Daradoko Negana Lalonai Helaro Namona Davaria Dalana
MANI oi laloa, inai gaudia be oi dekenai idia vara: Oiemu kohu ibounai idia ore, hari oi dabu momokani. Oiemu natudia—oi idia hamoalea taudia—idia mase. Oiemu adavana ese oi ia hagoadaia lasi. Oi gorere bada herea. Dina ta ta ai, hisihisi sibona oi ania.
Bema oiemu mauri be unai bamona, do oi laloa badina ta ia noho oi mauri noho totona, a? Eiava do oi daradoko?
Unai lalohisihisi sivaraina be Baibel torea negana ai ia noho tauna Iobu ena mauri sivarai momokanina. (Iobu, karoa 1, 2) Ia daradoko momokani neganai, Iobu ia taitai, ia gwau: “Egu mauri ena namo lau laloa lasi, lau hesikulaia noho. Unai dainai egu maumau do lau gwauraia hedinarai noho. Egu lauma ena mamina ia dika dainai do lau maumau.” Ia dekenai mase be hisihisi amo ia ruhaia gauna. (Iobu 10:1; 14:13) Ena be hisihisi bada herea ia ania, to Iobu ese Iehova ia badinaia noho. Iehova ese ia hanamoa dainai iena noho be namo bada, to iena noho gunana be namo bada lasi. Unai dainai ia buruka neganai, ena mauri dinadia dekenai iena lalona ia hegeregere bona lalo-maino ai ia mase.—Iobu 42:12, 17, NW.
Taunimanima ese Iobu ena haheauka idia herevalaia ema bona hari. Iobu ia mamia hahetoho ese ia idia hanamoa bona taunimanima ma haida idia hagoadaia, kara namo idia karaia totona. (Iamesi 5:10, 11) Gau badana be, Iobu ena badinaia karana ese Iehova ena kudouna ia hamoalea bada. (Aonega Herevadia 27:11) Unai hisihisi bada sivaraina be gabeai Dirava badinaia, abidadama, bona kara maoromaoro sivaraina ai ia lao bona Iobu ena sivarai idia ura tohotohoa taudia dekenai hahenamo momo ia mailaia.
Hahetoho Idauidau ai Helaro Ia Noho
Reana oi ese Iobu ia mamia bamona hahetohodia oi mamia danu. Oiemu lalokau tauna ena mase dainai reana emu hemami ia dika momokani. Gorere dikana dainai reana hanaihanai hisihisi oi mamia. Reana oiemu mauri ia dika ia lao, oiemu headava ia dika dainai. Reana moni hekwakwanai idia vara dainai oi dabu momokani. Reana hereva momokani idia inai henia taudia ese oi idia dagedage henia. Reana hahetoho haheaukalaia karana dainai oi hesiku bona helaro be lasi mamina oi abia.—1 Petero 1:6.
Namo lasi hisihisi ese oiemu lalona ia hamanokaia, to namona be sibona oi nanadaia, ‘Dahaka dainai hisihisi lau ania?’ Hisihisi oi ania badina inai tanobada dekenai oi noho bona “Satani ese tanobada taudia ibounai ia gunalaia noho.” (1 Ioane 5:19) Unai dainai, taunimanima iboudiai idia hisihisi. Dala idauidau ai ita ibounai ese Diabolo ena inai henia karana Basileia ena sivarai namona dekenai, eiava ma haida edia hebogahisi lasi herevadia, eiava Dirava ia habadua karadia dainai hisihisi ita mamia. Unai gaudia idia vara nega momo hari inai “nega ena dokona dekenai.”—2 Timoteo 3:1-5.
Bema gau dikana ta ia vara vadaeni oiemu mauri lalonai, reana “ia vara kava noho” dikana ta oi mamia unai. (Hadibaia Tauna 9:11) Eiava, nega haida iseda mauri lalonai hekwakwanai ita davaria ita be kara dika taudia dainai. (Roma 5:12) Bema kara dikana ta oi karaia, to oi helalo-kerehai momokani bona lauma heduruna oi tahua vadaeni, namo lasi oi laloa Dirava ese oi ia rakatania. (Salamo 103:10-14; Iamesi 5:13-15) Iena ura badana ta be ita ia naria. (1 Petero 5:6, 7) Namona be inai oi diba momokani, ‘Iehova be lalohisihisi taudia kahirakahira ia noho, bona ia ese edia lalona ia ore taudia ia hamauria noho.’ (Salamo 34:18) Herevana oi mamia hahetoho ia auka herea, Iehova ese oi dekenai aonega ia henia oi haheauka diba totona. (Iamesi 1:5-8) Iehova ese iseda tauanina o lalona o hemami edia bero iboudiai ia hanamoa diba. Iehova ese oi ia lalo-namo henia neganai, gau ta lasi ese oiemu mauri hanaihanai ahuna ia koua diba.—Roma 8:38, 39.
Gau Namona ta Ia Vara Diba Hahetoho amo, A?
Hereva ta be inai: “Ori iboudiai be mai edia diari, idia ia gegea diarina.” Unai hereva ena anina be herevana edena bamona dika bada herea oi davaria, oi lalo-goada ena badina ta do ia noho. Dirava ena Hereva lalonai idia noho herevadia ibounai edia anina be “Dirava ena namo dekenai do ita naria,” mai lalo-goada ida. (Roma 15:4) Ena be oiemu hekwakwanai be auka herea, Baibel ena gwauhamata bona ena hakaua herevadia ese oi do idia hamoalea lou bona nega vaira totona helaro idia henia.
Baibel ia hahedinaraia “hisihisi be metau lasi gaudia, bona do idia noho nega daudau lasi,” to Dirava idia lalokau henia taudia do idia abia hahenamo be do idia noho ela bona hanaihanai. (2 Korinto 4:16-18) Baibel ia hahedinaraia hahetoho lalonai Dirava amo idia mai kara namodia ita habadaia ena namo ese ladana badana o kohu momo abia edia namo ia hanaia. (1 Ioane 2:15-17) Unai dainai, hisihisi haheaukalaia be mai ena anina namona danu. (Heberu 5:8) Momokani, hahetoho negadiai oi dibaia gaudia oi gaukaralaia neganai, hahenamo momo do oi abia.
Hahetoho aukana ese oi ia hamanaua diba. Reana guna, oi diba oiemu kara ta ese ma haida ia habadua bona unai dainai lauma dalanai oi tubu daekau lasi. Reana unai kara ta be, oi laloa oi diba momo. Reana hekwakwanai ta ese oi ia hamanokaia dainai oi diba gau ibounai oi sibona oi karaia diba lasi, ma haida edia heduru oi abia be namo. Bema unai hahetoho ese unai ia hadibaia oi dekenai, bona oiemu kara oi haidaua, unai hahetoho ese oi ia hanamoa.
To, edena bamona bema guna ma haida ese oi idia tura henia lasi, oi badu haraga dainai? Reana unai hekwakwanai be oiemu tauanina ia hagorerea. (Aonega Herevadia 14:29, 30) To, hari, reana emu mauri ia namo ia lao badina Dirava ena lauma helaga ese oi ia durua oi boga-auka totona.—Galatia 5:22, 23.
Reana guna, taunimanima ma haida bamona, oi ese idia kerere bena idia helalo-kerehai taudia oi hebogahisi henia lasi. To bema nega ta oi sibona oi moru, bona ma haida edia hebogahisi oi ura bada oi abia, unai ese oi ia durua ma haida dekenai oi hebogahisi totona. Bema ma haida be mai edia kudouna ibounai ida oi idia laloa noho bona hebogahisi henia, do oi itaia namona be unai bamona kara oi karaia idia helalo-kerehai taudia dekenai. Bema oi mamia lalo-hisihisi ese oi ia doria oiemu kara manokadia oi hanamoa totona, ia be durua gauna ta. Oi dibaia vadaeni “bogahisihisi ia henia tauna ese Kota Biaguna ena bogahisihisi do ia davaria.”—Iamesi 2:13; Mataio 5:7.
To dahaka ia vara bema Keristani kongregesen ese oi ia matakani henia bona oi laloa bada gaukarana ta o hahenamo kongregesen ai oi haboioa? Namona be lalohisihisi ese emu lalona ia hamanokaia lasi. Matahakani ese kongregesen ia durua ia goeva noho, to badina ma ta be lauma dalanai kerere tauna ia namo lou totona. Momokani, “Tamana ese metau bona hisihisi ita dekenai ia henia neganai, iseda lalona idia hisihisi bona ita be moale lasi. To gabeai, inai matakani ese idia ia hamaoromaoroa vadaeni taudia ese kara maoromaoro ena davana namona, mai maino danu do idia davaria.” (Heberu 12:11) Ena be matakani abia dae be auka, to ia ese ia manau helalo-kerehai tauna ena helaro ia hadikaia lasi. Idaunegai Israela tauna King Davida ese matakani aukana ia abia kara dika bada ia karaia dainai, to ia helalo-kerehai bona gabeai Baibel ese ia gwauraia abidadama tauna namona.—2 Samuela 12:7-12; Salamo 32:5; Heberu 11:32-34.
Hahetoho ese oiemu lalohadai ia haidaua diba. Reana guna, inai tanobada ena kohu o ladana badana oi tahua. Reana oiemu hahetoho lalonai emu bisinesi ia dika o moni bada oi haboioa dainai hari anina bada gaudia oi laloa bada matamaia. (Filipi 1:10 itaia.) Hari oi diba, oiemu hesiai gaukara helagana lalonai lauma kohu bona lauma gaudia tahua karadia sibona ese oi do idia hamoalea momokani bona idia dainai do oi moale daudau.
Iehova Abidadama Henia
Iehova ena hesiai gaukara helagana oi karaia dainai, reana dagedage bona hisihisi do oi davaria iseda Keristani tomadiho dalana idia abia dae lasi taudia amo. Unai hahetoho dainai reana oi hesiku, to ia amo namo oi davaria diba. Reana unai hahetoho ese oiemu abidadama do ia hagoadaia. Danu, reana hisihisi idia davaria taudia ma haida do oi hagoadaia, oiemu haheauka idia itaia dainai. Reana oiemu kara namona idia itaia taudia ese Dirava do idia hanamoa. Reana oi idia dagedage henia taudia do idia hemarai bona oiemu kara namona do idia gwauraia!—1 Petero 2:12; 3:16.
Dagedage oi davaria neganai, oi lalo-manoka lasi totona Iehova oi abidadama henia be gau badana. Iena Hereva ia hahedinaraia unai hisihisi do ia noho hanaihanai lasi, to reana oiemu ura hegeregerena do ia ore haraga lasi. Ia vara lalonai, ‘kara namona karaia totona do oi hesiku lasi.’ (2 Tesalonika 3:13) Haheauka daladia oi tahua noho. Toana be unai hekwakwanai do ia namo lasi neganai, ‘oiemu lalo-hekwarahi be Iehova dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.’ (Salamo 55:22) Namona be oiemu hekwakwanai oi laloa lou lou lasi, to namona be oi abia hahenamodia, hegeregere Iehova oi diba, ena orea lalonai oi noho, bona emu helaro be mauri hanaihanai do oi abia be oi laloa loulou.—Ioane 3:16, 36.
Anina bada gaudia sibona oi laloa. Dina ta ta ai Iehova dekenai oi guriguri, goada ia henia oi haheauka diba totona. (Filipi 4:6, 7, 13) Oi idia hahisia taudia edia davana henia lalohadaina oi dadaraia be namo. Iehova ena imana dekenai oi rakatania. (Roma 12:19) Kara namo bona Keristani karadia idauidau goadalaia daladia oi tahua noho. (2 Petero 1:5-8) Namona be ma haida edia hekwarahi oi totona, hegeregere elda taudia be mai edia lalokau ida lauma dalanai oi idia naria karadia, oi laloa bada. (Heberu 13:7, 17) Dirava oi badinaia noho, bona mauri ahuna namona oi laloa noho, bona oi diba momokani mase ese unai ahuna ia koua diba lasi.—Ioane 5:28, 29; 17:3.
Bema hari lalohisihisi bada gauna o hahetoho auka hereana ta oi davaria, “Lohiabada do oi abidadama henia, mai emu kudouna ibounai,” bona gabeai do oi moale bada herea, oiemu daradoko bona mauri aukana do idia ore. (Aonega Herevadia 3:5, 6; Ioane 16:20) Dirava ese oi do ia hanamoa Iobu ia hanamoa hegeregerena neganai, oiemu lalohisihisi do ia ore bona do oi moale. Hari oi mamia hisihisi ena bada be bada lasi bema do oi abia ahuna ena namo ida oi hahegeregerea. (Roma 8:18 itaia.) Oiemu haheauka noho karana ese ma haida do ia hagoadaia bona oi do ia durua ‘oiemu laloa bona emu kudouna oi hamatamataia’ neganai oi abia Keristani karadia hairaidia oi habadaia totona. (Efeso 4:23, 24; Kolose 3:10, 12-14) Unai dainai, aposetolo Petero ena aonega sisibana oi kamonaia be namo: “Dirava ena ura dainai hisihisi idia abia taudia ese kara namodia sibona do idia karaia be namo. Ma danu, edia lauma be Dirava ena imana dekenai do idia atoa. Badina be ia ese ita ia karaia, bona ita abidadama henia diba, iena gwauhamata do ia badinaia momokani.”—1 Petero 4:19.
[Picture on page 23]
Iobu oi tohotohoa. Emu helaro oi dogoatao noho
[Picture on page 24]
Iehova oi abidadama henia oiemu kudouna ibounai ida