Lauma Dalanai Oi Aniani Namonamo, A?
“Taunimanima ese idia abia mai anina bada gauna be aniani namona. . . . Aniani ia hegeregere lasi neganai, ita mase diba.”
—Food and Nutrition.
UNAI “mai anina bada gauna” dekenai idia dabu tatau, hahine, bona natudia edia tauanina idia maragimaragi ena toana ese unai hereva ena anina ia hahedinaraia momokani. Haida be aniani taina idia abia to ia hegeregere lasi edia tauanina ia hagoadaia bona ia habadaia totona. To, aniani namodia idia ania diba taudia momo be edia tauanina ia hagoadaia lasi digara aniani dikadia idia moalelaia. Buka ta ladana, Healthy Eating, ia gwau: “Aniani be ita hadikaia momo gauna ta.”
Lauma aniani—Dirava ena Hereva, Baibel, lalonai ia noho hereva momokanina dekenai unai bamona ia vara danu. Taunimanima haida be lauma aniani ena hereva badadia dekenai idia dabu; lauma dalanai idia hitolo mase. Haida be idia noho lauma anianidia idia dadaraia. Oi be edena bamona? Oi be lauma dalanai oi aniani namonamo, a? Eiava oi sibona ese lauma aniani oi dadaraia? Unai kara dekenai gau badana be ita sibona dekenai do ita hereva momokani badina lauma aniani ita abia ena anina ese tauanina aniani ena anina ia hanaia.—Mataio 4:4.
Aniani, Lauma Dalanai Tubu Totona
Aniani namodia ania ena anina bada ia herevalaia bukana ta, Food and Nutrition, be dahaka dainai ita aniani namonamo ena badina namodia toi ia gwauraia. Aniani ita ania ena badina ta be “tauanina ia ubua do ia tubu totona bona tauanina ena sel do ia hamatamataia.” Oi diba, emu mauri dinadia ta ta ai, emu tauanina ena sel trilioni ta idia mase bona matamatadia do ia havaraia be namo, a? Iseda tauanina ia tubu namonamo bona ia gaukara namonamo totona aniani namodia do ita ania.
Lauma dalanai unai be momokani danu. Hegeregere, aposetolo Paulo ese Efeso kongregesen ia tore henia neganai, ia hahedinaraia loulou Keristani taudia ta ta ese lauma aniani namodia do idia abia be gau badana ‘tau badadia ai do idia lao’ totona. (Efeso 4:11-13) Lauma dalanai ita ia durua aniani ita ania namonamo neganai, ita be goada lasi beibi bamodia lasi, sibona ita naria diba lasi, bona dika idauidau lalonai ita moru. (Efeso 4:14) Lasi, to taunimanima badadia bona goadadia ai ita lao, bona hadibaia herevadia amo sibona ita “ubua” dainai abidadama dekenai ita gini goada diba.—1 Timoteo 4:6.
Oi be unai bamona, a? Lauma dalanai oi tubu daekau vadaeni, a? Eiava oi be do beibi lauma dalanai—oi manoka, haida dekenai oi tabekau sibona, bona Keristani maduna ibounai oi huaia diba lasi? Ita diba, ita momo do ita gwau haraga diba lasi ita be beibi bamona lauma dalanai, to namona be mai momokani ida ita ta ta do ita tahua. Aposetolo edia nega ai horoa Keristani taudia haida be unai bamona. Idia be “hadibaia taudia” ai idia lao diba bona Dirava ena Hereva amo haida idia hadibadia diba, to aposetolo Paulo ia gwau: “To umui be do diba maragi taudia. Unai dainai tau ta ese Dirava ena hereva, diba hamatamaia gaudia umui dekenai ia hadibaia lou be namo. Badina umui be rata sibona umui inua diba, umui be do hegeregere lasi aniani korikori do umui ania.” Bema oi ura lauma dalanai do oi tubu, lauma aniani aukadia ania urana do oi habadaia. Oi laloa lasi lauma dalanai beibi edia aniani oi dekenai be hegeregere!—Heberu 5:12.
Inai tanobada dikana amo dina ta ta ai hetoho ita davaria dainai, unai lauma aniani aukadia ese ita do idia durua ita goada totona. Unai hetoho ese iseda lauma goadana ia hamanokaia diba. To Dirava ese unai goada ia hamatamataia lou diba. Paulo ia gwau: “Unai dainai ai be hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho.” (2 Korinto 4:16) Edena bamona iseda goada be “dina ibounai idia matamata lao noho”? Dala ta be Dirava ena Hereva stadilaia hanaihanai, siboda eda stadi bona grup stadi ai Baibel bona Baibel herevalaia bukadia stadilaia karana amo.
Aniani, Lauma Goada Totona
Aniani ita ania danu “siahu bona goada ia henia totona.” Aniani ese goada ia henia iseda tauanina ia gaukara namonamo totona. Bema ita aniani namonamo lasi, goada sisina sibona do ita abia. Hegeregere, iron be iseda aniani amo ita abia lasi neganai, do ita hesiku bona ita goada lasi. Nega haida oiemu mamina be unai bamona lauma gaukara dekenai, a? Keristani tauna ena maduna idauidau oi huaia be auka, a? Sibodia idia gwau Iesu Keriso ena murina dekenai idia raka taudia haida be kara namodia karaia dekenai idia hesiku, bona idia be mai edia goada lasi Keristani gaukara karaia totona. (Iamesi 2:17, 26) Bema oi laloa oi be unai bamona, reana hanamoa dalana be emu lauma aniani do oi hanamoa eiava oi ania dalana do oi habadaia.—Isaia 40:29-31; Galatia 6:9.
Namona be oi naria ta ese oi ia koia, bena lauma dalanai aniani namonamo lasi karana dekenai oi manada garina. Lagani handred momo lalonai Satani ese ia gaukaralaia koikoi karana badana be taunimanima edia lalona ia ania bona idia laloa Baibel idia duahia bona ia amo diba maorona idia abia be anina lasi. Ia ese tuari taudia be siti ta idia abia gwauraia neganai idia gaukaralaia karana ta ia badinaia—aniani abia dalana ibounai idia koua bona siti taudia be hitolo dainai tuari taudia edia siahu henunai idia lao. To ia ese unai kara ia habadaia. Ia ese ia “hagegea” taudia ia koidia bona sibodia idia hitolo mase ena be lauma aniani bada herea be ororo bamona idia ia gegea. Unai dainai momo ia tohodia neganai idia moru be hoa gauna lasi!—Efeso 6:10-18.
Aniani, Lauma Ena Namo Totona
Food and Nutrition, ia gwau aniani ita ania ena badina ihatoina be ia ese “tauanina ena namo ia naria . . . bona gorere ia koua.” Aniani namodia edia namo tauanina dekenai be idia hedinarai haraga lasi. Aniani namona ta ita haorea neganai, ita laloa lasi, ‘Unai ese egu kudouna (eiava egu nadinadi eiava egu masolo, bona ma gau haida) ia hagoadaia.’ To, mani nega sisina daudau lalonai aniani oi ania lasi, bena oiemu tauanina dekenai unai kara ena toana do ia hedinarai. Dahaka do ia vara? Medikol ripoti ta ia gwau: “Ia vara momo gauna be namo lasi: idia tubu namonamo lasi, gorere maragidia idia koua diba lasi, goada be lasi bona gau ta karaia totona idia lalo-goada lasi.” Unai bamona gorerena lauma dalanai be idaunegai Israela besena dekenai nega sisina daudau lalonai ia vara. Peroveta tauna Isaia ese ia herevalaia, ia gwau: “Israela tano e, oiemu kwarana, be idia haberoa vadaeni, bona oiemu kudouna danu be ia manoka noho. Oiemu aena ela bona oiemu kwarana dekenai, gabu namona ta ia noho lasi.”—Isaia 1:5, 6.
Lauma aniani namodia ese ita dekenai siahu idia henia lauma dalanai manoka karana bona gorere ena dika ita dadaraia totona. Dirava amo ia mai dibana ese ita ia durua lauma dalanai ita noho namo totona—bema ia amo ita aniani! Iesu Keriso ia gwau, iena nega lalonai idia noho taudia be edia tubudia edia lauma aniani ania namonamo lasi karana amo gau ta idia dibaia lasi. Idia danu be Iesu ese ia harorolaia hereva momokanidia idia ura lasi idia kamonai. Unai dainai dahaka ia vara? Iesu ia gwau: “Inai bese taudia edia lalona idia dibura, edia taiana idia kudima, bona edia matana idia koua. Unai be edia matana dekena amo do idia itaia garina, bona edia taiana dekena amo do idia kamonai garina, edia lalona do idia kehoa garina, edia lalona do idia giroa, bona lau ese do lau hamauridia garina.” (Mataio 13:15) Momo be Dirava ena Hereva ena hanamoa siahuna amo namo idia davaria lasi. Lauma dalanai idia gorere noho. Horoa Keristani taudia haida danu “idia manokamanoka bona idia gorere.” (1 Korinto 11:30) Namo lasi Dirava ese ia henia lauma aniani ita matauraia lasi.—Salamo 107:20.
Miro, Lauma Dalanai
Lauma dalanai hitolo karana sibona lasi, to namona be ita diba dika karana ta ia noho danu—ita ania anianina be ia dika diba danu. Demoni edia lalohadai ese idia hadikaia hadibaia herevadia ita abia dae neganai, ia be hegeregere aniani korikorina mai ena jems eiava poisini ita ania. (Kolose 2:8) Aniani mai ena poisini be ita dibaia haraga lasi. Buka ta ia gwau: “Aniani haida edia toana be namo to idia lalonai gorere idia havaraia bakteria idia noho diba.” Unai dainai namona be iseda lauma aniani do ita tahua namonamo, bona namona be ita laloatao buka haida, hegeregere raka siri taudia edia buka, be Baibel amo idia mai lasi hadibaia herevadia bona taunimanima edia lalohadai idia hadibaia. Aniani idia hegaegaelaia kampani haida be taunimanima idia koidia bona idia karaia aniani dekenai ladana idauna idia atoa. Ita diba Satani, koikoi tauna badana, be unai bamona ia karaia diba. Unai dainai, namona be oi itaia namonamo oiemu lauma aniani be gabu korikorina amo oi abia, ‘abidadama ai oi gini goada’ totona.—Tito 1:9, 13.
Lagani 1600 ia lao 1699 lalonai ia haroro tauna, Thomas Adams, ese iena nega lalonai idia noho taudia ia gwauraidia ia gwau: “Edia isena amo edia mase gurina idia geia.” Anina be, idia ania gaudia ese idia hamasedia. Oi naria namonamo lauma dalanai oi ania gauna ese oi ia hamasea garina. Lauma aniani namodia oi tahua. Iehova Dirava ese sibodia iena bese idia gwauraia taudia to hadibaia taudia koikoidia bona peroveta taudia koikoidia idia kamonai henia taudia dekenai ia henanadai, ia gwau: “Badina dahaka emui moni umui negea kava noho, mai ena anina lasi gauna totona? . . . Lau dekenai do umui kamonai, bona lauegu hereva do umui karaia. Unai neganai aniani namo herea momokani do umui moalelaia. Lauegu hereva do umui kamonai, bona lau dekenai do umui mai! Lau dekenai do umui mai, vadaeni emui lauma do ia mauri!”—Isaia 55:2, 3; Ieremia 2:8, 13 itaia.
Lauma Aniani Bada Herea
Lauma aniani namodia be do idia ore diba lasi. Iesu Keriso ia peroveta hegeregerena, hari inai negai ia be mai ena hesiai tauna mai ena kamonai, bona mai ena kara maoromaoro, bona ia gaukara goada nega korikori ai ‘aniani ia henia’ idia ura taudia dekenai. (Mataio 24:45) Peroveta tauna Isaia amo, Iehova ia gwauhamata ia gwau: “Lau dekenai idia tomadiho bona kamonai henia taudia, be do idia aniani bona inuinu bada, to umui, be do umui hitolo bona ranu mase. . . . Kamonai! Egu hesiai taudia ese ane do idia abia, edia moale be bada dainai.” Momokani, ia ese aniani momo aria badana ia karaia idia ura aniani taudia totona. “Siahu Ibounai Lohiabada ese tanobada ena bese idauidau ibounai totona aria do ia karaia. Inai aria dekenai be aniani namodia momokani, bona uaina danu namo herea.”—Isaia 25:6; 65:13, 14.
To mani inai oi laloa: Aria ta dekenai ita hitolo mase diba! Ena be aniani ese ita ia hagegea, to bema ita toreisi bona unai aniani ita ania lasi, do ita gorere dikadika diba. Aonega Herevadia 26:15 ese unai ia herevalaia: “Taunimanima haida be lahedo momo dainai, sibodia edia uduna dekenai aniani idia atoa lasi.” Madi, unai be dika momokani! Ita danu ita lahedo diba bona, Dirava ena Hereva bona Baibel bukadia, lauma aniani abia totona ita idia durua bukadia, ita sibona ita stadilaia karana ita rakatania diba. Eiava ita manoka ita lao dainai Keristani kongregesen ena hebou totona ita hegaegae lasi bona ita haere lasi.
Aniani Daladia Namodia
Badina idauidau dainai, namona be iseda lauma aniani ania dalana ita hanamoa. To ia vara momokani gauna be, taunimanima be edia lauma aniani idia gadaralaia, idia ania namonamo lasi, haida be idia ura lasi idia aniani dainai idia hitolo mase. Idia be aniani namonamo ena anina idia laloa bada lasi ela bona gabeai edia mauri lalonai unai kara dainai idia gorere. Healthy Eating bukana ese inai badina ia gwauraia dahaka dainai iseda aniani dalana ita naria namonamo lasi, ena be ita diba ita mauri totona ita aniani namonamo be gau badana. Ia gwau: “Hekwakwanai be [aniani namonamo lasi karana dainai] tauanina be ia dika ia lao haraga lasi, karaharaga ia hedinarai lasi hegeregere ta be dala ia hanaia bona motuka ese ia moia bamona. Lasi, to metairametaira, hehuni dalanai ta ena tauanina ia manoka ia lao, ia gorere haraga, iena turia idia kwaidu haraga, toto be nega sisina daudau lalonai idia namo bona gorere ia davaria neganai nega sisina daudau murinai ia namo lou.”
Sibona ia hitolo dikadika tauna be anorexia nervosa gorerena ia abia kekenina bamona. Sibona ia hamaoroa aniani bada ia ania be anina lasi, ia namo, ena be ena tauanina be ia maragi ia lao. Dokonai, ena ura ibounai aniani totona be ia ore. Medikol buka ta ia gwau: “Unai be dika bada herea negana.” Dahaka dainai? “Ena be gorere kekenina be hitolo amo do ia mase lasi, to ena tauanina be ia goada lasi dainai, gorere maragidia ia abia haraga diba.”
Keristani hahinena ta ia gwau: “Lagani momo lalonai lau lalo-hekwarahi badina lau diba hebou totona lau hegaegae hanaihanai bona sibogu egu Baibel stadi lau karaia be gau badana, to lau karaia lasi.” Gabeai, unai hahine be gau haida ia haidaua bena Dirava ena Hereva stadilaia namonamo hahinena ai ia lao, to unai ia karaia badina be ia lalo-parara ia be lauma aniani dekenai ia dabu momokani.
Aposetolo Petero ese ia henia sisiba do oi abia dae momokani. “Beibi matamata” bamona ai do oi lao, bona ‘rata ia ura dikadika bamona, oi ese lauma ena rata goevagoeva do oi ura henia. Badina be unai rata oi inua neganai, oiemu lauma do ia tubu daekau, bona Dirava ena hamauria do oi davaria.’ (1 Petero 2:2) Oibe, ‘do oi ura henia’—ura goadana momokani do oi havaraia—oiemu lalona bona kudouna be Dirava ena diba amo oi hahonua totona. Lauma dalanai idia lo taudia danu be unai ura do idia habadaia noho. Lauma aniani be ‘oiemu hadikaia momo gauna ta’ ai oi halaoa lasi. Lauma dalanai oi aniani namonamo bona Dirava ena Hereva, Baibel amo idia mai ‘hagoadaia hadibaia herevadia’ edia namo ibounai oi abia.—2 Timoteo 1:13, 14.
[Picture on page 28]
Oiemu aniani dalana oi hanamoa be namo, a?