Haida Durua Goada Idia Davaria Totona
1 Taunimanima momo idia hesiku vadaeni hisihisi badadia, tuari, taravatu utua karana, bona hisihisi idauidau edia sivarai idia kamonaia neganai. Niuspepa edia ripoti lalodiai, taunimanima ese idia abia be namo gauna, heduru, idia hahedinaraia lasi. Heduru henia ena anina be ta ena “lalona hagoadaia bona helaro namona henia” bona ma ta ena “lalohisihisi o hekwakwanai hanamoa.” Ita Iehova ena Witness taudia ita hegeregere unai dala dekenai ma haida durua totona. (2 Kor. 1:3, 4) July bona August lalonai do ita hariharilaia buklet idauidau be mai edia hagoadaia hereva momokanidia Baibel amo. (Roma 15:4) Nega idauidau ai ita hariharilaia neganai, ita gwauraia diba hereva haida be inai:
2 Nius lalonai dika bada herea sivaraina ese dala ia kehoa diba ta oi haroro henia bona hagoadaia herevadia oi gwauraia diba totona, reana inai bamona do oi hereva:
◼ “Unai bamona gaudia idia vara neganai, haida idia daradara Dirava ia noho momokani eiava, bona bema ia noho, ita ia laloa bada, a? Dahaka oi laloa? [Haere naria.] Dirava ia noho ena hamomokania herevana ta be inai.” Heberu 3:4 duahia. Idia be mai edia karaia tauna gaudia haida oi abia hidi gwauraia totona. Bena oi gwau: “Lau be mai egu buklet ta bona lau laloa heduru oi davaria diba unai buklet amo. Ena ladana be Dirava ese Ita Ia Laloa Eiava? [Ena kopina dekenai idia noho henanadai oi duahia.] Ia hamomokania Dirava ia noho sibona lasi to ia hahedinaraia danu kahirakahira Dirava ese hari ita davaria hekwakwanai ibounai do ia haorea. Bema oi ura duahia, ta oi abia diba, ena davana be 40 toea sibona.” Lou henia negana oi hegaegaelaia.
3 Oi lou henia neganai, reana oi gwau:
◼ “Vanegai ita be Dirava ia noho idia hamomokania gaudia ita herevalaia neganai, unai buklet Dirava ese Ita Ia Laloa Eiava? lau rakatania. Reana rau 7 dekenai ia noho hereva ta oi itaia vadaeni. [Laulau hahedinaraia bona paragraf 15 ena hereva badadia gwauraia.] Unai haheitalai ta ia hahedinaraia iseda namo ia tahua Diravana ia noho momokani. [ Rau 8 dekenai paragraf 27 oi duahia.] Baibel stadilaia karana ese lau ia durua dina ta ta ai lau davaria hekwakwanai lau hanaia totona, badina Dirava ena lalohadai ia hahedinaraia.” Oi nanadaia bema Baibel stadi karaia dalana oi hahedinaraia diba.
4 Telefon oi gaukaralaia diba “Mauri Ena Anina be Dahaka—Edena Bamona Oi Davaria Diba?” buklet oi hariharilaia totona. Reana emu ladana oi gwauraia hedinarai bena oi gwau:
◼ “Oiemu ruma dekenai lau lao diba lasi dainai oi lau rini henia, inai mai anina bada sivaraina ta gwauraia totona.” Rau 4 dekenai ia noho paragraf ginigunana oi duahia, oi karaia hegeregere ia danu oi kiki. Ia oi nanadaia dahaka ia laloa, bona oi naria ia haere totona. “Egu Baibel lau kehoa vadaeni Isaia 45:18 dekenai. Inai siri ia hahedinaraia tanobada be ita totona ta ese ia havaraia. Ia namo oi dekenai lau duahia?” Murinai, buklet ena badina oi kikilaia, ena davana be 40 toea oi gwauraia, bona oi nanadaia kopi ta be ia dekenai edena bamona oi abia lao diba.
5 Guna oi hereva henia tauna oi rini henia lou neganai, Baibel stadi hamatamaia totona reana inai oi tohoa:
◼ “Lau ura guna ita kikilaia gauna lau habadaia, haheitalai amo lau ura hahedinaraia daika ese mauri ena anina be ita dekenai ia gwauraia diba. [Mauri Ena Anina be Dahaka? buklet ena rau 6, paragraf 1 bona 2 edia hereva badadia oi kikilaia.] Apokalupo 4:11 ia hahedinaraia Iehova Dirava be iseda Havaraia Tauna. [Duahia.] Momokani, ia be mai ena badina ta dainai ita ia havaraia. Unai idia ura diba taudia ese Dirava ena Hereva, Baibel, idia stadilaia. Lau ura unai bamona stadi oi ida lau karaia.” Iseda davana lasi Baibel stadi kosi karaia dalana oi gwauraia hedinarai, bona stadi hamatamaia totona nega umui abia hidi.
6 Inai bamona hereva dalana ese ta ia durua diba bema ena lalokau tauna ta ia mase:
◼ “Lau be volantia gaukara ta lau karaia, edia lalokau taudia be mase dainai idia haboioa taudia durua totona. Badina be ita ibounai dekenai mase be gau aukana, inai buklet, Oiemu Lalokau Tauna ta Ia Mase Neganai, idia hegaegaelaia heduru henia totona. Taunimanima milioni momo ia durua. Inai buklet amo lau ura oi dekenai Iesu Keriso ese ia gwauraia gwauhamata namona ta lau hahedinaraia. [Rau 26 ena paragraf namba 5 oi duahia, bona Ioane 5:21, 28, 29 oi duahia danu.] Rau 29 dekenai ia noho laulauna ese Evanelia sivaraina ta ia hahedinaraia, Iesu ese Lasaro be mase amo ia hatoreaisi lou. Bema inai hagoadaia buklet ta oi ura duahia, mai moale ida do lau rakatania oi dekenai, ena davana be 40 toea sibona.”
7 Oi lou henia neganai, “Oiemu Lalokau Tauna ta Ia Mase Neganai” buklet ena rau 29 dekenai ia noho laulauna oi hahedinaraia lou bena oi gwau:
◼ “Guna ita be Iesu ese Lasaro ia hatoreaisi lou sivaraina ita kikilaia, reana unai oi laloatao. [Rau 28 ena laulau gwauraia herevana duahia, bena inai hereva kwarana maragina “Ia Vara Momokani, A?” henunai idia noho herevadia oi herevalaia.] Bema oi ura dikadika emu lalokau mase tauna oi itaia lou, lau ura oi lau durua oi danu be toreisi lou helarona oi abia.” Baibel stadi oi herevalaia.
8 Namona be idia do mai noho hua lalodiai, mai iseda goada ibounai ida Iesu ena kara ita tohotohoa bona idia ‘taitai taudia ibounai do ita hagoadaia.’—Isa. 61:2.