Iehova, Dala Maoronai “Tanobada Ibounai Ia Hahemaoro Henia Tauna”
“[Tamana] ese taunimanima edia toana ia laloa lasi, ibounai be hegeregere ia vairanai. Ia ese ita ta ta iseda kara do ia tahua.”—1 PETERO 1:17.
1, 2. (a) Ita diba Iehova be Hahemaoro Henia Tauna badana dainai badina be dahaka ita ia hagaria bona ita ia durua danu be namo? (b) Iehova ese tanobada besedia ia hahemaoro henidia neganai, iena tanobada hesiai taudia edia maduna be dahaka?
IEHOVA be “tanobada ibounai ia Hahemaoro Henia Tauna” badana. (Genese 18:25, NW) Ia be gau ibounai ena Atai Herea Diravana dainai ia be mai ena maoro ia havaraia gaudia iboudiai ia hahemaoro henidia totona. Unai ita laloa neganai ita ia hagaria bona ita ia durua danu. Mose be unai lalohadai idaudia rua ia gwauraia bona unai ese ena kudouna ia hamarerea dainai ia gwau: “Iehova, emui Dirava, be dirava edia Dirava bona lohia edia Lohia; ia be Gaubada, ia be siahu bona gari havaraia Diravana. Ia vairanai taunimanima iboudiai be hegeregere; ta be iena lalona ia ania diba lasi. Ia ese vabu bona tamana lasi natuna dainai hahemaoro ia karaia bona idau bese tauna ia lalokau henia dainai aniani bona dabua ia henia.”—Deuteronomi 10:17, 18.
2 Unai be kara idaudia rua ia hahegeregeredia namo herea! Ia be Dirava badana, Dirava goadana, bona gari havaraia Diravana, to taunimanima ibounai be ia vairanai idia hegeregere dainai, lalokau dekenai ia ese tama sina lasi natudia, vabu, bona idau bese taudia ia naridia. Lalokau amo Hahemaoro Henia Tauna Iehova be herea, ani? Iehova ia gwau ia be Satana ena tanobada ena bese iboudiai dekenai hahemaoro do ia karaia, unai dainai iena tanobada hesiai taudia iboudiai ia boiridia iena hereva idia hamomokania totona. (Isaia 34:8; 43:9-12) Ia be Dirava maorona bona mai ena maoro ia lohia ia hamomokania totona be edia hereva dainai sibona lasi. To iena hereva idia hamomokania taudia dekenai maduna namona ia henidia, idia be tanobada taudia ibounai vairanai iena atai lohia siahuna idia hamomokania totona. Iena hereva idia hamomokania taudia be iena lohia dalana maoromaorona idia badinaia, bona edia haroro gaukara amo idia be ma haida idia veridia idia danu be Atai Herea Hahemaoro Henia Tauna ena siahu henunai idia mai totona.
Dirava Ena Hahemaoro Henia Dalana
3. Edena dala ai Iehova ena hahemaoro henia dalana ita gwauraia diba, bona Adam bona Eva edia sivarai dekenai edena dala ai unai kara rua idia hedinarai?
3 Tanobada ena sivarai ena matamaia negana ai, Iehova sibona ese kerere taudia ia hahemaoro henidia. Gabeai iena taunimanima bogaragidiai iena hesiai taudia haida be hahemaoro do idia karaia bona iena hahemaoro karaia daladia be haheitalai idia dekenai. (Salamo 77:11, 12) Iena hahemaoro dalana be inai bamona: ia gari lasi to kerere ia noho neganai ia gwauraia, to bema mai ena dala hebogahisi ia hahedinaraia. Adam bona Eva be goevadae tanobada taudia to sibodia edia ura dainai idia gwau-edeede, unai dainai hebogahisi ia hahedinaraia be maoro lasi. Unai dainai Iehova ese ia hahemaoro henidia bona idia mase. To edia natudia dekenai hebogahisi ia hahedinaraia. Iehova be maoromaoro Adam bona Eva ia hamasedia lasi, unai amo dala ia noho natudia idia havaraia. Lalokau dekenai dala ia kehoa edia natudia be helaro idia abia kara dika bona mase ena igui hesiai amo ia ruhadia nege totona.—Genese 3:15; Roma 8:20, 21.
4. Iehova be edena dala ai Kain ia kara henia, bona badina be dahaka unai sivarai ita laloa?
4 Ita ura ita diba Iehova be edena bamona Kain ia kara henia badina unai be nega ginigunana Adam bona Eva edia goevadae lasi natuna ta, “kara dika ena hesiai tauna” ta, ena sivarai idia torea. (Roma 7:14) Iehova ese unai ia laloa bona Kain ia kara henia dalana be iena tama sina Ia kara henidia dalana amo ia idau, a? Bona unai hahemaoro henia karana be hari inai negai Keristen elda taudia dekenai gau ta ia hadibaia diba, a? Namona be ita laloa. Iena boubou dekenai Dirava ia moale lasi dainai Kain ia lalohadai kerere, unai dainai Iehova be lalokau dekenai ia sisiba henia kara dika ese ia abia garina. Aonega hereva gunana ta ia gwau: ‘Gorere dalana oi koua be namo bada; gorere hanamoa be namo sisina.’ Iehova ese kara momo ia karaia Kain ia durua totona, ia sisiba henia kara dika ese Kain ia biagua garina. Ia durua toho ‘kara namo ia karaia’ totona. (Genese 4:5-7) Unai be nega ginigunana Dirava be kara dika tanobada tauna ta ia hamaoroa ia helalo-kerehai totona. Kain be helalo-kerehai lasi lalohadai ia hahedinaraia bona ia kara dika murinai, Iehova ese ia hahemaoro henia bona ia lulua, unai hahemaoro herevana ida taravatu ta ia karaia ma taunimanima haida ese do idia alaia mase lasi totona.—Genese 4:8-15.
5, 6. (a) Iehova be Utu-utu ia do vara lasi negana ena uru taudia dekenai edena bamona ia karaia? (b) Sodom bona Gomora taudia ia do hadikadia ore lasi neganai Iehova be dahaka ia karaia guna?
5 Utu-utu ia do vara lasi neganai, ‘Iehova ese taunimanima edia kara dika bada herea gabu ibounai dekenai ia itaia, bona edia lalohadai be nega ibounai ia dika sibona.’ (Genese 6:5, 6) Ia ‘lalohisihisi’ badina Utu-utu ia do vara lasi neganai uru taudia be edia ruhaia mauri namona idia gaukaralaia kerere, bona ia ese ia hahemaoro henidia be namo. To, ia be sisiba ia henidia guna, ia be lagani momo lalonai Noa ia gaukaralaia, “kara maoromaoro ia harorolaia tauna” unai. Unai murinai, Iehova be ‘ia naria noho lasi to Dirava idia badinaia lasi taudia ia panisi henidia.’—2 Petero 2:5.
6 Unai hegeregerena, Iehova be Sodom bona Gomora edia kara miro taudia dekenai hahemaoro ia karaia. To ia karaia dalana oi laloa. Ia be unai taudia edia kara dika dainai “sivarai” ta ia kamonai, unai be kara maoromaoro tauna Lota ena guriguri dainai ia kamonai. (Genese 18:20; 2 Petero 2:7, 8) To gau ta ia do karaia lasi neganai, iena aneru amo ia ‘diho’ unai hereva ia hamomokania totona. (Genese 18:21, 22; 19:1) Danu, ia ese Abraham ia hamaoroa dala maoronai hahemaoro do ia karaia.—Genese 18:23-32.
7. Iehova ena hahemaoro karaia dalana edia haheitalai amo hahemaoro idia karaia elda taudia be dahaka diba idia abia?
7 Hari inai negai elda taudia be unai haheitalai amo dahaka idia diba? Adam bona Eva edia sivarai dekenai, ena be edia natudia be kerere taudia edia varavara, to Iehova be lalokau bona hebogahisi ia hahedinaraia unai kerere dekenai idia vareai lasi taudia dekenai. Adam bona Eva edia natudia dekenai hebogahisi ia hahedinaraia. Kain ena sivarai dekenai, Iehova ia itaia Kain be dahaka dika ia davaria diba, bona kara manada dekenai sisiba ia henia, ia durua toho ia kara dika lasi totona. Ia lulua murinai danu Iehova be Kain ia laloa. Ma danu, ia be haheauka bona boga-auka bada ia hahedinaraia murinai sibona, Iehova be Utu-utu ia do vara lasi neganai unai uru taudia dekenai hahemaoro ia karaia. Idia ura idia kara dika karaia noho neganai sibona, Iehova ia “lalohisihisi.” Ia lalohisihisi taunimanima be iena kara maoromaoro lohia dalana idia gwau-edeede henia dainai, bona ia ese hahemaoro aukana ia henidia. (Genese 6:6; ma danu Esekiel 18:31; 2 Petero 3:9 itaia.) Sodom bona Gomora ena sivarai dekenai, Iehova be hereva ibounai ia hamomokania murinai sibona kara ta ia karaia. Hari inai nega lalonai hahemaoro idia karaia taudia dekenai unai be haheitalai namodia momokani!
Idau Negai Bese Kwaradia Edia Nega Ai Hahemaoro Karaia Taudia
8. Idau negai bese kwaradia edia nega ai dahaka idia diba Iehova ena taravatu badadia dekenai?
8 Ena be unai negana ai idia torea vadaeni taravatu be lasi, to idau negai bese kwaradia edia nega ai Iehova ena taravatu badadia idia diba, bona iena hesiai taudia edia maduna idia badinaia. (Genese 26:5 itaia danu.) Eden dekenai ia vara gauna ese ia hahedinaraia Iehova ena lohia dalana idia kamonai henia bona idia badinaia be namo. Kain ena sivarai ese ia hahedinaraia Iehova be ala-ala karana ia ura lasi. Maoromaoro Utu-utu murinai, Dirava be mauri ena helaga, ala-ala, mase ena hahemaoro henia herevana, bona rara ania karana edia taravatu taunimanima dekenai ia henia. (Genese 9:3-6) Iehova be Abraham, Sara, bona Gasa kahirakahira hanuana Gerara ena king, Abimeleka, edia sivarai dekenai, Iehova be heudahanai karana ia gwauraia kara dikana.—Genese 20:1-7.
9, 10. Dahaka haheitalai ese idia hahedinaraia idau negai bese kwaradia edia nega ai hahemaoro karaia dalana ia noho?
9 Unai dinadia ai bese kwaradia be hahemaoro karaia taudia bona taravatu dekenai taunimanima edia hekwakwanai idia naridia. Iehova be Abraham ia herevalaia, ia gwau: “Lau be ia lau abia hidi, ia ese ena natudia bona ena tubudia dekenai do ia hadibaia namonamo totona. Vadaeni idia ese lauegu taravatu do idia kamonai henia, kara maoromaoro bona kara namona dekenai.” (Genese 18:19) Abraham be, iena bona Lota ena mamoe naria hesiai taudia bogaragidiai ia vara hepapahuahuana lalonai, sibona ena ura ia laloa lasi bona lalo-parara ia hahedinaraia. (Genese 13:7-11) Ia be idau negai bese ena kwarana bona hahemaoro karaia tauna dainai, Iuda be iena ravana hahine Tamara ia hahemaoro henia, ia gwau do idia hamasea bona idia araia, badina ia laloa Tamara be heudahanai hahinena. (Genese 38:11, 24; Iosua 7:25 itaia danu.) To hereva ibounai ia diba murinai, ia gwau Tamara ena kara be maoromaoro momokani, bona sibona ena kara maoromaoro be maragi. (Genese 38:25, 26) Hahemaoro herevana ita do henia lasi neganai hereva ibounai ita kamonai henia guna be gau badana!
10 Iobu bukana ese hahemaoro karaia dalana ia herevalaia bona ia hahedinaraia namona be hahemaoro henia kara dekenai hahemaoro tauna be ia laloa iboudiai idia hegeregere. (Iobu 13:8, 10; 31:11; 32:21) Iobu ia laloatao guna taunimanima ese ia idia matauraia ia be hahemaoro karaia tauna dainai, ia be hanua ena vareai gabuna dekenai ia helai bona ia be vabu bona tamana lasi merona dainai hahemaoro ia karaia. (Iobu 29:7-16) Unai dainai, ia hedinarai idau negai bese kwaradia edia nega ai, “tau badadia” be Abraham ena tubudia idia hahemaoro henia taudia, unai be Aigupito idia do rakatania lasi bona Israel besena dekenai Dirava ese ia torea taravatuna ia do henia lasi negana ai. (Esodo 3:16, 18) Mose ese Taravatu gwauhamatana be Israel ena “tau badadia,” eiava elda taudia, dekenai ia henidia, idia be taunimanima totona idia hereva taudia.—Esodo 19:3-7.
Israel Ena Hahemaoro Karaia Dalana
11, 12. Bible idia stadilaia taudia rua edia hereva hegeregerena, dahaka dainai Israel ena hahemaoro henia dalana be ma bese haida edia hahemaoro henia dalana amo ia idau?
11 Israel dekenai hahemaoro karaia dalana bona idia kahirakahira idia noho besedia edia taravatu karaia dalana idia idau. Hanua taudia edia taravatu bona taravatu utua taudia edia taravatu be idau lasi. Unai taravatu iboudiai be mauri ena kara namo bona tomadiho taravatudia danu idia haboua tamona. Dekena tauna hadikaia karana be Iehova hadikaia karana danu. Iena buka The People and the Faith of the Bible lalonai, toretore tauna André Chouraqui ia torea, ia gwau: “Heberu taudia edia hahemaoro karaia dalana be edia dekena taudia edia hahemaoro karaia dalana amo ia idau; taravatu utua ena anina gwauraia dalana dekenai bona panisi gwauraia dalana dekenai ia idau, bona ena taravatu ena anina dekenai ia idau. . . . Torah [Taravatu] be dina iboudiai lalonai idia vara gaudia amo ia idau lasi; ia be hereva namona eiava hereva dikana ia gwauraia neganai dina ta ta iboudiai idia vara gaudia ia biagua. . . . Israel dekenai . . . ita gwau hanua lalonai taravatu idia idau be auka. Unai taravatu be mauri dalana tamona dekenai idia badinaia, unai mauri dalana dekenai gau ibounai idia karaia mauri Diravana ena ura hagugurua totona.”
12 Unai dala dekenai idia idau momokani dainai, Israel lalonai hahemaoro karaia dalana ese unai neganai idia noho idau besedia edia kara idia hereaia. Bible ia stadilaia tauna Roland de Vaux ia torea, ia gwau: “Ena be ena toana bona hereva iboudiai idia hegeregere bamona, to Israel ena taravatu be Asia taudia edia ‘gwauhamata herevadia’ bona edia ‘taravatu’ edia hereva amo idia idau. Ia be tomadiho taravatuna. . . . Asia ena taravatu ta lasi be Israel ena taravatu ida ia hegeregere badina Israel idia gwau Dirava ese unai taravatu ia torea. Bema Israel ena taravatu lalonai nega momo mauri ena kara namo ena taravatu momo idia noho, unai be Dirava ese ia henia Gwauhamatana ena hereva iboudiai ia herevalaia dainai, bona unai Gwauhamata ese taunimanima idia kara heheni karadia bona Dirava idia kara henia karadia ia biagua dainai.” Unai dainai ita hoa lasi Mose ia henanadai, ia gwau: “Edena bese badana edia taravatu bona edia hahegani idia maoromaoro, lau ese hari dina ai umui lau henia taravatudia iboudiai hegeregeredia?”—Deuteronomi 4:8.
Hahemaoro Karaia Taudia Israel Dekenai
13. Dahaka daladia ai Mose be haheitalai namona hari inai nega ena elda taudia dekenai?
13 Unai bamona hahemaoro karaia dala hereana dainai, edena bamona tauna idia abia hidi hahemaoro ia karaia totona? Bible be Israel dekenai hahemaoro karaia tauna ginigunana ia herevalaia inai bamona, ia gwau: “Mose be tanobada taudia iboudiai bogaragidiai ia sibona be manau herea.” (Numera 12:3) Sibona ena diba bona goada dainai ia laloa lasi ia maoro sibona. (Esodo 4:10) Ena be iena gaukara be taunimanima ia hahemaoro henidia, to nega haida Iehova vairanai idia dainai ia hereva, ia noinoi henia ia gwaudia tao totona bona ia ura idia dainai sibona ena mauri ia henia. (Esodo 32:11, 30-32) Ane hereva dekenai ia gwau: “Egu hereva be hunu bamona ia hedinarai, medu be rei matamata latanai bamona, medu be aniani ena ava latanai bamona.” (Deuteronomi 32:2) Sibona ena aonega amo taunimanima ia hahemaoro henidia lasi, to ia gwau: “Bema tau rua idia heai neganai lau kota henidia, bona Dirava ena oda bona ena taravatu lau hadibaia idia dekenai.” (Esodo 18:16) Ia daradara neganai, gau iboudiai be Iehova dekenai ia henia. (Numera 9:6-8; 15:32-36; 27:1-11) Mose be haheitalai namona hari inai negai elda taudia dekenai, idia be ‘Dirava ena mamoe taudia idia ubua’ bona hahemaoro henia herevadia idia henia. (Kara 20:28) Ai ura edia tadikaka ida idia noho “medu be rei matamata latanai bamona.”
14. Mose be Israel dekenai hahemaoro idia karaia taudia ia abia hidi neganai, idia be lauma dalana dekenai edena bamona kara idia hahedinaraia?
14 Nega ia lao murinai Mose ia hegeregere lasi taunimanima hahemaoro henidia karana ena metau ia huaia totona. (Esodo 18:13, 18) Iena ravana tau ena hereva ia kamonai bena heduru ia abia. Unai neganai danu, edena bamona taudia idia abia hidi? Ita duahia, ia gwau: “Tau haida mai edia aonega danu oi abia hidi, Dirava dekenai idia gari taudia, bona moni abia hunia karana do idia ura lasi taudia. . . . Israela taudia ibounai dekena amo [Mose ese] aonega taudia ia abia hidi, bona taunimanima edia gunalaia taudia ia halaodia, daha ta ta, sinahu ta ta, 50 ta ta, bona 10 ta ta edia gunalaia taudia. Idia ese diadi gaukara idia karaia dina ibounai. Hereva badadia be Mose dekenai idia mailaia, to hereva maragidia be idia sibona idia tahua.”—Esodo 18:21-26.
15. Israel dekenai hahemaoro idia karaia taudia be edena bamona taudia?
15 Ita itaia diba hahemaoro taudia idia abia hidi lasi edia lagani bada sibona dainai. Mose ia gwau: “Emui iduhu ta ta lalodiai tatau haida, mai aonegadia bona mai edia lalo-parara bona mai edia diba taudia, umui abia hidi, bena lau ese emui kwarana taudia ai do lau halaodia.” (Deuteronomi 1:13) Mose be idau negai Elihu ia gwauraia herevana ena anina ia diba momokani, ia gwau: “Aonega be lagani momo taudia edia gauna sibona lasi, bona tatau burukadia sibona lasi be hereva maoromaorodia idia diba.” (Iobu 32:9) Momokani, idia abia hidi taudia be “mai edia diba taudia” be namo. To gau badana be idia be gaukara idia karaia diba taudia, Dirava dekenai idia gari taudia, moni abia hunia karana idia ura lasi taudia bona mai aonega bona lalo-parara taudia. Unai dainai, ia hedinarai, Iosua 23:2 bona Iosua 24:1 ese idia gwauraidia “kwarana taudia” bona “hahemaoro henia taudia” be unai siri lalonai idia gwauraia “tau badadia” amo idia idau lasi, to unai taudia amo idia abia hidi.—Insight on the Scriptures, Volume 2, rau 549.
Maoro Dalanai Hahemaoro Karaia
16. Mose be ia abia hidi hahemaoro taudia ia henidia taravatu dekenai dahaka ita laloa hari inai negai?
16 Mose be ia abia hidi hahemaoro taudia dekenai ia henia taravatudia ia herevalaia, ia gwau: “Unai neganai emui hahemaoro taudia lau haganidia, lau gwau, ‘Emui tadikaka do umui hahemaoro henidia neganai, tau ta bona ena tadikaka huanai do umui hahemaoro maoromaoro, eiava tau ta bona idau bese tauna huanai do umui hahemaoro maoromaoro. Namo lasi hahemaoro hereva umui hagagevaia. Dagi maragi tauna bona dagi bada tauna be emui vairana ai do idia hegeregere. Tau ta dainai do umui gari lasi, badina be hahemaoro be Dirava ena; bona kara ta dainai umui daradara neganai, hereva be lau [Mose] dekenai umui mailaia, lau ese do lau kamonaia.’ ”—Deuteronomi 1:16, 17.
17. Daidia idia abia hidi hahemaoro karaia totona, bona King Iehosafat be idia dekenai dahaka sisiba ia henia?
17 Momokani, iena mauri negana lalonai sibona Mose ese ia hahemaoro karaia diba. Unai dainai, dala ia karaia gabeai hahemaoro aukadia be hahelaga taudia dekenai, Levi taudia dekenai, bona idia abia hidi hahemaoro taudia dekenai idia abia lao totona. (Deuteronomi 17:8-12; 1 Sisiga 23:1-4; 2 Sisiga 19:5, 8) Iuda ena hanua lalonai ia abia hidi hahemaoro taudia dekenai, King Iehosafat ia gwau: “Emui hahemaoro gaukarana be tau ta dainai umui karaia lasi to ia be Iehova dainai umui karaia . . . Iehova gari henia karana dekenai, namona be unai bamona umui karaia mai emui kara maoromaoro bona mai emui kudou ibounai danu. Emui tadikaka edia hanua lalodiai idia noho be hahemaoro totona umui dekenai idia mai neganai, . . . nega iboudiai do umui hadibadia, bena idia be Iehova vairanai do idia kerere lasi, bona badu be umui bona emui tadikaka latanai do ia vara lasi. Unai bamona do umui karaia, bena do umui kerere lasi.”—2 Sisiga 19:6-10.
18. (a) Israel ena hahemaoro taudia be dahaka hahegani haida idia badinaia? (b) Hahemaoro taudia be dahaka idia laloaboio lasi, bona unai idia laloaboio neganai edena Bible siri ese idia hahedinaraia dahaka do ia vara?
18 Israel lalonai hahemaoro taudia ese idia badinaia taravatudia be inai: taga taudia idia hahemaoro henidia ogogami taudia idia hahemaoro henidia hegeregeredia (Esodo 23:3, 6; Levitiko 19:15); iboudiai be idia vairanai idia hegeregere (Deuteronomi 1:17); bona edia lalona ania totona moni idia abia lasi. (Deuteronomi 16:18-20) Namona be nega ibounai hahemaoro taudia idia diba idia hahemaoro henidia taudia be Iehova ena mamoe. (Salamo 100:3) Ma danu, Iehova ese Israel besena ia dadaraia ena badina ta be edia hahelaga taudia bona mamoe naria taudia be hahemaoro maoromaoro karana idia rakatania bona metau dalana dekenai taunimanima idia kara henidia.—Ieremia 22:3, 5, 25; 23:1, 2; Esekiel 34:1-4; Malaki 2:8, 9.
19. Keristen taudia edia nega do lasi neganai Iehova ena hahemaoro dalana ita tahua be edena bamona ita ia durua, bona sivarai gabena dekenai dahaka do ita laloa?
19 Iehova ia idau lasi. (Malaki 3:6) Israel dekenai ia haganidia idia karaia hahemaoro dalana ita laloa neganai, bona Iehova ena lalohadai hahemaoro maoromaorona dadaraia karana dekenai ita laloa neganai, namona be hari inai negai hahemaoro idia karaia elda taudia idia laloa namonamo. Iehova be Hahemaoro Tauna ena haheitalai, bona Israel dekenai ia havaraia hahemaoro karaia dalana ese Keristen kongregesen lalonai hahemaoro karaia dalana ena haheitalai ia hamatamaia. Sivarai gabena dekenai unai do ita itaia.
Riviu Henanadai
◻ Edena dala ai Iehova ena hahemaoro karaia dalana ita gwauraia diba?
◻ Edena dala ai Kain bona Utu-utu ia do vara lasi negana ena uru taudia ia kara henidia dalana be Iehova ena dala ia haheitalaia?
◻ Idau negai bese kwaradia edia negai daidia be hahemaoro taudia, bona edena dala ai idia hahemaoro?
◻ Edena dala ai Israel ena hahemaoro karaia dalana be ma bese haida edia dala amo ia idau?
◻ Israel dekenai, edena bamona taudia idia abia hidi Israel idia hahemaoro henia totona, bona namona be edena hahegani idia badinaia?
[Picture on page 10]
Idau negai bese kwaradia edia nega ai bona Israel dekenai, idia abia hidi lagani bada tataudia be hanua edia vareai gabuna dekenai hahemaoro idia karaia