Hoa Dalanai Taunimanima Hanamoa Negana be Kahirakahira

‘GUNA inai bamona ai itaia lasi!’ Iesu ese ia marere diba lasi gorere tauna ia hanamoa neganai, matana dekenai idia itaia taudia be unai bamona idia hereva. (Mareko 2:12) Iesu ese matakepulu taudia, hereva diba lasi taudia, bona aena dika taudia danu ia hanamodia, bona iena hadibaia taudia ese unai bamona idia karaia danu. Iesu be daika ena siahu amo unai bamona ia karaia? Abidadama ena anina be dahaka unai kara lalonai? Aposetolo edia nega ai idia vara gorere hanamoa hoa karadia ese dahaka idia hahedinaraia hari inai nega ena hoa karadia dekenai?​—⁠Mataio 15:​30, 31.

“Oiemu Abidadama ese Oi Ia Hanamoa Vadaeni”

Hahine ta, ena gorere be lagani 12 lalonai rara ia itaia be Iesu dekenai ia lao ena gorere hanamoa totona. Iesu be ia dekenai ia gwau: “Oiemu abidadama ese oi ia hanamoa vadaeni.” Hari, inai negai abidadama amo gorere idia hanamoa taudia be idia ura unai hereva idia gwauraia. (Luka 8:​43-48) Iesu ena hereva ese ia hahedinaraia ena abidadama dainai unai hanamoa karana ia vara, a? Unai kara be hari inai nega lalonai idia karaia “abidadama amo gorere hanamoa” karadia hegeregerena, a?

Baibel ena sivarai ita duahia namonamo neganai, ita itaia nega momo Iesu bona ena hadibaia taudia be gorere taudia idia hamaorodia lasi edia abidadama idia gwauraia hedinarai guna bena do idia hanamodia. Ataiai sivarai dekenai, unai hahine be Iesu dekenai gau ta ia hereva lasi, to regerege lasi ida Iesu murina amo ia mai, iena dabua sibona ia dogoatao, “vadaeni nega tamona iena rara gorere ia doko.” Ma nega ta ai, Iesu ese ia idia dogoatao gwauraia taudia ida ia mai tauna ta ia hanamoa, bona Iesu diba lasi tauna ta ia hanamoa danu.​—⁠Luka 22:​50, 51; Ioane 5:​5-9, 13; 9:​24-34.

Unai kara lalonai abidadama ena anina be dahaka? Iesu bona ena hahediba taudia be Turo bona Sidono edia kahana dekenai idia lao neganai, Foenike hahinena ta ia mai bona ia boiboi: “Lohiabada e, Davida ena Natuna e, oi bogahisihisi lau dekenai, egu natuna kekeni be lauma dikana ese ia abia momokani.” Ia noinoi, “Lohiabada e, oi durua lau,” neganai, mani ena lalohisihisi oi laloa. Iesu ese ia bogaiahisi bada bona ia haere: “Hahine e, oiemu abidadama be ia bada herea, oiemu ura gauna do oi abia.” Bona “unai neganai ena natuna kekeni ia namo vadaeni.” (Mataio 15:​21-28) Ia hedinarai goevagoeva, abidadama be unai kara lalonai ia noho, to daika ena abidadama? Ita itaia Iesu ese sina ena abidadama ia hanamoa, natuna ena lasi. Dahaka ia abidadama henia? Unai hahine ese Iesu ia gwauraia “Lohiabada e, Davida ena Natuna” neganai, taunimanima vairadiai ia hahedinaraia ia abia dae Iesu be gwauhamata Mesiana. Ia be Dirava dekenai eiava gorere hanamoa karana dekenai ena abidadama ia gwauraia hedinarai sibona lasi. Iesu ia gwau, “Oiemu abidadama be ia bada herea, oiemu ura gauna do oi abia” neganai, ena anina be bema idia abidadama henia lasi ia be Mesia unai hisihisi taudia idia mai lasi ia dekenai ia hanamodia totona.

Unai Baibel lalonai ita duahia sivarai amo, ita itaia diba Iesu ese ia karaia hanamoa karadia be hari idia karaia karadia amo idia idau. Iesu be ia roho bona ia boiboi kava lasi, bona idia raraia taudia be idia lolo lasi, idia ane lasi, idia tai badabada lasi, bona idia mase-rea lasi. Bona danu, Iesu ia gwau lasi gorere ta do ia hanamoa diba lasi badina gorere tauna be abidadama lasi eiava ia henia monina be hegeregere lasi; Iesu ese gorere ibounai ia hanamodia.

Dirava Ena Siahu amo Ia Hanamodia

Iesu bona iena hadibaia taudia be edena dala ai gorere taudia idia hanamodia? Baibel ia haere ia gwau: “Lohiabada ena siahu dekenai gorere taudia ia hanamoa.” (Luka 5:17) Luka 9:43 ia gwau hanamoa karana ta murinai, “ibounai be Dirava ena siahu dekenai idia hoa bada herea.” Unai dainai, Iesu be ena gorere hanamoa dagina ia heagilaia lasi. Nega ta, tau ta amo demoni ia luludia murinai, ia hamaoroa: “Oi lao oiemu varavara bona turana dekenai, [Iehova] ia bogahisihisi oi dekenai, bona oi ia hamauria sivarai do oi hamaoroa.”​—⁠Mareko 5:⁠19.

Iesu bona ena aposetolo taudia be Dirava ena siahu amo gorere idia hanamodia dainai, ita itaia gorere tauna idia hanamoa totona ia be mai ena abidadama eiava lasi be gau badana lasi. To, gorere hanamoa tauna ena abidadama ia goada be gau badana. Unai dainai, Iesu ena hahediba taudia be siahu bada demoni idia luludia diba lasi neganai, Iesu ese ia hamaorodia: “Umui emui abidadama be maragimaragi dainai.”​—⁠Mataio 17:⁠20.

Hoa Karadia amo Gorere Hanamoa Ena Badina

Ena be Iesu be tanobada ai ia noho neganai gorere taudia momo ia hanamodia, to ‘gorere hanamoa gaukarana’ sibona ia karaia lasi. Ena gorere hanamoa hoa karadia​—⁠unai kara karaia totona davana ia tahua lasi eiava moni ia noinoi lasi​—⁠be iena gaukara badana lasi, iena gaukara badana be “Basileia ena Sivarai Namona ia harorolaia.” (Mataio 9:35) Baibel ia gwau nega ta taunimanima momo “ia abia dae, Dirava ena Basileia herevana ia haroro henia idia dekenai, bona gorere hanamoa ura taudia ia hanamoa.” (Luka 9:11) Evanelia bukadia lalonai nega momo Iesu idia gwauraia “Hadibaia Tauna” to idia gwauraia lasi “Gorere Hanamoa Tauna.”

Vadaeni, dahaka dainai Iesu ese hoa dalanai gorere taudia ia hanamoa? Ia karaia ena badina badana be ia ura ia hamomokania ia be gwauhamata Mesiana. Ioane Bapatiso be badina maorona lasi dainai dibura dekenai idia atoa neganai, ia ura ia diba bema ia be Dirava ese ia henia gaukarana ia karaia guguru. Iena hadibaia taudia ia siaia lao Iesu dekenai bona idia nanadaia: “Do ia mai Tauna be oi, o idau tauna ta do ai naria?” Iesu ese Ioane ena hadibaia taudia ia haere henidia dalana mani oi itaia, ia gwau: “Umui lao, umui kamonai, umui itaia karadia be Ioane dekenai do umui hamaoroa. Matakepulu taudia edia matana idia kehoa, aena dika taudia idia raka, lepera taudia idia goeva, taia kudima taudia idia kamonai, mase taudia idia toreisi lou, bona ogogami taudia ese Sivarai Namona idia abia dae.”​—⁠Mataio 11:​2-5.

Oibe, Iesu ese gorere hanamoa karadia ia karaia sibona lasi, to Evanelia bukadia ese idia gwauraia hoa karadia ma haida ia karaia danu ese idia hamomokania vaitani ia be “do ia mai Tauna,” gwauhamata Mesiana unai. Taunimanima be “idau tauna ta” do idia naria lasi.

Gorere Hanamoa Hoa Karadia Idia Vara Hari, A?

Vadaeni, do ita abia dae hari inai negai Iehova ese gorere hanamoa hoa karadia amo iena siahu do ia hamomokania, a? Lasi. Iesu ese Dirava ena siahu amo ia karaia hoa karadia idia hamomokania vaitani ia be gwauhamata Mesiana. Iesu ena siahu karadia be Baibel lalonai idia toredia ibounai ese idia duahia totona. Hoa karadia amo Dirava ese uru ta uru ta dekenai ena siahu do ia hahedinaraia loulou be anina lasi.

Gorere hanamoa karadia bona hoa karadia ese taunimanima ibounai edia lalona idia veria lasi. Ena be edia matana amo Iesu ena hoa karadia idia itaia, to haida idia abia dae lasi iena guba Tamana ese ia durua. “Iesu ese hoa kara momo edia vairana dekenai ia karaia, to idia be idia abidadama henia lasi ia dekenai.” (Ioane 12:37) Unai dainai, aposetolo Paulo be hoa karadia​—⁠hegeregere peroveta karana, gado idauidau hereva karana, gorere hanamoa karana bona ma kara haida​—⁠Dirava ese Keristani ekalesia taudia dekenai ia henia harihari gaudia ia herevalaia murinai, lauma helaga ena siahu henunai ia gwau: “Peroveta hereva be do idia ore. Idau momokani gadodia danu do idia doko. Aonega danu be do ia boio. Badina be unai peroveta bona aonega dalana be kahana sibona ita diba. To gabeai diba goeva momokani ia mai neganai, unai kahana sibona ita diba gaudia be do idia ore.”​—⁠1 Korinto 12:​28-31; 13:​8-10.

Momokani, Dirava ita abidadama henia be gau badana iseda namo totona. To bema iseda abidadama ena badina be gorere hanamoa gwauhamata koikoidia dekenai, lalohisihisi sibona do ia havaraia. Bona danu, inai nega dokona ia gwauraia neganai, Iesu ese inai hadibaia hereva ia gwauraia: “Badina be Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana.” (Mataio 24:24) Gorere hanamoa koikoi karana bona koikoi karadia ma haida sibodia lasi, to demoni ese edia siahu do idia hahedinaraia danu. Unai dainai, edia badina idia gwauraia hedinarai diba lasi gaudia idia vara be do ita hoalaidia lasi, bona unai bamona kara be badina namona lasi Dirava abidadama henia momokani totona.

Hari inai negai tau ta ese Iesu bamona hoa karadia ia karaia lasi dainai, ita be namo ta do ita davaria lasi, a? Lasi. Iesu ese ia hanamoa taudia be gabeai idia gorere lou. Idia ibounai idia buruka idia lao bona idia mase. Edia gorere ia ore hahenamo be nega kwadogina sibona gauna. To, Iesu ena gorere hanamoa hoa karadia edia anina be noho hanaihanai gauna, badina idia ese vaira negana ai do ita abia hahenamo idia laulaulaia.

Unai dainai, guna ita herevalaia taudia, Alexandre bona Benedita be Dirava ena Hereva, Baibel, idia tahua murinai, hari inai nega edia abidadama amo hanamoa karadia bona meamea karadia idia abidadama henidia noho lasi. To, idia abia dae momokani gorere hanamoa hoa karadia be gunaguna idia vara gaudia sibona lasi. Dahaka dainai? Taunimanima milioni momo tanobada hegegemadai hegeregerena, idia be mai moale ida Dirava ena Basileia henunai do idia vara gorere hanamoa karadia ena hahenamo idia naria noho.​—⁠Mataio 6:⁠10.

Gorere Bona Mase Idia Ore Vaitani

Ita itaia vadaeni hegeregerena, gorere ia hanamodia bona hoa karadia ma haida ia karaia be Iesu ena gaukara badana lasi. To, Dirava ena Basileia ena sivarai namona harorolaia gaukarana be iena gaukara badana. (Mataio 9:35; Luka 4:43; 8:⁠1) Dirava ese iena Basileia amo hoa dalanai taunimanima do ia hanamodia bona kara dika ese taunimanima besedia dekenai ia havaraia hisihisi ibounai do ia kokia. Edena bamona bona edena negai unai do ia karaia?

Nega vaira ia herevalaia neganai, Iesu Keriso ese aposetolo Ioane dekenai inai peroveta matahanaina ia henia: “Harihari iseda Dirava ena hamauria ia ginidae vadaeni. Harihari iena Keriso ese iena siahu ia hedinaraia.” (Apokalupo 12:10) Idia vara gaudia ibounai ese idia hahedinaraia lagani 1914 amo Dirava ena inai tauna badana, Satani, be tanobada dekenai idia negea diho, bona Basileia be hari ia lohia momokani noho! Iesu be Mesia Basileiana ena King ai idia halaoa vadaeni bona hari ia hegaegae vadaeni tanobada ai gau badadia ia haidaua totona.

Kahirakahira momokani nega vaira ai, Iesu ena guba gavamani ese nega matamata lalonai do idia noho kara maoromaoro taudia latanai do ia lohia, idia be “tanobada matamata.” (2 Petero 3:13) Iseda noho be edena bamona unai nega ai? Unai nega ena toana hairaina be inai: “Vadaeni guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. . . . Ia [Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:​1, 4.

Hoa karana amo taunimanima edia gorere do idia namo negana ena mauri oi laloa diba, a? “Idia noho taudia ta ese do ia gwau lasi, ‘Lau be gorere,’ bona Lohiabada ese edia kara dika ibounai do ia gwauatao.” Oibe, Dirava ese abidadama amo gorere idia hanamoa taudia ese idia karaia diba lasi gaudia do ia karaia. “Ia ese danu mase do ia haorea momokani ela bona hanaihanai.” Momokani, “Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.”​—⁠Isaia 25:8; 33:⁠24.

[Picture on page 7]

Dirava ena Basileia henunai, hoa dalanai taunimanima do idia namo