inai gabu idia diba. Inai gabu be koura badana, ia be mai hairaina bona niu audia ena uma badadia idia noho. Daba kahanai 6 okoloko ai, bouti lalonai ai heau sinavai dekenai. Sinavai ranuna be hevarivari ta bamona bona niu laulaudia be ranu dekenai idia hedinarai. Ai itaia ruma momo be au henudiai idia noho.

Ai laloa, “Iniseniai bouti do ia noho daudau eiava?” Lau idia hamaoroa kobara pusedia do ia mailaia tarakana be ia dika. Unai dainai, ai laloa bema hosi dekenai ai gui bona ai lao haraga inai koura ena atai gabuna, sinavai ranuna ororo amo ia moru diho gabuna ia mai henuai rumadia iboudiai ai vadivadi henidia diba. Ena be ai noho daudau lasi, to unai gabu ena ruma bese 12 bamona ese ai idia kamonai henia namonamo.

Motumotu Ma Haida Dekenai

Kilomita 40 bamona Nuku Hiva ena east kahana motumotu ta ladana Ua Huka ia noho. Inai motumotu be ia maragi, ena tano be namo momokani lasi, bona ororo momo idia noho. Vadaeni daba kahana 6 okoloko ai, kone dekenai ai lao. Unai kone be nadi kavakava, bona ai raka hanaia neganai dala maragina dekenai ororo ai daekau lao ela bona hora tamona, bena ai ginidae hanua badana dekenai, ena ladana be Hane. Vaia edia kara bamona edia dubu badana ia noho. Unai nega lalonai taunimanima momo be unai dubu dekenai idia lao, idia ese gado idauidau dekenai idia hereva ena tomadiho idia abia dae vadaeni dainai. To unai hanua dekenai ia noho mero badana ta ia lalo-hekwarahi momo tanobada ena kara dikadia dainai, bona ia ese tanobada paradaisona lalonai do ia noho diba sivaraina ia moalelaia.

Murinai ai lao Ua Pu motumotuna dekenai. Ai hoa nadi dubaduba ororodia ai itaia neganai, unai ororo ena lata be mita 1,200, bona edia tubuana be ori lalonai. Guna inai roro be ia pou bona lahi ia ore murinai inai nadi dubaduba idia noho. Inai motumotu dekenai hanua idauidau 5 idia noho, bona ai vadivadi henidia. Taunimanima dekenai paradaiso sivaraina ai harorolaia neganai idia moale bada, bona buka idia itaia neganai, idia gwau, “Mea kanahau!” (“Ia be mai hairaina!”) Unai gabu taudia momo ese unai buka idia ura henia dainai aiemai puse dekenai davara koukoudia, sipora, vaivai, orange, bona grapefruit idia udadia. Haakuti ena hanua maragina be ororo dekenai ia noho, bona unuseniai hahine ta mai natuna kekenina idia moale bada idia kamonaia herevana dainai, bona raruosi be ororo amo idia raka diho ela bona bouti ia naria noho gabuna, bona taunimanima iboudiai idia hamaorodia aiemai hereva idia kamonai bona buka idia abia totona.

Hanua badana, ladana Hakahau dekenai ai ginidae neganai ia daradara sisina, badina bouti nega sisina sibona ia noho unuseniai, edena bamona unai taunimanima 1,000 bamona do ai vadivadi henidia diba? Vadaeni, sivarai namona ia moalelaia tauna ta ese ena motuka ia henia ai totona, ia gwau: “Umui ura henia gabudia dekenai do ita lao.” Lagani haida gunanai Iehova ena Witness taudia ese buka bona magasin idia hariharilaidia inai gabu dekenai, to idia lao murinai fada tauna ta ia lao bona iboudiai ia abidia bona ia gabudia. Unai ia karaia dainai taunimanima idia gari. To sivarai namona idia ura kamonai henia dikadika dainai ruma bese 12 bamona ese edia gari idia koua bona buka idia abidia.

Murinai ma motumotu ta dekenai ai lao, ena ladana be Hiva Oa, Marquesas motumotudia iboudiai amo ia be namo herea, tubutubu gaudia idauidau momo idia tubu noho. Piksa ia penia tauna, Paul Gauguin ese unai gabu ena piksa momo ia penia. Ia ese Atuona dekenai ia noho ela bona ia mase. Hari ai ginidae unai gabu dekenai. Vadivadi taudia ese inai motumotu dekenai idia ginidae neganai hanua taudia idia gwau: “Umui lao vadaeni aiemai nadi diravana (tiki) umui itaia totona, a?” Inai nadi diravana be lata herea (mita 2.4), French Polynesia dekenai idia noho nadi diravadia iboudiai edia bada ia hanaia. Idia dekenai ai haere inai bamona: “Ia be mai ena matana to ia itaia diba lasi, ia be mai ena uduna to ia hereva diba lasi. Ai be nega sisina sibona ai noho iniseniai unai dainai ai ura mauri taudia ai hereva henidia, bona gau namona ai hahedinaraia idia dekenai.” Hahine ta be buka ia moalelaia bada herea dainai ena turana ia doria ta ia abia totona. Ena turana dekenai moni ia henia ia abia totona. Ma hahine ta ia gwau: “Lau lalo-parara vadaeni, Bible lau duahia be mai anina bada, hanuaboi iboudiai dubu dekenai lau lao guriguri totona ena anina be maragi.”

Hanuaboi ia kahirakahira neganai ai ginidae Hanaiapa dekenai, bona lamepa ena diari amo nese dekenai taunimanima ai hereva henidia totona. Ai be hel ena sivarai ai kikilaia hebou. Ai hamaorodia, ai gwau: “Bema natuna ta ia gwau-edeede, oi ese lahi badana do oi karaia bona lalonai oi negea, a?” Idia gwau: “Lasi!” Bena ai gwau: “Vadaeni, oi laloa Dirava ese ena natudia do ia hahisihisidia hanaihanai lahi dekenai, a?” Hahine 4 bona tau tamona idia kamonai namo herea. Dirava ese taunimanima ia “boiridia” tanobada dekenai do idia noho, bona “kara dika tauna do ia noho lasi” sivaraina idia moalelaia. Idia diba kara dika taudia do idia ore, hisihisi idia hanaihanai lasi.—Salamo 37:10.

Hiva Oa ai rakatania bona daudau lasi ai ginidae Tahuata motumotu maragina dekenai. Bouti tauna ta ia hevaseha, ia gwau lagani 100 gunanai inai hanua taudia ese tau kurokurodia haida idia anidia. To ai be idia danu ai herevahereva hebou sibona. Unai motumotu dekenai gado idauidau dekenai idia hereva ena tomadiho ia haginia tauna ai hereva henia, ia ura lasi buka ta ia abia, to ai ia doria galasi mai ranuna ai abia totona. Ai abia neganai, ia ese Iesu ena hereva Ioane 4:14 dekenai ena anina ia herevalaia kerere, ia gwau: “Lau henia ranuna do ia inua tauna be do ia ranu mase lasi ia lao bona hanaihanai.” Ai tanikiu henia, bona ai gwau: “Inai be ranu kavakava sibona, bona mai moale danu ai abia. To oi ese mauri ia havaraia ranuna bona lauma anianina ai henimu toho neganai oi dadaraia, a?” Inai hereva ese ena lalona ia veria bona buka haida ia abidia. Gabeai, bouti ia noho gabuna dekenai taunimanima ese ai idia kirikirilaia, idia gwau: “Reana ta ese emui buka ta idia abia lasi, a?” Unai gabu ena gaukara taudia edia biaguna ia gwau ia ura unai buka ia itaia, bona idia iboudiai vairadiai ta ia abia. Idia kamonai haida ese inai buka idia abia neganai idia hoa bamona!

Marquesas ena south kahana motumotu dokona ai lao henia, ena ladana be Fatu Hiva. Lagani 1595 ai, Spain tauna, ladana Álvaro de Medaña de Neyra, ese inai motumotu ia davaria, bona Peru ena gavana ta ena adavana ladana ia henia—La Marquesa de Mendoza. Fatu Hiva motumotuna be hairai momokani gabuna. Hanua badana, Omoa dekenai, ruma bese ta idia kamonai namo herea. Ai rakatanidia neganai ma haida ai hereva henidia totona, unai ruma hahine ia lao ena turadia ia haboudia totona, bona ai giroa mai neganai idia helai hegaegae, mai moale danu ai idia naria. Idia ura buka idia abia Bible ena hereva idia dibaia totona, bona hanuaboi dekenai Bible idia stadilaia neganai diba idia abia totona. Bouti dekenai ai giroa mai neganai, aiemai puse badana ta lalonai gau ta ia noho lasi, to ma puse ta ia honu orange bona sipora hauhuadia amo.

Tuamotus Dekenai Ai Lao

Bouti dekenai, dina tamona bona hanuaboi rua southwest kahanai ai heau lao, bena Tuamotus ena motumotu ta, Pukapuka dekenai ai ginidae. Dala ai hegaegaelaia unai bouti Araroa ena kapena tauna ese dina ta ta dekenai unai motumotu maragidia rua dekenai ia lao totona. Inai dala amo unai taudia ai haroro henidia diba, badina ma dala haida idia noho lasi idia kamonai totona.

Inai motumotu maragidia dekenai Pomotus taudia be tausen tamona bamona, bona ruma bese 30 bamona ese ai “boiboilaia” sivaraina idia kamonai henia mai moale danu. Kohu momo lasi rumana, niu audia henunai ai lao henia, bena haraga herea ruma hahine ia lao karu ranuna ia hoilaia, bona moni ia abia buka haida ai abidia totona. Unai ruma bese do ia laloaboio diba lasi, idia ese ai idia doria edia tini guhina henunai idia taua dae gwarume gabugabuna ai abia totona.

Ai Laloatao Noho

Taunimanima momo herea idia moale ai hereva henidia neganai, bona do ai lalodia boio diba lasi, bona ai diba Iehova ese do ia naridia. Ai moale bada Marquesas bona Tuamotus motumotudia dekenai ai lao haroro dainai. Ai itaia “Mauri Hanaihanai Paradaiso Dekenai” ena sivarai ai “boiboilaia” gaukarana ena siahu be bada herea!—Ta ese inai sivarai ia siaia.

Gilead ena Misinari Taudia—Edia Gaukara be Tamona

“WIKI gunanai umui be Student taudia, to hari wiki vairanai misinari taudia ai do umui lao!” Watchtower Bible School of Gilead ena klas namba 81 ia ore neganai Student taudia 23 ese unai hereva idia kamonai, bona idia moale. Taunimanima 4,262 idia ida idia hebou Iehova ena Witness edia Assembly Hall, Jersey City dekenai, September 7, 1986 lalonai, bona unai moale dinana do idia laloaboio haraga diba lasi.

Martin Poetzinger ese unai hebou ia kehoa guriguri amo bena Carey Barber be seamani tauna dainai ia ese hebou ena program ia kikilaia. Ia gwau sivarai namona harorolaia taudia tausen momo ese Gilead ena sikuli dekenai idia hadibadia, bona unai sikuli ena badina tamona be: misinari taudia idia siaidia lao tano idauidau dekenai Basileia ena sivarai idia harorolaia totona. Ia gwau inai misinari matamatadia dainai ita moale bada herea, badina unai hereva “Gilead,” idia hamomokanilaia badina idia be ‘witness orea badana ena kahana ta’!

Hereva hamatamaia totona Milton Henschel ia gwau inai Student taudia be Iesu ena nega aposetolo taudia hegeregeredia, diba idia abia gaukara badana idia karaia totona. Misinari tauna Paulo ese ena gaukara ia herevalaia inai bamona, ia gwau: “Lau be hesiai mai guia danu tauna lasi. To taunimanima ibounai edia hesiai mai guia danu tauna lau lao noho, momo herea do lau veria mauri totona.”—1 Korinto 9:19.

Paulo ena hereva ena anina be dahaka. Anina be inai misinari matamata taudia ese taunimanima idia lalodia bada be gau badana. Namona be idia ura taunimanima idauidau iboudiai idia durudia mauri ia havaraia sivarai namona amo—herevana unai taudia be ma tomadiho idauna ta idia goadalaia eiava lasi.

Hereva iharuana ia gwauraia tauna, Theodore Jaracz, ese unai misinari matamata taudia ia hamaorodia do idia siaidia siti idauidau dekenai sivarai namona idia harorolaia totona, idia siaidia lasi unai gabu dekenai idia loaloa kava totona holide taudia bamona. Ia hagoadadia idia ese Iesu bona ena hahediba taudia bona hari misinari haida idia tohotohodia totona, unai misinari taudia momo mai edia abidadama danu idia do gaukara noho idia siaidia gabudia dekenai. Ia gwau, “Gaukara tamona umui laloa noho. Kohu ura henia karana ese umui ia veria garina. Bema ‘emui matana do idia namo; unai anina be gaukara tamona do umui laloa noho.’ (Luka 11:34) Ma ia gwau: “Umui be Gilead misinari taudia dainai gaukara tamona do umui goadalaia, kamonai taudia umui tahudia bona sivarai namona umui harorolaia unai.”

Faktori Komiti tauna ta, Max Larson ese sisiba namona ia henidia, ia hamaorodia dahaka do idia karaia bema do idia siaidia gabudia dekenai hekwakwanai idia vara neganai. Ia gwau: “Umui haheauka, unai gabu umui rakatania lasi. Namona be unai hekwakwanai hanaia dalana umui tahua.” Edena bamona unai idia karaia diba? Ma ia gwau: “Dirava ena lalohadai unai hekwakwanai dekenai umui tahua.” (1Korinto 2:11-16) Unai tau Larson ia gwau gau badana be Iehova idia guriguri henia ena heduru abia totona bona ia gwau hanaihanai misinari taudia ese edia turana karana Dirava dekenai idia tahua be mai anina bada.

Watchtower Farms Komiti tauna ta, Lon Schilling ena hereva dekenai ia gwau idia ese lalohadai maorona idia abia bona idia dogoatao noho be gau badana. Inai henanadai ia henidia, ia gwau: “Bema gau ta ia vara dainai emui lalohadai umui haidaua be gau badana, dahaka do umui karaia. Ita be dala maorona ita abia isi diba, bona maduna be ita dekenai kara namodia ita havaraia totona.” Ia gwau Dirava ese “iseda kara iboudiai dekenai ita ia doria lasi.” Unai dainai namo lasi ita laloa nega ibounai Dirava ese ena heduru do ia henia. Ia gwau Iehova Dirava, ena Hereva, ena lauma helaga, bona ena orea edia hakaua dalana idia ura badinaia taudia ese lalohadai maorona do idia dogoatao noho diba.

Gilead Sikuli ena hahediba tauna ta, Ulysses Glass ena hereva lalonai inai henanadai ia henidia, ia gwau: “Kara namodia umui laloa bada, a?” Inai hahediba tauna ese haheitalai haida amo ia hahedinaraia “bema misinari taudia idia laloa namonamo bona kara namodia idia laloa bada inai ese do ia durudia Basileia gaukarana idia laloa bada totona.” Ia ese stampa ta ia hahedinaraia iboudiai idia itaia totona, bena ia hamaorodia inai stampa ena davana be ia maragi, to ena gaukara be mai anina bada badina be gau ta dekenai ia kamokau neganai, unai gau dekenai do ia noho ela bona idia siaia gabuna dekenai ia ginidae. Ia hamaorodia: “Namona be umui be unai stampa bamona bona gau ta dekenai do umui kamokau—unai be emui haroro gaukarana—ela bona hisihisi badana amo umui roho mauri bona umui lao henia gabuna dekenai umui ginidae.”

Gilead Sikuli ena hahediba tauna ta, Jack Redford be guna misinari gaukara ia karaia, bona ena hereva dokonai ia ese unai misinari matamatadia do idia davaria hekwakwanai haida ia gwauraidia. Ia gwau bema idia ese Iehova dekenai idia abidadama, hekwakwanai iboudiai idia hanaidia diba, herevana gado matamata ta idia tahua noho, o edia varavara itadia totona idia lalohisihisi, o ma taunimanima idaudia danu idia noho hebou, o unai gabu edia kara idauna idia manadalaia noho, eiava idia bona ma ta edia lalohadai ia idau dainai hekwakwanai idia vara. Ena hereva badana be inai, ia gwau: “Sibomui emui goada dekenai inai gaudia umui hanaia diba lasi. 1 Korinto 3:9 lalonai ia gwau, ‘Dirava ena gaukara ai karaia hebou noho.’” Ma ia gwau: “Emui gaukara umui karaia bena Iehova ese iena gaukara do ia karaia.”

Daba kahana ena hereva dokona tauna, Frederick W. Franz, Society ena presiden, ena hereva lalonai, ia gwau: “Watchtower Bible School of Gilead be harihari gauna Dirava ena amo.” Ia gwau Gilead Sikuli ena badina be “taunimanima idia hadibadia bona idia siaidia haroro gaukara idia karaia namonamo totona, bena unai amo taunimanima do idia diba Dirava ena Basileia, Iesu Keriso amo hari ia lohia noho.” Bena unai klas namba 81 taudia ia hamaorodia edia maduna badana be inai Basileia idia harorolaia. Ia gwau: “Hari umui haroro noho negana be mai anina bada taunimanima iboudiai dekenai. Unai dainai Iehova ese maduna ia henia ita dekenai tanobada ibounai lalonai Basileia ena sivarai namona ita harorolaia totona, bona Dirava ese ia kehoa roho mauri dalana taunimanima ita hadibaia totona.”

Gilead Sikuli idia haorea gwauraia taudia ese edia pass pepadia idia abia neganai idia moale bada herea unai sikuli idia kara dainai. Edia misinari gaukara dalana idia diba dainai, unai klas namba 81 taudia ese leta idia torea Hakaua Oreana bona Betele taudia dekenai, bona lalonai idia gwau mai edia abidadama danu Iehova Dirava ena kara do idia karaia, bona taunimanima dekenai ‘iena ladana do idia hanamoa.’ (2 Samuel 22:50) Adorahi kahanai haroro gaukara idau gabudia dekenai, New York dekenai, bona misinari gaukara gabudia dekenai idia haheitalaia bona drama ta idia karaia murinai Lyman Swingle ese Gilead hebouna ia koua guriguri amo.

Unai sikuli idia haorea student taudia 23 ese do idia karaia misinari gaukara dainai idia moale bada. Dahaka dainai? Idia ta ia gwau: Oiemu hesiai gaukara Dirava dekenai oi habadaia bona oi hanamoa diba a? Bema oibe, namona be oi goada karaia, unai sikuli idia haorea taudia hegeregeredia, idia hekwarahi misinari gaukara idia abia dae totona. Idia moale bada edia mauri ibounai lalonai Iehova ena hesiai gaukara idia karaia dainai, bona oi ese unai moale oi abia diba danu.—Malaki 3:10.

[Box on page 26]

“Tadikaka Larson ena hereva amo lau diba gau badana be egu lalohadai lau haidaua kara haida idia vara neganai. Misinari gaukara lau hagugurua totona gau badana be ‘tauanina karadia lau tahua lasi,’ to Iehova bona ena Natuna, Iesu, edia lalohadai hegeregerena lau abia be namo.”—Alain Saint-Jean ena hereva, ia idia siaia New Caledonia dekenai.

[Box on page 27]

“Tadikaka Glass ena hereva ese lau ia durua, hari lau diba kara namodia lau lalodia bada be namo. Namo lasi anina lasi gaudia ese ita idia veria. Gau iboudiai ita laloa namonamo be gau badana.”—Humphrey Hermanus ena hereva, ia idia siaia Suriname dekenai.

[Box on page 28]

“Tadikaka Redford lau kamonai henia noho lalonai egu mamina ia namo badina lau diba do ai davaria hekwakwanaidia be hekwakwanai matamatadia lasi. Guna haida ese inai hekwakwanai idia hanaidia, unai dainai, bema Iehova dekenai ai tabekau, bona sibomai emai goada dekenai ai tabekau lasi, do ai hanaidia diba danu.—Veronica Lipham ena hereva, ia idia siaia Papua New Guinea dekenai.

[Box on page 28]

“Iesu ia gwau: ‘Oiemu kohu oi lao hoia bona lau murina dekenai oi raka mai, … bona Dirava ena Basileia do oi harorolaia.’ (Mataio 19:21; Luka 9:60) Misinari gaukara ai tahua badina ai ura taunimanima momo ai durudia lauma dalanai, herevana unai gaukara be edeseniai, ai ura ai lao bona ai karaia.”—Fredrick Steiner ena hereva, ia idia siaia Guatemala dekenai.

[Box on page 28]

GILEAD SIKULI ENA LIST

Edia tano idauidau: 7

Idia lao henia tano idauidau: 12

Edia mauri lagani ena averes be: 30.3

Edia bapatiso laganidia ena averes be: 13.4

Edia pioneer laganidia ena averes be: 9.3

[Pictures on page 27]

COSTA, Alan and Betty United States

GANSLMEIER, Anton and Rita Germany

GONZALES, John and Cynthia United States

GRAULICH, Uwe and Katherine Germany

HERMANUS, Humphrey and Ludmila Netherlands Antilles

JOHANSEN, Bård and Ester Norway

KLOOSTERMAN, Otto and Yvonne Netherlands

LARSON, Gary and Annette Canada

LIPHAM, Mark and G. Veronica United States

SAINT-JEAN, Alain France

STEINER, Fredrick and Helen United States

SZYMANSKI, Cynthia United States

WILKE, David United States

Kudouna Idia Hamoalea Harihari Gaudia

INAI rau henuai Kerisendom ena tomadiho oreadia ese idia siaia letadia rua idia noho, inai bamona leta idia siaidia moni idia abia totona. Oi laloa inai bamona leta ese kudou ia hamoalea, a? Lasi momokani! Dirava ia hanamoa tomadihona habadaia bona gaukarana durua totona moni idia abia be gau badana. To, Keristen ena orea be edena dala amo moni idia abia Dirava ena ura idia karaia totona?

Haere do ita diba bema Keristen kongregesen ginigunana ena kara ita tahua, bona unai kongregesen ia haginia tauna, Iesu Keriso ena hereva Luka 6:38 dekenai ita laloa, ia gwau: “Taunimanima dekenai umui henia lao, vadaeni taunimanima do [idia] henia umui dekenai. Taunimanima ese emui puse do idia hahonua ela bona do ia bubua danu. Oibe, umui dekenai idia haria gauna be do ia hegeregere momokani, bona ia hanaia danu.” Iesu idia kamonai henia taudia ese unai haheitalai herevana idia lalopararalaia. Badina idia edia dabua dekenai poketi ta ia noho gau haida udaia totona. Unai poketi, (Greek herevana, kol’pos) idia hahanaia “mamuna” eiava “kemena,” bona edia beleta ataina dekenai edia dabua idia lokua poketi ta karaia totona, bona gau ta idia hoia neganai, do idia bubua vareai unuseniai.

Oi laloa hoihoi taudia ese poketi dekenai idia bubua vareai gauna do idia pataia diho namonamo hoia tauna dekenai ia be kohu bada herea ia henia totona, a? Sedira, ta lasi! To, bema Keristen taudia ese ogogami taudia idia durudia hebogahisi karadia amo, idia ese hebogahisi bada do idia davaria danu. Taunimanima oi kara henidia hegeregerena do oi davaria, ena be oi durudia bada eiava oi durudia maragi, taunimanima amo hahenamo do oi abia, to Iehova Dirava ese oi do ia hanamoa be gau badana.—2 Korinto 9:6; Galatia 6:7 oi hahegeregeredia.

Iesu ese sibona ena goada bona kohu ia henia taunimanima ia durudia totona, unai dainai gau momo ia davaria. Ia be durua tauna hereadaena. Mai ena goada bona ura ibounai ida ia ese Dirava ena Basileia ena sivarai namona ia harorolaia ogogami taudia dekenai. Ia karaia davana lasi, ia ura lasi moni idia henia ia haroro dainai. To gau ta dekenai ia dabu lasi. Taunimanima be mai moale ida idia durua noho haroro gaukara ia karaia totona.—Luka 7:22; 8:1-3.

Iesu ena henia karana dainai Simona, Petro, Iakobo, Ioane bona aposetolo taudia 12 oredia ese Iesu idia tohotohoa bona gau iboudiai idia rakatania haroro gaukarana karaia totona. (Luka 5:10, 11; 9:1-6) Unai bamona henia karana be namo ia havaraia hari inai nega lalonai danu. Iehova ena Witness taudia ese edia nega, goada bona kohu idia gaukaralaia haida ese Dirava ena Basileia ena sivarai namona idia kamonai henia totona. Bena murinai unai kamonai taudia danu idia haroro, bona ma haida idia bamodia sivarai namona harorolaia gaukarana habadaia totona.—Hereva Lada-isidia 11:25.

Iseda haroro gaukarana be harihari gauna ta, to kudouna hamoalea gauna ma ta ia noho danu. Tomadiho korikorina ena kara ta be heduru moni ita henia lalohadai maorona bona badina korikori dainai. (2 Korinto 9:9-14) Keristen ginigunadia be edena dala amo idia heduru?

Keristen Ginigunadia Idia Karaia Dalana

Lagani 33 C.E. ai, Keristen kongregesen idia haginia ena dina ginigunana dekenai, bapatiso idia abia taudia 3,000 ‘idia heduru heheni, idia aniani hebou, bona idia guriguri noho.’ Dahaka dainai unai bamona idia karaia? Idia ura edia abidadama matamatana idia hagoadaia idia ese “aposetolo edia hadibaia herevadia idia kamonai” noho totona.—Kara 2:41, 42.

Iuda bona Iuda tomadiho idia abia dae idau bese taudia be Ierusalem dekenai idia mai Pentekoste Ariana karaia totona. To idia momo ese Keristen tomadiho idia abia dae neganai idia ura idia noho gau haida idia diba totona bona edia abidadama matamatana hagoadaia totona. Vadaeni hekwakwanai ia havaraia, aniani bona ruma idia hegeregere totona. Unai vadivadi taudia haida be moni lasi ma nega sisina idia noho totona, to ma haida edia moni be bada. Unai dainai edia kohu idia haboudia bona idia haridia idia dabu taudia dekenai.—Kara 2:43-47.

Edena bamona unai taudia idia ubudia bona edia ruma idia henidia diba? Aposetolo taudia, hakaua orea hegeregerena, ese harihari gaudia idia haboudia bona idia haridia ta ta dekenai, edia ogogami hegeregerena. Unai dainai Keristen kongregesen ginigunana taudia ese sibodia edia kohu idia laloa bada lasi, to idia gaukaralaidia kongregesen taudia iboudiai durudia totona. (Kara 2:44; 4:32) Ma danu, “mai edia tano o ruma taudia ese edia gau idia hoia, bona edia davana moni idia abia lao, aposetolo taudia edia vairana dekenai idia atoa diho. Bona aposetolo taudia ese ta ta dekenai idia henidia, edia ogogami hegeregerena.”—Kara 4:34, 35.

Tano o ruma idia hoia bona unai moni idia atoa hebou karana idia karaia badina idia ura dainai. Ta ese idia doria lasi edia kohu harihari gauna ta idia henia totona; bona taravatu idia atoa lasi idia ogogami totona. Keristen taga taudia ese edia kohu iboudiai idia hoia lasi idia ogogami totona. To, unai nega lalonai edia Keristen tadikakadia dabu dainai, bona idia bogahisihisi henidia dainai, edia tano haida idia hoia bona unai moni idia henia Basileia gaukarana durua totona.—2 Korinto 8:12-15.

Hari inai nega lalonai danu, taunimanima ta ta ese edia tano o kohu idia henia International Bible Students Association of Papua New Guinea dekenai, eiava pepa ta dekenai, ( edia will unai), idia gwau idia mase murinai idia ura unai orea ese edia kohu o moni do idia abia. Vadaeni, unai anina be Iehova ena Witness edia Hakaua Oreana ese unai moni do idia gaukaralaia diba Basileia gaukarana durua totona. Unai harihari gaudia be heduru bada taunimanima ese lauma dalanai idia goada totona, Pentekoste dekenai heduru idia abia hegeregerena. To harihari gaudia henia karana be taravatu lasi.

Haboua Noho be Namo

Lagani 20 bamona, Pentekoste 33 C.E. murinai, aposetolo Paulo ese Korinto kongregesen taudia ia hamaorodia harihari gauna idia henia totona. Ia gwau: “Ekalesia orea durua totona moni lau ura herevalaia. Galatia ekalesia orea lau hamaoroa hegeregerena, umui danu lau hamaoroa, moni do umui haboua.” Bena murinai sisiba ia henidia, ia gwau: “Pura ena dina ginigunana ibounai umui ta ta ese emui rumai moni taina do umui haboua noho, ena bada be emui gaukara ena bada hegeregerena. Vadaeni do lau ginidae neganai boubou haboua gaukara be lasi. Vadaeni umui dekenai lau ginidae neganai, umui ese umui abia hidi taudia dekenai revareva ta do lau henia. Vadaeni unai taudia mai revareva danu do lau siaia, emui harihari gauna moni, Ierusalema dekenai do idia abia lao.” Reana, ruma bese ibounai, herevana idia taga eiava idia ogogami, idia kiki hebou bona moni hida idia henia idia herevaherevalaia, ita diba unai bamona idia karaia badina idia haboua “edia rumai.”—1 Korinto 16:1-3.

Paulo ena sisiba moni henia karana dekenai be hari inai nega kongregesen taudia ese idia badinaia diba danu. Edena bamona? Wiki ta ta iboudiai haboua noho be dala namona. Peru ena branch opesi tauna ia gwau, oiemu kongregesen ese hebou gabuna o Kingdom Hall ena renta davana bona ruma hanamoa davana ia karaia totona, gau badana be “moni bada henia lasi, to wiki ta ta o hua ta ta iboudiai sisina sisina oi haboua noho Basileia gaukara durua totona.” Oi laloa unai bamona kara be ia namo, a? Natudia oi hadibaia diba harihari gauna idia henia lou lou totona badina unai be edia tomadiho karana ta.

Unai dainai, harihari gaudia ita henia lalohadai maoromaoro bona ena badina korikori dainai, Dirava bona taunimanima edia kudouna idia hamoalea. 2 Korinto 9:7 lalonai, ia gwau: “Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.”