Iehova Ena Dina Laloa Noho
“Nega dokona dekenai, . . . Dirava badinaia kara do idia kirikirilaia.”—2 PETERO 3:3.
1. Hari inai negai Keristani tauna ta be edena karaharaga lalohadaina ia abia?
LAGANI 66 lalonai ful-taim hesiai gaukara ia karaia tauna ta ia torea: “Hanaihanai egu lalona ai karaharaga lalohadai ia noho. Nega ibounai egu lalohadai be Aramagedono be kerukeru bamona do ia mai. (Apokalupo 16:14, 16) Egu tamana, bona egu tamana ena tamana bamona, aposetolo [Petero] ia hagoadaia hegeregerena lau mauri noho, ‘Iehova ena dina lau laloa bona naria noho.’ Lau laloa unai gwauhamata tanobada matamatana ‘lau itaia lasi, to egu lalona ia diba momokani unai gauna do lau abia.’ ”—2 Petero 3:11, 12; Heberu 11:1; Isaia 11:6-9; Apokalupo 21:3, 4.
2. Iehova ena dina ita naria noho ena anina be dahaka?
2 Petero ia gwau Iehova ena dina “do umui naria noho” ena anina be iseda lalona dekenai unai naria karana ita hadokoa lasi. Namona be ita laloaboio lasi Iehova ese iena gwauhamata tanobada matamatana ia haginia totona, inai tanobada ena oromana do ia hadikaia dinana be kahirakahira momokani. Namona be ita dekenai ia be momokani dainai ia ita itaia goevagoeva diba, ita vairanai ia noho bamona. Dirava ena idaunegai peroveta taudia dekenai ia be unai bamona, bona nega momo idia gwau kahirakahira do ia mai.—Isaia 13:6; Ioela 1:15; 2:1; Obadaia 15; Sepanaia 1:7, 14.
3. Dahaka ese Petero ia doria Iehova ena dina laloa dalana sisibalaia totona?
3 Dahaka dainai Petero ese ita ia hagoadaia namona be ita laloa “kerukeru bamona” Iehova ena dina do ia mai? Badina be haida ese Keriso ia gwauhamatalaia gauna, ena noho negana bona kara dika taudia do ia panisia henia negana, idia kirikirilaia matamaia. (2 Petero 3:3, 4) Unai dainai ena revareva iharuana ena karoa 3 ai, harihari ita laloa karoana, Petero ese idia kirikirilaia taudia edia samania herevadia dekenai haere ia henia.
Mai Hebogahisi ida Ia Noidia Idia Laloaboio Lasi
4 Petero ese ena tadikaka ura henia karana ia hahedinaraia inai karoa lalonai, idia ia gwauraia loulou “lauegu lalokau taudia.” Mai hebogahisi ida ia noidia idia dibaia vadaeni gaudia idia laloaboio lasi. Petero ena hamatamaia herevana be inai: “Lauegu lalokau taudia e, . . . umui emui lalodia do lau hagoadaia. Vadaeni mai emui laloa maoromaoro danu, lauegu hadibaia hereva ma do umui laloa lou. Peroveta helagadia gunaguna idia gwauraia hereva, bona Lohiabada bona Hamauria Tauna ena taravatu, aposetolo taudia umui dekenai idia hadibaia hereva, be do umui laloatao.”—2 Petero 3:1, 2, 8, 14, 17; Iuda 17.
5. Peroveta taudia haida be dahaka idia gwau Iehova ena dina dekenai?
5 Petero ese duahia taudia ia hagoadaia, peroveta taudia be “gunaguna idia gwauraia hereva” idia laloatao totona, to edena hereva? Keriso be Basileia siahuna ida ia noho negana bona Dirava idia badinaia lasi taudia hahemaoro henia karana idia perovetalaia herevadia unai. Guna Petero ese unai herevadia ia gwauraia momo. (2 Petero 1:16-19; 2:3-10) Iuda ese Enoka ia herevalaia, ia be Dirava be kara dika taudia do ia kota henia ia perovetalaia bona ena sivarai idia torea tauna ginigunana. (Iuda 14, 15) Peroveta taudia ma haida be Enoka murinai idia mai, bona Petero ena ura be idia torea gaudia ita laloaboio lasi.—Isaia 66:15, 16; Sepanaia 1:15-18; Sekaraia 14:6-9.
6. Edena hereva, Keriso bona ena aposetolo taudia edia, ese Iehova ena dina idia herevalaia bona iseda lalona idia hadiaria?
6 Danu, Petero ese ena revareva idia duahia taudia ia hamaoroa, namona be “Lohiabada bona Hamauria Tauna ena taravatu” idia laloatao. Iesu ena taravatu lalonai be inai hahegani: “Do umui naria namonamo . . . tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina.” “Umui naria namonamo, umui noga noho, badina be inai gaudia idia mai nega umui diba lasi.” (Luka 21:34-36; Mareko 13:33) Petero ese ita ia hagoadaia aposetolo taudia edia hereva ita kamonaia danu. Hegeregere, aposetolo Paulo ia torea: “Lohiabada ena Dina be do ia mai, henaoa tauna hanuaboi neganai ia mai bamona. Unai dainai, namo ita mahuta lasi, haida idia mahuta bamona. To namo ita noga noho, ita laloa goada noho.”—1 Tesalonika 5:2, 6.
Kirikirilaia Taudia Edia Ura
7, 8. (a) Dirava ena hadibaia herevadia idia kirikirilaia taudia be edena bamona taudia? (b) Unai taudia be dahaka idia gwau?
7 Ai herevalaia vadaeni hegeregerena, Petero be unai sisiba ia henia badina haida be unai bamona hadibaia herevadia idia kirikirilaia matamaia, idaunegai Israela taudia ese Iehova ena peroveta taudia idia hevaseha henia bamona. (2 Sivarai 36:16) Petero ia gwau: “Nega dokona dekenai, tauanina ena ura sibona idia karaia taudia be do idia hedinarai. Dirava badinaia kara do idia kirikirilaia.” (2 Petero 3:3) Iuda ia gwau unai bamona taudia be “Dirava do idia negea, bona sibodia edia ura dikadia do idia karaia.” Ia gwau “edia tauanina edia ura dikadia ese edia mauri do idia biagua noho, bona idia ese Lauma Helaga do idia abia lasi.”—Iuda 17-19.
8 Petero ia gwau unai hadibaia koikoi taudia, “tauanina ena ura dikadia, matabodaga karadia idia karaia noho” taudia, be lauma gaudia idia laloa lasi vaitani kirikirilaia karana idia karaia taudia huanai idia noho. (2 Petero 2:1, 10, 14) Mai edia hevaseha ida abidadama Keristani taudia idia henanadai henia, idia gwau: “Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.”—2 Petero 3:4.
9. (a) Dahaka dainai Dirava ena Hereva idia kirikirilaia taudia idia ura ena karaharaga lalohadaina idia hamanokaia? (b) Iehova ena dina ita naria noho karana be edena bamona ita ia gimaia?
9 Dahaka dainai unai idia kirikirilaia? Dahaka dainai idia gwau Keriso ena noho be reana do ia vara lasi, bona guna Dirava ese taunimanima dekenai kara ta ia karaia lasi bona dohore ia karaia lasi? Dirava ena Hereva ena karaharaga lalohadaina idia hamanokaia amo, unai tauanina ena ura ese ia biagua kirikirilaia taudia idia ura ma haida be lauma dalanai idia mahuta, bena mai mataganigani ida do idia veria haraga diba. Unai ese ita ia hagoadaia momokani lauma dalanai ita noga noho hari be namo! Namona be Iehova ena dina ita laloa noho bona hanaihanai ita laloaboio lasi ita ia itaia noho! Unai amo mai iseda lalo-goada bona kara goeva ida Iehova do ita hesiai henia diba.—Salamo 11:4; Isaia 29:15; Esekiela 8:12; 12:27; Sepanaia 1:12.
Mai Edia Ura ida Kara Dika Idia Karaia
10 Unai hereva idia kirikirilaia taudia ese mai anina bada gauna idia laloa lasi. Mai edia ura ida idia laloa lasi bona idia ura ma haida ese idia laloaboio. Dahaka dainai? Taunimanima do idia veria haraga totona. Petero ia torea: “Oibe, kara ta idia ura laloaboio.” Edena kara? “Kara be inai: Dirava ese guba bona tanobada, sibona ena oda hereva dekena amo ia karaia. Tanobada be ranu dekena amo ia karaia, bona ranu ese ia hagegea. To Dirava ese unai tanobada gunana be ranu dekena amo ia hadikaia ore, abata badana dekena amo.” (2 Petero 3:5, 6) Oibe, Iehova ese tanobada dekenai ia noho kara dika be Noa ena dina ai Abata lalonai ia haorea, bona Iesu ese unai ia herevalaia danu. (Mataio 24:37-39; Luka 17:26, 27; 2 Petero 2:5) Unai dainai, idia kirikirilaia taudia edia hereva be maoro lasi, “tanobada ia karaia negana ia mai bona harihari gau ta be idau lasi” be momokani lasi.
11 Reana unai taudia ese abidadama Keristani taudia idia kirikirilaia badina edia helaro ia do guguru lasi. Iesu be kahirakahira do ia mase neganai, ena hahediba taudia “idia laloa Dirava ena Basileia be unai nega dekenai do ia hedinarai.” Bena, ia toreisi lou murinai, idia nanadaia bema Basileia be maoromaoro do ia haginia. Danu, lagani 10 idia do noho ela bona Petero be ena revareva iharuana ia torea neganai, haida idia laloa aposetolo Paulo o ia idia bamoa taudia ese “revareva ta” o “hereva” ta ia siaia bona ia gwau Iehova “ena Dina ia ginidae vadaeni.” (Luka 19:11; 2 Tesalonika 2:2; Kara 1:6) To, ita gwau lasi Iesu ena hahediba taudia edia helaro be kerere, edia nega lalonai idia vara lasi sibona. To Iehova ena dina do ia mai!
Dirava Ena Hereva Ita Badinaia Noho Diba
12. Dirava ena Hereva ena peroveta herevadia ‘Iehova ena dina’ dekenai be edena bamona idia hahedinaraia idia momokani?
12 Guna ai herevalaia gauna be, Keriso ia do vara lasi neganai, peroveta taudia be nega momo taunimanima idia hadibaia Iehova ena hahemaoro dinana be kahirakahira. Lagani 607 B.C.E. ai, Iehova be ena gwau-edeede oreana taudia ia kota henia neganai, ‘Iehova ena dina’ ia laulaulaia negana ia vara. (Sepanaia 1:14-18) Gabeai, bese ma haida, Babulonia bona Aigupito danu, be idia hegeregerena ‘Iehova ena dina’ ia laulaulaia hisihisina idia abia. (Isaia 13:6-9; Ieremia 46:1-10; Obadaia 15) Idaunegai Iuda taudia edia oromana ena dokona idia perovetalaia danu, bona lagani 70 C.E. ai, Roma ena tuari taudia ese Iudea idia hadikaia ore neganai, unai ia vara. (Luka 19:41-44; 1 Petero 4:7) To Petero ese dohore do ia vara dinana, ‘Iehova ena dina’ badana, tanobada hegegemadai Abatana ena siahu do ia hanaia dinana ia herevalaia!
13. Histori lalonai, dahaka haheitalai ia hahedinaraia inai tanobada ena oromana be momokani do ia doko?
13 Petero ese unai hadikaia negana ia herevalaia matamaia inai bamona: “Iena oda hereva dekena amo.” Ia gwau vadaeni Abata be ia do mai lasi neganai, Dirava “ena oda hereva” dainai “tanobada be ranu dekena amo ia karaia, bona ranu ese ia hagegea.” Baibel be tanobada ia vara dalana ia herevalaia bona unai ranu ia noho ia gwauraia ese ia hahedinaraia Dirava ena oda, o ena hereva dainai medu ia diho neganai Abata ia vara diba. Petero ma ia gwau: “To harihari idia noho guba bona tanobada be Dirava ese, iena oda hereva dekena amo ia naridia noho. Oibe, idia noho hegaegae, ela bona Kota Badana Dinana dekenai. Unai neganai, lahi badana ese tanobada bona guba do ia araia ore, bona Dirava idia negea taudia be do idia boio.” (2 Petero 3:5-7; Genese 1:6-8) Iehova ena hereva, ita badinaia diba gauna, ese ia gwauraia! Ena dina badana ai ena lahi bamona badu amo “guba bona tanobada”—inai tanobada ena oromana —do ia haorea! (Sepanaia 3:8) To edena negai?
Idia Ura Bada Dokona Do Ia Ginidae
14. Dahaka dainai ita diba momokani “nega ena dokona ai” ita noho?
14 Iesu ena hahediba taudia idia ura idia diba edena negai dokona do ia ginidae, unai dainai ia idia nanadaia: “Do oi giroa mai, bona tanobada dokona danu, ena toana be dahaka?” Toana be Iuda besena ena dokona idia nanadailaia, to Iesu ena haere ese hari iseda negai ‘guba bona tanobada’ do idia ore negana ia herevalaia. Iesu ese tuari badadia, aniani be lasi, tano mareremarere, gorere, bona raskol karadia ia perovetalaia. (Mataio 24:3-14; Luka 21:5-36) Lagani 1914 amo, Iesu ese ia gwauraia “tanobada dokona” ai do ia vara toana ia guguru noho bona aposetolo Paulo ia gwauraia “nega ena dokona” do idia hahedinaraia gaudia idia vara danu. (2 Timoteo 3:1-5) Momokani, ita itaia gaudia idia hahedinaraia goevagoeva hari ita noho inai tanobada ena dokona negana ai!
15. Ena be Keriso ese ia hadibaia idia karaia lasi, to Keristani taudia be dahaka kerere idia karaia?
15 Iehova ena Witness taudia ese Iehova ena dina ena mai negana idia ura bada idia diba. Unai ura bada dainai, nega haida do ia vara negana idia gwauraia toho. To unai idia karaia neganai, Iesu ena hahediba taudia ginigunadia hegeregerena, edia Biagua ena sisiba idia badinaia lasi, ia gwau “inai gaudia idia mai nega umui diba lasi.” (Mareko 13:32, 33) Abidadama Keristani taudia be idia ura negana lalonai edia helaro ia guguru lasi neganai, taunimanima ese idia kirikirilaia. (2 Petero 3:3, 4) To herevana, Petero ia hamomokania Iehova ena dina do ia mai, Iena nega korikorina ai.
Iehova Ena Lalohadai Ita Abia be Namo
16 Petero ese ita ia hamaoroa lou, Iehova ena lalohadai nega dekenai ita abia: “Lauegu lalokau taudia e, inai hereva tamona do umui laloaboio lasi: Lohiabada ena vairana dekenai, dina tamona be lagani 1000 bamona, bona lagani 1000 be dina tamona bamona.” Iseda mauri laganidia be ia ida ita hahegeregerea neganai, lagani 70 o 80 sibona be kwadogi momokani! (2 Petero 3:8; Salamo 90:4, 10) Unai dainai bema toana be Dirava ena gwauhamata guguru negana ia mai haraga lasi, namona be Dirava ena peroveta tauna ena sisiba ita abia dae: “Sedira oi laloa iena mai [ia abia hidi vadaeni dinana] be haraga lasi, to do oi naria noho, ia be do ia vara momokani.”—Habakuku 2:3.
17 Dahaka dainai inai tanobada ena nega dokona ena daudau be momo idia laloa negana ena daudau ia hanaia? Petero ese ita ia hamaoroa badina namona dainai unai ia vara, ia gwau: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Iehova ese taunimanima ibounai edia namo ia laloa. Ia laloa bada gauna be taunimanima edia mauri, ia gwau: “Lau Lohiabada, mauri Diravana ese kara dika tauna ena mase lau moalelaia lasi. To dika tauna bema iena dika ia rakatania, vadaeni mauri ia davaria, unai kara dekenai do lau moale momokani.” (Esekiela 33:11) Unai dainai ita diba momokani dokona be iseda aonega bona lalokau Havaraia Tauna ena ura hagugurua negana korikorina ai do ia vara!
Dahaka Do Ia Ore?
18, 19. (a) Dahaka dainai Iehova be ena lalona ia hadaia vadaeni inai tanobada ena oromana do ia hadikaia? (b) Petero be inai tanobada ena oromana ena dokona be edena bamona ia herevalaia, bona dahaka gaudia do idia ore momokani?
18 Badina Iehova ese ena hesiai taudia ia lalokau henia momokani, idia hahisidia taudia ibounai do ia haorea. (Salamo 37:9-11, 29) Petero be guna Paulo ia laloa gauna ia laloa danu, unai hadikaia karana be idia diba lasi negana ai do ia vara. Petero ia torea: “Iehova ena dina be henaoa tauna bamona do ia mai, unai neganai guba do ia boio mai regena ida, to anina gaudia be idia siahu momokani amo do idia makohi ore, bona tanobada bona ia lalonai idia karaia gaudia be do idia hedinarai.” (2 Petero 3:10, NW; 1 Tesalonika 5:2) Guba korikori bona tanobada korikori be Abata ese ia hadikaia lasi hegeregerena, Iehova ena dina lalonai do idia ore lasi danu. Unai dainai dahaka “do ia boio,” eiava do ia hadikaia?
19 Tanobada taudia edia gavamani ese taunimanima ataiai, “guba” bamona, idia lohia, to do idia ore bona “tanobada,” eiava Dirava idia badinaia lasi taudia, be do idia ore danu. “Mai regena ida” ia hahedinaraia unai guba be do ia ore haraga. Inai tanobada ena taunimanima dikadia, eiava “anina gaudia,” do idia “makohi ore,” eiava do idia hadikaia ore. Bona “tanobada” bona “ia lalonai idia karaia gaudia” be “do idia hedinarai.” Iehova ese inai tanobada dikana ibounai ia haorea neganai, taunimanima edia dika karadia do ia hahedinaraia goevagoeva.
Oiemu Helaro Laloa Bada Noho
20 Badina be unai gau badadia be kahirakahira do idia vara, Petero ia gwau ‘iseda kara ibounai do idia helaga be namo, bona Dirava do ita badinaia namonamo. Ma Dirava ena dina do ita naria noho, bona do ia ginidae haraga totona do ita gaukara goada noho.’ Unai gaudia ita daradaralaia lasi momokani! “Guba be lahi ese ia araia amo do ia makohi ore bona anina gaudia be idia siahu momokani amo do idia veve!” (NW) (2 Petero 3:11, 12) Unai gaudia be kerukeru idia hamatamaia diba dainai, namona be gau ta ita karaia eiava ita palanilaia neganai unai gaudia ita laloa.
21 Petero be hari ita ia hamaoroa unai gau gunadia edia gabu idia abia gaudia be dahaka, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13; Isaia 65:17) Unai neganai namo momokani do ita mamia! Keriso bona ia danu idia lohia taudia 144,000 ese “guba” gavamani “matamata” do idia karaia, bona inai tanobada ena dokona amo idia roho mauri taudia be inai “tanobada matamata.”—1 Ioane 2:17; Apokalupo 5:9, 10; 14:1, 3.
Karaharaga Lalohadaina Bona Kara Goeva
22 Petero ma ia gwau: “Unai dainai, lauegu lalokau taudia e, inai gaudia umui naria noho dainai, do umui noho namonamo. Mai goevagoeva bona kerere lasi danu Dirava ena vairanai do umui noho. Bona Dirava danu mai maino danu do umui noho. Do umui laloaboio lasi, Lohiabada ese umui ia naria noho, mai haheauka danu . . . iena hamauria do umui davaria totona.” Bema mai eda ura ida ita naria bona toana be Iehova ena dina ia mai haraga lasi neganai, ita laloa unai be Dirava ena haheauka karana. Unai lalohadai ese ita do ia durua lauma dalanai mai goevagoeva bona kerere lasi ida do ita noho. To, dika ia havaraia gauna ia noho! Petero ia hamaoroa “varavara lalokau tauna Paulo” ena revareva lalonai, “iena hereva haida edia anina davaria be auka. Vadaeni daradara bona diba lasi taudia haida ese unai hereva edia anina idia gwauraia kerere, Buka Helaga ena hereva haida edia anina idia gwauraia kerere bamona. Inai bamona idia karaia taudia ese sibodia idia hadikaia ore noho.”—2 Petero 3:14-16.
23 Hadibaia koikoi taudia ese Paulo ia torelaia gauna, Dirava ena hariharibada, idia gaukaralaia lebulebu karadia idia karaia diba totona. Reana Petero ese unai ia laloa noho ena sisiba dokona ia torea neganai, ia gwau: “Lauegu lalokau taudia e, inai gaudia umui diba vadaeni. Unai dainai do umui naria namonamo, koikoi taudia ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.” Bena ena revareva ia hadokoa inai hagoadaia herevana amo, ia gwau: “Iseda Lohiabada bona Hamauria Tauna Iesu Keriso ena hariharibada, bona iena diba, bona laloa diari lalonai do umui tubu daekau noho.”—2 Petero 3:17, 18.
24. Namona be Iehova ena hesiai taudia ibounai ese dahaka lalohadai idia abia dae?
24 Ita itaia goevagoeva diba, Petero ia ura ena tadikaka ia hagoadaia. Ia ura idia ibounai be guna ai herevalaia tauna, unai abidadama mauri lagani 82 Witness tauna, ena lalohadai idia abia, ia gwau: “Aposetolo tauna ia hagoadaia hegeregerena lau mauri noho, ‘Iehova ena dina lau laloa bona naria noho.’ Lau laloa unai gwauhamata tanobada matamatana ‘lau itaia lasi, to egu lalona ia diba momokani unai gauna do lau abia.’ ” Namona be ita ibounai be unai bamona ita mauri noho.
Edena Bamona Do Oi Haere?
◻ Iehova ena dina ita “naria noho” ena anina be dahaka?
◻ Dirava ena hereva idia kirikirilaia taudia be mai edia ura ida dahaka idia laloa lasi, bona dahaka dainai?
◻ Dahaka dainai unai bamona taudia be abidadama Keristani taudia idia kirikirilaia?
◻ Edena bamona laloa dalana ita dogoatao noho be namo?
4. Petero ia ura dahaka ita laloatao?
10. Petero be edena dala ai ia hamomokania Dirava ena hereva idia kirikirilaia taudia idia maoro lasi?
11. Idaunegai Keristani taudia haida idia laloa edia nega ai edena helaro do ia guguru dainai haida ese idia kirikirilaia?
16. Namona be dahaka sisiba ita badinaia?
17. Ena be nega dokona ena daudau be momo idia laloa negana ena daudau ia hanaia, to dahaka ita diba momokani?
20. Ita diba vaira negana ai unai gaudia do idia vara dainai, iseda mauri ena heau dalana be edena bamona ia idau be namo?
21. Hari idia noho guba bona tanobada edia gabu do idia abia gaudia be dahaka?
22. (a) Lauma dalanai mai goevagoeva bona kerere lasi ida do ita noho totona, ita ia durua gauna be dahaka? (b) Petero ese edena dika ia havaraia gauna ia gwauraia?
23. Petero ena sisiba dokona be dahaka?
[Picture on page 23]
Iehova ena dina oi laloa noho . . .
[Picture on page 24]
. . . bona ia murinai do ia vara tanobada matamatana