Sene Tubudia Tomadiho Henidia Karana

Anina: Sene tubudia matauraidia bona tomadiho henidia karana. Taunimanima idia laloa edia sene tubudia edia laumadia be idia itaia diba lasi gabuna dekenai idia noho, unai dainai idia matauraidia bona idia tomadiho henidia, badina idia laloa edia sene tubudia ese idia durudia diba eiava idia hadikadia diba. Unai be Baibel ena hahediba herevana ta lasi.

Idia mase vadaeni sene taudia be mauri taudia edia kara idia diba bona idia durudia diba, a?

Koh. 9:5: “Mauri taudia na dibadia do bae mase; a mase taudia na ḡau ta asi dibadia.”

Iobu 14:​10, 21: “A taunimanima na e masemu, . . . bena ia be edeseni ai? Natuna na dagi namodia e abimu, a ia na asi dibana.”

Sal. 49:​10, 17-19: “Aonega taudia danu e masemu; kava tauna bona lalo-duhu tauna raruosi bae mase, bona edia taḡa na bae rakatani, haida edia. . . . Badina be baine mase negana ai ḡau ta basine abia kau, basine laohaia; ia hairaina basine diholaia. . . . To tamana ena uru taudia baine lao henidia; idia ese diari basie itaia lou.”

Boubou patana ai eiava gara ai idia atoa anianina be ta ese ia ania lasi, ani? Unai ese ia hahedinaraia unai aniani amo mase taudia idia ubudia lasi, ani?

Inai sinado badana “Babalau, Meamea” itaia danu.

Iseda sene tubudia, idia mase vadaeni taudia unai, ese ita do idia hadikaia garina ita gari be mai badina korikorina, a?

Koh. 9:​5, 6: “Mase taudia . . . edia heura-heni bona edia heinai-heni bona edia vaḡeḡe vada e ore vaitani; bona dina henunai e karamu karadia iboudiai lalodiai idia na asi ahudia, ela bona hanaihanai.”

Ta ia mase neganai, ena lauma be ena tauanina murimurinai ia mauri noho, a?

Esek. 18:4: “A itaia, lauma [souli] iboudiai na lauegu, tama laumana [soulina] bona natuna laumana [soulina] danu; kara dika tauna laumana [soulina] na baine mase.” (Eze 18 Siri 20 danu)

Sal. 146:​3, 4: “Pavapava basio abidadama henidia; taunimanima natuna ta danu basio abidadama henia . . . Laḡana e dokomu negana ai na ia ese tano e lou heniamu; unai dina ai ena lalo-hadai e oremu.”

Saiens taudia bona doketa taudia ese gau ta idia davaria lasi, mase tauanina amo ia roho mauri.

Rau 276-8 itaia danu, inai sinado “Mase” henunai.

Edena oi ura​—⁠oiemu natudia bona oiemu tubudia ese oi do idia matauraia bona oi do idia lalokau henia oi mauri noho neganai, eiava oi mase murinai emu gara ai tomadiho karadia do idia karaia, a?

Ef. 6:​2, 3: “ ‘Emui tamana bona sinana do umui matauraia.’ Inai be Buka Helaga ena Taravatu mai ena gwauhamata ginigunana. Badina be inai bamona umui karaia neganai, gwauhamata be inai: ‘Mauri namona do umui abia, bona emui mauri do ia daudau tanobada dekenai.’ ” (Baibel ena taravatu idia badinaia memerodia bona kekenidia ese edia tamadia sinadia idia matauraidia, unai amo edia lalodia idia hamoaledia idia do mauri noho neganai.)

Her. 23:22: “Tamamu, e haravamu tauna, na ba kamonai henia; bona sinamu na e burukamu negana ai basio dadaraia.”

1 Tim. 5:4: “Vabu ta, bema ia be mai ena natuna o mai ena tubuna, idia ese edia sinana bona tubuna idia durua be namo. Badina be Dirava do ita hamoalea karana ta be, iseda ruma taudia do ita laloa bona durua.”

Rohe taudia idia gwau mase taudia edia hereva idia halasia, to unai hereva be daidia edia amo idia mai?

Isa. 8:19: “Bae hamaoromui, baeto ‘Rohe taudia bona mea taudia, e tanatanamu bona e hereva hemaunumu taudia, na ba nanadaidia’ negana ai ba laloa, taunimanima ese edia Dirava basiema nanadaia a? Mase taudia bema nanadaidia mauri taudia daidiai a?” (Bema unai kara amo iseda lalokau taudia ida ita hereva momokani diba, Dirava ese do ia taravatulaia lasi, ani?)

Kara 16:16: “Dina ta guriguri gabuna ai lao neganai, hesiai kekeni ta ia davaria ai. Unai kekeni be meamea lauma ese ia abia. Ia be vairai do idia vara gaudia ia gwauraia. Inai kekeni ena biaguna be moni momo idia abia ena meamea kara amo.”

Rau 43-5 itaia danu, inai sinado “Babalau, Meamea” henunai.

Daika ita tomadiho henia be maoro?

Luka 4:8: “Iesu ia haere, ia gwau, ‘Buka Helaga ia torea vadaeni inai bamona, “Lohiabada oiemu Dirava dekenai do oi tomadiho henia, ia sibona ena ura do oi karaia.” ’ ”

Ioane 4:​23, 24: “Nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho. Dirava be Lauma, bona do idia tomadiho henia taudia ese lauma bona momokani dekena amo do idia tomadiho henia.”

Nega vairai, taunimanima ese edia varavara, idia mase vadaeni taudia, do idia hedavari henidia lou diba, a?

Ioane 5:​28, 29: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona, to kara dika taudia do idia toreisi kota henia totona.”