Dekena Tauna ida Herevahereva​—Kara Namo Taudia Ibounai be Guba Idia Lao, A?

IEHOVA ENA WITNES TAUDIA idia moale edia neiba ida Baibel idia herevalaia totona. Oi ese Baibel ena hereva ta oi laloa momo, a? Eiava Iehova ena Witnes taudia idia abia dae gaudia o edia tomadiho karadia oi ura diba, a? Bema oibe, vadaeni Iehova ena Witnes tauna ta oi davaria neganai, ia dekenai oi ura dibaia gauna oi gwauraia be namo. Ia be mai moale ida oi do ia durua.

Henunai do oi itaia, Iehova ena Witnes tauna ta be ena dekena tauna ida idia herevahereva. Witnes tauna ladana Marcus be Robert ena ruma dekenai ia lao bona idia herevahereva.

Guba Idia Lao Taudia be Dahaka Do Idia Karaia?

Marcus: Oi laloa vaira negana ai, gau ibounai do idia namo o do idia dika, eiava do idia idau lasi?

Robert: Lau laloa gau ibounai do idia namo. Bona lau be lau naria noho guba do lau lao bona Lohiabada ida do lau noho.

Marcus: Unai be helaro namona. Baibel ese guba ena toana bona guba do idia lao taudia edia gaukara ia herevalaia momo. Oi laloa guba idia lao taudia be dahaka do idia karaia?

Robert: Dirava ida do ai noho bona ia do ai hanamoa hanaihanai.

Marcus: Momo idia ura unai bamona idia karaia. Baibel ese guba do idia lao taudia edia hahenamo ia herevalaia sibona lasi, to do idia karaia mai anina bada gaukarana ia herevalaia danu.

Robert: Dahaka gaukara do idia karaia?

Marcus: Apokalupo 5:10 ese unai ia herevalaia. Ia gwau: “Oi [Iesu] ese idia be iseda Dirava ena king bona hahelaga taudia ai oi halaoa, bona idia be tanobada do idia lohiaia.” Oi itaia, guba idia lao taudia be dahaka gaukara do idia karaia?

Robert: Siri ia gwau, idia be king taudia ai do idia lao bona tanobada do idia lohiaia.

Marcus: Unai be point namona, ani?

Daidia Do Idia Lohiaia?

Marcus: Bema guba idia lao taudia be king taudia ai do idia lao, anina be idia ese haida do idia lohiaia. Mani oi laloa, bema gavamani ta ia noho to do ia lohiaia taudia be lasi, vadaeni, unai gavamani be anina lasi, ani?

Robert: Unai be momokani.

Marcus: Unai dainai, henanadai ma ta be, daidia do idia lohiaia?

Robert: Reana tanobada ai idia noho bona idia do mase lasi taudia do ai lohiaia.

Marcus: Reana emu hereva be maoro, bema kara namo taudia ibounai be guba idia lao. To, oi laloa kara namo taudia ma haida be guba do idia lao lasi, a?

Robert: Nega ta lau do kamonai lasi, Keristani tauna ta be unai ia abia dae.

Marcus: Unai henanadai lau gwauraia badina Salamo 37:29 ena hereva lau laloa. Ia namo unai siri oi duahia?

Robert: Namo. Ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.”

Marcus: Tanikiu. Inai siri ai oi itaia, kara maoromaoro taudia be edeseni do idia noho?

Robert: Siri ia gwau idia be tanobada ai do idia noho.

Marcus: Maoro. Bona ia gwau nega sisina sibona lasi, to “do idia noho ela bona hanaihanai.”

Robert: Reana unai ena anina be tanobada ai kara namo taudia be hanaihanai do idia noho. Bema ita mase bona guba ita lao, gabeai idia vara kara namo taudia ma haida ese iseda gabu do idia abia.

Marcus: Unai siri dekenai reana momo be unai bamona idia laloa. To, reana unai siri be gau ma ta ia herevalaia, ani? Oi laloa unai siri be kara namo taudia tanobada ai do idia noho hanaihanai karana ia herevalaia, a?

Robert: Lau daradara.

Do Ia Vara Tanobada Paradaisona

Marcus: Vaira negana ai taunimanima ese tanobada ai do idia abia maurina, be Baibel ena siri ma ta ese ia herevalaia. Mani Apokalupo 21:4 ita duahia, ia gwau: “Ia [Dirava] ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.” Unai be gwauhamata hereadaena, ani?

Robert: Oibe. To lau laloa unai siri ese guba ai taunimanima do idia abia maurina ia herevalaia.

Marcus: Momokani, guba do idia lao taudia be unai bamona hahenamo do idia abia. To unai siri mani oi itaia lou. Ia gwau mase dekenai dahaka do ia vara?

Robert: Ia gwau “mase be do ia ore.”

Marcus: Maoro. Reana inai hereva do oi abia dae, bema gau ta do ia ore, anina be unai gauna be guna ia noho.

Robert: Oibe.

Marcus: To guba dekenai mase be lasi, ani? Tanobada sibona dekenai taunimanima idia mase.

Robert: Unai do lau lalohadailaia.

Marcus: Robert, reana oi itaia Baibel ia gwau kara namo taudia haida be guba do idia lao, to kara namo taudia momo be tanobada ai do idia noho hanaihanai. Momokani, lau diba oi be inai hereva oi kamonai: “Manau taudia be idia moale, badina idia ese tanobada do idia abia.”​—Mataio 5:5.

Robert: Oibe, nega momo unai siri be dubu dekenai idia duahia.

Marcus: Bema manau taudia ese tanobada do idia abia, anina be taunimanima be tanobada ai do idia noho, ani? Apokalupo ese ia herevalaia hahenamodia be tanobada ai idia noho taudia ese do idia moalelaia. Taunimanima edia mauri ia idau karana do idia itaia, badina Dirava ese dika ibounai​—mase danu​—be inai tanobada amo do ia kokia vaitani.

Robert: Emu hereva ena anina lau lalopararalaia. To lau laloa siri tamona o rua be hegeregere lasi oi gwauraia gaudia hamomokania totona.

Marcus: Unai be momokani. Nega vaira ai, tanobada dekenai taunimanima ese do idia moalelaia maurina be siri momo ese ia herevalaia. Bema oi dekenai miniti haida idia noho, lau ura henia sirina ta do lau hahedinaraia.

Robert: Oibe, miniti haida idia do noho.

“Kara Dika Taudia Do Idia Ore”

Marcus: Matamanai ita ese Salamo 37 bona siri 29 ita duahia. Mani unai karoa ita itaia lou. Hari siri 10 bona 11 do ita duahia. Ia namo unai siri ruaosi oi duahia?

Robert: Ia namo. Siri ia gwau: “Nega daudau lasi lalonai kara dika taudia do idia ore. Edia gabu do umui tahua, to do umui davaria lasi. To manau taudia ese noho gabuna tano do idia abia, do idia helai namonamo, mai moale bona mai maino danu.”

Marcus: Tanikiu. Siri 11 ai ia gwau “manau taudia” o kara namo taudia be edeseniai do idia noho?

Robert: Ia gwau, idia ese “tano do idia abia.” To, lau laloa unai siri be hari taunimanima edia noho ia herevalaia, badina hari kara namo taudia be tanobada ai idia noho.

Marcus: Unai be momokani. To, oi itaia siri ia gwau kara namo taudia be “mai maino danu” do idia noho. Oi laloa hari inai negai tanobada dekenai maino ia noho, a?

Robert: Lasi.

Marcus: Vadaeni edena dala ai unai gwauhamata be do ia guguru? Reana inai haheitalai do lau gwauraia: Oi ese ruma badana ta mai ena daiutu momo (o apartment) oi biagua. Unai ruma idia rentaia taudia haida be taunimanima namodia, edia daiutu idia naria namonamo bona edia neiba idia matauraia. Oi moale unai bamona taudia ese emu ruma idia rentaia, ani? To ruma idia rentaia taudia haida be edia daiutu idia hadikaia bona edia neiba idia matauraia lasi. Bema unai taudia be edia kara idia haidaua lasi, dahaka do oi karaia?

Robert: Do lau kokidia.

Marcus: Kara dika taudia dekenai Dirava be unai bamona do ia karaia. Siri 10 oi itaia lou. Ia gwau: “Kara dika taudia do idia ore.” Eiava, Dirava ese ma haida idia matauraia lasi taudia do ia “kokidia.” Bena kara namo taudia be tanobada ai do idia noho mai maino danu. Lau diba inai lalohadai, kara namo taudia be tanobada ai do idia noho hanaihanai, be reana guna oi dibaia gaudia amo ia idau.

Robert: Oibe, unai lalohadai be nega ta egu dubu dekenai lau kamonai lasi.

Marcus: Bona matamanai oi hereva bamona, siri tamona o rua ita duahia be hegeregere lasi. Namona be Baibel ena hereva ibounai ita stadilaia namonamo, unai amo kara namo taudia dekenai do idia vara gaudia ita dibaia totona. To, ita duahia vadaeni siridia hegeregerena, oi laloa kara namo taudia haida be guba dekenai do idia lao, to kara namo taudia momo be tanobada ai do idia noho hanaihanai, a?

Robert: Lau daradara. To hari oi duahia siridia amo lau diba unai bamona do ia vara. Oi herevalaia gaudia do lau lalohadailaia.

Marcus: Unai gaudia oi lalohadailaia neganai, reana henanadai ma haida do oi laloa danu. Hegeregere, guna idia noho kara namo taudia be edena bamona? Idia be guba idia lao, a? Bema lasi, hari idia be edeseni?

Robert: Unai be henanadai namodia.

Marcus: Reana oi durua totona gau rua lau karaia diba. Namba 1, ita herevalaia gaudia edia siri ma haida do lau torea.a Namba 2, lau ura do lau giroa mai bona unai siri do ita herevalaia, unai dainai namona be unai siri oi duahia bona lalohadailaidia. Ia namo?

Robert: Unai be namo. Tanikiu.

[Futnout]