Kerere Gwauraia Hedinarai Karana

Anina: Ta ese taunimanima momo vairadiai eiava taunimanima tamona vairanai, sibona ena kara dikadia ia gwauraia hedinarai.

Katolik Dubu Oreana ena hahediba herevana hegeregerena, Katolik taudia ese edia kara dikadia be fada tauna ta idia hamaorolaia hehuni, bena ia ese edia dika ia gwauatao. Baibel ia gwau unai kara be maoro, a?

Fada tauna hereva henia dalana

Idaunega amo ema bona hari taunimanima momo be inai bamona idia hereva henia: “Tamagu e, lau oi hanamoa, badina lau kara dika vadaeni. Lauegu dika gwauraia hedinarai negana ginigabena amo ema bona hari [pura o dina hidaosi] idia ore.”​—⁠U.S. Catholic magazine, October 1982, p. 6.

Mat. 23:​1, 2, 9: “Iesu . . . ia gwau, . . . ‘Tanobada dekenai tau ta do umui gwauraia lasi umui emui “Tamana,” badina be emui Tamana be tamona sibona, ia be guba dekenai ia noho.’ ”

Dirava ese edena kara dikadia ia gwauatao?

“[Katolik] Dubu Oreana be nega ibounai ia gwau, kara dika iboudiai, herevana idia bada herea, to Dirava ese ia gwaudiatao diba.”​—⁠The Catholic Encyclopedia (pope ese gwaumaoro ia henidia unai buka idia halasia totona), R. C. Broderick (Nashville, Tenn.; 1976), p. 554.

Heb. 10:​26: “Keriso ena hereva momokani ita diba murinai, bema iseda ura dekenai kara dika ita karaia noho, boubou gauna ta lasi ese unai dika do ia gwauatao diba.”

Mar. 3:​29: “Bema tau ta Lauma Helaga ena ladana ia hadikaia, iena dika be do ia gwauatao lasi. Iena dika ia noho hanaihanai, kokia dalana be lasi.”

Helalo-kerehai toana hahedinaraia dalana

Fada taudia momo edia kara be inai: Edia dubu oreana tauna ta ese ena dika idia ta vairanai ia gwauraia hedinarai neganai, ia hamaoroa “Aiemai Tamana” guriguridia bona “Maria hanamoa” guriguridia hidaosi do ia gwauraia loulou ena helalo-kerehai toana hahedinaraia totona.

Mat. 6:​7: “Umui guriguri neganai, hereva kava momo umui gwauraia loulou lasi, Dirava diba lasi taudia bamona, badina be idia laloa edia hereva momo dainai Dirava idia do ia kamonai.”

Mat. 6:​9-12: “Inai bamona do umui guriguri. ‘Aiemai Tamana e, guba dekenai oi noho, . . . Aiemai dika mani oi gwauatao.’ ” (Baibel ena siri ta ia gwau lasi Maria do ita guriguri henia eiava iena amo do ita guriguri. Filipi 4⁠:6 itaia, bona rau 271 danu inai sinado “Maria” henunai.)

Roma 12⁠:9: “Taunimanima umui lalokau henia koikoi lasi, to umui lalokau henia momokani. Dika do umui negea momokani, to namo do umui dogoatao momokani.”

Iesu ese siahu ena aposetolo ia henidia kara dika do idia gwauatao totona, a?

Ioane 20:​21-23: “ ‘Tamana ese lau ia siaia hegeregerena, lau danu umui do lau siaia.’ Unai bamona ia hereva, vadaeni uduna dekena amo ia hahodi henia idia dekenai, ia gwau, ‘Lauma Helaga umui abia. Edia dika do umui gwauatao taudia edia dika be do idia gwauatao, to edia dika do umui gwauatao lasi taudia edia dika be do idia noho.’ ”

Aposetolo idia laloa unai hereva ena anina be dahaka, bona edena bamona idia badinaia? Baibel lalonai inai bamona sivarai ta be lasi: Tau ta ese ena kara dika be aposetolo ta ia hamaorolaia hehuni, bena unai aposetolo ese ena dika ia gwauatao. Lasi. To Baibel ia gwau, ta be edena bamona do ia karaia be namo bena Dirava ese iena kara dika do ia gwauatao. Lauma helaga ese ia hakaudia dainai, aposetolo idia diba ta ese unai kara ia karaia eiava lasi, bena unai dainai idia gwau diba Dirava ese ena dika ia gwauatao vadaeni eiava lasi. Unai bamona sivarai be Kara 5:​1-11, 1 Korinto 5:​1-5 bona 2 Korinto 2:​6-8 ai oi itaia.

Inai sinado badana “Aposetolo Edia Dagi Abia Herevana” itaia danu.

Ta ese ena kara dika be fada tauna ia hamaorolaia hehuni karana ena matamaia dalana, be diba momo taudia ese idia lalo-tamonalaia lasi

The Catholic Encyclopedia, R. C. Broderick ese ia torea bukana, ia gwau: “Lagani 300 A.D. bamona murina amo ema bona hari, edia kara dika be fada taudia idia hamaorolaidia hehuni karana idia abia dae.”​—⁠Rau 58.

New Catholic Encyclopedia ia gwau: “Idaunegai sivaraidia idia torea taudia, Katolik bona Protestant taudia, be hari inai negai idia gwau dubu orea taudia edia kara, idia edia kara dika be fada taudia idia hamaorolaidia hehuni bena fada taudia ese idia haganilaidia karadia idia karaia edia helalo-kerehai hahedinaraia totona karana unai, be Ireland, Wales, bona Britain edia dubu oreadia ai idia hamatamaia. Kerere taudia ese monk taudia edia biaguna bona fada dagina idia abia monk taudia dekenai edia kerere idia gwauraia hedinarai, bena idia ese kerere taudia be edia helalo-kerehai hahedinaraia totona do idia karaia karadia idia hamaorolaidia. Idia sibodia idia noho hebou rumadia lalodiai, monk taudia be vaia sibodia edia kara dika idia gwauraia hedinarai loulou bona sisiba idia abia loulou. Unai hegeregerena idia ese edia dubu orea taudia oredia idia haganidia unai bamona do idia karaia. . . . Kara idauna, edia kara dika hehunidia idia gwauraidia hedinarai vadaeni to helalo-kerehai karadia idia do karaia lasi neganai edia dika gwauatao karana, be idia hamatamaia lasi ela bona lagani 1000 A.D. murinai.”​—⁠(1967), Vol. XI, p. 75.

Idaunegai sivaraidia ia torea tauna A. H. Sayce ia gwau: “Revareva haida ese idia hahedinaraia, hebou taudia vairadiai bona hehuni dekenai taunimanima ese edia kara dika idia gwauraia hedinarai karadia, be Babulonia dekenai idia karaia. Momokani, hehuni dekenai gwauraia hedinarai karana be idia karaia matamaia guna, bona nega momo idia karaia.”​—⁠The Religions of Ancient Egypt and Babylonia (Edinburgh, 1902), p. 497.

Iehova ena Witness taudia edia hahediba herevana be dahaka, kerere gwauraia hedinarai karana dekenai?

Ta ese Dirava ia kara dika henia neganai

Mat. 6:​6-12: “Oi guriguri neganai oiemu ruma dekenai oi vareai, iduara oi koua, oiemu Tamana, hunia gabuna ia noho dekenai do oi guriguri henia. . . . ‘Aiemai Tamana e, guba dekenai oi noho, oiemu ladana do ai hahelagaia. . . . Aiemai dika mani oi gwauatao, badina be ai dekenai idia hadikaia taudia edia dika ai gwauatao.’ ”

Sal. 32:⁠5: “Egu kara dika na [oi Dirava] vairamu ai na gwauraia hedinarai, egu kara havara na asina hunia; nato ‘Egu kerere baina gwaurai hedinarai Iehova vairanai’; bena oi ese egu kara dika ena metau o abia oho.”

1 Ioane 2:1: “Tau ta bema ia kara dika, ita be mai iseda durua tauna, iseda Tamana vairanai. Ia be Iesu Keriso, kara maoromaoro tauna.”

Ta ese taunimanima ta ia kara dika henia neganai eiava taunimanima ta ese ia ia kara dika henia neganai

Mat. 5:​23, 24: “Oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.”

Mat. 18:15: “Oiemu tadikakana ese kara dikana bema ia karaia oi dekenai, do oi lao ia dekenai, ena kerere do oi hedinaraia, umui ruaosi sibona do umui herevalaia.”

Luka 17:3: “Oiemu tadikaka ese oi bema ia hadikaia, do oi sisiba henia, vadaeni iena lalona bema ia giroa neganai be ena dika do oi gwauatao.”

Ef. 4:32: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.”

Ta ese kara dika rohoroho ia karaia dainai ia ura lauma dalanai heduru do ia abia neganai

Iak. 5:​14-16: “Umui ta [be lauma dalanai] ia gorere, a? Ia ese ekalesia gunalaia taudia do ia boiria be namo. Idia ese ia dainai do idia guriguri, bona ia dekenai dehoro do idia atoa, Lohiabada ena ladanai. Inai guriguri mai abidadama danu ese gorere tauna do ia hanamoa. Lohiabada ese iena mauri do ia hanamoa, bona iena kara dika do ia gwauatao. Unai dainai umui ta ta dekenai emui kara dikadia do umui gwauraia hedinarai, bona umui ta ta totona do umui guriguri. Vadaeni unai neganai Dirava ese emui mauri do ia hanamoa.”

Her. 28:13: “Ena kara dika e hunidiamu tauna basine namo, a ena kara dika e gwaurai hedinaraimu bona e rakatanimu tauna na ena dika baine hegwau tao.”

Bema kongregesen taudia idia kara dika to heduru idia tahua lasi, edena bamona ita kara henidia be namo?

Gal. 6:1: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina.”

1 Tim. 5:20: “Kara dika taudia ibounai be ekalesia taudia [unai kerere idia diba taudia] ibounai edia vairanai do oi gwau henia, vadaeni ekalesia taudia oredia be do idia gari.”

1 Kor. 5:​11-13: “Iseda ekalesia tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi. . . . ‘Unai kara dika tauna emui orea dekena amo umui atoa siri.’ ”