Inai Oi Diba, A?
Idaunegai, ta ese ma ta ena uma ai ava dikadia ia hadoa diba, a?
Lohia Tauna, Justinian, ese lagani 1468 ai ia torea bukana Digest ese idaunegai idia karaia kota momo ia sivarailaia
MATAIO 13:24-26 ai, Iesu ia gwau: “Guba Basileia be tau ta bamona, ena uma dekenai uhe namodia ia hadoa. Taunimanima idia mahuta lalonai, ena inai tauna ia mai bona witi huanai ava dikadia ia hadoa, bena ia lao. Witi ia tubu bona huahua ia atoa neganai, ava dikadia danu idia hedinarai.” Toretore taudia ma haida idia henanadai bema inai parabole ese ia herevalaia gauna be ia vara momokani karana ta, bona idaunegai Roma toretoredia haida ese unai idia hamomokania.
Baibel diksenari ta ia gwau: “Roma ena taravatu henunai, bema ta be dika davana haloua totona, ma ta ena uma ai ava dikadia ia hadoa, unai be kerere. Unai taravatu ia noho dainai, unai kara be ia vara momo lasi.” Taravatu ia diba momo tauna, Alastair Kerr, ia gwau, lagani 533 C.E. ai, Roma ena Lohia Tauna, Justinian, ese iena buka ladana Digest ia halasia. Unai buka ai Roma ena taravatu bona taravatu torea taudia ese lagani 100-250 C.E. bamona ai idia torea taravatu idia noho. Unai buka (Digest, 9.2.27.14) ese ia hahedinaraia, taravatu torea tauna, Ulpian, be Roma ena ofesa, Celsus, ese ia karaia kota ia herevalaia. Tau ta ese ma ta ena uma ai ava dikadia idia hadoa bona unai ese iena witi idia hadikaia. Digest bukana ia gwau, taravatu hegeregerena uma biaguna ese kerere tauna amo davana ia abia diba.
Idaunegai, Roma Basileia henunai unai kara kererena ia vara dainai, ita diba Iesu ese ena parabole ai ia vara momokani gauna ia herevalaia.
Aposetolo edia negai, Roma ese Iuda ena kota biagudia dekenai dahaka maoro ia henia?
APOSETOLO edia negai, Iudea be Roma taudia ese idia lohiaia, idia be mai edia gavana bona ia be mai ena tuari oreadia. Iena ura badana be Roma totona takisi do ia gogoa bona maino bona lalotamona do ia havaraia. Roma gavamani ia ura taravatu utua karana ia koua, unai dainai kerere idia havaraia taudia ia panisia. To, Roma gavamani ese dina ta ta ena gaukara idauidau be hanua idia naria taudia edia imana dekenai ia rakatania.
Iuda taudia edia Sanhedrin
Sanhedrin be Iuda taudia edia kota badana bona idia ese Iuda ena taravatu hegeregerena hahemaoro idia karaia. Iudea ena gabu ta ta ai kota maragidia idia noho danu. Roma gavamani ese reana unai kota idauidau dekenai maoro ia henia unai tano ai idia vara hekwakwanai eiava taravatu utua taudia idia hahemaoro henia totona. To, idia be maoro lasi taravatu utua taudia idia hamasea totona. Roma gavamani sibona be mai ena maoro unai ia karaia totona. To, inai nega sibona ai, Sanhedrin taudia ese Stefano be nadi amo idia hodoa mase.—Kara 6:8-15; 7:54-60.
Iuda taudia edia Sanhedrin be mai edia siahu hahemaoro idia karaia totona. To, diba bada tauna ta ladana, Emil Schürer, ia gwau: “To bema Roma gavamani ia kamonai ta be gavamani ena taravatu ia gwauraia dika, ia sibona ese hahemaoro ia karaia.” Haheitalai ta be tuari biaguna, Klaudio Lusia, ena nega ai ia vara, ia ese aposetolo Paulo, Roma tauna unai, ia hadiburaia.—Kara 23:26-30.