Elda Taudia E, mai Maoromaoro Ida Hahemaoro Karaia

“Emui tadikaka do umui hahemaoro henidia neganai, tau ta ena tadikaka ida do umui hahemaoro henia maoromaoro.”​—DEUTERONOMI 1:16.

1. Hahemaoro karaia neganai, siahu be daika dekenai idia henia, bona unai ena anina be dahaka tanobada hahemaoro karaia taudia dekenai?

IEHOVA be Atai Herea Hahemaoro Tauna dainai, ia ese ena Natuna dekenai hahemaoro karaia siahuna ia henia. (Ioane 5:27) Ia be Keristen kongregesen ena kwarana dainai, Keriso ese hesiai tauna mai ena kamonai bona mai ena kara maoromaoro bona ena Hakaua Oreana ia gaukaralaidia elda taudia idia abia hidi totona. Nega haida unai elda taudia be hahemaoro karaia taudia. (Mataio 24:​45-47; 1 Korinto 5:​12, 13; Tito 1:​5, 9) Idia be hahemaoro karaia taudia maragidia dainai, unai taudia edia maduna be guba Hahemaoro Karaia Taudia, Iehova bona Keriso Iesu, edia haheitalai idia badinaia namonamo.

Keriso​—Haheitalai Namona Hahemaoro Tauna

2, 3. (a) Dahaka Mesia peroveta herevana ese Keriso ena Hahemaoro Karaia karadia ia hahedinaraia? (b) Dahaka gau badadia ita laloa be namo?

² Keriso be Hahemaoro Tauna dainai, peroveta hereva gunana ta ese ia herevalaia, ia gwau: “Iehova ena Lauma do ia diho mai, aonega bona lalo-parara laumana, sisiba bona goada laumana, diba bona Iehova gari henia laumana; bona ia ese Iehova gari henia do ia moalelaia. Ia be do ia hahemaoro lasi matana ia itaia gaudia dainai, bona lalona do ia hadaia lasi taiana ia kamonai herevana dainai, to mai kara maoromaoro ida ia ese ogogami taudia do ia hahemaoro henidia, bona iena lalona do ia hadaia maoro, tanobada ena manau taudia dainai.”​—Isaia 11:​2-4.

³ Unai peroveta hereva dekenai Keriso ena kara ia herevalaia, ia be “tanobada ibounai do ia kota henia mai maoromaoro danu.” (Kara 17:31) Iehova ena lauma, ena aonega, ena lalo-parara, ena sisiba, bona ena diba amo ia hahemaoro karaia. Ita laloa danu, ia hahemaoro karaia Iehova gari henia karana dekenai. Unai dainai, “Keriso ena Kota [gabuna]” be “Dirava ena Kota henia gabuna.” (2 Korinto 5:10; Roma 14:10) Ia naria namonamo ia hahemaoro karaia Dirava ese ia hahemaoro karaia dalana dekenai. (Ioane 8:16) Ia be matana ese ia itaia gaudia amo eiava ia kamonai gaudia amo sibona dainai ia hahemaoro karaia lasi. Ia be manau taudia bona ogogami taudia totona hahemaoro maoromaoro ia karaia. Ia be Hahemaoro Tauna namo hereana! Bona unai be haheitalai namo herea goevadae lasi taudia dekenai, badina idia be hari inai nega lalonai hahemaoro gaukara idia karaia!

Tanobada Hahemaoro Taudia

4. (a) Keriso ena Lagani 1,000 Lohia Negana lalonai 144,000 taudia edia gaukara ta be dahaka? (b) Dahaka peroveta hereva ese ia hahedinaraia horoa Keristen taudia haida be hahemaoro taudia ai do idia lao idia be tanobada dekenai idia do noho neganai?

⁴ Bible ia gwau horoa Keristen taudia haida sibona, aposetolo taudia 12 edia nega amo ia mai hari, be Lagani 1,000 Lohia Negana lalonai, Keriso Iesu ida do idia hahemaoro karaia. (Luka 22:​28-30; 1 Korinto 6:2; Apokalupo 20:4) Tanobada dekenai lauma Israel edia horoa orena taudia be 1918 ia lao 1919 lalonai hahemaoro idia abia bona idia gaukara lou. (Malaki 3:​2-4) Unai lauma Israel taudia idia gaukara lou karana dekenai guna peroveta herevana ta ia gwau: “Emui hahemaoro taudia do lau haginidia lou, gunaguna hegeregerena, bona emui sisiba taudia danu, nega gunadia ai bamona.” (Isaia 1:26) Unai dainai, Israel besena ena “nega gunadia ai” ia karaia bamona, Iehova be idia gini lou orena taudia dekenai hahemaoro bona sisiba henia taudia maoromaorodia ia henia.

5. (a) Lauma Israel ia gini lou murinai, daidia be “hahemaoro idia karaia totona” idia atoa, bona Apokalupo bukana lalonai edena dala ai idia laulaulaia? (b) Hahemaoro karaia gaukarana dekenai daidia be horoa naria taudia idia durudia, bona edena dala ai unai taudia idia hadibaia idia be hahemaoro gaukara dekenai idia namo idia lao totona?

⁵ Idia hamatamaia neganai, idia abia hidi ‘aonega taudia’ unai ‘hahemaoro gaukara idia karaia totona’ be horoa tau badadia, eiava elda taudia. (1 Korinto 6:​4, 5) Apokalupo lalonai, Iesu ena imana idibana lalonai, abidadama bona taunimanima ese idia matauraidia horoa heitatao taudia ia herevalaidia. Anina be Iesu ese ia biagudia bona ia hakaudia. (Apokalupo 1:​16, 20; 2:1) Lagani 1935 negana amo, edia namba ia bada lao noho “hutuma bada herea” be mai edia abidadama ida horoa taudia idia durudia, unai hutuma taudia edia helaro be “hisihisi bada herea” amo do idia roho mauri bona paradaiso tanobadana dekenai do idia mauri hanaihanai. (Apokalupo 7:​9, 10, 14-17) “Mamoe ena Natuna ena headava aria” ia mai noho neganai, horoa Hakaua Oreana ese unai hutuma bada herea taudia edia amo tatau idia abia hidi, idia be tanobada hegegemadai Iehova ena Witness taudia edia kongregesen 66,000 bona ma haida lalodiai elda bona hahemaoro gaukara idia karaia totona.a (Apokalupo 19:​7-9) Sikuli idaudia amo, idia be “tanobada matamatana” lalonai gaukara naria totona diba idia abia. (2 Petero 3:13) Tano momo dekenai, 1991 ena dokonai idia karaia Kingdom Ministry School momo ese idia hahedinaraia bada hahemaoro karaia daladia idia karaia namonamo be gau badana. Hahemaoro idia karaia elda taudia edia maduna be Iehova bona Keriso Iesu idia tohotohoa, edia hahemaoro be momokani bona maoromaoro.​—Ioane 5:30; 8:16; Apokalupo 19:​1, 2.

‘Mai Gari Danu Idia Noho’ Hahemaoro Karaia Taudia

6. Badina be dahaka hahemaoro komiti dekenai idia gaukara elda taudia be ‘mai gari danu idia noho’ be namo?

⁶ Bema Keriso be Iehova gari henia karana dekenai bona Iena lauma ena heduru amo hahemaoro ia karaia neganai, goevadae lasi elda taudia be unai kara idia habadaia be namo! Hahemaoro komiti dekenai idia gaukara neganai, namona be ‘mai gari danu idia noho,’ bona hahemaoro maoromaoro idia karaia totona namona be idia noinoi ‘Tamana dekenai, ia be taunimanima edia toana ia laloa lasi, ibounai be hegeregere ia vairanai.’ (1 Petero 1:17) Namona be idia laloatao idia be taunimanima edia ‘mauri’ idia kara henidia, idia be “Dirava ena vairanai edia gaukara ibounai ena anina do idia gwauraia hedinarai.” (Heberu 13:17) Unai do ia vara dainai, hahemaoro dekenai idia kerere kava neganai Iehova vairanai edia kara ena anina do idia gwauraia hedinarai danu. Heberu 13:17 ia herevalaia neganai, J. H. A. Ebrard ia torea, ia gwau: “Mamoe naria tauna ena gaukara be ia ese ia ubua mauridia do ia itaia noho, bona . . . idia ta ta iboudiai dainai iena hereva do ia gwauraia hedinarai, bona iena kerere dainai idia boio taudia dainai danu. Unai hereva idia laloa bada be namo. Namona be hereva ena hesiai taudia iboudiai idia laloa, idia be sibodia edia ura dainai unai mai metau bada maduna idia abia dae.”​—Ioane 17:12 itaia danu; Iakobo 3:1.

7. (a) Hari inai negai hahemaoro idia karaia taudia be dahaka idia laloatao be namo, bona dahaka idia ura be namo? (b) Mataio 18:​18-20 amo elda taudia be dahaka idia diba be namo?

⁷ Namona be hahemaoro idia karaia elda taudia idia laloatao hahemaoro gaukara ta ta iboudiai lalonai Hahemaoro Karaia Taudia korikoridia be Iehova bona Keriso Iesu. Namona be Israel ena hahemaoro taudia dekenai idia gwauraia hereva oi laloa, ia gwau: “Emui hahemaoro gaukarana be tau ta dainai umui karaia lasi to ia be Iehova dainai umui karaia; bona ia be umui danu ia gaukara hebou emui hahemaoro gaukarana lalonai. Bona namona be hari Iehova gari henia karana be emui latanai ia noho. . . . Unai bamona do umui karaia, bena do umui kerere lasi.” (2 Sisiga 19:​6-10) Dirava idia gari henia karana lalonai, hahemaoro ta idia karaia elda taudia idia hekwarahi bada bona dala idia kehoa Iehova be ‘idia danu ia gaukara hebou edia hahemaoro gaukarana lalonai.’ Namona be edia hahemaoro be Iehova bona Keriso idia hahemaoro karaia dalana hegeregerena. Namona be laulau dalana dekenai tanobada ai ia ‘guia gauna’ (kerere gauna) eiava ‘ruhaia gauna’ (kerere lasi gauna) be guba dekenai ia guia eiava ia ruhaia vadaeni​—Dirava ena lauma amo ia torea Herevana ese ia hahedinaraia hegeregerena. Bema Iesu ena ladana dekenai Iehova idia guriguri henia, Iesu be “idia dekenai [ia] noho” ia durudia totona. (Mataio 18:​18-20; Gima Kohorona, August 1, 1991, rau 9) Hahemaoro idia karaia neganai namona be ia hedinarai Keriso be momokani idia dekenai ia noho.

Nega Ibounai Mamoe Naria Taudia

8. Mamoe taudia dekenai elda taudia edia gaukara ginigunana be dahaka, Iehova bona Keriso ese idia haheitalaia hegeregerena? (Isaia 40:​10, 11; Ioane 10:​11, 27-29)

⁸ Elda taudia be nega ibounai hahemaoro idia karaia lasi. Nega ibounai lalonai mamoe naria gaukara idia karaia. Idia be taunimanima hanamoa taudia, idia be taunimanima panisia henia taudia lasi. (Iakobo 5:​13-16) Greek herevana dekenai naria tauna (e·piʹsko·pos) ena anina be dika ia koua naria gaukarana. Theological Dictionary of the New Testament bukana ia gwau: “Unai hereva mamoe naria tauna [1 Petero 2:25] dekenai hari hereva [e·piʹsko·pos] idia haboua, bona ia hahedinaraia unai tauna be mamoe ia naria eiava ia itaia noho dika ese ia abidia garina.” Oibe, elda edia gaukara badana be mamoe idia naria bona idia itaia tao, idia be seri lalonai idia noho totona, idia ura lasi idia luludia.

9, 10. (a) Paulo be edena dala ai elda taudia edia gaukara badana ia gwauraia bada, unai dainai dahaka henanadai ita laloa be namo? (b) Kara 20:29 dekenai Paulo ena hereva ena anina be dahaka, unai dainai namona be elda taudia be reana dahaka idia karaia diba hahemaoro komiti edia namba idia hamaragia totona?

⁹ Efeso kongregesen ena elda taudia ia hereva henidia neganai, aposetolo Paulo ese hereva badana ia gwauraia, ia gwau: “Umui sibona umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana amo ia hoia gauna, umui ubua.” (Kara 20:28) Paulo ia gwau mamoe naria gaukara be gau badana, ia gwau lasi panisi henidia karana be gaukara badana. Namona be elda haida ese inai henanadai idia laloa namonamo: ‘Bema mamoe naria gaukarana totona nega ita henia bona ita hekwarahi unai ese hahemaoro gaukara karaia bona tahua gaukarana dekenai ita negea bada negana ia hakwadogia diba, a?”

¹⁰ Momokani, Paulo be sisiba ia henia “uda sisia dikadia” garina. To unai taudia ia samania badina idia be ‘mamoe orea idia hadikaia,’ ani? (Kara 20:29) Bona ena be ia gwau abidadama naria taudia be unai “uda sisia dikadia” idia lulua be namo, to iena hereva ese idia hahedinaraia elda taudia be seri taudia ma haida idia “naria namonamo,” ani? Mamoe ta be lauma dalana dekenai ia manoka bona dala badinai ia moru neganai, dahaka ia abia be namo​—ta ese ia botaia eiava ia hanamoa, ta ese ia panisia eiava ia naria be namo? (Iakobo 5:​14, 15) Unai dainai, namona be elda taudia be nega idia atoa mamoe naria gaukara be hanaihanai idia karaia totona. Reana, unai amo, nega bada do idia halusia kava lasi hahemaoro komiti dekenai, Keristen haida be kara dika dekenai idia moru dainai. Momokani, namona be elda taudia idia laloa bada gauna be Iehova ena taunimanima idia durudia bona edia lalona idia hamatamataia, bona unai amo maino, lalo-hekwarahi lasi, bona noho namo do ia habadaia.​—Isaia 32:​1, 2.

Mai Edia Hebogahisi Mamoe Naria bona Hahemaoro Taudia

11. Badina be dahaka hahemaoro komiti idia karaia elda taudia ese edia vairanai idia mai taudia iboudiai be dala tamonai idia lalodia be namo, bona “Dirava dekena amo aonega” idia abia be namo?

¹¹ Keristen tauna ta ia do kerere lasi neganai bema mamoe naria gaukarana idia habadaia reana unai ese Iehova ena taunimanima bogaragidiai idia karaia hahemaoro karadia edia namba do ia hamaragia. (Galatia 6:1 itaia danu.) To, taunimanima idia kara dika bona idia goevadae lasi dainai, Keristen naria taudia be nega haida kara dika ia vara dainai do idia hahemaoro henia. Dahaka hahegani idia badinaia be namo? Unai be Mose ena nega eiava gunaguna Keristen taudia edia nega ai idia karaia hahegani amo idia idau lasi. Mose ena hereva Israel ena hahemaoro taudia dekenai idia do badinaia noho: “Emui tadikaka do umui hahemaoro henidia neganai, tau ta bona ena tadikaka huanai do umui hahemaoro maoromaoro. Namo lasi hahemaoro hereva umui hagagevaia.” (Deuteronomi 1:​16, 17) “Dirava dekena amo aonega” be taunimanima toana dainai hahemaoro ia hagagevaia lasi. Unai aonega be gau badana elda taudia dekenai, idia be hahemaoro komiti dekenai idia gaukara totona. (Iakobo 3:17; Hereva Lada-isidia 24:23) Unai aonega ese do ia durudia do idia diba manoka karana be idau bona kara dika mai ena ura dika be idau.

12. Edena dala ai hahemaoro taudia be kara maoromaoro taudia bona kara namo taudia?

¹² Elda taudia be “mai maoromaoro ida” idia hahemaoro karaia be namo, unai be Iehova ese ia gwauraia dahaka be maoro bona dahaka be dika herevana hegeregerena. (Salamo 19:9) To, ena be idia hekwarahi bada idia be kara maoromaoro taudia ai idia lao, namona be idia hekwarahi idia be kara namo taudia ai idia lao danu, Paulo be Roma 5:​7, 8 dekenai ese ia gwauraia hegeregerena. Insight on the Scriptures bukana lalonai, ena sivarai “Rightousness” [“Kara Maoromaoro”] dekenai, unai siri ia gwauraia, ia gwau: “Unai Greek herevana ia hahedinaraia ena kara badana be kara namo tauna be tau namona (nega momo ia ura kara namo karaia eiava ma haida ia durudia) bona ia be heduru tauna (ia be kara amo ena namo ia hahedinaraia). Ia ura lasi kara maorona sibona ia karaia, to ia be ma kara haida ia karaia danu, iena ura be ma haida ia lalodia bona ia ura idia be namo idia davaria bona ia durudia.” (Volume 2, rau 809) Kara maoromaoro sibona lasi to kara namo idia karaia elda taudia ese kara dika tauna do idia kara henia mai kudou-manada bona mai hebogahisi ida. (Roma 2:4) Namona be idia ura hebogahisi bona gwauatao bamona idia hahedinaraia. Ena be idia hereva henia hamatamaia neganai edia hereva ia kamonai lasi toana ia karaia, to namona be kara dika tauna idia durua toho bena idia ura do ia helalo-kerehai.​—Efeso 4:​32–5:1; Iakobo 2:13; Iuda 22, 23.

Hahemaoro Komiti Dekenai Lalohadai Maorona

13. (a) Elda tauna be hahemaoro gaukara ia karaia neganai, dahaka gaukara ia hadokoa lasi? (b) Hahemaoro komiti dekenai dahaka sisiba Paulo ese ia henia idia badinaia noho be namo?

¹³ Hahemaoro komiti idia karaia neganai, namo lasi elda taudia idia laloaboio idia be do mamoe naria taudia, Iehova ena mamoe idia naria, “mamoe naria tauna namona” henunai idia gaukara. (Ioane 10:11) Paulo ese ia henia sisibana, hekwakwanai idia davaria mamoe taudia durudia totona, be hahemaoro komiti ese idia badinaia danu. Ia torea, ia gwau: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina. Umui ta ta umui durua henia, emui metau do umui huaia totona. Inai dala dekenai Keriso ena taravatu do umui badinaia.”​—Galatia 6:​1, 2.b

14. Edena dala ai naria taudia be hahemaoro komiti idia laloa be namo, bona kara dika tauna dekenai edena bamona idia laloa be namo?

¹⁴ Namo lasi idia laloa idia be hahemaoro taudia hereadia bona taunimanima idia panisi henidia totona idia hebou, to namona be hahemaoro komiti dekenai idia gaukara elda taudia idia laloa unai komiti gaukarana be edia mamoe naria gaukarana ena dala ma ta. Iehova ena mamoe ta ese dika ia davaria. Dahaka idia karaia diba idia durua totona? Seri amo ia raka boio mamoe durua dalana be ia koua, a? Ita ura lasi unai bamona ia vara. Bema mai ena dala elda taudia ese hebogahisi idia hahedinaraia, unai bamona idia karaia be namo. Namo lasi kara dika badana ta ia vara neganai Iehova ena taravatu ena maka idia haidaua. To namona be idia laloa kara ta dainai kara dika ia karaia bona unai dainai dala ia noho neganai hebogahisi idia hahedinaraia diba. (Salamo 103:​8-10; 130:3) To, madi, kara dika taudia haida edia kwarana be auka dainai elda taudia be dala lasi to idia be kara aukana idia karaia, to namo lasi idia be dagedage idia hahedinaraia.​—1 Korinto 5:13.

Hahemaoro Komiti Idia Karaia Ena Badina

15. Taunimanima huanai hekwakwanai badana ia vara neganai, elda be dahaka idia tahua guna be namo?

¹⁵ Taunimanima haida huanai hekwakwanai badana ia vara neganai, aonega elda taudia do idia tahua gauna be unai taudia be sibodia unai hekwakwanai idia hanamoa toho vadaeni, Mataio 5:​23, 24 eiava Mataio 18:15 ese ia herevalaia dalana hegeregerena, eiava lasi? Bema unai dala ai idia karaia to ia hegeregere lasi, reana elda tamona eiava rua edia sisiba be ia hegeregere hekwakwanai kokia totona. Hahemaoro komiti do idia karaia bema kara dika rohorohona ta idia karaia neganai sibona, kongregesen murimurinai do idia atoa diba gauna unai. (Mataio 18:17; 1 Korinto 5:11) Namona be Bible ese ia gwauraia badina ta sibona dainai hahemaoro komiti do idia karaia. (The Watchtower, September 15, 1989, rau 18 itaia.) Unai hahemaoro komiti idia karaia neganai, namona be unai kara dika dekenai edia diba ia hegeregere elda taudia idia hididia idia karaia totona.

16. Hahemaoro komiti dekenai elda taudia be dahaka idia karaia toho?

¹⁶ Elda taudia be hahemaoro komiti idia karaia neganai dahaka idia ura? Gau ginigunana be inai, bema unai kerere dekenai hereva momokani idia diba lasi neganai mai maoromaoro ida do idia hahemaoro karaia diba lasi. Israel dekenai ia vara bamona, namona be gau badadia ‘idia tahua namonamo.’ (Deuteronomi 13:14; 17:4) Unai dainai hahemaoro komiti idia karaia ena badina ta be gau iboudiai idia tahua namonamo. To gau badana be lalokau dekenai unai idia karaia be namo. (1 Korinto 13:​4, 6, 7) Hereva iboudiai idia diba murinai, elda taudia be gau iboudiai do idia karaia kongregesen idia naria totona, bona Iehova ena taravatu namo hereadia idia badinaia noho totona, bona iena lauma ia gaukara namonamo noho totona. (1 Korinto 5:​7, 8) To, hahemaoro komiti karaia ena badina ta be, dala ia noho neganai, kara dika tauna idia durua.​—Luka 15:​8-10 itaia danu.

17. (a) Hahemaoro komiti dekenai edena dala ai samania tauna idia kara henia, bona dahaka idia ura idia karaia? (b) Hahemaoro komiti taudia be edena bamona idia karaia be namo?

¹⁷ Nega ibounai samania tauna be Dirava ena mamoe ta bamona idia kara henia. Namona be mai kara manada ida idia kara henia. Bema unai kara dika (eiava kara dikadia) ia karaia, kara maoromaoro hahemaoro taudia idia ura unai kara dika tauna ena lalohadai idia hamaoromaoroa, idia durua toho ia diba iena kara dika be dahaka, idia durua toho ia helalo-kererehai totona, bona unai amo “[Satana] ena koikoi dekena amo” do idia hamauria diba. Namona be “mai [edia] haheauka” danu idia karaia, “do [idia] sisiba henidia mai [edia] manau” danu. (2 Timoteo 2:​24-26; 4:2) Bema kara dika tauna ia diba ia kerere, bona ena lalona ese ena kudouna ia botaia momokani, bona Iehova ia noia gwauatao abia totona be edena bamona? (Kara 2:37 itaia danu.) Bema komiti taudia idia laloa momokani ia ura heduru ia abia, nega momo, kongregesen ena murimurinai do idia atoa be anina lasi.​—Gima Kohorona, October 1, 1983, rau 30, paragraf 1 itaia.

18. (a) Edena negai hahemaoro komiti taudia be idia kara auka be namo bona kongregesen ena murimurinai ta idia atoa? (b) Dahaka lalohisihisi gauna badana dainai elda taudia do idia hekwarahi bada mamoe idia boio garina?

¹⁸ To, hahemaoro komiti taudia vairanai ta be hereva momokani dadaraia karana ia hahedinaraia momokani neganai, Iehova ena taravatu ia gwau-edeede henia noho mai ena ura danu, eiava ia kara dika momokani karaia noho, edia maduna be kongregesen taudia oredia idia naridia bona unai helalo-kerehai lasi kara dika tauna be kongregesen ena murimurinai idia atoa. Hahemaoro komiti be nega momo kara dika tauna ida do idia hebou lou hebou lou lasi, eiava bema ia hedinarai momokani ia be Dirava dekenai ia sori lasi, do idia doria lasi uduna amo helalo-kerehai herevadia ia gwauraia totona.c Idia hanai lagani haida lalonai, tanobada ibounai dekenai kongregesen murimurinai idia atoa taudia edia namba be pablisa taudia edia namba amo 1 pesen. Anina be seri lalonai idia noho mamoe taudia handred handred amo, tamona tamona idia boio​—reana nega sisina lalonai sibona. Taunimanima ta be seri lalonai idia abia vareai totona nega bada ia ania, unai ita laloa neganai, ita lalohisihisi bada badina lagani ta ta iboudiai lalonai tausen gwauta momo be ‘Satana dekenai idia henia lou,’ ani?​—1 Korinto 5:5.

19. Hahemaoro komiti dekenai idia gaukara elda taudia be dahaka idia laloaboio lasi be namo, bona unai dainai dahaka idia karaia toho?

¹⁹ Namona be hahemaoro komiti idia karaia hamatamaia neganai elda taudia idia laloatao kongregesen lalonai kara dikadia momo idia vara taunimanima idia manoka dainai, idia karaia lasi kara dika idia moalelaia dainai. Namo lasi Iesu ena haheitalai ia boio mamoe dekenai idia laloaboio. Unai sivarai be inai hereva amo ia hadokoa, ia gwau: “Lau hamaoroa umui dekenai, inai bamona dika tauna ta ena lalona ia giroa dainai guba dekenai moale do ia bada. To kara maoromaoro taudia 99, edia lalona idia giroa lasi dainai guba dekenai moale do ia maragi.” (Luka 15:7) Momokani, “[Iehova] ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Iehova ena heduru amo, namona be tanobada ibounai dekenai hahemaoro komiti iboudiai do idia hekwarahi bada guba dekenai moale idia havaraia totona, unai be kara dika taudia idia durudia idia diba namona be idia helalo-kerehai, bona mauri hanaihanai dekenai ia lao dala maragina dekenai edia aena idia veridia lou.​—Mataio 7:​13, 14.

[Footnotes]

Riviu Henanadai

◻ Mamoe Naria Tauna Badana bona Mamoe Naria Tauna Namona edia haheitalai idia badinaia neganai, elda taudia edia ura badana be dahaka?

◻ Elda taudia be edena dala ai hahemaoro komiti karaia negadia edia namba idia hamaragia toho?

◻ Edena dala ai hahemaoro taudia idia kara maoromaoro sibona lasi to idia kara namo danu be namo?

◻ Hahemaoro komiti dekenai edena dala ai kara dika tauna idia kara henia be namo, bona badina be dahaka?

◻ Badina be dahaka durua daladia iboudiai idia tahua namonamo guna, murinai, ta be kongregesen ena murimurinai idia atoa?

[Picture on page 16]

Mamoe naria gaukarana idia karaia guna neganai, reana hahemaoro komiti momo do idia karaia lasi

[Picture on page 18]

Hahemaoro komiti negana ai danu, namona be mai manau ida elda taudia be kara dika tauna ena lalohadai idia hamaoromaoroa toho