Mase

Anina: Ta ia mase neganai, ena mauri siahuna ia ore. Iena lagana ia doko bona ena kudouna bona ena kwara harana idia gaukara lasi neganai, ena tauanina lalonai ia noho mauri siahuna be metairametaira ia ore. Mauri be idau vaitani bona mase be idau vaitani.

Dirava ese taunimanima ia havaradia do idia mase totona, a?

Lasi. Iehova ese Adam ia hadibaia namona be ia gwau-edeede lasi, badina gwau-edeede amo mase do ia vara. (Gen. 2⁠:17) Gabeai, Dirava ese Israel taudia ia hadibadia, namona be idia kara dika lasi, idia do buruka momokani lasi neganai do idia mase garina. (Esek. 18⁠:31) Unai murinai iena Natuna ia siaia, taunimanima dainai do ia mase, bena unai hahemauri dalana idia abidadama henia taudia ese mauri hanaihanai do idia abia diba.​—⁠Ioane 3⁠:​16, 36.

Salamo 90⁠:10 ia gwau taunimanima momo edia mauri laganidia be 70 eiava 80 bamona neganai idia mase. Mose ese unai hereva ia torea neganai unai be momokani, to matamana neganai be unai bamona lasi. (Genese 5⁠:​3-32 itaia.) Heberu 9⁠:27 ia gwau, “Taunimanima ibounai be nega tamona sibona do idia mase.” Paulo ese unai ia torea neganai unai be momokani. To Adam ia do kara dika lasi bona Dirava ese ia do kota henia lasi neganai, be unai bamona lasi.

Dahaka dainai ita buruka ita lao bona ita mase?

Iehova ese tau bona hahine ginigunadia ia havaradia neganai, idia be goevadae dainai idia mauri hanaihanai diba. Idia be mai edia ura-kwalimu. Ia havaradia Diravana idia lalokau henia bona ena heduru idia moalelaia dainai, ia do idia badinaia, eiava? Unai bamona idia karaia diba, koua gauna ta be lasi. Dirava ese Adam ia hamaoroa, ia gwau: “Kara namona bona kara dikana hadibaia au ena huahua oi ania lasi, badina be inai huahua oi ania dina dekenai do oi mase momokani.” Satana ese gaigai ena uduna amo Eva ena lalona ia ania, Iehova ena taravatu do ia utua totona. Adam ese ena adavana ia gwau henia lasi, to ia danu ese taravatu auna ena huahua ia ania. Iehova ia hereva vadaeni hegeregerena, Adam ia kota henia, ia hamaoroa do ia mase. To unai kara dika taudia ruaosi edia mauri ia do hadokoa lasi neganai, mai ena hebogahisi ida nega ia henidia edia natudia do idia havaradia guna totona.​—⁠Gen. 2:17; 3:​1-19; 5:​3-5; ma danu Deuteronomi 32:4 bona Apokalupo 12:9 itaia.

Roma 5:​12, 17, 19: “Tau tamona [Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika. . . . Momokani unai tau tamona ena kara dika dainai mase ese taunimanima ibounai ia biagua. . . . Bona tau tamona ese Dirava ia kamonai henia lasi dainai taunimanima hutuma be kara dika taudia idia halaoa.”

1 Kor. 15:22: “Taunimanima ibounai Adam dainai idia mase vadaeni.”

Inai sinado badana “Mauri Biagua Siahuna” itaia danu.

Dahaka dainai beibi idia mase?

Sal. 51:​5: “Momokani, lau na kara havara ai na vara, bona kara dika ai sinagu ese e havaragu.” (Iobu 14:4; Genese 8:21 itaia danu.)

Roma 3:23; 6:23: “Ita ibounai ita kara dika vadaeni, bona Dirava ena hairaina ita abia be hegeregere lasi. . . . Kara dika ena davana be mase.”

Dirava ese memero kekeni be edia tamadia sinadia edia amo ia “abidia oho” lasi. Ena be tano ese anina bada ia havaraia, to nega momo gavamani bona bisinesi edia mataganigani taudia ese unai aniani be dabu taudia hariharilai henidia dalana idia koua dainai, unai aniani idia abia diba lasi, bena hitolo dainai idia mase. Memero kekeni haida be aksiden dainai idia mase, taunimanima badadia bamona. To ita ibounai be Adam ena amo kara dika ita abia; ita ibounai ita goevadae lasi. Taunimanima iboudiai, namodia bona dikadia, be vaia idia mase. (Koh. 9⁠:⁠5) To Iehova ia ‘ura lalo-dika’ toreisi-lou dalana amo memero kekeni be edia tamadia sinadia ida do ia haboudia lou, bona unai dala ia lailaia vadaeni.​—⁠Ioane 5:​28, 29; Iobu 14:14, 15; ma danu Ieremia 31:​15, 16 bona Mareko 5:​40-42 itaia.

Mase taudia be edeseniai?

Gen. 3:19: “Do oi varahu bona do oi gaukara auka tano ena anina abia totona. Ia lao bona tano dekenai do oi giroa lou, badina be tano dekena amo oi mai. Oi be tano dekenai karaia gauna, bona tano dekenai do oi giroa lou.”

Koh. 9:10: “Oi imamu ese baine davaria ḡaukarana na ba karaia mai goada-badamu ida; badina be o lao heniamu gabuna, mase taudia edia gabu, lalonai na asi ḡaukara ta, asi lalo-hadai ta, asi lalo-parara ta, bona asi aonega ta.”

Mase taudia be edena bamona?

Koh. 9:5: “Mauri taudia na dibadia do bae mase; a mase taudia na ḡau ta asi dibadia.”

Sal. 146:4: “Laḡana e dokomu negana ai na ia ese tano e lou heniamu; una dina ai ena lalo-hadai e oremu.”

Ioane 11:​11-14: “ ‘Iseda turana Lasaro be ia mahuta noho, to lau lao, do lau haoa.’ . . . Iesu ese idia dekenai ia hereva maoro, ia gwau, ‘Lasaro be ia mase vadaeni.’ ” (Salamo 13⁠:3 danu)

Taunimanima ta ia mase neganai ena kahana ta ia mauri noho, a?

Esek. 18:4: “Kara dika tauna laumana [soulina] na baine mase.”

Inai sinado badadia “Souli” bona “Lauma” itaia danu.

Mase taudia ese mauri taudia idia durudia diba bona idia hadikadia diba, a?

Koh. 9:6: “Edia heura-heni bona edia heinai-heni bona edia vaḡeḡe vada e ore vaitani; bona dina henunai e karamu karadia iboudiai lalodiai idia na asi ahudia, ela bona hanaihanai.”

Taunimanima haida idia gwau idia mase bena idia mauri lou, bona idia mase neganai idia itaia gaudia idia herevalaidia; edia sivarai be edena bamona?

Taunimanima ta ena lagana ia doko bona ena kudouna ia gaukara lasi neganai, ena mauri siahuna be ena tauanina ena sel lalodiai metairametaira ia ore matamaia lasi ela bona miniti haida idia ore. Bema ena tauanina idia haparakaia momokani, unai do ia vara haraga lasi, to hora haida muridiai do ia vara matamaia. Unai dainai, bema unai bamona taudia haida edia ududia amo idia hahoho henidia loulou bona edia kemedia idia gigidia loulou neganai, idia hamauridia lou diba. Unai bamona taudia be idia mase bamona, to edia tauanina edia sel be idia do mauri noho.

Unai bamona taudia momo be idia mase bamona neganai idia vara gaudia idia diba lasi. Ma haida idia gwau mamina idia abia idia be ataiai idia hure bamona. Haida idia gwau hairai gaudia idia itadia; ma haida idia gwau idia gari dikadika.

Doketa ese unai taudia edia mamina ena badina idia gwauraia diba, a?

Gorere bona muramura edia sivarai be magasin ta ladana The Arizona Republic lalonai ia torea tauna be ia gwau: “Taunimanima ta ese hamahutaia hekodona ia abia neganai, eiava gorere dikana o bero dikana ia abia neganai, ena tauanina ena kahana idauidau edia gaukara biagua siahuna ia maragi ia lao. Unai dainai, unai negai ena hemami varovarodia lalodiai idia noho muramuradia momo herea be haraga herea idia aru badabada, bena unai dainai ia nihi bamona​—⁠gau idauidau ia itaia bona rege idauidau ia kamonai. Gabeai, ena lalona ia abia lou neganai, ia gwau ia mase bena ia mauri lou.”​—⁠May 28, 1977, p. C-1; ma danu Fortschritte der Medizin, No. 41, 1979; Psychology Today, January 1981.

Taunimanima haida idia gwau edia varavara idia mase murinai edia laulau idia itaia bona idia ida idia herevahereva; unai ese idia mase bamona bena idia mauri lou taudia edia hereva ia hamomokania ani?

Mani emu kara, ai torea vadaeni siridia, inai sinado maragina “Mase taudia be edena bamona?” henunai oi duahia lou. Dirava ena Hereva momokanina ese ita ia hadibaia, mase taudia be edena bamona?

Daika ia ura taunimanima ese lalohadai idauna ta do idia abia dae? Iehova ese Adam bona Eva ia hamaorodia bema idia gwau-edeede do idia mase, bena daika ese hereva idauna ta ia gwauraia? “Gaigai [Satana ese ia hagaukaraia gauna; Apokalupo 12⁠:9 itaia] ese hahine dekenai ia gwau, Inai be momokani lasi, dohore umui mase lasi.” (Gen. 3⁠:⁠4) To gabeai, Adam bona Eva idia mase. Bena daika ese inai lalohadai ia havaraia: Taunimanima ta ia mase neganai, ena tauanina ia mase to ena lauma ia roho mauri? Ita itaia vadaeni, Dirava ena Hereva be unai bamona ia hereva lasi. Dirava ena taravatu idaunegai Israel taudia dekenai hegeregerena, mase taudia hereva henidia toho karana be “miro,” bona unai bamona kara idia karaia taudia be Dirava ese ia ‘dadaraidia.’ (Lev. 19:31; Deut. 18:​10-12; Isa. 8:⁠19) Bema mauri taudia ese idia mase vadaeni taudia, edia lalokau taudia, idia hereva henidia sibona, lalokau Diravana ese edia kara do ia gwauraia dika lasi, ani? To, bema lauma dikadia be idia mase vadaeni taudia edia toana idia karaia bona unai amo taunimanima idia koidia, Dirava ese iena taunimanima ia lalokau henidia dainai unai ia hadibalaidia be maoro, bena lauma dikadia edia koikoi amo idia siri diba, ani?​—⁠Ef. 6:​11, 12.

Dahaka dainai Iehova ena Witness taudia ese sene taudia edia kara, mase taudia taitailaidia karana, idia karaia lasi?

Taunimanima ta ena lalokau tauna ta ia mase neganai ia lalohisihisilaia bona ia taitailaia be maoro

Iena turana namona, Lasaro, ia mase murinai “Iesu ia tai.” (Ioane 11⁠:35) Dirava ena hesiai taudia haida edia lalohisihisi be bada herea, edia lalokau taudia idia mase neganai.​—⁠2 Sam. 1:​11, 12.

To toreisi-lou helarona dainai, Keristen taudia ese inai sisiba idia abia: “Ai ura lasi mase dekenai idia mahuta taudia totona umui daradara. Umui lalohisihisi lasi, ekalesia lasi taudia bamona, madi idia laloa goada diba lasi.”​—⁠1 Tes. 4:13.

Iehova ena hesiai taudia ese taunimanima be mase dainai idia karaia karadia iboudiai idia dadaraidia lasi

Gen. 50:​2, 3: “Iosepa ese ena hesiai taudia haida muramura gaukara idia diba taudia ia hamaorodia, iena tamana ena tauanina do idia hagoevaia, muramura mai edia bonana dekena amo do idia dahua ia bodaga haraga lasi totona . . . Dina 40 ia ore, muramura taudia edia gaukara edia nega be unai.”

Ioane 19:40: “Idia ese Iesu ena tauanina idia abia, dabua aukana mai muramura danu dekenai idia kumia, Iuda taudia edia mase guria karana hegeregerena.”

Dirava idia hamoalea toho taudia ese Dirava ena Hereva utua karadia idia karaia lasi

Haida ese kara haida idia karaia, edia lalohisihisi toana be taunimanima vairadiai idia hahedinaraia badabada totona. To Iesu ia gwau: “Aniani umui ania lasi neganai, [lalohisihisi dainai umui aniani lasi neganai danu] umui emui vairana dekenai lalohisihisi toana umui hedinaraia lasi guriguri koikoi taudia bamona. Badina be edia vairana dekenai lalohisihisi toana idia atoa, idia hitolo bamona, taunimanima do idia itaia totona. Umui lau hamaoroa momokani, edia davana idia abia vadaeni. To oi be aniani oi ania lasi neganai oiemu kwarana dekenai dehoro do oi atoa, oiemu vairana danu do oi huria. Vadaeni taunimanima be do idia diba lasi oi be aniani oi ania lasi noho, to oiemu Tamana ese hunia gabuna dekenai ia noho, be do ia diba. Vadaeni oiemu Tamana ese hunia gabuna dekenai oi sibona oi karaia gauna ia itaia noho, bona ena davana do ia henia oi dekenai.”​—⁠Mat. 6:​16-18.

Taunimanima edia kara haida amo idia hahedinaraia idia laloa taunimanima be mai edia lauma bona idia mase neganai unai lauma idia roho mauri, bona idia diba mauri taudia be dahaka dahaka idia karaia. To Baibel ia gwau: “Mase taudia na ḡau ta asi dibadia.” (Koh. 9:⁠5) Ma ia gwau: “Kara dika tauna laumana [soulina] na baine mase.”​—⁠Esek. 18:4.

Kara haida idia karaia badina idia laloa namona be mauri taudia ese mase taudia idia durudia, eiava idia laloa bema mase taudia idia hamoaledia lasi do idia hadikadia. To Dirava ena Hereva ese ia hahedinaraia, mase taudia ese hisihisi idia ania lasi bona idia moale diba lasi. “Laḡana e dokomu negana ai na ia ese tano e lou heniamu; una dina ai ena lalo-hadai e oremu.” (Sal. 146:4; ma danu 2 Samuel 12:​22, 23 itaia.) “Edia heura-heni bona edia heinai-heni bona edia vaḡeḡe vada e ore vaitani; bona dina henunai e karamu karadia iboudiai lalodiai idia na asi ahudia, ela bona hanaihanai.”​—⁠Koh. 9:6.

Bema Ta Ia Gwau​—⁠

‘Unai be Dirava ena ura’

Reana inai bamona oi haere henia diba: ‘Taunimanima momo be unai bamona idia laloa. To lau davaria vadaeni namona be Dirava sibona ena hereva inai gau dekenai ita tahua.’ Bena reana ma oi gwau: (1) ‘(Genese 2⁠:17 duahia.) Bema tau ta ese ena natuna ia hamaoroa kara ta do ia karaia lasi do ia mase garina, oi laloa unai tau ia ura ena natuna ese unai kara do ia karaia, a?’ (2) ‘Vadaeni, Dirava ena ura taunimanima dekediai be dahaka? Iesu ia gwau: “Egu Tamana ena ura be inai: ena Natuna do idia itaia noho [anina be, do idia diba bona do idia abia dae Iesu be momokani Dirava ena Natuna] bona do idia abidadama henia taudia ibounai be mauri hanaihanai do idia abia, bona lau ese dokona dina dekenai idia do lau hatorea isi.” (Ioane 6⁠:40)’

‘Nega ibounai taunimanima do idia mase’

Reana inai bamona oi haere henia diba: ‘Momokani, Adam ena nega amo ema bona hari unai bamona ia vara, ani?’ Bena reana ma oi gwau: ‘To mani Dirava ena gwauhamata namona Apokalupo 21⁠:​3, 4 (eiava Isaia 25⁠:⁠8) ai oi itaia.’

‘Ta ena nega do ia ginidae neganai do ia mase’

Reana inai bamona oi haere henia diba: ‘Taunimanima momo be unai bamona idia laloa. Idaunegai Greek taudia momo be unai bamona idia laloa danu; unai oi diba a? Idia gwau dirava hahinedia toi ese taunimanima ta ta edia mauri laganidia idia gwauraidia hidi. To Baibel ena hereva be idau vaitani.’ Bena reana ma oi gwau: (1) ‘(Kohelete 9:11 duahia.) Inai hegeregerena: Tau ta be ruma ta ia rakaia hanai neganai, unai ruma ena biriki ta be unai tau latanai ia moru. Dirava ese unai kerere ia havaraia, a? Bema ia havaraia, ruma biaguna idia samania be maoro lasi ani? . . . Baibel ena hereva hegeregerena, unai kerere ia vara kava, Dirava ena palani hegeregerena ia vara lasi, bona ta ia diba lasi unai tau be unuseniai do ia raka neganai unai biriki do ia moru.’ (2) ‘Baibel ese ita ia hamaoroa, bema kara dika amo ita siri iseda mauri do ita naria. (Her. 16⁠:17) Bema oi be mai emu natudia, lau laloa oi hamaorodia kara haida do idia karaia lasi edia mauri do idia hadikaia o do idia mase garina. Hari inai negai Iehova ese taunimanima iboudiai unai bamona ia sisiba henidia.’ (3) ‘Iehova be nega vairai do idia vara gaudia ia diba. Baibel amo ita ia hamaoroa dahaka ita karaia diba bena mauri daudauna do ita abia, do ita mase haraga lasi iena hereva idia dadaraia taudia bamona. (Ioane 17:3; Her. 12:28)’ (Inai sinado badana “Mauri Biagua Siahuna” itaia danu.)