Oi Roha Lao Idia Hedinarai Gaudia Edia Murina Oi Raraia!
MATA namodia be hahenamo ta. Bema taunimanima oi nanadaidia, kahirakahira iboudiai do idia gwau idia dekenai idia noho gaudia haida mo ese unai idia hereaia. To aposetolo Paulo ese itaia karana ta ia gwauraia, ia be mai anina bada Keristani taudia dekenai, bona iena namo ese mata korikoridia namodia edia namo ia hereaia. Paulo ia gwau: “Matana dekenai ita itaia gaudia be do ita laloa lasi, to matana dekenai ita itaia lasi gaudia do ita laloa.” (2 Korinto 4:18) Itaia karana idau hereana ta amo, ta ese ia itaia diba lasi gaudia ia raraia diba! Gauna be lauma dalanai itaia karana hereadaena.
Dahaka Dainai Unai Ita Abia be Namo?
Aposetolo edia negai idia noho Keristani taudia ese lauma dalanai itaia siahuna idia abia be gau badana. Edia Keristani hesiai gaukarana idia karaia mai edia hekwarahi bada ida. Paulo be inai bamona ia gwauraia: “Kahana ibounai dekena amo, hisihisi bona metau ai dekenai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi. Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.”—2 Korinto 4:8, 9.
Ena be hahediba taudia mai edia kamonai edia noho be unai bamona, to idia gini auka. Dirava idia abidadama henia goadagoada dainai, Paulo ia hereva bamona idia hereva diba; ia gwau: “Unai dainai ai be hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho.” To dahaka ese edia goada be dina iboudiai ia hamatamataia lou? Paulo be ma ia gwau: “Badina be hari ai abia noho hisihisi be metau lasi gaudia, bona do idia noho nega daudau lasi. Oibe, inai hisihisi maragi idia ore murinai, Dirava ese ai do ia hanamoa bada herea momokani guba dekenai, ela bona hanaihanai. Unai dainai matana dekenai ita itaia gaudia be do ita laloa lasi, to matana dekenai ita itaia lasi gaudia do ita laloa. Matana dekenai ita itaia gaudia be idia noho nega daudau lasi, to matana dekenai ita itaia lasi gaudia be nega hanaihanai do idia noho.”—2 Korinto 4:16-18.
Paulo ese ena lauma tadikakadia ia hagoadaia, idia vairanai ia noho davana hereadaena do idia laloaboio lasi, herevana hekwakwanai, lalo-hekwarahi, dagedage—hisihisi idauidau—idia davaria. Namona be edia noho unai nega lalonai idia laloa momo lasi, to edia Keristani dalana dainai do idia abia maurina namona idia raraia noho be namo. Unai ese ia durudia, edia lalona be dina iboudiai idia hadaia lou do idia goada karaia. Keristani taudia hari inai negai danu ese lauma dalanai itaia namonamo siahuna unai bamona idia abia be namo.
Hari Idia Vara Hisihisidia be Nega Daudau Lasi Gaudia Bamona Oi Laloa!
Dina ta ta iboudiai gau haida ita itaia, ita ura lasi do ita itaia gaudia unai. Hevarivari ai iseda vairana ena toana ita itaia neganai, ita ura lasi gaudia, toto bona toutou, ita itaia; idia hahedinaraia iseda tauanina idia goevadae lasi. Dirava ena Hereva be hevarivari bamona; ita itaia namonamo neganai, siboda eda toto bona toutou lauma dalanai be ita itaia diba, bona ma haida edia danu. (Iamesi 1:22-25) Bona dina iboudiai niuspepa eiava TV ita itaia neganai, kara gagevagageva, dagedage, bona hisihisi sivaraidia ese iseda lalona idia hahisia.
Satani ia ura ita itaia gaudia dainai iseda lalona do ia hametaua, eiava unai gau ese iseda lalona do idia veria bena iseda abidadama do ia manoka ia lao. Unai do ia vara dalana be edena bamona ita koua diba? Aposetolo Petero ia gwau namona be Iesu Keriso ena kara ita tohotohoa, ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.” (1 Petero 2:21) Iesu ese Keristani taudia edia mauri dalana maorona ibounai ia hahedinaraia goevagoeva.
Petero ese Iesu ena kara toana ia gwauraia neganai, ia gwau hisihisi ia ania. Momokani, Iesu be tanobada ai ia noho neganai hisihisi bada ia ania. Ia be Iehova ena “gaukara karaia tauna” dainai, taunimanima idia karaia neganai ia noho, unai dainai ia diba goevagoeva Dirava ena palani be taunimanima do idia goevadae. (Aonega Herevadia 8:30, 31) To tanobada ai ia noho neganai, kara dika bona goevadae lasi maurina ese idia hadikadia dalana be ia itaia. Dina ta ta iboudiai taunimanima edia kerere bona edia manoka ia itaia bona ia laloa. Momokani unai ese ena lalona ia hahekwarahia.—Mataio 9:36; Mareko 6:34.
Iesu ese taunimanima edia hisihisi ia itaia, bona ia danu ese hisihisi ia ania. (Heberu 5:7, 8) To ia be lauma dalanai ia itaia goevagoeva diba dainai, unai hisihisi ia laloa lasi, to do ia abia davana namona ia raraia. Ia diba kara maoromaoro ia badinaia dainai Dirava ese do ia abia isi bona doko diba lasi maurina do ia henia. Ia be Mesia Pavapavana ai do ia lao, bena hisi-ani taudia be edia noho dikana amo do ia abia isi, bena mauri goevadaena, matamana ai Iehova ese ia palania maurina, do idia abia. Ena be dina ta ta iboudiai hisihisi idauidau ia itaia, to nega vairai do ia abia gaudia, ena matana amo ia itaia diba lasi gaudia, ia raraia. Unai ese ia durua, Dirava ena hesiai lao henia karana ai do ia moale noho. Gabeai Paulo ia gwau: “Iesu be satauro dainai ia hesiku lasi. Lasi momokani. Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.”—Heberu 12:2.
Ena be Iesu ese hekwarahi bona lalo-hekwarahi ia davaria, to idia dainai ena darana ia doko lasi, o ena lalona idia veria diba lasi, o ena abidadama idia hamanokaia diba lasi. Ita be iena hahediba taudia dainai, namona be iena haheitalai hereadaena ita tohotohoa namonamo.—Mataio 16:24.
Ita Itaia Diba Lasi Noho Hanaihanai Gaudia Oi Raraia!
Iesu do ia haheauka totona ia durua gauna be Paulo ese ia herevalaia lalonai, do ita heaulaia dalana ia herevalaia danu, ia gwau: “Iseda vairana dekenai ia noho heau helulu, be mai haheauka danu do ita heau goada. Iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua, ela bona dokona.” (Heberu 12:1, 2) Oibe, Keristani dalana do ita heaulaia mai kwalimu bona mai moale ida totona, namona be ita roha lao, idia hedinarai gaudia edia murina ita raraia. To “iseda matana be Iesu dekenai do ita negea lao” dalana be dahaka, bona unai ese ita be edena bamona do ia durua?
Haheitalai ta be inai: Lagani 1914 ai, Iesu be Dirava ena Basileia Pavapavana ai ia lao, bona guba amo ia lohia. Momokani, unai ibounai be iseda matana korikoridia amo ita itaia diba lasi. To, bema “iseda matana be Iesu dekenai do ita negea lao,” lauma dalanai itaia karana ese ita ia durua, do ita lalo-parara ia noho hegaegae, hari tanobada oromana dikana do ia hadikaia ore bona Satani bona ena lauma dikadia hutuma do ia guidia. Bema ita roha lao, lauma dalanai ita itaia diba karana amo tanobada matamatana namona ena toana do ita itaia diba. Unuseniai “mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”—Apokalupo 19:11-16; 20:1-3; 21:4.
Vadaeni, noho daudau lasi hisihisidia, reana dina ta ta iboudiai ita davaria gaudia, ese iseda lalona idia hametaudia be namo lasi, to do idia noho ela bona hanaihanai gaudia ita raraia noho be namo, ani? Namona be inai tanobada mirona ena gorere bona ena mataganigani do ita laloa momo lasi, to abidadama ena matana amo ita ese paradaiso, moale taudia goadadia mai edia lalokau ese do idia hahonua gabuna, do ita raraia be namo, ani? Namona be iseda toutou bona kerere, tauanina bona lauma gaudia, do ita laloa momo lasi, to Keriso ese ena boubou amo ita do ia hanamoa lou ela bona hanaihanai negana do ita raraia be namo, ani? Namona be tuari, kara dika, bona dagedage dainai ia vara masena do ita laloa momo lasi, to toreisi lou matamata taudia be Iehova ena maino bona ena kara maoromaoro do idia hadibalaidia negana do ita raraia be namo, ani?
‘Iseda matana be Iesu dekenai ita negea lao’ ena anina ma ta be, lauma dalanai ita itaia karana amo, Basileia, matana korikori amo ita itaia diba lasi gauna, ese tanobada ai Dirava ena orea taudia bogaragidiai ia havaraia vadaeni gaudia ita raraia noho; gaudia be inai: lalo-tamona, maino, lalokau, tadikaka hebogahisi henia karana, bona noho namo lauma dalanai. Keristani hahinena ta Germany ai ese vidio ta ladana United by Divine Teaching ia itaia murinai ia torea herevana be inai: “Unai vidio ese lau do ia durua, do lau laloa noho Keristani tadikakadia bona taihudia momo tanobada hegegemadai be harihari Iehova ena hesiai idia lao henia mai edia kamonai ida—bona unai idia karaia, herevana taunimanima ese idia inai henidia. Dagedage bona badu tanobadana lalonai iseda tadikaka ida ita lalo-tamona be mai anina bada!”
Oi danu ese Iehova, Iesu, kamonai anerudia, bona Keristani taudia milioni momo oi badibadinai idia gini, be oi “itaia” a? Bema oi itadia, “tanobada ena laloa metau idauidau” do oi laloa momo lasi. Unai gau ese emu lalona idia hametaua diba bena idia dainai Keristani hesiai gaukarana lalonai “anina” do oi havaraia lasi. (Mataio 13:22) Unai dainai namona be emu lauma matana amo Dirava ena Basileia, ia haginia vadaeni Basileiana, bona ena hahenamo, hari inai nega gaudia bona nega vairai gaudia, oi raraia; unai amo ‘emu matana be Iesu dekenai oi negea lao.’
Mauri Oi Tahua, Hari Oi Itaia Diba Lasi Gaudia Do Oi Itaia Totona!
Dirava ena tanobada matamatana, do ia noho ela bona hanaihanai gauna, bona hari ia noho tanobadana gunana, ia dika ia lao gauna, edia idau ita itaia diba dainai, namona be unai ese ita ia hagoadaia do ita kara maoromaoro, bena do ita hegeregere do ita mauri ela bona hari inai negai iseda abidadama matana amo ita itaia gaudia be iseda matana korikoridia amo do ita itadia. Toreisi lou taudia hutuma bada do idia noga bona paradaiso tanobadana mai kara maoromaorona do idia itaia neganai do idia hoa maragi lasi, badina be idia do mase lasi neganai idia itaia tanobadana ena toana be idau vaitani. Bema unai neganai do ita noho bona idia toreisi lou neganai do ita abidia dae bona Dirava ese ia karaia karadia do ita hamaorolaidia, do ita moale bada, ani?—Ioel 2:21-27 itaia.
Oibe, lauma dalanai itaia goevagoeva karana be mai anina bada, bona unai ita naria namonamo be gau badana! Unai do ita karaia totona, namona be siboda eda Baibel stadi ita karaia loulou, Keristani heboudia ita lao henidia loulou, Baibel ena hereva dainai ita abia helarona be taunimanima ita hamaorolaidia loulou, bona kara badana be, nega ibounai Dirava ita noia ita do ia hakaua. Unai ese lauma dalanai ita itaia karana do ia naria namonamo, bena do ita roha lao diba, idia hedinarai gaudia edia murina do ita raraia diba!