Tanobada Matamata Dekenai Oi Mauri Totona Oi Hegaegae
“Lota ena adavana umui laloa.”—LUKA 17:32.
1. Inai stadi dekenai, edena idau negai sivaraina ese Dirava ena hamauria karana ia herevalaia bada, bona edena dala ai unai ese ita ia durua diba?
IEHOVA ese Noa bona iena ruma bese ia hamauria karana ia herevalaia murinai, aposetolo Petro ese ma hahemauri haheitalaina ta ia herevalaia. Petero Iharuana 2:6-8 dekenai ita duahia hegeregerena, ia ese Sodoma bona Gomora araia ore negana ia herevalaia. Unai sivarai idia torea ita ia durua totona. (Roma 15:4) Unai hahemauri ena sivarai be iseda kudou dekenai ita atoa neganai, ita ia durua Dirava ena tanobada matamata dekenai ita roho mauri totona.
Inai Tanobada Taudia edia Mauri Dalana Ita Laloa Dalana
2. Sodoma bona Gomora taudia be dahaka idia karaia dainai, Dirava ese ia hadikadia ore?
2 Badina be dahaka unai hanuadia bona edia taunimanima idia hadikaia ore? Aposetolo Petro ia gwau idia “lebulebu” dainai. (2 Petero 2:7) Greek herevana ta amo unai hereva idia hahanaia bona ena anina be Sodoma bona Gomora taudia be kara dika idia karaia neganai idia be taravatu bona siahu idia laloa lasi momokani, idia kara dika neganai idia be hemataurai lasi karana idia heagilaia. Iuda siri 7 ia gwau idia “sihari kava bona kara bodaga idauidau idia karaia momo” bona ‘hidio idia gaukaralaia kerere.’ Edia kara badana ia hedinarai ‘Sodoma ena tatau, . . . uhaudia bona burukadia’ be Lota ena ruma dekenai idia mai neganai, bona iena vadivadi taudia totona idia boiboi, edia lalohadai mirodia dainai sihari henidia totona. Bona Lota ese edia hereva mirodia ia dadaraidia neganai, Lota idia gwau dika henia.—Genese 13:13; 19:4, 5, 9.
3. (a) Badina be dahaka Lota bona iena ruma bese be gabu dikana, Sodoma dekenai idia noho? (b) Lota be dahaka ia laloa Sodoma taudia edia lebulebu kara dekenai?
3 Lota be guna ia laloa Sodoma dekenai bisinesi do ia karaia namo diba bona ia laloa unuseniai kohu ia habadaia diba. Nega sisina murinai, ia lao unai hanua dekenai ia noho momokani totona. (Genese 13:8-12; 14:12; 19:1) To ia be unai hanua ena tatau edia kara bodaga ia dadaraia, bona idia laloa ia be idau, badina ia bona ena ruma bese be idia ida idia hebamo lasi. 2 Petero 2:7, 8 ia gwau: “Lota be unai lebulebu taudia edia kara dainai iena lalona be ia metau. Lota be kara maoromaoro tauna, to edia huanai ia noho dainai, dina ibounai edia dika ia itaia bona ia kamonai. Unai dainai iena lalona be ia hisihisi bada.” Unai bamona nohona ese Lota ia tohoa bada, badina ia be kara maoromaoro dainai, unai bamona karadia ia inai henidia.
4. (a) Edena dala ai, hari inai nega be gunaguna Sodoma ena nega bamona? (b) Bema ita be kara maoromaoro tauna Lota bamona, dahaka ita laloa hari inai nega ena dika dekenai?
4 Iseda nega lalonai danu, taunimanima edia kara be ia dika vadaeni. Tano momo dekenai, idia do headava lasi neganai mahuta hebou karana idia karaia lasi taudia be haida sibodia. Sikuli dekenai matamata taudia be unai kara idia karaia momo bona unai bamona idia karaia lasi taudia idia hevasehalaidia. Tatau be tatau ida idia mahuta hebou bona edia kara idia hemarailaia lasi to hanua badadia dekenai idia loaloa, idia ura taunimanima ese edia kara idia abia dae. Dubu taudia danu be unai bamona idia karaia. Dubu momo lasi be tatau ida idia mahuta tataudia bona sihari taudia idia abia dae edia dubu hadibaia taudia totona. To, momokani, bona tanobada sivarai ese ia hahedinaraia hanaihanai hegeregerena, dubu gunalaia taudia momo be tatau ida idia mahuta hebou, idia sihari, bona idia heudahanai. Dubu taudia badadia be unai karadia idia karaia dainai idia siaidia ma hanua ta dekenai eiava edia dagi amo idia kokidia diho badina taunimanima be edia kara idia gwauraia hedinarai dainai. Kara maoromaoro idia lalokau henia taudia be unai kara dikadia idia abia dae lasi; idia be ‘dika idia negea momokani.’ (Roma 12:9) Idia lalohisihisi bada, sibodia idia gwauraidia Dirava idia hesiai henidia taudia be iena ladana idia hadikaia neganai bona diba lasi taudia be unai kara dainai tomadiho ibounai idia dadaraia.—Roma 2:24.
5. Iehova ese Sodoma bona Gomora ia hadikadia ore dainai, dahaka henanadai ena haere ita abia?
5 Lagani idia hanai noho lalonai, dika ia bada ia lao. Do ia doko diba, eiava? Oibe! Iehova ese Sodoma bona Gomora ia hadikaia ore dainai, ia hahedinaraia, ena nega korikori ai, Dirava ese hahemaoro herevana do ia gwauraia. Ia ese kara dika taudia do ia hadikadia ore momokani, bona ia ese Dirava kamonai henia taudia do ia hamauridia. Iehova idia abidadama henia taudia sibodia do ia hamauridia.
Daika Eiava Dahaka be Gau Badana Iseda Mauri Lalonai?
6. (a) Lota ena natudia kekeni idia maoheni memerodia edia sivarai amo, dahaka ita diba? (b) Idia maoheni memerodia edia lalohadai be edena dala ai Lota ena natudia kekeni ia tohodia?
6 Dirava idia badinaia momokani taudia sibona be do idia mauri. Unai ita laloa neganai, Sodoma bona Gomora idia do haorea lasi neganai, Iehova ena aneru edia hereva Lota dekenai umui laloa. “Oiemu varavara haida ma idia noho iniseni, eiava lasi? Bema oiemu ravana o oiemu natudia memero o oiemu varavara ta ia noho inai hanua dekenai, oi abidia, bona inai gabu umui rakatania. Badina be inai gabu do ai hadikaia ore.” Unai dainai Lota ia lao iena natudia kekeni edia maoheni memerodia dekenai. Nega momo ia hamaorodia: “Umui toreisi, inai gabu ita rakatania, badina be Iehova ese inai hanua do ia hadikaia ore.” Idia be Lota ena varavara dainai, idia dekenai dala ia kehoa idia roho mauri totona, to idia sibodia be gaukara ta idia karaia be namo. Namona be Iehova dekenai idia kamonai henia karana idia hamomokania. To, edia matana dekenai, Lota be ia “hevaseha sibona.” (Genese 19:12-14) Lota ena natudia kekeni be unai idia kamonai neganai, edia lalona be reana edena bamona? Edia abidadama Dirava dekenai ia tohoa.
7, 8. (a) Aneru ese Lota idia hamaoroa iena ruma bese ia abia bona idia heau mauri neganai, ia be edena bamona ia karaia, bona badina be dahaka unai be aonega lasi? (b) Hahemauri idia abia totona, Lota bona iena ruma bese be dahaka do idia karaia be namo?
7 Daba ia rere neganai, anerudia be Lota idia haharagaia. Idia gwau: “Karaharaga! Oiemu adavana bona oiemu natudia kekeni ruaosi oi abidia, inai gabu rakatania, do ia hadikaia ore lalonai umui danu mase garina.” To “ia haraga lasi.” (Genese 19:15, 16) Badina be dahaka? Dahaka ese ia koua? Sodoma dekenai iena kohu ia laloa dainai—guna unai ese ia veria unai gabu dekenai, a? Bema unai gaudia ia laloa momo, Sodoma dekenai ia danu do ia mase.
8 Hebogahisi dainai, aneru be iena ruma bese taudia, imadia idia dogoatao bona hanua amo idia veridia. Hanua murimurinai, Iehova ena aneru idia hereva: “Umui heau mauri. Umui emui vairana umui giroa murina dekenai lasi, bona taora dekenai umui naria lasi. Ororo dekenai umui heau, umui mase garina.” To Lota ia daradara. Idia herevaherevalaia sisina murinai, idia gwau, daudau momokani lasi gabuna ta dekenai ia lao be hegeregere, bona ia bona iena ruma bese idia heau haraga. (Genese 19:17-22) Idia kara metaira noho diba lasi; kamonai be gau badana.
9, 10. (a) Badina be dahaka iena adavana danu ia gini sibona be ia hegeregere lasi Lota ena hahine ia roho mauri totona? (b) Lota ena hahine ia mase neganai, Lota bona iena natudia kekeni rua be dahaka hahetoho ma ta idia abia?
9 To, Sodoma idia rakatania neganai hahemauri idia do abia lasi. Genese 19:23-35 ese ita ia hadibaia: “Dina ia daekau neganai Lota be Soara dekenai ia ginidae. Vadaeni, Iehova ese araia gauna (sulphur) guba amo ia negea diho, Sodoma bona Gomora edia latanai. Unai hanua badadia, bona taora ibounai, bona hanua taudia, bona unai tano dekenai vara gaudia ibounai Iehova ese ia hadikaia ore.” To Lota ena adavana be edeseniai?
10 Ia be iena adavana ida ia heau lao. To ena adavana hegeregerena ia laloa danu, a? Ita duahia lasi ia be Sodoma ena lebulebu karadia ia abia dae. To iena lalokau Dirava dekenai ese iena lalokau iena ruma bona ena kohu dekenai ia hanaia eiava lasi? (Luka 17:31, 32 danu hahegeregerea.) Hetoho neganai, ena kudou ena lalona ia hedinarai. Idia be Soara kahirakahira ai idia noho neganai, sedira hanua idia vareai gwauraia neganai, ia gwau-edeede bona ia giroa ia rakatania gabuna ia itaia totona. Bona Bible ia gwau: ‘Ia be damena nadi dekenai’ ia lao. (Genese 19:26) Hari Lota bona iena natudia kekeni dekenai ma hahetoho ta ia noho. Lota be iena adavana ia lalokau henia dainai bona kekeni be edia sinana idia lalokau henia dainai, Iehova lalokau henia karana idia rakatania, a? Ena be edia lalokau varavara ta ese ia gwau-edeede henia, idia be Dirava do idia kamonai henia noho, eiava? Oibe, Iehova idia abidadama henia noho dainai idia giroa lasi bona idia itaia lou lasi.
11. Inai sivarai amo dahaka ita diba Iehova ese ia henia hahemauri henia dalana dekenai?
11 Oibe, Iehova ia diba edena bamona hahetoho amo Dirava kamonai henia taudia ia hamauridia. Ia diba edena bamona tomadiho momokani dekenai idia lalo-tamona ruma besedia ia hamauridia diba; ia diba edena bamona taunimanima ta ta ia hamauridia diba. Idia lalokau henia momokani neganai, ia hebogahisi henidia bada. “Ia sibona be ita ia karaia dalana ia diba namonamo, ia laloa tao ita be tano kahuna.” (Salamo 103:13, 14) To ia be Dirava kamonai henia taudia sibodia ia hamauridia, idia kamonai momokani taudia, edia kamonai karana be abidadama karana dainai.
Lalokau Dalana Dekenai Hahemauri Hereana Ta Ia Hegaegae
12. Mai moale danu ita naria hahemaurina ia do mailaia lasi neganai, Iehova be lalokau dalana dekenai dahaka ia hegaegaelaia?
12 Noa bona Lota edia negai ia karaia karadia amo, Iehova be kara dika taudia ia kokidia lasi ela bona hanaihanai. Bible ia hereva hegeregerena, gabeai idia vara gaudia ia laulaulaia sibona. Unai gaudia idia do vara lasi neganai, Iehova ese ma kara momo do ia karaia guna Ia idia lalokau taudia ia durudia totona. Ia ese sibona ia havaraia Natuna, Iesu Keriso, do ia siaia tanobada dekenai. Iniseniai, Iesu ese Dirava ena ladana hadikaia herevadia do ia koua. Gunaguna, Adam be tau goevadaena dainai, Dirava ia badinaia diba hegeregerena, Iesu ese Dirava do ia badinaia; to Iesu ese do ia karaia neganai ena noho toana be idau. Iesu ese iena goevadae tauanina do ia henia boubou bamona. Unai amo, Adam ena abidadama natudia be Adam ese ia haboioa gauna do idia abia lou diba. Bena, Dirava ese abidadama taudia ena “orea maragi” do ia abia hidi Keriso danu do idia lohia totona iena guba Basileia lalonai, bona “hutuma bada herea” ta be bese idauidau iboudiai amo do ia haboudia tanobada matamata idia havaraia totona. (Luka 12:32; Apokalupo 7:9) Unai ia karaia neganai, Abata bona Sodoma bona Gomora edia negai idia vara gaudia ese idia laulaulaidia hahemauri hereana do ia karaia.
Harihari Ita ese Kara Ita Karaia Haraga ena Badina
13, 14. Petro ese Lota bona Noa edia negai Dirava idia badinaia lasi taudia edia hadikaia ore negana ia herevalaia dainai, dahaka ita diba?
13 Dirava ena Hereva idia stadilaia taudia idia diba Iehova be nega momo iena hesiai taudia ia hamauridia. To, nega momo lasi, Bible ia gwau ‘Unai negadia bamona, Taunimanima ena Natuna do ia mai neganai unai bamona gaudia do idia vara.’ Badina be dahaka, lauma helaga ese ia doria neganai, aposetolo Petro ese unai haheitalai rua sibona ia gwauraidia bada? Lota bona Noa edia negai idia vara gaudia be edena bamona ma nega haida amo idia idau?
14 Iuda 7 ese ia gwauraia hedinarai, ia gwau: “Sodoma bona Gomora bona idia kahirakahira noho hanuadia danu be unai bamona idia karaia. . . . Unai dainai Dirava ese edia kerere davana ia henidia, noho hanaihanai lahina ena hisihisi. Edia dika davana be toana ia hedinaraia ita dekenai.” Oibe, unai hanua dekenai idia noho kara bodaga momokani taudia do idia mase hanaihanai hegeregerena, dina dokonai idia mase taudia do idia mase hanaihanai. (Mataio 25:46) Noa ena negai ia vara Abatana idia herevalaia neganai idia be mase hanaihanaina idia herevalaia. (2 Petero 2:4, 5, 9-12; 3:5-7) Unai dainai, Dirava kamonai henia lasi taudia Noa bona Lota ena negai ia hamasedia dainai, Iehova ia hahedinaraia ia ese kara dikadia idia karaia taudia ia hamasedia ela bona hanaihanai neganai, iena hesiai taudia ia hamauridia diba.—2 Tesalonika 1:6-10.
15. (a) Kara dikadia idia karaia taudia dekenai dahaka sisiba aukana idia henia? (b) Kara dikadia idia karaia noho taudia be hahemaoro do idia abia ena badina be dahaka?
15 Kara dikadia idia karaia taudia ia hamasedia neganai, Iehova ia moale lasi, bona iena hesiai taudia danu idia moale lasi. Iena Witness taudia amo, Iehova ese taunimanima ia hamaorodia: “Umui giroa, emui kara dikadia amo umui giroa. Do umui mase ena namo be dahaka?” (Esekiel 33:11) To, taunimanima be unai lalokau boiboina idia kamonai lasi neganai, bona sibodia edia ura idia tahua noho neganai, Iehova be iena ladana helagana ia matauraia dainai, bona iena abidadama hesiai taudia ia lalokau henidia dainai, idia be Dirava kamonai henia lasi taudia amo dagedage idia hisihisilaia dainai, ia ese hahemaoro maoromaoro do ia karaia.
16. (a) Badina be dahaka ita abia dae momokani diba ia perovetalaia hahemaurina be kahirakahira do ia vara? (b) Dahaka amo bona dahaka dekenai hahemauri do ita abia?
16 Dirava ese hahemauri ia mailaia negana ia kahirakahira! Iesu ese ia perovetalaia karadia bona lalohadai iena mai bona ena noho neganai bona nega dokona be idia hedinarai momokani. Unai nega ena toana idia hedinarai matamaia lagani 75 gunanai, bona Iesu ia gwau ‘inai uru’ do idia mase lasi ela bona Dirava ese hahemaoro hereva do ia karaia Dirava idia kamonai henia lasi taudia dekenai. Iehova be ia laloa Basileia sivaraina be tanobada ibounai idia harorolaia vadaeni neganai, tanobada dikana ena dokona do ia havaraia, bona unai neganai Dirava idia kamonai henia taudia edia hahemauri negana do ia mai danu. (Mataio 24:3-34; Luka 21:28-33) Dahaka amo do idia roho mauri? Taunimanima dikadia amo idia hisihisilaia hahetoho amo do idia roho mauri. Idia be dina iboudiai idia lalohisihisi badina idia be kara maoromaoro taudia dainai, bona idia be tanobada matamatana dekenai do idia hanai, unuseniai gorere bona mase be lasi.
Dirava ese Ita Ia Durua Hahemauri Ita Ia Henia Totona
17. (a) Dahaka henanadai be ita ta ta ibounai dekenai sibona ita henanadailaia? (b) Edena dala ai ita hamomokania diba, Noa bamona, ‘Dirava gari henia karana’ ese ita ia veria?
17 Namona be ita ta ta iboudiai ita henanadai, ‘Lau hegaegae vadaeni Dirava ena hahemaoro negana totona, a?’ Bema ita sibona dekenai ita tabekau eiava ita sibona iseda lalohadai kara maoromaorona dekenai ita gini, ita do hegaegae lasi. To, bema Noa bamona, ‘Dirava gari henia’ karana ese ita ia veria neganai, vadaeni ita be abidadama dekenai Iehova ena hakaua hereva ita kamonai henia bona unai ese ita do ia hamauria.—Heberu 11:7.
18. Badina be dahaka Dirava ena siahu ita matauraia be gau badana tanobada matamata dekenai ita roho mauri dalana ita hegaegaelaia neganai?
18 Salamo 91 be hereva namodia amo Iehova ese hari ia naridia taudia ia herevalaidia. Sal 91 Siri 1 bona 2 idia gwau: “Atai Momokani Dirava ena hehuni gabuna dekenai ia noho tauna be Siahu Ibounai Dirava ena kerukeruna gabuna dekenai ia noho. Iehova dekenai do lau gwau: ‘Oi be lauegu roho mauri gabuna bona lauegu goada gabuna, lauegu Dirava, oi lau abidadama henia.’ ” Dirava ese inai orea ia naridia manu ta ese iena natudia iena apena henunai ia naridia hegeregerena. Idia be Iehova idia abidadama henia momokani. Idia diba ia be Atai Momokani, Siahu Ibounai Tauna. Unai dainai, idia be ena lohia siahuna idia matauraia bona ena henunai idia gaukara, herevana tama sina be unai siahu dekenai oda idia gwauraidia eiava “hesiai tauna mai ena kamonai bona mai ena kara maoromaoro” ese oda idia henia. (Mataio 24:45-47) Ita ta ta iboudiai be unai bamona danu, a? Noa bamona, ita be ‘Iehova ese ita ia hagania hereva iboudiai’ ita kamonai henia bona iena dala dekenai ita karaia, eiava? (Genese 6:22) Bema unai bamona, Iehova ese ita ia hegaegaelaia iena kara maoromaoro tanobada matamatana dekenai ita vareai totona.
19. (a) Iseda laulau kudouna be dahaka, bona badina be dahaka ita naria namonamo be gau badana? (Hereva Lada-isidia 4:23) (b) Edena dala ai Lota ena haheitalai ese ita ia durua tanobada gaudia ese ita idia veria toho neganai?
19 Unai hegaegae karana anina be iseda haheitalai kudouna ita naria danu. “Iehova ese taunimanima edia kudou dekenai idia noho gaudia ia tahudia.” (Hereva Lada-isidia 17:3) Ita ia durua ita lalo-parara, ita karaia gaudia sibona be gau badana lasi to iseda lalona ia itaia. Tanobada ena dagedage dekenai ita vareai lasi, eiava ena lebulebu kara dekenai ita vareai lasi, to namona be ita naria namonamo unai gaudia ese ita idia veria garina eiava ita moalelaidia garina. Lota bamona, namona be unai taravatu utua karadia dainai ita lalohisihisi. Kara dika idia inai henia taudia be unai gaudia do idia tahua lasi; badina reana idia inai henia lasi taudia be tauanina dekenai idia karaia lasi, to ena lalona dekenai idia ura henia. “Iehova umui lalokau henia taudia e, dika umui inai henia.”—Salamo 97:10.
20. (a) Bible be edena daladia ai ita ia sisiba henia kohu ita ura henia bada garina? (b) Edena dala ai ita diba Bible ena sisiba kohu ura henia bada karana dekenai be iseda kudou dekenai ia noho?
20 Iehova be lalokau dekenai ita ia hadibaia ita be lebulebu karadia bona kohu tahua momo karana ita dadaraia totona. Iena Hereva ena sisiba be: “Bema ita be mai iseda aniani bona dabua neganai, moni dekenai ita laloa momo lasi be namo.” (1 Timoteo 6:8) Noa bona ena natudia be lagatoi idia vareai neganai edia ruma idia rakatania. Lota bona iena ruma bese danu, be idia mauri totona edia ruma bona edia kohu idia rakatania. Ita be dahaka ita ura henia bada? “Lota ena adavana umui laloa.” (Luka 17:32) Iesu ia gwau: “Iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.” (Mataio 6:33) Ita be unai bamona ita karaia, a? Bema Iehova ena kara maoromaoro ita badinaia bona bema iseda mauri dekenai iena Basileia harorolaia gaukarana ita atoa guna, vadaeni, ita be iena hegaegae herevadia, iena tanobada matamata dekenai ita roho mauri totona, ita kamonai henia.
21. Badina be dahaka ita be mai maoro danu ita diba Iehova ena gwauhamata hahemaurina be kahirakahira do ia vara?
21 Iena Basileia ena siahu ia abia negana ena toana idia itaia taudia bona Dirava idia kamonai henia taudia dekenai, Iesu ia gwau: “Emui kwarana do umui abia isi. Badina be umui emui hahemauri be ia kahirakahira vadaeni.” (Luka 21:28) Unai toana ena hagugurua dalana oi itaia, a? Namona be oi abidadama momokani Iehova ena hahemauri gwauhamatana be kahirakahira do ia guguru! Namona be oi abia dae momokani “bema hisihisi bona metau Dirava badinaia taudia dekenai idia noho neganai, [Iehova] ese inai hisihisi dekena amo idia ia hamauria diba.”—2 Petero 2:9.
Dahaka Oi Diba?
◻ Lota bamona, namona be dahaka ita laloa tanobada ena mauri dalana dekenai?
◻ Lota bona iena ruma bese be Sodoma amo idia heau mauri neganai, dahaka hetoho idia abia?
◻ Petro ese ia herevalaia haheitalai be edena dala ai idia hahedinaraia Iehova ena kahana dekenai ita gini be gau badana?
◻ Iena taunimanima be hahemauri totona ia hegaegaelaidia neganai, Iehova be dahaka hereva badana idia ia hadibaia?
[Picture on page 18]
Dirava ese iena taunimanima ia naridia manu ese edia natudia edia apena henunai idia naridia hegeregerena