Mauri Ena Heau Helulu Lalonai Oi Hesiku Lasi!
“Ita vairanai ia noho heau heluluna lalonai do ita heau mai eda haheauka ida.”—HEBERU 12:1, NW.
1, 2. Inai dina gabedia ai, dahaka gaudia ese Iehova ena hesiai taudia idia hamoalea?
ITA be gau idauidau momo bona hekwakwanai momo idia vara negana lalonai ita noho. Lagani 80 mai kahana gunanai, lagani 1914 ai, Iesu be Dirava ena guba Basileia ena King ai ia lao. Unai neganai “Lohiabada ena Dina” bona inai tanobada ena “dokona negana” idia hamatamaia. (Apokalupo 1:10; Daniela 12:9) Unai murinai, nega ia kwadogi dainai, Keristani taudia idia diba mauri ena heau helulu lalonai idia hesiku lasi be namo. Dirava ena hesiai taudia idia hekwarahi Iehova ena guba kariota, iena guba orena, ida idia gaukara. Gau ta ese ia koua lasi, to ia gaukara noho Iehova ena ura hagugurua totona.—Esekiela 1:4-28; 1 Korinto 9:24.
2 Dirava ena taunimanima ese mauri hanaihanai abia ena ‘heau helulu’ lalonai idia heau neganai, moale idia davaria, a? Oibe, idia davaria! Idia moale bada badina Iesu ena tadikaka ginigabedia haboua gaukarana idia itaia, bona idia moale badina idia diba unai 144,000 taudia oredia dekenai Dirava ena maka atoa gaukarana be kahirakahira do ia ore. (Apokalupo 7:3, 4) Danu, idia moale bada herea badina idia diba Iehova ia horoa King ese ena uma kaia badana ia gaukaralaia “tanobada ena anina” ia utua totona. (Apokalupo 14:15, 16) Bona ia ese anina bada herea ia haboua! (Mataio 9:37) Ema bona hari, taunimanima milioni ima mai kahana ia haboua—idia be “hutuma bada herea, tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo.” (Apokalupo 7:9, NW) Ta ese unai hutuma edia momo ia gwauraia diba lasi, badina tau ta ese ia duahia diba lasi.
3. Edena bamona gaudia idia vara, to ita moale noho be namo?
3 Momokani, inai heau helulu lalonai ita heau haraga noho neganai, Satani ese ita ia hamorua eiava ita ia hametaua toho. (Apokalupo 12:17) Bona ita heau noho be mai ena hekwarahi, badina inai dokona negana ai tuari, hitolo bada, daihanai goreredia, bona hekwakwanai idauidau momo herea idia vara. (Mataio 24:3-9; Luka 21:11; 2 Timoteo 3:1-5) To, inai heau helulu ena dokona ia mai kahirakahira dainai, iseda lalona idia moale bada herea. Paulo be iena nega lalonai idia noho Keristani taudia ia hagoadaia inai kara idia karaia, bona ita karaia danu be namo, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale”!—Filipi 4:4.
4. Filipi Keristani taudia ese edena bamona karadia idia karaia?
4 Ita diba Paulo ia hereva henia Keristani taudia ese edia abidadama karana amo moale idia abia, badina Paulo ia gwau idia dekenai: “Lohiabada lalonai umui noho dainai, do umui moale.” (Filipi 3:1) Filipi kongregesen taudia ese hariharibada bona lalokau karadia idia hahedinaraia, bona edia hesiai gaukara idia karaia goadagoada bona mai edia ura ida. (Filipi 1:3-5; 4:10, 14-20) To aposetolo taudia edia nega ai idia noho Keristani taudia ibounai ese unai bamona kara idia hahedinaraia lasi. Hegeregere, Paulo be Heberu bukana ia torea neganai, ia torea henia Iuda Keristani taudia haida edia kara dainai ia lalo-hekwarahi.
“Ita Dogoatao Bona Badinaia be Namo”
5. (a) Keristani kongregesen ginigunana idia haginia neganai, Heberu Keristani taudia edia kara be edena bamona? (b) Lagani 60 C.E. bamona ai, Heberu Keristani taudia haida edia kara mani oi gwauraia.
5 Tanobada ena sivarai lalonai, Keristani kongregesen ginigunana taudia be Iuda bese taudia korikori bona guna Iuda tomadiho idia badinaia taudia, bona lagani 33 C.E. ai idia haginia Ierusalema dekenai. Edia kara be edena bamona? Bema ta be Kara bukana ena karoa ginigunadia ia duahia, do ia diba ena be dagedage idia davaria, to idia moale bona idia gaukara goadagoada. (Kara 2:44-47; 4:32-34; 5:41; 6:7) Lagani momo idia hanaia murinai, gau momo idia idau, bona Iuda Keristani taudia momo ese mauri ena heau helulu dekenai idia heau metairametaira. Buka ta ese edia noho lagani 60 C.E. bamona ai ia herevalaia, ia gwau: “Idia lahedo, idia hesiku, idia lalohisihisi edia helaro ia do guguru lasi dainai, edia helaro idia naria daudau dainai hari idia lalo-goada lasi, idia hekwarahi lasi bona edia mauri lalonai edia abidadama idia hahedinaraia lasi. Idia be Keristani taudia to edia guba helarona ena hairai idia laloa maragi.” Dahaka dainai horoa Keristani taudia be unai lalohadai idia abia? Bema Paulo ena revareva Heberu taudia dekenai (lagani 61 C.E. bamona ai ia torea) ena kahana haida ita laloa, unai ese ita do ia durua unai henanadai haerelaia totona. Unai revareva ita laloa ese ita do ia durua lauma dalanai do ita manoka lasi, guna unai taudia idia manoka bamona.
6. Tomadiho karana Mose ena Taravatu henunai bona tomadiho karana Iesu Keriso abidadama henia dainai edia idau haida be dahaka?
6 Heberu Keristani taudia be Iuda tomadiho oreana amo idia mai, unai orea ia gwau Mose ena amo Iehova ese ia henia Taravatu ia badinaia. Iuda Keristani taudia momo ese unai Taravatu idia laloa bada noho, badina lagani handred momo lalonai ia be Iehova lao henia dalana tamona, ia be taunimanima momo idia hoalaia tomadiho dalana, hahelagaia taudia idia noho, boubou idia karaia hanaihanai, bona taunimanima momo idia dibaia vadaeni dubu ia noho Ierusalema dekenai. Keristani tomadihona be idau. Namona be Keristani taudia be lauma dalanai gau idauidau idia itaia namonamo Mose bamona, ia be “[vaira negana ai] Dirava do ia henia davana namona ia laloa,” bona “ita itaia diba lasi Diravana, be Mose ese matana dekenai ia itaia bamona.” (Heberu 11:26, 27) Iuda Keristani taudia momo be lauma dalanai unai bamona idia itaia lasi. Mauri ena heau helulu lalonai idia heau namonamo lasi, to aena dika tauna bamona idia raka metairametaira.
7. Ita rakatania oreana be edena dala ai mauri ena heau helulu ita karaia dalana ia haidaua diba?
7 Hari inai negai unai bamona gauna ia vara, a? Gau ibounai be unai negai hegeregerena momokani lasi. To, Keristani taudia be heagi herevadia momo idia gwauraia taudia edia orea amo idia mai. Inai tanobada dekenai moale abia daladia idauidau momo idia noho, to nega tamona ai, taunimanima dekenai maduna metaudia ia henia. Danu, ita momo ita davaria iseda noho gabudia dekenai taunimanima idia hekokoroku bona momo be mataganigani bona sibona atoa guna lalohadaina idia hahedinaraia. Bema inai bamona tanobada ena siahu ese iseda lalona ia veria, iseda “lalona” do idia diari lasi. (Efeso 1:18) Edena dala ai mauri ena heau helulu lalonai do ita heau diba bema iseda dalana ita itaia goevagoeva diba lasi?
8. Edena dala idauidau ai Keristani tomadiho be Mose ena Taravatu henunai idia tomadiho karana ia hereaia?
8 Iuda Keristani taudia ia hagoadaia totona, Paulo ese idia ia hamaoroa Keristani oreana ena namo be Mose ena Taravatu ena namo ia hereaia. Momokani, Taravatu henunai Israela besena be Iehova ena taunimanima neganai, Iehova be ena peroveta taudia amo idia ia hereva henia. To, Paulo ia gwau, hari iena “Natuna dekena amo ita ia hereva henia. Iena Natuna dekena amo Dirava ese tanobada ibounai ia karaia. Bona Dirava ese iena Natuna ia abia hidi, vadaeni inai nega dokona neganai, gau ibounai be ia ese ia biagua noho.” (Heberu 1:2) Danu, Iesu be ena “bamona taudia” ibounai, Davida ena bese amo idia mai king taudia unai, ia hereaia. Ia be aneru ibounai ataiai danu.—Heberu 1:5, 6, 9.
9. Dahaka dainai Paulo ena nega ai idia noho Iuda Keristani taudia hegeregerena, namona be Iehova amo ‘ita kamonai vadaeni gaudia ita dogoatao bona badinaia’?
9 Unai dainai, Paulo ese Iuda Keristani taudia dekenai sisiba ia henia, ia gwau: “Dirava ena Natuna ena ladana ia bada momokani dainai, unai hereva momokani, ita kamonai vadaeni gauna, do ita dogoatao bona badinaia be namo. Namo lasi ita manokalaia, do ita boio garina.” (Heberu 2:1) Ena be Keriso ena kara idia dibaia be hahenamo badana, to namona be kara ma haida idia karaia. Namona be Dirava ena Hereva idia hakala henia namonamo, Iuda taudia edia orea ena siahu be edia lalona ia veria lasi totona. Ita danu be Iehova ia herevalaia gaudia “ita dogoatao bona badinaia be namo,” badina inai tanobada lalonai iseda lalona idia veria herevadia be idia halasia hanaihanai. Unai ena anina be sibona eda stadi karana ita hanamoa bona Baibel duahiduahi ena sediual namona do ita badinaia. Paulo be ena revareva amo Heberu taudia dekenai ia hereva hegeregerena, ena anina danu be hebou ita lao henia hanaihanai bona iseda abidadama ita gwauraia hedinarai. (Heberu 10:23-25) Unai bamona gaukara ese ita do ia durua lauma dalanai ita noga noho bona iseda helaro namona do ita itaia noho totona. Bema iseda lalona be Iehova ena lalohadai amo ita hahonua, inai tanobada ese ita do ia hametaua lasi eiava iseda laloa namonamo karana do ia hadikaia lasi.—Salamo 1:1-3; Aonega Herevadia 3:1-6.
“Umui Ta Ta Dekenai Durua Hereva Do Umui Henia”
10. (a) Dahaka do ia vara Iehova ena Hereva ia kamonai vadaeni to ia dogoatao bona badinaia lasi tauna dekenai? (b) Edena dala ai ‘ita ta ta dekenai durua hereva do ita henia diba’?
10 Bema lauma gaudia ita laloa momo lasi, gabeai reana do ita laloa Dirava ena gwauhamata idia momokani lasi. Aposetolo taudia edia nega ai, edia kongregesen taudia ibounai be horoa taudia sibona bona aposetolo taudia haida idia do mauri noho neganai, unai ia vara danu. Paulo be Heberu taudia dekenai sisiba ia henia, ia gwau: “Lauegu varavara taudia e, do umui naria namonamo, umui ta ese ia laloa kerere, iena abidadama be lasi, vadaeni Mauri Diravana do ia rakatania garina. Hari inai negai be Dirava ese ia herevalaia, ‘hari dina.’ Inai ‘hari dina’ ia do noho dainai, umui ta ta dekenai durua hereva do umui henia, emui lalona hagoadaia totona. Dina ibounai inai bamona do umui karaia, umui ta be kara dika ese ia koia garina, bona unai tau ese iena lalona be Dirava dekena amo do ia koua garina.” (Heberu 3:12, 13) Paulo ena hereva “umui naria namonamo” ese ia hahedinaraia ita gima noho be gau badana. Dika ese ita ia hadikaia diba! Reana abidadama lasi—“kara dika”—be iseda kudouna dekenai ia tubu matamaia, bona Dirava dekenai do ita raka kahirakahira lasi to do ita rakatania matamaia. (Iamesi 4:8) Paulo ese ita ia hamaoroa “umui ta ta dekenai durua hereva do umui henia.” Tadikaka edia hebamo namona ita abia be namo. “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.” (Aonega Herevadia 18:1) Unai bamona hebamo abia totona, Keristani taudia be kongregesen ena hebou bona hebouhebou badadia dekenai idia lao loulou.
11, 12. Dahaka dainai Keristani hahediba herevadia badadia sibona ita diba be hegeregere lasi?
11 Iena revareva ena dokona kahana ai, Paulo ese inai sisiba namona ia henia, ia gwau: “Nega ia ginidae vadaeni, umui be hadibaia taudia do umui halaoa totona. To umui be do diba maragi taudia. Unai dainai tau ta ese Dirava ena hereva, diba hamatamaia gaudia umui dekenai ia hadibaia lou be namo. Badina umui be rata sibona umui inua diba, umui be do hegeregere lasi aniani korikori do umui ania. . . . To aniani korikori be tau badadia idia ania diba. Idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:12-14) Toana be Iuda Keristani taudia haida be edia laloa maoromaoro karana idia habadaia lasi. Taravatu bona kopina utua karana dekenai diari ia bada ia lao, to diba matamata idia abia dae haraga lasi. (Kara 15:27-29; Galatia 2:11-14; 6:12, 13) Idia haida be edia sene karadia idia laloa bada noho, hegeregere pura ena Sabati dinana bona lagani ta ta amo Kara Dika ena Davana Karaia Dinana.—Kolose 2:16, 17; Heberu 9:1-14.
12 Unai dainai, Paulo ia gwau: “Namona be Keriso ena hadibaia hereva, diba hamatamaia gaudia ita rakatania. Bona iena hereva badadia do ita tahua.” (Heberu 6:1) Bema heau helulu aukana bona daudauna ai ia heau tauna ta ese aniani namona sibona ia ania, unai ese ia do ia durua ia haheauka diba totona. Unai hegeregerena, bema Keristani tauna ta ese ena lauma aniani ia laloa namonamo—bona “diba hamatamaia gaudia” sibona ia abia lasi—ia heaulaia dalana do ia badinaia diba ela bona ena dokona. (2 Timoteo 4:7 itaia.) Unai ena anina be hereva momokani “ena lababa, bona ena lata, bona ena ataiai, bona ena dobu” do ia tahua, unai amo lauma dalanai lo tauna ai do ia lao.—Efeso 3:18.
“Do Umui Haheauka”
13. Idaunegai, Heberu Keristani taudia edia abidadama hahedinaraia dalana be dahaka?
13 Pentekoste 33 C.E. maoromaoro murinai ia vara negana ai, Iuda Keristani taudia be dagedage bada herea idia davaria, to idia gini goada. (Kara 8:1) Reana Paulo ese inai hereva ia torea neganai unai nega ia laloa noho, ia gwau: “Nega gunana do umui laloa lou be namo. Dirava ena diari umui davaria murinai, hisihisi momo umui abia, to umui gini goada.” (Heberu 10:32) Unai bamona haheauka mai abidadama ida ese edia lalokau Dirava dekenai ia hahedinaraia, bona ia dainai Iehova dekenai idia raka kahirakahira, mai edia gari lasi. (1 Ioane 4:17) Paulo ese idia ia hamaoroa, namo lasi idia abidadama lasi dainai unai hahenamo idia negea. Idia ia hagoadaia, ia gwau; “Do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia. Badina be Buka Helaga ia gwau: ‘Nega daudau lasi, nega sisina sibona, inai ia mai noho Tauna be do ia ginidae. Ia be do ia naria noho lasi.’ ”—Heberu 10:35-37.
14. Ena be lagani momo lalonai Iehova ita hesiai henia vadaeni, to dahaka gaudia ese ita do ia durua ita haheauka totona?
14 To hari ita be edena bamona? Ita momo be hereva momokani ita dibaia matamata neganai, mai eda ura bada ida ita badinaia. Unai ura goadana ia do noho, a? Eiava ‘guna ita lalokau henia bada, to hari be lasi’? (Apokalupo 2:4) Iseda ura ia keru, a? Reana Aramagedono ita do naria noho dainai ita lalo-hisihisi sisina eiava ita hesiku, a? To namona be inai ita laloa: Hereva momokani ena namo ia maragi ia lao lasi, ena namo be guna ena namo hegeregerena. Iseda guba Pavapavana, Iesu, ese ita ia lohiaia noho. Iseda helaro, mauri hanaihanai tanobada paradaisona dekenai, ia do noho, bona Iehova ita tura henia noho. Bona namona be inai ita laloaboio lasi: “Ia mai noho Tauna be do ia ginidae. Ia be do ia naria noho lasi.”
15. Iesu bamona, edena dala ai Keristani taudia haida be dagedage dikadia idia haheaukalaia?
15 Unai dainai, Paulo ena hereva Heberu 12:1, 2 ai be maoro, ia gwau: “Namona be ita idia hametaua gaudia ibounai, bona ita idia guia noho kara dikadia do ita negea momokani. Vadaeni iseda vairana dekenai ia noho heau helulu, be mai haheauka danu do ita heau goada. Iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua, ela bona dokona. Iesu be satauro dainai ia hesiku lasi. Lasi momokani. Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.” Inai dina gabedia ai, Dirava ena hesiai taudia be gau idauidau momo idia haheaukalaia. Iesu be ena abidadama ia dogoatao ela bona ia mase hegeregerena, iseda tadikaka bona taihu haida ese dagedage dika herea idia haheaukalaia—dibura kamepa, hahisia karadia, hahine hadikaia karana, bona mase danu. (1 Petero 2:21) Edia badinaia karana ita laloa neganai, iseda kudouna lalonai eda lalokau idia totona be ia bada herea, ani?
16, 17. (a) Keristani taudia momo ese dahaka abidadama tohoa gaudia idia davaria? (b) Mauri ena heau helulu lalonai ita heau noho totona, dahaka ita laloatao be namo?
16 To Keristani taudia momo dekenai, Paulo ena hereva be maoro: “Umui ese kara dika umui koua toho noho, umui tuari henia bamona, mai emui goada danu. To emui tuari lalonai, emui rarana be ia do bubua lasi, ani?” (Heberu 12:4) To ita ibounai dekenai, inai tanobada lalonai, hereva momokani ena dala badinaia be mai ena hekwarahi. Haida be edia moni gaukara gabuna ai eiava sikuli gabuna ai ‘kara dika taudia ese mai badu danu idia dagedage henidia,’ edia hevaseha herevadia idia haheaukalaia bona kara dika karaia hedibagani idia dadaraia. (Heberu 12:3) Haida be edia lalona idia hadaia Dirava ena taravatu do idia badinaia, to hedibagani goadana ese idia ia hamanokaia. (Heberu 13:4, 5) Hereva momokani negea taudia be edia poisini herevadia amo tadikaka haida be lauma dalanai idia hamanokaia. (Heberu 13:9) Ma haida be tadikaka edia kara idauidau dainai edia moale ia boio. Keristani taudia haida be moale karadia bona laga-ani karadia idia tahua goadagoada dainai idia manoka. Bona momo herea ese inai tanobada dikana noholaia ena hekwakwanai momo ena metau idia mamia.
17 Momokani, unai karadia dainai iseda “rarana be ia do bubua lasi.” Bona hekwakwanai haida idia vara badina dala kererena ita abia hidi. To unai hekwakwanai ibounai ese iseda abidadama idia tohoa. Unai dainai namona be Iesu ena haheitalai namo hereana ta, ena haheauka, ita laloa noho. Namona be ita laloaboio lasi iseda helaro be gau namo hereana ta. Namona be ita daradara lasi to ita diba momokani Iehova “idia tahua taudia ibounai, be davana namona Dirava ese do ia henidia.” (Heberu 11:6) Bena lauma dalanai do ita goada bona mauri ena heau helulu lalonai do ita heau noho.
Ita Haheauka Diba
18, 19. Edena sivarai ia hahedinaraia Heberu Keristani taudia Ierusalema dekenai be Paulo ena sisiba idia badinaia?
18 Iuda Keristani taudia be Paulo ena revareva dainai dahaka idia karaia? Heberu taudia dekenai unai revareva ia torea murinai, lagani 6 idia ore neganai, Iudea tanona lalonai tuari ia vara. Lagani 66 C.E. ai, Roma ami taudia ese Ierusalema idia hagegea, bona Iesu ena hereva ia guguru: “Tuari orea ese Ierusalema do idia koua hagegea do umui itaia, vadaeni do umui diba, iena dokona ia kahirakahira vadaeni.” (Luka 21:20) To Ierusalema dekenai do idia noho Keristani taudia durua totona, Iesu ia gwau: “Unai neganai Iudea dekenai idia noho taudia be ororo dekenai do idia heau lao, bona hanua lalonai idia noho taudia be do idia heau murimuri dekenai, bona gunika dekenai idia noho taudia be hanua dekenai do idia raka vareai lasi.” (Luka 21:21) Unai dainai, Iuda taudia bona Roma taudia edia tuari heheni karana ese Iuda Keristani taudia do ia tohoa: Ierusalema, Iuda tomadiho gabuna badana bona dubu hairaina ena gabu do idia rakatania, a?
19 To Roma taudia be karaharaga idia lao, bona taunimanima be unai kara ena badina idia diba lasi. Reana edia tomadiho idia goadalaia Iuda taudia idia laloa unai kara ia hamomokania Dirava be edia hanua helagana ia gimaia. To Keristani taudia be dahaka idia karaia? Histori ia gwau unai hanua idia heautania. Bena, lagani 70 C.E. ai, Roma taudia idia giroa lou bona Ierusalema idia hadikaia ore bona taunimanima momo herea idia hamasea. Ioela ia perovetalaia “Lohiabada ena Dina Badana” ia ginidae Ierusalema dekenai. To abidadama Keristani taudia idia noho lasi. Idia heau bona ‘mauri idia davaria.’—Ioela 2:30-32; Kara 2:16-21.
20. Ita diba ‘Iehova ena dina’ badana be kahirakahira dainai, unai ese ita do ia doria dahaka ita karaia totona?
20 Hari inai negai, ita diba kahirakahira ‘Iehova ena dina’ ma ta be inai tanobada ena oromana dikana ibounai do ia hadikaia. (Ioela 3:12-14) Edena dina ai do ia mai ita diba lasi. To Dirava ena Hereva ese ita ia hamaoroa do ia mai! Iehova ia gwau do ia leiti lasi. (Habakuku 2:3; 2 Petero 3:9, 10) Unai dainai, ‘ita kamonai vadaeni gauna ita dogoatao bona badinaia be namo.’ Namona be ‘ita ia guia diba kara dikana’ ta, abidadama lasi karana, ita dadaraia. Herevana emu haheauka negana ena daudau be edena bamona to emu lalona oi hadaia do oi haheauka. Laloaboio lasi, Iehova ena kariota bamona guba oreana ia heau noho. Dirava ena ura do ia hagugurua. Unai dainai namona be ita ibounai be mauri ena heau helulu lalonai ita heau noho bona ita hesiku lasi!
Inai Oi Laloatao, A?
◻ Edena sisiba, Paulo be Filipi taudia dekenai ia torea sisibana, ese ita do ia durua mauri ena heau helulu lalonai ita haheauka totona?
◻ Edena kara ese ita do idia durua tanobada ena lalona veria karadia do ita koua totona?
◻ Edena dala ai ita ta ta ita durua diba, inai heau helulu lalonai ita kwalimu totona?
◻ Keristani tauna idia hametaua gaudia haida be dahaka?
◻ Iesu ena haheitalai namona be edena bamona ita ia durua ita haheauka totona?
[Picture on page 9]
Keristani taudia be heau helulu taudia bamona, heau helulu sibona idia laloa be namo
[Picture on page 10]
Gau ta lasi ese Iehova ena guba kariota, Dirava ena ura do ia hagugurua gauna, ia koua diba