Dirava Ia Noho, A?

Baibel ena Haere

Oibe, Baibel lalonai hamomokania gaudia ese idia hahedinaraia Dirava ia noho. Unai ese iseda abidadama Dirava dekenai ia hagoadaia, namo lasi tomadiho oreadia ese idia gwauraia herevadia ita abia dae sibona, to namona be ita “laloa namonamo” bona “laloa kehoa” ita gaukaralaia. (Roma 12:1; 1 Ioane 5:20, futnout) Henunai, Baibel ena lalohadai unai badina idauidau dekenai mani oi itaia:

• Iunives be edia gabu korikori ai idia noho namo herea, unai ese ia hahedinaraia, Havaraia Tauna ia noho. Baibel ia gwau: “Momokani, ruma ibounai be mai edia karaia tauna, to gau ibounai ia karaia tauna be Dirava.” (Heberu 3:4) Unai hereva be auka lasi ita lalopararalaia totona, diba bada taudia ese idia abia dae danu.a

• Ita be taunimanima sibona, iseda ura badana be mauri ena anina bona ena badina ita lalopararalaia, unai ese ia hahedinaraia ita ura iseda mauri ia durua gaudia ita diba. Baibel ese unai bamona ura ia gwauraia, “Dirava dibaia totona idia hitolo taudia,” unai be Dirava dibaia bona tomadiho henia karana. (Mat. 5:3; Apok. 4:11) Dirava dibaia totona ita hitolo karana ese ia hahedinaraia Dirava ia noho, ia be lalokau Havaraia Tauna bona ia ura iseda mauri ia durua gaudia ita diba.​​—Mataio 4:4.

• Baibel ena peroveta herevadia be idaunegai idia torea bona idia perovetalaia hegeregerena ia vara. Hamomokania gaudia ese ia hahedinaraia taunimanima edia siahu ia hereaia tauna ese unai ia gwauraia.​​—2 Petero 1:​21.

• 

  Baibel idia torea taudia be mai edia diba saiens dekenai, edia nega ai idia noho taudia edia diba ia hereaia. Hegeregere, guna momo idia abia dae tanobada be elephant, boroma, eiava ox latanai ia noho. To, Baibel ia gwau, Dirava ese “tanobada be gau ta latanai ia atoa lasi.” (Iobu 26:7) Unai hegeregerena, Baibel ese tanobada ena toana ia gwauraia, “kuboruna,” eiava “circle.” (Isaia 40:22, New World Translation) Taunimanima momo idia gwau, unai bamona hereva be idaunegai Baibel idia torea taudia ese idia torea, idia torea hereva be Dirava amo idia abia.

• Baibel ese henanadai aukadia momo ia haerelaia, unai bamona henanadai edia haere idia abia lasi taudia, be atheism eiava Dirava ia noho lasi lalohadaina idia abia taudia ai idia lao. Hegeregere: Bema Dirava be lalokau bona siahu ibounai tauna, dahaka dainai tanobada ai hisihisi bona kara dika ia noho? Dahaka dainai nega momo tomadiho oreadia ese taunimanima idia durua lasi, to idia hakaua kerere?​​—Tito 1:16.