Raka Siri Karana

Anina: Raka siri karana ena anina be, Dirava tomadiho henia bona hesiai henia karadia rakatania karana. Raka siri taudia haida idia gwau Dirava idia diba bona idia hesiai henia, to iena Hereva lalonai idia noho hahediba herevadia eiava taravatudia idia dadaraidia. Ma haida idia gwau Baibel ena hereva idia abia dae, to Iehova ena orea idia dadaraia.

Bema Keristen kongregesen taudia haida ese hereva momokani idia dadaraia, do ita hoa a?

1 Tim. 4:1: “Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.”

2 Tes. 2:3: “Tau ta ese dala inai bamona dekenai do ia koikoi lasi umui dekenai. Badina Lohiabada ena Dina be do ia ginidae lasi ela bona unai Tau Dika Rohorohona do ia hedinaraia guna. Unai tau be Dirava ese do ia hadikaia momokani mase gabuna dekenai.”

Raka siri taudia edia toana haida be inai:

Ma haida idia veridia toho idia murinai do idia raka totona; unai amo orea idia hapararaia bona sibodia edia orea idia haginidia

Kara 20:30: “Umui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.”

2 Pet. 2:​1, 3: “Hadibaia koikoi taudia be umui huanai do idia hedinarai. Hunia dekenai hereva koikoi do idia gwauraia, bona taunimanima momo edia abidadama do idia hadikaia. Edia Lohiabada, ia ese idia ia hamauria vadaeni, to idia ese do idia negea. . . . Edia mataganigani dainai, inai hadibaia koikoi taudia ese sivarai koikoi dekena amo umui emui laloa do idia ania, vadaeni emui moni momo do idia davaria.”

Reana idia gwau Keriso idia abidadama henia, to ia ese ia murinai idia raka taudia ia henidia gaukarana, haroro bona hadibaia gaukarana, idia laloa maragi

Luka 6:46: “Umui be badina dahaka umui gwauraia lau dekenai, umui gwau, ‘Lohiabada e, Lohiabada e,’ to egu hereva umui karaia lasi?”

Mat. 28:​19, 20: “Unai dainai do umui lao, bese ibounai be diba tahua taudia do umui halaoa, bona . . . do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.”

Mat. 24:14: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”

Reana idia gwau Dirava idia hesiai henia, to iena gwaukau taudia, iena orea tanobada dekenai, be idia dadaraidia

Iuda 8, 11: “Inai hari idia noho tau dikadia ese nihi idia abia, vadaeni sibodia edia tauanina idia hadikaia noho. Dirava ena siahu idia gwauraia be anina lasi. Idia ese danu guba noho taudia idia hereva dika henia. Madi, dika momokani do idia davaria! . . . Idia ese mai hekokoroku danu Dirava idia kamonai henia lasi, Kora ia karaia bamona. Bona Kora ese dika ia davaria bamona, idia danu edia dika davana mase do idia abia.”

Num. 16:​1-3, 11, 19-21: “Kora . . . e tore isi, Mose dekena ela, idia bona orea lohiadia sinahu-rua imahui, hebou ese e abidia hidi taudia, iboudiai na mai haridia taudia. Idia na Mose bona Aaron vairadiai e hebou, e heai henidia, eto, Umui raruosi na o hekokorokumu; badina be hebou taudia iboudiai na hehelaḡa; oibe, ibouboudiai, bona Iehova na bogaragidiai e nohomu. Dahaka dainai umui raruosi ese Iehova ena orea taudia o lohiadiamu? [Mose eto:] Matona, oi bona emu orea taudia iboudiai vada o hebou, Iehova vada o heai henia. Aaron be daika, umui ese ia o maumauraiamu a? Bena Kora ese orea idoinai e haboudia idia vairadiai, hebou kalagana iduarana ai. Bena Iehova diaridiarina e hedinarai, hebou taudia iboudiai ese e itaia. Bena Iehova ese Mose bona Aaron e hamaorodia, eto, Ena hebou amo ba raka siri, bena baina habuadia tari.”

Idia ese abidadama momokani idia rakatania sibona lasi, to edia bamodia gunadia idia ‘dadabadia’ danu, taunimanima vairadiai idia gwauraidia dika bona dala ma haida amo edia gaukara idia koua toho; raka siri taudia be unai bamona idia karaia, Dirava ena orea hadikaia totona, hanamoa totona lasi

Mat. 24:​45-51: “Hesiai tauna mai ena kamonai bona mai ena kara maoromaoro, ena biaguna ese ia abia hidi, ena ruma do ia naria, bona aniani neganai edia aniani do ia henia, tauna be daika? . . . To hesiai tauna dikana ena lalona dekenai do ia laloa, do ia gwau, ‘Lauegu biaguna be do ia giroa mai haraga lasi.’ Vadaeni ia ese ena hesiai taudia haida do ia botaia, muramura inua kekero taudia danu do ia aniani noho, do ia inuinu noho. Unai hesiai tauna be ia laloa lasi dainai, bona hora ta ia diba lasi neganai iena biaguna do ia ginidae. Biaguna ese kaia amo do ia utua kahana maragimaragi, koikoi taudia danu edia panisia gabu do ia siaia.”

2 Tim. 2:​16-18: “Anina lasi hereva bona hereva kavakava dekena amo do oi raka siri, badina be unai kara ese taunimanima Dirava dekena amo ia luludia oho. Oibe, hereva unai bamona be toto dikana bamona, ia be ia bada ia lao noho. Humenaio bona Fileto be unai bamona. Idia ruaosi be hereva momokani idia rakatania vadaeni, idia gwau, mase dekena amo toreisi lou be ia ore vadaeni. Inai hereva koikoi dekena amo haida edia abidadama ia manoka vadaeni.”

Keristen taudia mai edia kamonai ese raka siri taudia idia abidia dae eiava edia buka idia duahia be maoro, a?

2 Ioane 9, 10: “Tau ta bema Keriso ena hadibaia hereva ia badinaia lasi, to ia raka siri, bona hadibaia hereva idauna ta ma ia badinaia, unai tau dekenai Dirava ia noho lasi. . . . Unai dainai, bema tau ta umui dekenai ia mai, bona inai Keriso ena hadibaia hereva ia gwauraia lasi neganai, emui ruma dekenai do umui abia dae lasi. Bona hanamoa hereva do umui henia lasi.”

Roma 16:​17, 18: “Lauegu varavara taudia e, ekalesia orea idia hapararaia taudia bona taunimanima haida edia abidadama idia hadikaia taudia do umui naria namonamo. Ai ese umui dekenai ai henia vadaeni hadibaia hereva idia ura makohia gwauraia. Idia dekena amo do umui raka siri. . . . Idia danu hereva manau koikoi bona hereva namo koikoi dekena amo, diba bada lasi taudia idia koia noho.”

Raka siri taudia edia lalohadai ia diba totona, bema ta ese edia hereva ia kamonai eiava edia buka ia duahia, unai ese ia do ia hadikaia a?

Her. 11:9: “Dirava se matauraiamu tauna ese ia uduna amo ia dekena tauna bema habuaia tari.”

Isa. 32:6: “Kavakava tauna na e hereva kava hereva kavamu, bona lalona ese kara dikadia e lalo hatamu, Dirava iḡonaḡonalaina karadia baine kara bona Iehova baine herevalaia kerere helaoreana; hitolo tauna na bogana basine hakunua bona ranu mase tauna na ranu basine henia helaoreana.” (Isaia 65:​13, 14 itaia danu.)

Raka siri karana ena kerere be bada eiava?

2 Pet. 2:1: “Hunia dekenai hereva koikoi do idia gwauraia, bona taunimanima momo edia abidadama do idia hadikaia. Edia Lohiabada, ia ese idia ia hamauria vadaeni, to idia ese do idia negea. Vadaeni karaharaga Dirava ese idia do ia hadikaia ore.”

Iobu 13:16: “Dirava se matauraiamu tauna na ia vairanai basine gini.”

Heb. 6:​4-6: “Gunaguna edia lalona idia diari, bona guba ena harihari gauna idia mamia toho, bona Lauma Helaga ena siahu idia abia. Bona idia diba vadaeni Dirava ena hereva be namo, bona guba ena mauri gabeai gauna idia diba vadaeni. Inai bamona taudia bema edia abidadama idia rakatania neganai idia be mai edia dala do edia lalona idia giroa lou, a? Lasi momokani. Idia ese edia kara dika dekena amo Dirava ena Natuna satauro dekenai idia hamasea lou bamona. Idia ese Keriso taunimanima edia vairana dekenai idia hahemaraia lou bamona.”