“Umui Gini Goada, Bona Do Umui Marere Lasi”

1-2. Edena dala ai Keristani tauna be ruma latana ta bamona? (1 Korinto 15:58)

LAGANI 1978 ai, Japan dekenai 60 stori rumana ta idia haginia. Taunimanima idia laloa unai siti dekenai tano mareremarere ia vara momo dainai, edena bamona unai ruma do ia gini noho. Ensinia taudia be dahaka idia karaia? Palani idia karaia ia be do ia gini goada to tano mareremarere lalonai do ia davea sisina bona ia moru lasi. Keristani taudia be unai ruma bamona. Edena dala ai?

² Keristani tauna be taravatu badinaia karana bona ena lalohadai ia haidaua karana dekenai lalohadai maorona ia abia be namo. Namona be mai ena lalona ibounai ida Iehova ena taravatu bona hakaua herevadia ia badinaia. (1 Korinto 15:58 duahia.) Ia be “hereva ia badinaia haraga” bona ia lalomanoka lasi. To danu, bema kara ta be Dirava ena taravatu ia utua lasi, “ia laloa maoromaoro” bona ena lalohadai ia haidaua diba. (Iam. 3:17) Unai bamona Keristani tauna be taravatu aukana do ia atoa lasi, bona do ia kara kava lasi. Inai atikol ai, gini goada daladia do ita stadilaia. Danu Satani ese iseda gini goada karana ia ura hadikaia daladia faiv do ita itaia, bona ita dadaraia daladia do ita herevalaia.

EDENA BAMONA ITA GINI GOADA?

3. Kara 15:28, 29 ai Iehova be dahaka taravatu ia henia?

³ Taravatu Henia Tauna Badana, Iehova, be hanaihanai ena taunimanima dekenai taravatu ia henia neganai ia hahedinaraia goevagoeva. (Isa. 33:22) Hegeregere aposetolo taudia edia negai, hakaua oreana be Keristani taudia ese do idia badinaia taravatu toi ia gwauraia hedinarai: (1) kaivakuku do idia tomadiho henia lasi, to Iehova sibona, (2) Iehova ena taravatu rara be helaga do idia badinaia, bona (3) Baibel ese ia taravatua matabodaga karadia do idia dadaraia. (Kara 15:28, 29 duahia.) Edena dala ai inai nega Keristani taudia ese unai taravatu toi idia badinaia diba?

4. Edena dala ai Iehova sibona ita tomadiho henia? (Apokalupo 4:11)

⁴ Kaivakuku ita tomadiho henia lasi, to Iehova sibona. Iehova ese Israela taudia ia oda henia ia sibona do idia tomadiho henia. (Deu. 5:6-10) Diabolo ese Iesu ia dibagania neganai, Iesu ia gwau Iehova sibona ita tomadiho henia be namo. (Mat. 4:8-10) Unai dainai, ita be kaivakuku ita tomadiho henia lasi. Ma danu, taunimanima ita tomadiho henia lasi, herevana idia be tomadiho gunalaia taudia, politikol taudia, sports taudia, muvi actor eiava ane abia taudia. Iehova ena kahanai ita gini bona ‘gau ibounai ia havaraia’ Diravana sibona ita tomadiho henia.​—Apokalupo 4:11 duahia.

5. Dahaka dainai Iehova ena taravatu mauri bona rara dekenai ita badinaia?

⁵ Iehova ena taravatu mauri bona rara dekenai badinaia. Dahaka dainai? Badina rara ese mauri ia laulaulaia, bona mauri be Iehova ese ia henia harihari gauna. (Lev. 17:14) Guna, Iehova ese taunimanima dekenai gwaumaoro ia henia animal ena hidio do idia ania neganai, ia hamaorodia rara do idia ania lasi. (Gen. 9:4) Mose ena Taravatu be Israela taudia dekenai ia henia neganai, unai oda herevana ia gwauraia lou. (Lev. 17:10) Bona aposetolo taudia edia negai, hakaua oreana ia oda henia Keristani taudia ibounai do idia hadibaia ‘rara . . . do idia dadaraia noho.’ (Kara 15:28, 29) Medikol heduru ita abia hidi gwauraia neganai, unai oda herevana ita badinaia.b

6. Iehova ese ia taravatua matabodaga karadia ita dadaraia totona dahaka do ita karaia?

⁶ Iehova ese ia taravatua matabodaga karadia dadaraia. (Heb. 13:4) Aposetolo Paulo be laulau dalanai ita ia sisiba henia iseda tauanina ena kahana idauidau ita “hamasea” totona. Anina be do ita gaukara goada iseda tauanina ena ura dikadia ita dadaraia totona. Namo lasi ita karaia karana ta o itaia gauna ta ese eda lalona ia veria matabodaga karana ita karaia totona. (Kol. 3:5; Iobu 31:1) To, hedibagani ita davaria neganai, iseda hetura karana Dirava ida do ia hadikaia lalohadaina eiava karana ita dadaraia be gau badana.

7. Iseda lalona ita hadaia dahaka do ita karaia bona dahaka dainai?

⁷ Iehova ia ura “mai kudouna ibounai ida” ia do ita badinaia. (Roma 6:17) Iena hakaua dalana be iseda namo totona, bona iena taravatu ita haidaua diba lasi. (Isa. 48:17, 18; 1 Kor. 6:9, 10) Namona be ita gaukara goada Iehova ita hamoalea bona salamo torea tauna ena kara ita tohotohoa, ia gwau: “Lau ese egu lalona lau hadaia, emu hakaua hereva lau badinaia totona, nega ibounai ela bona hanaihanai.” (Sal. 119:112) To, Satani ia ura ita ia hamorua. Edena dala ai?

EDENA DALA AI SATANI IA URA ITA IA HAMORUA?

8. Edena dala ai Satani ese dagedage ia gaukaralaia iseda gini goada karana ia hadikaia totona?

⁸ Dagedage. Diabolo ese dagedage bona hahetoho idauidau ia gaukaralaia iseda gini goada karana ia hadikaia totona. Ena tahua gauna be ita do ia “ania ore,” unai ena anina be ia ura iseda hetura karana Iehova ida ia hadikaia. (1 Pet. 5:8) Aposetolo taudia edia negai, Keristani taudia edia gini goada karana idia hadikaia totona, idia hagaridia, dadabadia, bona hamasedia. (Kara 5:27, 28, 40; 7:54-60) Satani be dagedage karana ia do gaukaralaia noho. Unai be momokani badina Russia bona tano ma haida edia gavamani ese iseda tadikaka taihu idia dagedage henidia bada noho. Danu, tadikaka taihu momo be dala idauidau amo haida ese idia inai henidia noho.

9. Hehuni dalana idia vara hahetoho ena haheitalai ta oi herevalaia.

⁹ Hehuni dalanai idia vara hahetoho. Satani ese dagedage karana sibona ia gaukaralaia lasi, to “koikoi karadia” danu. (Efe. 6:11) Mani tadikaka Robert ena haheitalai ita laloa, ia be opereisen badana ta totona hospital dekenai ia noho. Doketa taudia ia hamaoroa rara abia hanai karana do ia dadaraia. Doketa tauna be ena abia hidi ia matauraia. To, opereisen ia do abia lasi neganai, ena famili idia lao murinai, hanuaboi ai doketa ma ta be Robert ia vadivadi henia. Unai doketa ese Robert ia hamaoroa, doketa taudia ese rara do idia henia lasi, to idia atoa hegaegae sibona. Ia laloa Robert be sibona ia noho dainai, reana ena lalona do ia haidaua. To Robert ia gini goada bona ia gwau, herevana dahaka ia vara, rara do idia henia lasi.

10. Dahaka dainai taunimanima edia lalohadai ita abia dae be tarapu ta bamona? (1 Korinto 3:19, 20)

¹⁰ Taunimanima edia lalohadai. Bema Iehova ena taravatu idia dadaraia taudia edia lalohadai ita badinaia, Iehova ena taravatu ita dadaraia diba. (1 Korinto 3:19, 20 duahia.) “Tanobada ena aonega” ese taunimanima edia lalona ia veria Dirava idia gwau-edeede henia totona. Keristani taudia haida be Peregamo bona Tuatira siti taudia edia matabodaga bona kaivakuku tomadiho henia karana idia karaia. Iesu ese unai matabodaga karadia idia abia dae kongrigeisen rua dekenai sisiba aukana ia siaia. (Apok. 2:14, 20) Hari, taunimanima ese ita do idia doria lalohadai kereredia ita abia dae totona. Famili bona turadia do idia gwau ita be Dirava ena taravatu ita badinaia auka, bona iseda lalonai do idia veria unai taravatu ita utua totona. Hegeregere, do idia gwau matabodaga karadia ita karaia be kerere lasi, bona Baibel ena taravatu be hereva gunana.

11. Ita gini goada totona dahaka ita dadaraia be namo?

¹¹ Nega haida ita laloa Iehova ese ia henia hakaua herevadia be idia hedinarai namonamo lasi. Reana ita ura sibona iseda lalohadai ita badinaia, to “Toretore Helagadia lalonai idia torea gaudia” ita dadaraia. (1 Kor. 4:6) Iesu ena nega ai idia noho tomadiho gunalaia taudia be unai kerere idia karaia. Mose ena Taravatu dekenai sibodia edia lalohadai idia atoa kau dainai, taunimanima ese idia badinaia be auka. (Mat. 23:4) Iehova ese ena Hereva bona orea amo ita dekenai hakaua hereva namodia ia henia. Ita be maoro lasi ia henia hakaua herevadia dekenai sibona iseda lalohadai ita atoa kau. (Aon. 3:5-7) Unai dainai, gau badana be Baibel lalonai idia torea gaudia sibona ita badinaia, bona tadikaka taihu sibodia ese do idia karaia abia hidi gaudia dekenai taravatu ita atoa lasi.

12. Edena dala ai Satani ese “anina lasi koikoi herevadia” ia gaukaralaia?

¹² Koikoi herevadia. Satani ese “anina lasi koikoi herevadia” bona “tanobada ena lalohadai badadia” ia gaukaralaia taunimanima ia hakaua kerere bona hapararaia totona. (Kol. 2:8) Aposetolo taudia edia negai, unai be taunimanima edia lalohadai herevadia, Iuda tomadiho ena hahediba hereva koikoidia, bona Keristani taudia ese Mose ena Taravatu idia badinaia be maoro ena hahediba herevana. Unai be koikoi herevadia badina taunimanima be aonega ena Badina, Iehova amo idia hakaudia siri. Hari, Satani ese media bona intanet ia gaukaralaia unai amo politikol taudia ese sivarai koikoidia idia halasia. COVID-19 gorerena lalonai unai bamona koikoi sivaraidia momo ita kamonai.c Iehova ena Witnes taudia be orea ese ia halasia hakaua herevana idia badinaia dainai, unai koikoi herevadia idia kamonai taudia ese idia abia lalohekwarahi idia dadaraia.​—Mat. 24:45.

13. Dahaka dainai lalona veria gaudia dekenai do ita naria namonamo?

¹³ Lalona veria gaudia. Namona be “mai anina bada gaudia” ita laloa bada. (Fili. 1:9, 10) Lalona veria gaudia dekenai iseda nega bona goada ita haorea neganai, mai anina bada gaudia do ita karaia lasi. Bema aniani, inuinu, moale karadia bona moni gaukara be iseda mauri lalonai ita atoa guna, iseda lalona idia veria diba. (Luka 21:34, 35) Danu, nega ibounai nius ai protest karadia bona politikol oreadia edia hepapahuahu sivaraidia momo ita itaia. Ita ura lasi unai gaudia ese iseda lalona idia veria, bena ta ita durua bona ma ta ita inai henia. Unai gaudia be Satani ese ia gaukaralaia kara maoromaoro ita badinaia karana ia hadikaia totona. Mani Satani ita dadaraia bona ita gini goada daladia ita herevalaia.

EDENA BAMONA ITA GINI GOADA DIBA?

14. Dahaka ese ita do ia durua Iehova ena kahanai ita gini goada totona?

¹⁴ Emu gwauhamata bona bapatiso oi laloa. Unai oi karaia badina oi ura Iehova ena kahanai oi gini. Mani oi laloatao dahaka ese oi ia durua bena oi abia dae hereva momokani oi davaria vadaeni. Oi ese Iehova oi diba namonamo bona emu guba Tamana bamona oi matauraia bona lalokau henia. Emu abidadama ia goada bona oi helalo-kerehai. Iehova ia inai henia karadia oi rakatania bona ia hamoalea karadia oi karaia. Oi moale badina oi laloparara Dirava be emu dika ia gwauatao. (Sal. 32:1, 2) Keristani hebou dekenai oi lao bona oi dibaia gaudia be ma haida dekenai oi harorolaia. Hari Dirava dekenai oi gwauhamata bona oi bapatiso vadaeni, bona mauri dalana oi badinaia noho.​—Mat 7:13, 14.

15. Dahaka dainai stadi bona laloa dobu karana be mai anina bada?

¹⁵ Dirava ena Hereva oi stadilaia bona laloa dobu. Au ena ramuna be tano lalonai ia diho momokani neganai ia gini goada, unai hegeregerena bema Dirava ena Hereva ita abidadama henia momokani, do ita gini goada. Au ia tubu neganai, ena ramuna be tano lalonai ia diho bona gabu ibounai dekenai ia lao. Baibel ita stadilaia bona laloa dobu neganai, iseda abidadama ita hagoadaia bona ita abia dae Dirava ena dala be hereadae. (Kol. 2:6, 7) Mani idaunegai Iehova ese ena hesiai taudia ia hadibaia, ia hakaua bona naria dala oi laloa. Hegeregere, matahanai lalonai aneru be dubu ia hahetohoa neganai, Esekiela ese ia raraia namonamo. Unai ese Esekiela ia hagoadaia, bona ita dekenai tomadiho momokanina totona Iehova ena taravatu badinaia daladia ia hahedinaraia.d (Ese. 40:1-4; 43:10-12) Ita danu be Dirava ena Hereva ena dobu gaudia ita stadilaia bona laloa dobu neganai, namo do ita abia.

16. Dahaka ese tadikaka Robert ia durua? (Salamo 112:7)

¹⁶ Emu lalona oi hagoadaia. King Davida ia hahedinaraia ena lalokau Iehova totona be do ia ore lasi. Ane amo ia gwau: “Dirava e, egu kudouna [eiava, lalona] ia goada.” (Sal. 57:7) Ita danu be mai iseda lalona ibounai ida Iehova ita abidadama henia diba. (Salamo 112:7 duahia.) Unai ese tadikaka Robert ia durua dalana mani ita herevalaia. Doketa ese ia hamaoroa rara ia atoa hegaegae neganai, ia gwau bema idia ura rara idia henia, karaharaga hospital do ia rakatania. Gabeai, ia gwau: “Lau daradara lasi.”

17. Robert ena sivarai amo dahaka ita dibaia? (Laulau itaia danu.)

¹⁷ Robert be hospital ia do lao lasi neganai, rara ia dadaraia totona abia hidi ia karaia. Gau ginigunana be ia ura Iehova do ia hamoalea. Gau iharuana be Baibel bona iseda pablikeisen ese mauri bona rara idia herevalaia dalana ia stadilaia namonamo. Bona gau ihatoina be ia abia dae Iehova ena taravatu badinaia karana ese hahenamo do ia mailaia. Oibe, herevana dahaka hekwakwanai ita davaria, ita gini goada diba.

18. Edena dala ai Baraki ena haheitalai ese ita ia durua? (Rau 1 ena laulau itaia.)

¹⁸ Iehova oi abidadama henia. Mani Baraki ese Iehova ena hakaua herevana ia badinaia bona ia kwalimu sivaraina ita laloa. Ena be Israela taudia be tuari kohudia lasi, to Iehova ese Baraki ia hamaoroa Kanana ena tuari biaguna Sisera, bona ena tuari oreana mai edia tuari kohudia momo do ia tuari henia. (Hah. 5:8) Peroveta hahinena Debora ese Baraki ia hamaoroa ororo amo tano palakana dekenai do idia diho lao, Sisera mai ena kariota 900 idia tuari henia totona. Tano palakana ai Israela taudia be do idia hegeregere lasi unai tuari taudia mai edia kariota idia tuari henia totona. Baraki be unai ia diba, to Debora ena hereva ia badinaia sibona. Baraki mai ena tuari taudia be Taboro Ororona amo idia diho lao neganai, Iehova ese medu badana ia siaia. Sisera ena kariota be kopukopu lalonai idia hepuni, bona Iehova ese Baraki dekenai kwalimu ia henia. (Hah. 4:1-7, 10, 13-16) Unai hegeregerena, Iehova ese ita dekenai kwalimu do ia henia, bema ita abidadama henia bona ena orea amo ita abia hakaua herevadia ita badinaia.​—Deu. 31:6.

LALONA ITA HADAIA DO ITA GINI GOADA NOHO

19. Dahaka dainai oi ura oi gini goada noho?

¹⁹ Inai nega oromana ai, ita gini goada totona do ita hekwarahi noho. (1 Tim. 6:11, 12; 2 Pet. 3:17) Dagedage, hehuni dalanai idia vara hahetoho, taunimanima edia lalohadai, koikoi herevadia, bona lalona veria gaudia idia vara neganai, ita gini goada be namo. (Efe. 4:14) To, Iehova tomadiho henia karana dekenai do ita gini goada bona ena oda herevadia do ita badinaia. Danu, ita laloa maoromaoro be namo. Atikol 32 ai, Iehova bona Iesu edia laloa maoromaoro karana do ita herevalaia.