Moale Korikori be Edeseniai Ita Davaria Diba?

TAUNIMANIMA momo idia laloa kohu abia karana amo moale idia davaria diba. Oi be edena bamona? Momokani, ena be kohu ese ita idia hamoalea diba, to moale korikori ia havaraia lasi; bona tauanina durua gaudia ese iseda abidadama idia hagoadaia lasi bona idia dainai lauma dalanai ita hegeregere lasi.

Ororo ai ia haroro neganai, Iesu Keriso ia gwau: “Idia diba lauma gaudia idia tahua be namo taudia idia moale, badina be guba basileiana be idia edia.” (Mataio 5:3, NW) Iesu be ma ia gwau: “Do umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekena amo lasi, lasi momokani.“​—Luka 12:15.

Momo ese sihari kava bona “tauanina ena kara” ma haida amo moale idia tahua. (Galatia 5:​19-​21) To, lebulebu karadia ese moale korikori, ia noho hanaihanai moalena, ia havaraia lasi. Momokani, unai kara idia karaia taudia ese Dirava ena Basileia do idia davaria lasi.​—1 Korinto 6:​9, 10.

Ma haida ese sibodia edia namo idia habadaia toho, unai amo moale idia tahua. Laiberi dekenai bona buka hoihoilaia sitoa dekenai taunimanima be sibodia edia namo idia habadaia daladia idia gwauraia bukadia be momo herea, to unai bamona bukadia amo noho hanaihanai moalena idia davaria lasi. Vadaeni, moale korikori be edeseniai ita davaria diba?

Do ita moale momokani totona, namona be ita diba lauma dalanai ita dabu be dika. Iesu ia gwau: “Idia diba lauma gaudia idia tahua be namo taudia idia moale.” To, bema unai ita diba to unai dabu haorea dalana ita tahua lasi, namo do ita davaria lasi. Haheitalai ta be inai: Bema ia heau daudau tauna be ena heau ena dokonai ena tauanina ena ura, ranu inua urana, ia hagugurua lasi, dahaka do ia vara ia dekenai? Ena tauanina ranuna do ia ore bona dika ma haida do ia davaria, ani? Unai hegeregerena, bema ita diba lauma aniani ita abia be namo to kara ta ita karaia lasi, lauma dalanai eda goada do ia ore. Bena unai dainai iseda moale do ia boio.

Iesu ia diba goevagoeva lauma gaudia do ia abia be namo, unai dainai Dirava ena Hereva ia tahua loulou bona ia laloa dobu. Buka Helaga ena hereva idauidau ia davaria haraga diba bona ia duahia namonamo diba, bona ma haida be unai kara ia hadibadia. (Luka 4:​16-​21; ma danu Efeso 4:​20, 21 itaia.) Iesu ia gwau iena Tamana guba ai ena ura karaia karana be aniani bamona. Dirava ena ura karaia karana amo moale bada ia davaria.​—Ioane 4:​34.

Oibe, moale korikori be kohu abia karana amo ita davaria diba lasi; bona iseda tauanina dikadia edia ura hagugurua karana ese moale ia havaraia lasi. Moale korikori be iseda lalona ai ia vara; ena badina be abidadama momokani bona Iehova Dirava tura henia namonamo karana. Unai dainai, salamo torea tauna, Davida, ia gwau: “Edia Dirava be Lohiabada, ena bese taudia be idia moale noho.”​—Salamo 144:15b.

[Picture on page 23]

Abidadama bona Dirava tura henia namonamo karana amo moale korikori do oi davaria