Emu Dava Bada Gaudia amo Iehova Oi Hanamoa—Edena Bamona?
“OIEMU uma ena anina namodia, be Lohiabada dekenai do oi henia, oiemu [hanamoa] karana Lohiabada dekenai be unai.” Inai aonega herevana, Dirava ena lauma amo ia havaraia bona, lagani 2,600 idia ore vadaeni idia torea herevana lalonai, Iehova ena hahenamo bada abia karana ia herevalaia, badina torea tauna be ma ia gwau: “Oiemu aniani haboua gabuna be do ia honu, bona uaina be momo herea dainai, haboua gabuna dekenai atoa be ia hegeregere lasi.”—Aonega Herevadia 3:9, 10.
To Iehova ita hanamoa ena anina be dahaka? Dahaka dava bada gaudia amo Iehova do ita hanamoa? Bona edena bamona unai ita karaia diba?
Iehova Oi Hanamoa
Baibel lalonai, Heberu gado hereva badana hanamoa totona be ka·vohdhʹ, ena anina be “metau.” Unai dainai, ta ita hanamoa anina be do ita laloa ia be tau eiava hahine badana, namona, eiava ia be mai ena namo bada. Heberu herevana ma ta hanamoa totona be, yeqarʹ, ena anina idia hahanaia “dava bada” eiava “dava bada gaudia.” Unai hegeregerena, Greek herevana ti·meʹ, Baibel lalonai idia hahanaia “hanamoa,” ese anina bada, eiava dava bada ia gwauraia. Unai hegeregerena, ta ese ma ta ia hanamoa anina be ia ese unai tauna ia matauraia eiava ia laloa bada.
Hanamoa be mai ena anina ma ta. Abidadama Iuda tauna Morodekai ena sivarai mani ita laloa, nega ta ia be idaunegai Parasa ena King Ahasuero idia ura alaia mase karana ta ia hahedinaraia. Gabeai, king ia davaria Morodekai ena kara namona dainai idia hanamoa lasi neganai, iena praiminista, Hamana ia nanadaia, king ese ia ura do ia hanamoa tauna dekenai dahaka do ia karaia. Hamana ia laloa unai hemataurai karana be ia totona, to ia kerere! To, Hamana ia gwau, unai bamona tauna be “king ena dabua” amo do idia hahedokilaia bona king ena “hosi ena latanai do ia helai.” Ma ia gwau: “Lohia tauna badana ese hosi be hanua ena ariara badana do ia hakaua hanaia. Bona lohia tauna badana ese unai tau ena vairanai do ia raka, do ia boiboi, do ia gwau, ‘King ese ia moalelaia tauna, be inai bamona ia hanamoa noho!’ ” (Eseta 6:1-9) Unai kara ai, tau ta hanamoa karana be ariara lalonai idia hakaua lao unai amo taunimanima ese do idia laloa bada.
Unai hegeregerena, Iehova hanamoa be mai ena kahana rua: ita ta ta ese ia ita matauraia bada bona ariara dekenai iena ladana hanamoa gaukarana ita karaia bona unai gaukara karaia dalana ita durua danu.
Oiemu Dava Bada Gaudia—Idia be Dahaka?
Iseda dava bada gaudia be iseda mauri, iseda nega, iseda aonega, bona iseda goada. Iseda kohu be edena bamona? Iesu ese ogogami vabuna be dubu helaga ena moni mauana lalonai moni maragidia rua ia udaia ia itaia neganai ia gwauraia herevana mani ita laloa. Ia gwau: “Momokani umui lau hamaoroa, inai vabu mai ogogami danu ia udaia moni ese idia ibounai edia moni ia hanaia. Badina be idia ese edia moni bada herea dekena amo sisina sibona boubou maua dekenai idia udaia, to inai vabu be mai ogogami danu, to ia ese iena moni ibounai, iena mauri dekenai durua gauna ia udaia.” (Luka 21:1-4) Iesu ese unai vabu ia hanamoa badina ena kohu ia gaukaralaia Iehova ena tomadiho dalana durua totona.
Vadaeni, ia hedinarai goevagoeva, Solomona ese ia herevalaia dava bada gaudia be iseda kohu ia herevalaia danu. Bona inai hereva “oiemu uma ena anina namodia” ese iseda dava bada gaudia namo hereadia Iehova dekenai do ita henia lalohadaina ia hahedinaraia.
To, Dirava be edena bamona ita hanamoa unai bamona kohu ita henia neganai? Gau ibounai be iena, ani? (Salamo 50:10; 95:3-5) King Davida be mai ena kudouna ibounai ida Iehova ia guriguri henia neganai, ia gwau: “Gau ibounai be oi dekena amo idia mai.” Bona dubu haginia totona ia bona ena taunimanima ese idia henia harihari gaudia bada herea ia gurigurilaia neganai, Davida ia gwau: “Oi sibona oiemu gau, be ma ai henia lou vadaeni oi dekenai.” (1 Sivarai 29:14) Unai dainai Iehova dekenai harihari gaudia ita henia neganai, ita be iena kudou namo amo ita ia henia gaudia ita henia giroa ia dekenai. (1 Korinto 4:7) To, guna ita herevalaia hegeregerena, Iehova hanamoa anina be ma haida vairanai Iehova ita abia isi. Bona tomadiho momokanina durua totona ita gaukaralaia harihari gaudia be Dirava hanamoa gaudia. Baibel lalonai unai bamona dala ai Iehova hanamoa karadia edia haheitalai namodia idia noho.
Idaunega Haheitalai
Lagani 3,500 gunanai, Iehova ese tano gagaena ai Israela taudia totona tomadiho palai dubu ia ura haginia gwauraia neganai, idia ese dava bada kohu haida do idia haboua be namo, Iehova ese ia gwauraia haginia dalana hegeregerena. Iehova ese Mose ia hamaoroa ‘harihari gaudia idia ura idia henia taudia ese Iehova dekenai harihari gauna do idia henia.’ (Esodo 35:5) Unai sivarai dekenai ma ia gwau: “Harihari gaudia idia ura idia henia taudia ibounai ese edia harihari gaudia be Lohiabada dekenai idia mailaia, Palai Dubu do idia haginia totona. Idia ese ma Palai Dubu lalonai do idia noho gaudia bona kohu, bona dabua helagadia karaia gaudia danu idia mailaia.” (Esodo 35:21) Mai edia ura ida idia henia harihari gaudia be gaukara totona idia ura abia kohu ia hanaia momokani, unai dainai taunimanima idia hamaorodia bena “harihari gaudia idia hadokoa”!—Esodo 36:5, 6.
Haheitalai ma ta mani ita itaia. Palai dubu ena gaukara ia ore bona idia hegaegae dubu helagana idia haginia gwauraia neganai, Davida be ena natuna Solomona ese do ia haginia dubu helagana totona, sibona ena harihari gauna badana ia henia. Ma haida ia boiridia danu harihari gaudia idia henia totona, bona taunimanima idia kamonai bona dava bada gaudia idia henia Iehova dekenai. Siliva bona golo ena davana be reana 67 bilioni kina bamona hari inai nega ena golo davana ita laloa neganai. “Unai taunimanima ese mai edia laloa namo danu unai harihari gaudia momo Lohiabada dekenai idia henia dainai, idia be mai moale bada danu.“—1 Sivarai 29:3-9; 2 Sivarai 5:1.
“Harihari Gaudia” Hari Iseda Negai
Iseda nega lalonai harihari gaudia henia karana mai moalena be edena bamona ita karaia diba? Hari inai nega ai tanobada lalonai idia karaia mai anina bada gaukarana be Basileia ena sivarai harorolaia bona hadibaia taudia halaoa gaukarana. (Mataio 24:14; 28:19, 20; Kara 1:8) Bona Iehova ese Basileia ena tanobada gaukara be iena Witness taudia dekenai ia henia.—Isaia 43:10.
Ia hedinarai goevagoeva, Iehova ena Witness taudia edia gaukara idia karaia totona moni be gau badana. Kingdom Hall, Hebouhebou Rumadia, brens opesi, faktori, bona Betele rumadia haginia bona hanamoa gaukaradia karaia totona moni bada idia gaukaralaia. Baibel bona Baibel idia herevalaia buka bona magasin be gado idauidau dekenai idia printaia bona haria gaukarana lalonai moni bada idia gaukaralaia danu. Unai bamona gaukara ena davana be edena bamona idia karaia? Taunimanima edia ura amo idia henia harihari gaudia sibona amo!
Harihari gaudia momo be kohu momo lasi taudia—Iesu ese ia herevalaia vabu bamona—ese idia henia. Idia ura lasi Iehova hanamoa karana idia reaia dainai, moni sisina “edia goada hegeregerena idia henia,” bona nega haida, “edia goada ia hanaia gauna” idia henia danu.—2 Korinto 8:3, 4.
Aposetolo Paulo ese Korinto Keristani taudia ia hamaorodia: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:7) Mai moale ida henia ena anina be do ita hegaegae namonamo. Paulo ese Korinto taudia ia hamaorodia: “Pura ena dina ginigunana ibounai umui ta ta ese emui ruma ta ta dekenai moni do umui haboua noho, ena bada be emui gaukara davana ena bada hegeregerena. Vadaeni do lau ginidae neganai, moni haboua gaukara ena hekwarahi be lasi.” (1 Korinto 16:2) Unai hegeregerena, hari inai negai Basileia ena gaukara durua totona sibodia edia ura hegeregerena, harihari gaudia idia ura idia henia taudia be idia davaria moni sisina idia atoa diba unai karaia totona.
Iehova ese Ia Idia Hanamoa Taudia Ia Hanamodia
Ena be tauanina dalanai kohu momo abia karana be lauma dalanai taga karana ia havaraia lasi, to iseda dava bada gaudia—iseda nega, iseda aonega, bona iseda moni bona kohu—ita gaukaralaia Iehova ita hanamoa totona ese hahenamo bada do ia mailaia. Badina be gau ibounai ia biagua Diravana, ia gwau: “Oi henia bada noho, vadaeni do oi noho namo. Taunimanima haida do oi durua, vadaeni haida ese oi do idia durua.”—Aonega Herevadia 11:25.
King Davida ia mase murinai, iena natuna Solomona be ena tamana ese ia haboua harihari gaudia ia gaukaralaia dubu helagana hereadaena ia haginia totona, Iehova ena hereva hegeregerena. Bona Solomona be Dirava tomadiho henia karana dekenai ia goada noho lalonai “Iuda bona Israela taudia be maino danu idia noho.” (1 King Taudia 4:25) Aniani rumadia idia honu, bona vine ranuna idia atoa gaudia idia honu bona idia bubua diho—Israela taudia ese edia dava bada gaudia amo Iehova idia hanamoa ena nega ibounai lalonai.
Gabeai, peroveta tauna Malaki amo, Iehova ia gwau: “Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.” (Malaki 3:10) Hari inai negai, lauma dalanai Iehova ena hesiai taudia idia taga ese ia hahedinaraia Dirava be iena gwauhamata ia hagugurua noho.
Iehova be ita dekenai ia moale Basileia ena gaukara ita karaia neganai. (Heberu 13:15, 16) Bona ia gwauhamata ita do ia naria bema ita ese ‘Basileia bona ena kara maoromaoro ita tahua guna.’ (Mataio 6:33) Iseda kudouna amo mai moale bada ida, Iehova ita hanamoa iseda dava bada gaudia amo.
[Box on page 28, 29]
HAIDA ESE HENIA KARANA IDIA HAHEDINARAIA DALADIA KONTRIBUSEN MONIDIA, TANOBADA IBOUNAI GAUKARA DURUA TOTONA
Momo ese edia moni idia atoa hegaegae, maua ta ladana “Basileia Gaukarana Kontribusen Monina” lalonai do idia udaia totona. Hua ta ta iboudiai, kongregesen ese unai moni be Society ena hedikwota Brooklyn, New York dekenai, eiava ena brens opesi ta dekenai idia siaia.—Mataio 24:14.
Taunimanima ese kontribusen monina idia siaia diba International Bible Students Association of Papua New Guinea Inc., Box 636, Boroko, NCD 111 dekenai. Mai davana bada herahera gaudia eiava dava bada gaudia idaudia danu idia henia diba. Revareva ta ida idia siaidia be namo, unai revareva ai idia gwau idia be harihari gaudia.
KONTRIBUSEN MONINA MAI TARAVATUNA Taunimanima ese moni be Watch Tower Society idia henia diba, trust fund ai do idia naria totona, to bema henia tauna ia dabu bona ia ura ena moni ia abia lou, do idia henia lou diba. Bema oi ura ma hereva haida oi diba, namona be Society dekenai leta oi torea lauri kahana ai ia noho adres dekenai.
Palanilaia Henia Gaudia
Kontribusen moni bona mai taravatu kontribusen sibona lasi, to dala ma haida idia noho Basileia ena gaukara tanobada hegegemadai durua totona. Idia haida be inai:
Insurens: Bema ta ese life insurens ia hoia o moni be retirement fund ta ai ia atoa, Watch Tower Society ena ladana ia torea diba, bena ia mase neganai eiava ia buruka neganai unai moni do idia abia. Namona be unai bamona ia karaia tauna ese Society ia hadibaia.
Banika Akaun: Ta ena banika ena taravatu hegeregerena, dala ia karaia diba Watch Tower Society ese ena moni do idia gaukaralaia ia do mauri lalonai, eiava ia mase neganai do idia henia Society dekenai. Namona be unai bamona ia karaia tauna ese Society ia hadibaia.
Share Monina: Ta ena share monina be Watch Tower Society dekenai ia hariharilaia diba, eiava dala ia karaia diba unai share be idia edia, to ato-kau monina be ia ese do ia abia.
Tano Bona Ruma: Ta be ena ruma o tano, ia hoia diba gauna, be Watch Tower Society dekenai ia henia diba harihari gauna bamona, eiava ia noholaia diba ela bona ia mase bena Society ese do ia abia momokani. Bema ta ia ura unai bamona do ia karaia, namona be Society ia hadibaia guna.
Wills Bona Trusts: Bema ta ena ura be ia mase neganai Watch Tower Society ese ena tano, ruma, kohu, o moni do idia abia, loea dekenai ia lao be namo, will pepana, mase murinai kohu hariharilaia gwaumaoro pepana ai, iena ura do ia torea. Eiava bema ena moni be trust fund ai ia noho, ia ese Society ena ladana be trust agreement pepana ai ia torea diba unai moni do idia abia totona. Tano haida ai, bema ta ese ena trust monina be tomadiho oreana ta ia henia, takisi moni haida do ia henia lasi. Namona be will eiava trust pepana ena kopi ta be Society dekenai ia siaia.
Unai palanilaia henia gaudia idia laloa taudia bema idia ura hereva haida idia diba, namona be International Bible Students Association of Papua New Guinea Inc., Box 636, Boroko, NCD 111, telefon namba 325 3011, eiava Society ena opesi oiemu tano dekenai oi tore henia eiava oi rini henia.