Headava Lasi Maurina be mai Ena Hahenamo
“Hahine ese ia ura henia tauna do ia adavaia diba, taravatu lasi. To ekalesia tauna sibona do ia adavaia diba. To lauegu laloa be inai: bema ia vabu noho be iena lalona do ia namo.”—1 KORINTO 7:39, 40.
1. Herevana ita headava o ita headava lasi, Iehova be edena bamona ita kara henia be maoro?
IEHOVA idia gwauhamata henia taudia be mai edia kudouna ibounai danu Iehova idia tomadiho henia be maoro. Herevana ita headava o ita headava lasi, namona be Dirava ita lalokau henia mai eda lalona ibounai, mai eda mauri ibounai, mai eda aonega ibounai bona mai eda goada ibounai ida. (Mareko 12:30) Momokani, ia headava lasi Keristen tauna ena mauri lalonai iena lalona idia veria gaudia be momo lasi, to headava taudia edia mauri lalonai unai bamona gaudia be momo. To bema Iehova ena hesiai tauna ta ia headava lasi, ia moale momokani diba a?
2, 3. (a) Paulo ena hereva 1 Korinto 7:39, 40 dekenai ena anina be dahaka? (b) Edena henanadai ita lalodia be namo?
2 Aposetolo Paulo ena haere be oibe. Guna idia headava to gabeai idia be adavana lasi taudia ia herevalaidia, ia gwau: “Hahine ese iena adavana do ia badinaia ela bona tau ena mauri dokona. To bema iena tau ia mase neganai unai hahine ese ia ura henia tauna do ia adavaia diba, taravatu lasi. To ekalesia tauna sibona do ia adavaia diba. To lauegu laloa be inai: bema ia vabu noho be iena lalona do ia namo. Bona lau laloa danu Dirava ena Lauma be lauegu lalona dekenai ia noho.”—1 Korinto 7:39, 40.
3 Unai hereva amo Paulo ese ia hahedinaraia idia headava lasi taudia idia moale diba. Unai dainai henanadai haida idia vara. Henanadai be inai: Edena taudia ese headava lasi maurina eiava headava haraga lasi karana idia lalohadailaia diba? Dahaka ese headava lasi Keristen taudia edia moale ia habadaia? Momokani, headava lasi maurina ese hahenamo edena bamona ia havaraia diba?
Headava Lasi Mauri Laganidia Lalodiai Anina Namona Idia Davaria
4. Tauhau bona hane-ulato laganidia be edena bamona?
4 Aonega Pavapavana Solomon ia gwau: “Oi ia havaraia Diravana be emu tauhau negana lalonai oi laloatao, dina dikadia idia do ginidae lasi neganai bona inai hereva: ‘Lau moalelaidia lasi,’ oi do gwauraia lasi neganai.”(Kohelete 12:1) Uhau bona ulato momo be mai edia goada bona idia gorere momo lasi. Unai dainai Iehova ena hesiai gaukarana be mai edia lalona ibounai ida bona mai edia goada ibounai ida idia karaia be namo, ani? Danu, idia matamata neganai, namona be edia aonega idia habadaia bona edia raka dalana idia hamaoromaoroa. To tanobada taudia idia matamata neganai, edia ‘lalokau’ be lalokau koikoina. Hegeregere, uhua bona ulato edia kara idia tahua taudia ese idia 1,079 edia kara idia nanadailaidia neganai, idia davaria idia ta ta iboudiai be nega 7 bamona ai taunimanima ta idia lalokau henia bada bona iboudiai idia gwau hari idia bamoa tauna be edia lalokau tauna korikorina, edia lalokau ia koikoi lasi.
5. Namona be tauhau eiava hane-ulato be sibona edena bamona ia nanadaia, headava ia laloa neganai?
5 Headava taudia momo idia parara, momo ese edia headava idia hadokoa, bona ruma bese taudia momo idia noho hebou lasi. Unai ese ia hahedinaraia, uhau bona ulato idia headava haraga be aonega lasi karana. Namona be Keristen uhaudia bona ulatodia idia hetura heheni haraga lasi bona idia headava haraga lasi, to namona be idia be mai edia aonega ida idia laloa edia matamata laganidia be mai edia lalona ibounai ida Iehova ena hesiai gaukara lalonai edena bamona do idia gaukaralaidia diba. Bema oi be tauhau ta eiava hane-ulato ta, namona be oiemu mauri dalana oi tahua neganai, sibomu oi nanadaia inai bamona: Lauegu lalona ena goada be taunimanima badadia edia lalona ena goada hegeregerena dainai, lau hegeregere headava do lau lalohadailaia a? Mauri dalana dekenai lauegu diba be hegeregere, adavana namona ai do lau lao a? Headava ena maduna bona natu naridia ena maduna do lau huaia namonamo diba a? Lauegu mauri be Iehova dekenai lau gwauhamatalaia vadaeni dainai, namona be egu goada be ia lau henia, ani?
Headava Lasi Mauri Goevana ena Davana Namona
6, 7. (a)Idia headava lasi taudia edia hahenamo haida be dahaka dahaka? (b)Unai hegeregerena, ia headava lasi misinari tauna ta, Africa dekenai ia gaukara tauna, ena hereva be dahaka?
6 Headava lasi Keristen taudia edia mauri lalonai lalona veria gaudia be momo lasi, bona ‘Lohiabada ena gaukara momo idia karaia diba.’ (1 Korinto 7:32-34; 15:58) Tauhau ta ia bamoa lasi ulatona bona ulato ta ia bamoa lasi tauhauna be mai edia dala, lalokau be kongregesen taudia momo dekenai do ia hahedinaraia. Buruka bona manoka taudia ia durudia diba mai ena lalokau ida. (Salamo 41:1) Vaia, idia headava lasi taudia edia nega ia hegeregere, Dirava ena Hereva do idia stadilaia bona laloa namonamo. (Hereva Lada-isidia 15:28) Headava lasi taudia edia dala ia kehoa bada, Iehova kahirakahira dekenai do idia lao bona Iehova tabekau henia bona kamonai henia karadia idia manadalaia. (Salamo 37:5; Filipi 4:6, 7; Iakobo 4:8) Headava lasi misinari tauna ta, Africa lalonai lagani momo lalodiai Iehova ena hesiai gaukara ia karaia tauna, be ia gwau:
7 “Africa ena hanua maragidia lau noholaidia neganai, lau egu mauri dalana ia namo, badina hari inai nega ena kohu bona kara ese lau idia veria oho lasi. Unai dainai lauegu nega ia hegeregere Dirava ena Hereva do lau stadilaia bona do lau laloa namonamo. Unai dainai, lauma dalanai lau goada noho. Oibe, lau egu misinari gaukara be hahenamo korikorina, bona lau ia gimaia, kohu bona moni lau ura henia bada garina. Adorahi ai, lauegu nega ia hegeregere lauma gaudia dobudia bona Iehova ese ia havaraidia gaudia do lau lalodia, bona Iehova kahirakahira dekenai do lau lao. Lau moalelaia bada gauna be inai: Adorahi ta ta dekenai, egu lalona ia do noga neganai, bona lau sibona lau noho neganai, guba mai hisiu momo henunai Iehova danu lau raka diba bona ia lau hereva henia diba. Inai ese lau Iehova kahirakahira dekenai ia veria lao.”
8. Ia headava lasi Keristen taihuna ta, lagani momo Watch Tower Society ena hedikwota dekenai hesiai gaukara ia karaia hahinena, ese headava lasi karana edena bamona ia herevalaia?
8 Headava lasi taihuna ta be lagani momo lalodiai hesiai gaukara ia karaia Watch Tower Society ena hedikwota dekenai. Iena hereva danu be mai ena anina. Ia gwau: “Lau ese headava lasi maurina lau abia hidi, Iehova ena hesiai gaukara lau karaia totona. Lau sibona lau noho dainai, lau lalohisihisi, a? Lasi vaitani. Momokani, lau sibona lau noho negadia idia namo herea. Iehova lau guriguri henia diba. Lauma gaudia lau lalodia dobu bona Dirava ena hereva lau stadilaia negadiai egu lalona veria oho gaudia be lasi dainai, unai nega lau moalelaia. Lau headava lasi dainai lauegu moale ia bada.”
9. Headava lasi Keristen tauna ese edena gaukara namodia ia karaia diba?
9 Danu, headava lasi tauna ese hesiai gaukara badadia ia abidia dae diba, to headava taudia bema mai edia ruma bese danu, idia be dala lasi unai gaukara do idia karaia. Hegeregere, reana dala ia kehoa, headava lasi tauna be idau gabuna ta dekenai do ia lao bona pioneer gaukara be unuseniai do ia karaia, unai gabu dekenai Basileia harorolaia taudia be momo lasi. Eiava, reana tauhau ta ese Betele gaukara ia karaia diba, Watch Tower Society ena hedikwota lalonai, eiava brens opesi ta lalonai. Reana hane-ulato ta ese hahine badana ta pioneer gaukara lalonai ia bamoa diba, edia kongregesen lalonai eiava kongregesen ma ta lalonai idia heduru totona. Emu sekit naria tauna danu inai hereva umui kikilaia hebou be namo. Bema oi be headava lasi Keristen tauna ta, sibona oi henia Iehova ena hesiai gaukara oi karaia badabada totona, bena oi do ia hanamoa bada.—Malaki 3:10.
Idau Negai Taudia edia Haheitalai
10. Iehova ena headava lasi hesiai tauna badana, haheitalai namona ia hahedinaraia tauna, be daika? bona dahaka dainai oi laloa ia headava lasi be namo?
10 Iehova ena headava lasi hesiai tauna badana be Iesu Keriso. Iena nega bona goada ibounai ia negea, Dirava ena ura ia karaia totona. Ia gwau: “Egu aniani be inai, lau ia siaia Diravana ena ura do lau karaia, ena gaukara do lau karia haorea momokani.” (Ioane 4:34) Ia gaukara bada herea,—ia haroro, gorere taudia ia hanamodia, bona unai bamona gaukara momo ia karaia! (Mataio 14:14) Iesu ese taunimanima edia namo ia tahua momokani, bona ia be tatau, hahine bona maragidia danu ia hebou mai ena moale ida. Momokani, ia haroro loaloa neganai, nega haida taunimanima haida ese idia bamoa. (Luka 8:1-3) Bema Iesu be mai ena adavana bona natuna maragidia, unai bamona ia karaia be auka herea! Momokani, Iesu ia headava lasi dainai kara momo ia karaia diba, headava taudia idia karaia diba lasi karadia unai. Hari inai nega lalonai danu, headava lasi Keristen tauna ena dala be unai bamona ia kehoa, hesiai gaukara idauidau do ia karaia, hegeregere, gabu daudaudia eiava gabu dikadia lalodiai Basileia harorolaia gaukarana do ia karaia diba.
11, 12. (a)Daidia edia kara toana be headava lasi hahinedia, Iehova ena hesiai gaukara hari idia karaia hahinedia unai, ese idia tohotohoa be namo?
11 To, taunimanima ma haida danu ese namo idia davaria idia headava lasi dainai. Iefeta ena natuna kekenina ese ena tamana ena gwauhamata ia hamomokania totona ia headava lasi, headava bona natudia havaradia karana idia laloa bada taudia bogaragidiai ia noho be herevana. Iehova ena hesiai gaukara ia moalelaia. Namona be ita laloa danu, haida ese ena lalona idia hagoadaia. “Lagani ta ta amo Israel kekenidia ese dina 4 Iefeta, tau Gilead, ena natuna kekenina idia vadivadi henia bona ena ladana idia hanamoa.” (Hahemaoro Taudia 11:34-40) Unai hegeregerena, namona be headava Keristen taudia bona ma haida danu ese idia headava lasi hahinedia, Iehova ena hesiai gaukara harihari idia goadalaia taihudia unai, edia kara idia hanamodia bona edia lalona idia hagoadaia.
12 Filipo ena natuna ulatodia 4 ese “peroveta hereva idia gwauraia.” (Kara 21:8, 9) Edia hesiai gaukara be Iehova ena ladana abia isi gaukarana, unai dainai idia moalelaia bada. Unai hegeregerena, hari inai nega lalonai, ulato momo ese hesiai gaukara mai ena hahenamo, hegeregere pioneer gaukara, nega ibounai Basileia harorolaia gaukarana unai, idia moalelaia noho. Momokani, namona be ita hanamodia, badina be idia be ‘sivarai namona idia gwauraia hahinedia edia tuari oreana badana’ lalonai idia vareai dainai.—Salamo 68:11.
13. Paulo ena sivarai ese edena bamona ia hahedinaraia, headava lasi maurina be mai ena hahenamo?
13 Aposetolo Paulo ese headava lasi karana ena namo ia davaria. Kilomita daha momo ai ia haroro loaloa. Ia hekwarahi momo. Dika momo ia davaria, nega momo hanuaboi ai ia mahuta lasi bona nega momo ia hitolo. (2 Korinto 11:23-27) Momokani, bema Paulo ia headava, unai bamona ia karaia be auka herea bona mai ena lalohisihisi bada ida. Danu, bema ia be mai ena maduna ruma bese durua totona, “Iuda lasi taudia totona aposetolo gaukara” ena dagi do ia abia diba lasi.(Roma 11:13) Ena be ia hekwarahi momo, to sibona ena mauri lalonai idia vara gaudia dainai, Paulo ia diba headava lasi karana be mai ena hahenamo.
Hari Inai Negai Taudia edia Haheitalai
14. Colporteur (pioneer) taudia, — idia momo idia headava lasi— be dahaka idia karaia mai edia moale ida?
14 Paulo bona headava lasi Keristen taudia ginigunadia hegeregeredia, (lagani 1881 amo ema,) Dirava ena orea taudia haida, colporteur (pioneer) gaukara idia karaia taudia, be headava lasi taudia. Idia be maduna lasi ruma bese durua totona. Mai edia ura danu idia be idia diba lasi hanuadia badadia bona maragidia dekenai idia lao, kudou namo taudia tahudia bona Bible buka hariharilaidia totona. Tereini, basikele, hosi ese idia veria gaudia, eiava motuka amo idia loaloa. Nega momo, mai moale danu ruma ta ruma ta dekenai idia raka. (Kara 20:20, 21) Iehova ena witness tauna ta ia gwau: “Nega haida, idia ese [Bible buka] idia hariharilaidia neganai, uma gaudia, kokoroku, sopu bona unai bamona gaudia idia abia, buka edia davana. Unai gau idia gaukaralaidia eiava idia hoihoilaidia. Nega haida bema gabu ta be ruma momo lasi, hanuaboi ai uma biagudia eiava boromakau biagudia edia ruma lalodiai idia mahuta . . . Inai kara maoromaoro taudia (idia momo idia headava lasi) be lagani momo lalodiai idia gaukara goadagoada ela bona idia buruka momokani.” Momokani, idia ta ese colporteur taudia iboudiai edia lalohadai ia gwauraia hedinarai, ia gwau: “Unai ai karaia neganai, ai matamata bona Keristen hesiai gaukara ai moalelaia. Ai moale bada herea, badina emai goada ai haorea Iehova ena hesiai gaukara lalonai.”
15 Gabeai, pioneer taudia momo, nega ibounai Basileia idia harorolaia taudia, be headava lasi taudia. Nega momo idia be taunimanima momo lasi idia noholaia gabudia dekenai idia haroro, kongregesen matamatadia idia haginidia bona hahenamo idauidau Iehova ena hesiai gaukara lalonai idia moalelaia. Lagani 1943 lalonai, Tanobada Ibounai Tuarina Iharuana ia do doko lasi neganai, Iduara namona ia kehoa idia haida edia, do idia vareai bena gaukara badana do idia karaia, badina be unai neganai Watchtower Bible School of Gilead idia kehoa. (1 Korinto 16:9) Oibe, idia headava lasi pioneer taudia momo be Gilead School dekenai misinari gaukara idia hadibalaidia, bena nega sisina murinai Basileia ena sivarai be gabu matamatadia dekenai idia halasia. Headava ena maduna ese edia dala ia koua lasi dainai, sibodia edia mauri idia henia Iehova ena hesiai gaukara idia karaia totona. Unai misinari taudia haida, gunaguna Gilead School dekenai idia sikuli taudia, idia do headava lasi, bona misinari gaukara eiava Keristen hesiai gaukara idauna ta idia karaia noho nega ibounai.
16. Dahaka ese ia hahedinaraia idia headava lasi Betele taudia ese hahenamo momo idia davaridia?
16 Headava lasi Keristen taudia momo be lagani momo lalodiai Watchtower Society ena hedikwota dekenai, eiava brens opesi ta dekenai, Betele gaukara idia karaia. Idia headava lasi dainai, hahenamo idia davaria, a? Oibe. Hegeregere, headava lasi tadikakana ta, lagani momo lalodiai Brooklyn Betele dekenai ia gaukara tauna, be ia gwau: “Lau moale, badina lau itaia magasin bona buka milion milion momo amo Dirava ena Hereva be gabu daudau hereadia dekenai idia abia lao. Unai sibona be hahenamo badana ta.” Danu, headava lasi tadikakana ma ta be lagani 45 lalodiai Betele gaukara ia karaia murinai, ia gwau: “Dina iboudiai iseda Tamana guba dekenai ia noho lau guriguri henia, lau noia iena heduru bona aonega be lau do ia henia, lauma dalanai bona tauanina dalanai do lau goada noho totona, bena unai dainai iena ura helagana do lau badinaia noho. . . . Lauegu mauri dalana amo moale, davana namona bona hahenamo lau davaria.”
Headava Lasi Karana Goevana
17. Dahaka gau rua ese headava lasi taudia idia durudia, kara goeva idia badinaia totona?
17 Bible ese ia sivarailaidia taudia bona hari inai nega lalonai idia noho taudia danu edia sivarai ese idia hahedinaraia, headava lasi karana ese hahenamo ia havaraia diba. Momokani, oi headava lasi negana lalonai, namona be emu “lalona ia auka.” (1 Korinto 7:37) To dahaka ese oi do ia durua, oi headava lasi neganai oi goeva noho totona? Iehova “Guriguri Kamonai Henia Diravana,” be iseda Heduru Tauna Badana. (Salamo 65:2) Unai dainai, namona be hanaihanai Iehova oi noia guriguri amo. ‘Guriguri oi goadalaia nega ibounai’ bona Dirava oi noia, iena lauma helaga do ia siaia bona oi do ia durua, lauma helaga ena huahua do oi havaraia totona, unai huahua rua be maino bona tauanina ena ura koua karana. (Roma 12:12; Luka 11:13; Galatia 5:22, 23) Bena, mai emu guriguri danu, nega ibounai Dirava ena Hereva oi laloa dobu bona oi badinaia be namo.
18. 1 Korinto 14:20 ena hereva ese headava lasi tauna edena bamona ia durua ia kerere lasi totona?
18 Emu headava lasi karana goevana oi hadikaia garina, namona be tauanina ena ura dikadia idia havaradia gaudia iboudiai amo oi siri. Anina be piksa, buka bona moale karadia mirodia iboudiai amo oi gini siri be namo. Paulo ia gwau: “Kara dika dekenai natuna maragidia bamona umui noho; to lalo-parara dekenai taunimanima badadia ai umui lao.” (1 Korinto 14:20, NW) Kara dika oi dibalaia toho lasi bona oi manadalaia toho lasi, to Dirava ena heduru amo aonega dalana oi badinaia; kara dika lalonai emu diba ia maragi beibi ena diba hegeregerena be namo. Danu, namona be oi laloatao, Dirava vairanai sihari kava bona kara dika idia namo lasi.
19. Edena Bible siri ese dala ma haida idia hahedinaraia, headava lasi tauna ese kara goevana ia badinaia totona?
19 Danu, bema oi headava lasi, namona be oiemu hebamo karadia oi naria namonamo, oi kara maoromaoro noho totona. (1 Korinto 15:33) Mahuta hebou karana bona headava idia laloa bada bona idia kikilaia momo taudia oi bamodia lasi be namo. Hevaseha herevadia mirodia oi dadaraia! Paulo ena sisiba be inai: “Umui be Dirava ena taudia dainai heudahanai bona matabodaga bona kohu ura dikadika kara, be do umui herevalaia lasi. Lebulebu hereva, hereva kavakava, hevaseha hereva mai miro danu be namo lasi, to Dirava do umui tanikiu henia be namo.”—Efeso 5:3, 4.
Nega Vairai ena Hahenamo
20. Headava lasi negana ena lagani lalodiai, Iehova ena hesiai gaukara goadalaia karana ese dahaka do ia havaraia?
20 Bema emu headava lasi laganidia be Iehova ena hesiai gaukara lalonai oi gaukaralaia, unai ese oiemu lalona do ia hamoalea bona do ia hamainoa. Unai bamona do oi karaia neganai, lauma dalanai do oi goada bona do oi gini auka. Basileia gaukara oi karaia totona, bema oi headava lasi ela bona hari ena nega dikana ena dokona, Iehova ese oiemu kara do ia laloaboio lasi, oi ese sibona oi henia iena hesiai gaukara helagana oi karaia totona.
21. Bema hari oi headava lasi bona dala goevana oi badinaia mai hahenamo momo danu, gabeai do oi headava gwauraia neganai, oi be edena bamona?
21 Bema oi headava lasi bona mai emu goada ibounai danu Basileia gaukara bema oi tahua, hahenamo momo do oi abia. (Hereva Lada-isidia 10:22) Bena, bema gabeai do oi headava, unai do oi karaia mai emu diba bada ida, lauma dalanai ia goada tauna hegeregerena. Danu, Bible ena sisiba do oi badinaia dainai, adavana namona do oi abia hidi. Ia be sibona Dirava dekenai ia gwauhamatalaia vadaeni bona ia raka maoromaoro dainai, oi do ia durua, Dirava ena hesiai gaukara oi karaia namonamo totona. Vadaeni, harihari amo ela bona unai nega, lalokau Diravana, Iehova, ena hesiai gaukara lalonai headava lasi maurina ena hahenamo do oi davaria diba.
Edena Bamona Do Oi Haere?
◻ Iehova ena Witness taudia bogaragidiai, headava lasi taudia ese kara goeva idia badinaia dainai, edena hahenamo idia abia?
◻ Bible lalonai daidia edia sivarai ese idia hahedinaraia headava lasi karana be mai ena hahenamo?
◻ Hari inai nega lalonai daidia edia sivarai ese idia hahedinaraia headava lasi karana be mai ena hahenamo?
◻ Keristen tauna ia headava lasi neganai, dahaka ese do ia durua iena kara ia goeva totona?
15. Lagani 45 idia lao vadaeni, idia headava lasi pioneer taudia momo ese dahaka gaukara lalonai idia vareai matamaia diba?
[Box on page 21]
Heduru Hereva Haida Headava Lasi Taudia Idia Kara Goeva Totona
◆ Nega ibounai Dirava oi guriguri henia, oi noia iena lauma helaga do ia siaia bona oi ia durua lauma ena huahua oi hahedinaraia totona
◆ Dirava ena Hereva oi laloa dobu bona oi badinaia hanaihanai
◆ Buka, piksa bona moale karadia mirodia amo oi gini siri
◆ Emu hebamo karana oi naria namonamo
◆ Hevaseha herevadia mirodia oi dadaraia
[Pictures on page 20]
Iefeta ena natuna kekenina, bona Paulo, bona Iehova ena hesiai taudia ma haida danu be idia headava lasi, to hahenamo momo idia davaria. Unai bamona oi karaia diba, a?