Buklet Idauidau amo Basileia Ena Sivarai Namona Ita Harorolaia
1 Hereva momokani ita diba bona sivarai namona idia harorolaia goadagoada taudia bogaraginai ita noho be moale bada gauna! Dirava ena orea murimuri ai idia noho taudia be Basileia ena sivarai namona idia kamonai be gau badana. Inai buklet, “Itaia! Lau ese Gau Iboudiai Lau Hamatamataia,” bona Inai Gavamani ese Paradaiso Do Ia Mailaia ese auka lasi dalanai, Basileia ena hereva momokani idia hahedinaraia. Idia ese tanobada maurina Dirava ena Basileia henunai idia hahedinaraia namonamo, bona duahia tauna idia hakaua lao, Dirava ena Hereva lalonai ia hadibaia Basileia ena hahenamo dekenai. Inai buklet, Toi Tamona Oi Abia Dae be Namo, Eiava? ese kudou-maoro taudia ia durua diba maorona idia abia Iehova, Iesu, bona lauma helaga dekenai. To momokani, kamonai tauna ta dekenai buklet ita rakatania be iseda gaukara ena matamana sibona. (1 Kor. 9:23) Buklet ita rakatania murinai, haraga ita lou henia, Diba ese Mauri Dekenai Ita Ia Hakaua Lao bukana amo stadi do ita hahedinaraia totona. August lalonai, edena bamona unai do ita karaia diba?
2 Bema ta oi hereva henia bona ia ese Kerisendom ena Toi Tamona hadibaia herevana ia daradaralaia eiava ia laloa Iesu be Dirava, unai neganai inai buklet “Toi Tamona Oi Abia Dae be Namo, Eiava?,” be hereva kwadogi amo oi hariharilaia diba. Buklet ena vairana oi hahedinaraia neganai, reana oi gwau:
◼ “Nega momo taunimanima ai davaria bona idia gwau Toi Tamona idia abia dae, to edia lalohadai unai hereva dekenai be idauidau. Inai buklet ese inai henanadai ia haerelaia: Toi Tamona be dahaka? Baibel ese ia hadibaia, a? Iesu Keriso be siahu ibounai Diravana bona Toi Tamona ena kahana ta, a? Lauma helaga be dahaka, bona edena bamona ia gaukara? Inai buklet oi stadilaia bona ena Baibel siridia oi duahia neganai, do oi moalelaia. Inai kopi oi abia diba, ena davana be 40 toea sibona.” [Herevalaia bukana ena rau 405-7 oi duahia, toi tamona idia henanadailaia taudia oi haere henia totona.]
3 “Toi Tamona” buklet oi rakatania murinai oi lou henia neganai, dahaka do oi gwau? Reana inai oi tohoa:
◼ Buklet ena rau ginigabena ena laulau oi hahedinaraia bona oi henanadai, “Inai laulau be mai hairaina, ani?” Haere oi naria. Paragraf ginigunadia rua oi duahia to Diba bukana oi herevalaia, Mauri Hanaihanai bukana oi gwauraia lasi. Diba bukana ena rau 4 bona 5 ai ia noho laulau oi kehoa bona oi henanadai: “ ‘Oi ura unai paradaiso mai hairaina ai do oi noho hanaihanai, a?’ [Haere naria.] Bema unai oi ura, mani oi itaia Baibel ese unai hairai gabuna ita moalelaia ena ki ia gwauraia hedinarai. [Ioane 17:3 duahia.] Lau moale bema inai buka, Diba ese Mauri Dekenai Ita Ia Hakaua Lao bukana, amo oi ida Baibel do lau stadilaia diba, davana lasi. Unai oi ura, a?” Buka oi hariharilaia, ena davana be K1.50, bona bema ia abia, lou henia ena nega oi gwauraia.
4 Inai buklet, “Itaia! Lau ese Gau Iboudiai Lau Hamatamataia” oi hariharilaia neganai, reana oi hamatamaia totona ena kopina ena laulau oi hahedinaraia bena oi henanadai:
◼ “Dahaka oi laloa, edena dala amo inai bamona tanobada ia vara diba?” Haere oi naria. Laulau ai idia noho gaudia haida, rau 3 dekenai idia herevalaia gaudia unai, oi kikilaia. Bena oi gwau: “Taunimanima momo idia laloa inai bamona tanobada ia vara diba lasi. To Dirava ese ia karaia diba. [Paragraf 43 ena hereva haida oi gwauraia; bena Isaia 9:6, 7 oi duahia.] Dirava ese ia gwauhamata tanobada matamatana do ia mailaia, ia lalonai tano idauidau amo idia mai taudia ese paradaiso do idia moalelaia. Lau ura oi ese inai buklet do oi duahia. Ena davana be 40 toea sibona. Ia hahedinaraia edena dalana ai oi bona oiemu famili ese Dirava ia mailaia mauri namona do umui moalelaia diba.”
5 Lou henia neganai, “Itaia!” buklet oi gaukaralaia diba bona do oi hahedinaraia dahaka dainai Baibel ita dibaia be namo. Reana ena kopina oi hahedinaraia lou bona oi gwau:
◼ “Nega ginigunana inai laulau oi dekenai lau hahedinaraia neganai, ita gwau ita ura inai bamona tanobada namona dekenai do ita noho. Unai do ia vara totona, ita ibounai be gau ta ita karaia be namo.” “Itaia!” buklet ena paragraf 52 oi kehoa; unai paragraf bona Ioane 17:3 oi duahia. Unai haheitalai herevana bona paragraf 53 ena hereva, Baibel dekenai diba tahua herevana, oi kikilaia bena oi hahedinaraia Iehova ena Witness taudia ese taunimanima edia ruma dekenai, unai bamona hadibaia gaukarana idia karaia, davana lasi. Diba bukana amo stadi karana oi hahedinaraia.
6 “Inai Gavamani ese Paradaiso Do Ia Mailaia” buklet oi hariharilaia neganai, reana oi gwau:
◼ “Lau kamonai taunimanima momo idia ura hari inai negai ita davaria hekwakwanai badadia ia kokia diba gavamanina henunai do idia noho. [Emui gabu dekenai idia vara hekwakwanai oi gwauraia, hegeregere gaukara be lasi, raskol karadia idia bada idia lao, eiava drag ania karana.] Unai gaudia dainai ita daradara, nega vairai dahaka do ia vara ita bona iseda lalokau taudia dekenai. Oi laloa, dohore gavamani ta ese unai hekwakwanai do ia kokia, a? [Haere naria.] Reana oi ese Lohiabada ena Guriguri nega haida oi gwauraia. Bema oi gwauraia, oi diba oi ese kara maoromaoro gavamanina oi gurigurilaia unai, a?” Gavamani buklet ena rau 3 oi kehoa bona paragraf ginigunadia rua oi duahia. Buklet oi hariharilaia, ena davana be 40 toea.
7 Bema “Inai Gavamani ese Paradaiso Do Ia Mailaia” buklet oi rakatania, lou henia neganai oiemu hereva be inai bamona oi hamatamaia diba:
◼ “Vanegai, taunimanima edia hekwakwanai ia kokia diba kara maoromaoro gavamanina ita abia be namo ita kikilaia. Lau rakatania buklet ese ia hahedinaraia iseda helaro be Dirava ena Basileia. Haida idia daradara unai gavamani ese dahaka ia karaia diba iseda mauri ia hanamoa totona. Baibel ese ia hahedinaraia Keriso ese ia hamomokania vadaeni, tanobada ena siahu taudia idia karaia diba lasi gaudia danu ia karaia diba.” Gavamani buklet ena rau 29 oi kehoa, bona paragraf ginigabedia hani oi duahia. Bena oi gwau: “Unai gaudia do idia vara be namo herea, ani? Oi ura unai do oi itaia, a?” [Haere naria.] Ioane 17:3 oi duahia. Oi hagoadaia ia ese Baibel stadi amo diba do ia abia.
8 Bema oi ese buklet ma haida oi gaukaralaia, oiemu hereva be ataiai idia noho hereva bamona, oi hegaegaelaia diba. Oi hegaegae namonamo bona Iehova ena hahenamo oi tahua, Basileia ena sivarai namona oi harorolaia neganai.