Tau ta Ia Mase Neganai, Ena Lauma Ia Mauri Noho, A?

Baibel ena haere

Inai Heberu hereva ruʹach bona Grik hereva pneuʹma edia anina be “laga.” Edia anina ma haida be (1) lai, (2) tanobada ena mauri gaudia edia mauri siahuna, (3) taunimanima ena lalona amo ia mai lalohadai, unai ese ta ena hereva bona kara ia biagua, (4) ita itaia diba lasi lauma tauna amo idia mai hereva, (5) lauma taudia, bona (6) Dirava ena gaukara siahuna, eiava lauma helaga.​—Esodo 35:21; Salamo 104:29; Mataio 12:43; Luka 11:13.

• Iehova Dirava ese tau ginigunana, Adamu, ia havaraia neganai, Baibel ia gwau Dirava ese tau ena “udu baubau lalonai mauri ena laga ia hiriria vareai, bona unai tau be mauri tauna ai ia lao.” (Genese 2:7) Unai siri amo ita itaia, inai hereva laga anina be tau ta ena mauri siahuna, unai amo unai tau be ia mauri noho.

Taunimanima be mai edia mase diba lasi laumana, a?

Salamo 104:29 ia gwau: “Bema oi [Iehova] ese edia lagana [ruʹach] oi hadokoa neganai, idia be idia mase, bona kahu dekenai ma idia giroa lou.” Bona Luka 8:55 ia gwau: “Iena laumana [pneuʹma] ia giroa lou, kekeni be nega tamona ia toreisi.” Unai siri dekenai idia gaukaralaia hereva rua, ruʹach bona pneuʹma ese tauanina dekenai mauri ia henia gauna ia herevalaia. Bema tauanina dekenai unai gauna ia noho lasi, ia be mase gauna. Unai dainai, New World Translation Baibel ese inai hereva ruʹach idia hahanaia lauma, bona mauri siahuna. Hegeregere, Genese 7:22 ia gwau: “Tano ai idia mauri bona idia hahodi gaudia [ruˈach] ibounai idia mase.” (Genese 6:17; 7:15) Unai dainai, inai hereva rua, ruʹach bona pneuʹma ese mauri gaudia ibounai dekenai mauri ia henia gauna ia herevalaia.

Haheitalai

Reidio ia gaukara totona paua ia abia be namo. Unai hegeregerena, tauanina ia gaukara totona mauri siahuna [ruʹach eiava pneuʹma] ia abia be namo. Unai haheitalaia totona, reidio maragina ta mani oi laloa. Unai reidio dekenai bateri oi atoa bona oi kehoa neganai, bateri lalonai ia noho paua ese reidio ia hasiahua bena ia gaukara matamaia. To bema bateri be lasi, reidio be do ia gaukara lasi. Bona bema reidio ena varo be paua point amo oi kokia neganai, do ia gaukara lasi. Unai hegeregerena, tauanina ia gaukara noho totona, mauri siahuna ia abia be namo. Bona paua hegeregerena, unai lauma [ruʹach eiava pneuʹma] ese gau ta ia mamia lasi bona ia laloa diba lasi. Ia be siahu ta sibona. To, bema ita dekenai unai lauma, eiava mauri siahuna ia noho lasi, salamo torea tauna ia gwau bamona, iseda tauanina ia mase bona ‘kahu dekenai ma ita giroa lou.’

Hadibaia Tauna 12:7 ese tau ta ena mase be inai bamona ia gwauraia: “Kahu [tau ena tauanina] be tano dekenai ia giroa lou, guna ia noho gabuna unai, bona mauri siahuna [ruʹach] be Dirava momokanina dekenai ia giroa lou. Dirava ese taunimanima dekenai unai ia henia.” Lauma, eiava mauri siahuna ese tau ta ena tauanina ia rakatania neganai, unai tauanina be ia mase bona tano dekenai ia giroa lou. Unai hegeregerena, mauri siahuna be Dirava dekenai ia giroa lou. (Iobu 34:14, 15; Salamo 36:9) Unai ese ia hahedinaraia lasi mauri siahuna be guba dekenai ia lao. To, ia hahedinaraia tau ta ia mase neganai, Iehova Dirava sibona ese ia dekenai mauri ia henia lou diba. Iena mauri be Dirava ena imana dekenai ia noho. Dirava sibona be mai ena siahu unai tauna dekenai ena lauma eiava mauri siahuna ia henia lou, ia mauri lou totona.

Mase diba lasi lauma ena hahediba herevana be edena bamona ia matamaia?

Mase diba lasi laumana ena hahediba herevana be Baibel amo lasi, to ia be idaunegai Greek taudia edia lalohadai. Dirava ia ura lasi taunimanima edia lalohadai be ena hahediba herevadia ida idia hakapua. Baibel ia gwau: “Umui naria namonamo, namo lasi tau ta ese inai tanobada ena aonega bona anina lasi koikoi herevadia amo umui ia tarapua. Unai gaudia be taunimanima edia sene herevadia amo.”​—Kolose 2:8.