Oi ese Dagedage Taudia Oi Laloa Dirava ese Ia Lalodia Bamona, A?

Nega daudau lalonai taunimanima ese goada taudia idia laloa bada bona idia matauraia, edia tauanina idia goada bona gari lasi toana idia hahedinaraia. Unai bamona tauna ta be Greece edia gori ese ia gwauraia tauna, Heracles, Eiava Roma taudia idia gwauraia Hercules.

HERACLES be lada bada goada tauna, tuari tauna goadana. Unai gori ia gwau bamona, ia be goada herea tauna ta, iena tamana be Greek diravana Zeus, bona ena sinana be Alcmene, hahine ta. Iena kara badadia edia sivarai be, ia be ena mahuta gabuna ai ia do hekure noho beibi neganai ia matamaia. Mama dirava hahinena ta ese Heracles hamasea totona gaigai badadia rua ia siaia neganai, Heracles ese edia aiona ia gigia. Gabeai ena mauri lalonai, ia tuari, dagedage gaudia badadia ia hadarerea, bona ena turana ta ia hamauria totona mase danu ia tuari. Siti momo ia hadikaia, hahine momo ia reipidia, mero maragina ta be gima kohorona amo ia hamorua, bona ena adavana bona ena natudia ia alaia.

Ena be ia be taunimanima korikorina ta lasi, to gunaguna amo Heracles be Greek taudia idia diba idaunegai tanodia edia gori ese idia hahedinaraia. Roma taudia ese idia tomadiho henia dirava ta bamona; hoihoi taudia bona loaloa taudia ese idia guriguri henia, edia kohu ia habadaia bona ia gimaia totona. Ena kara badadia edia sivarai ese lagani tausen momo lalonai taunimanima edia lalona idia veria.

Unai Gori Ia Vara Dalana

Heracles bona sene goridia ai idia hedinarai kwalimu taudia ma haida bamona taudia be guna idia noho momokani, a? Dala ta ai, idia noho. Baibel ese nega ta ia gwauraia, taunimanima edia sivarai ena matamanai, unai nega ai “dirava” bona “goada herea taudia” be momokani tanobada ai idia noho.

Unai nega ia herevalaia neganai, Mose ia gwau: “Nega ia mai vadaeni, taunimanima be momo tanobada dekenai, bona natuna kekeni idia vara noho. Bona Dirava ena natuna haida ese idia itaia, inai kekeni be mai edia hairai. Vadaeni, idia ura henia kekenidia idia abia, idia adavaia.”​​—⁠Genese 6:​1, 2.

Unai “Dirava ena natuna” be taunimanima lasi; idia be Dirava ena aneru. (Mani Iobu 1:6; 2:1; 38:​4, 7 itaia.) Baibel torea tauna Iuda ia gwau aneru haida ese “edia dagi korikori ena maka dekenai idia noho lasi, bona edia gabu korikori idia rakatania.” (Iuda 6) Ita gwau diba, Dirava ena guba oreana dekenai edia gaukara idia rakatania badina idia ura tanobada hahine mai hairai ida idia noho. Iuda be ma ia gwau unai gwau-edeede anerudia be Sodoma bona Gomora taudia bamona, idia ese “sihari kava bona kara bodaga idauidau idia karaia momo.”​​—⁠Iuda 7.

Baibel ese unai gwau-edeede anerudia edia sivarai ibounai ia gwauraia lasi. To, Greece bona ma gabu haida edia idaunegai goridia lalonai dirava bona dirava hahine momo be taunimanima huanai idia loaloa, haida idia hedinarai haida idia itaia diba lasi. Taunimanima edia tauanina idia abia neganai, idia be mai hairai bada. Idia aniani, inuinu, mahuta, bona idia sibodia huanai bona taunimanima ma haida danu mahuta hebou karadia idia karaia. Ena be taunimanima idia laloa idia be helaga bona idia mase diba lasi, to idia koikoi bona taunimanima idia koia, idia heai bona idia heatu, lalo-ani bona reipi karadia idia karaia. Unai bamona gori sivaraidia, ena be unai gaudia idia hahairaia bona hanamoa, to reana Baibel bukana Genese ese ia gwauraia abata ia do vara lasi negana idia hahedinaraia sisina.

Gunaguna Idia Noho Goada Taudia mai Edia Ladana Bada

Taunimanima ai idia lao gwau-edeede anerudia be hahine danu idia mahuta hebou, bona unai hahine ese natudia idia havaraia. Idia be natudia korikoridia lasi. Idia be Nefilim, edia kahana be aneru bona kahana be taunimanima. Baibel ena sivarai ia gwau: “Unai Dirava ena natuna taudia ese taunimanima edia natuna kekeni idia adavaia bona natuna idia havaraia neganai, tatau badadia badadia idia noho tanobada dekenai. Idia be gunaguna, bona gabeai danu, goada taudia mai ladana, edia sivarai danu be bada.”​​—⁠Genese 6:⁠4.

Heberu hereva “nefilim” ena anina be “hamorua taudia,” dagedage karadia amo ma haida idia hamorua. Unai dainai ita hoa lasi Baibel be ma ia gwau: “Dika be gabu ibounai dekenai.” (Genese 6:11) Unai gori sivaraidia edia goada taudia, Heracles bona Babylon taudia edia ladana bada tauna Gilgamesh, ese Nefilim edia toana idia hahedinaraia goevagoeva.

Mani oi itaia Nefilim idia gwauraidia “goada taudia mai ladana.” Kara maoromaoro tauna Noa, Nefilim idia noho neganai ia noho tauna, bamona lasi, Nefilim taudia ese Iehova ena ladana idia abia isi lasi. Idia be sibona edia ladana, hairai, bona kara idia abia isi bada. Kara badadia, dagedage bona rara bada bubua karadia, idia karaia dainai kahirakahira idia noho Dirava diba lasi taudia amo idia ura abia ladana badana idia abia. Idia be edia negai idia noho kwalimu taudia badadia​​—⁠idia gari henidia, matauraidia, bona toana be do idia lusi lasi.

Ena be Nefilim bona edia aneru tamadia dikadia ese reana unai nega lalonai idia noho taudia amo ladana badana bona hairai idia abia, to Dirava ena matanai idia be ladana bada taudia lasi. Edia mauri dalana be dika momokani. Unai dainai, Dirava ese idia moru anerudia ia kara henidia. Aposetolo Petero ia gwau: “Aneru haida ese kara dika idia karaia, to Dirava ia bogahisihisi henidia lasi. Ia ese [Tartarus] ena dibura masemase gabuna dekenai idia ia negea diho. Unuseni idia ia guia. Bona unai gabu dekenai do idia noho, ela bona Kota Bada Dinana dekenai. Gunaguna, taunimanima momo ese Dirava idia kamonai henia lasi neganai, ia ese idia ia bogahisihisi henia lasi. To abata bada herea ia havaraia, vadaeni ibounai idia mase. Noa, kara maoromaoro ia harorolaia tauna, bona taunimanima 7, idia sibona idia mauri.”​​—⁠2 Petero 2:​4, 5.

Tanobada ibounai Abata badana lalonai, unai gwau-edeede anerudia ese edia tanobada tauanidia idia rakatania bona mai hemarai ida lauma taudia edia gabu dekenai idia giroa lou. Dirava ese ia panisidia taunimanima tauanidia do idia abia lou diba lasi. Unai Nefilim, gwau-edeede anerudia edia natudia badadia, iboudiai idia mase ore. Noa bona ena ruma bese maragina sibona be Abata amo idia roho mauri.

Ladana Bada Taudia Hari Inai Negai

Hari inai negai dirava bona goada taudia be tanobada ai idia loaloa lasi. To, dagedage ia bada herea. Hari inai negai ladana bada taudia be buka, muvini piksa, televisen, bona miusiki dekenai idia hanamoa. Idia ese edia vairana lauri kahana danu idia henia lasi, edia inai taudia idia lalokau henia lasi, maino idia tahua lasi, dika idia gwauatao lasi, bona kara dika amo idia raka siri lasi. (Mataio 5:​39, 44; Roma 12:17; Efeso 4:​32; 1 Petero 3:​11) To, hari inai nega ena goada taudia be momo ese idia laloa bada, badina idia goada bona idia heatu diba, idia sibona ese dika davana idia henia, bona dagedage karadia be dagedage kara badadia amo idia koua dainai.a

Dirava ena lalohadai unai bamona taudia dekenai be Noa ena nega amo ia idau lasi. Iehova ese dagedage idia ura henia taudia ia ura henia lasi, bona edia kara sivaraidia ia moalelaia lasi. Salamo torea tauna ese ane ia abia: “Iehova ese kara maoromaoro tauna bona kara dika tauna ruaosi edia kara ia tahua, Bona Ena souli ese dagedage ia ura henia tauna ia inai henia momokani.”​​—⁠Salamo 11:​5, NW.

Goada Idauna Ta

Goada taudia mai edia dagedage edia amo ia idau tauna mai ena ladana bada momokani be Iesu Keriso, maino ia ura henia tauna. Tanobada ai ia noho neganai, “alaia karana ta ia karaia lasi.” (Isaia 53:⁠9) Getesemane umana ai ena inai taudia be ia idia abia totona idia mai neganai, iena murinai idia raka taudia haida ese tuari kaia idia abia. (Luka 22:​38, 47-​51) Idia ese tuari grup ta idia karaia diba Iuda taudia edia imana amo ia idia hamauria totona.​​—⁠Ioane 18:⁠36.

Momokani, aposetolo Petero ese ena tuari kaia ia abia Iesu ia durua toho totona, to Iesu ese ia hamaoroa: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.” (Mataio 26:​51, 52) Oibe, dagedage ese dagedage ia havaraia, taunimanima edia sivarai ese ia hahedinaraia hegeregerena. Iesu ese tuari kohudia amo sibona lasi, to ma dala ta amo ia sibona ia gimaia diba danu. Ia ese Petero ma ia hamaoroa: “Oi laloa lau be siahu lasi a, lauegu Tamana bema lau noia, be ia ese aneru orea 12, bona ma haida danu do ia siaia, lau dekenai durua henia totona?”​​—⁠Mataio 26:⁠53.

Iesu ese dagedage karana eiava aneru edia heduru ia tahua lasi, to do idia alaia taudia dekenai sibona ia henia. Dahaka dainai? Badina ta be ia diba nega ia do ginidae lasi ena guba Tamana ese tanobada dekenai kara dika ia haorea totona. Iesu be ia sibona ena ura hegeregerena ia karaia lasi, to Iehova ia abidadama henia.

Unai be manoka karana lasi to lalona ai ia noho goadana ia hahedinaraia. Iesu ese ia hahedinaraia ia abia dae momokani Iehova ese ena nega bona ena dala ai gau ibounai do ia hanamoa. Iena kamonai karana dainai, Iehova ese Iesu be ia abia isi bona ladana bada ia henia, Ia sibona henunai. Aposetolo Paulo ese Iesu ia herevalaia, ia gwau: “Ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase. Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia. Bona Iesu ena ladana hanamoa totona ibounai be dohore idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.”​​—⁠Filipi 2:​8-​11.

Dirava Ia Gwauhamata Dagedage Do Ia Haorea

Keristani taudia momokanidia edia mauri dalana be Iesu ena haheitalai bona ena hahediba hegeregerena. Idia ese tanobada ena lada bada bona dagedage taudia idia laloa bada eiava idia tohotohoa lasi. Idia diba Dirava ena nega korikorina ai, unai bamona taudia do ia haorea ela bona hanaihanai, Noa ena nega ai kara dika taudia ia hadikaia ore bamona.

Dirava be tanobada bona taunimanima Havaraia Tauna. Danu, ia be guba bona tanobada edia Lohia Badana maorona. (Apokalupo 4:​11) Bema hahemaoro tauna be mai ena maoro taravatu ena hahemaoro karana ia karaia totona, vadaeni Dirava be mai ena maoro momokani unai bamona do ia karaia. Sibona ena kara maoromaoro hakaua herevadia ia matauraia bona ia idia lalokau henia taudia ia lalokau henia dainai, ia ese kara dika ibounai bona idia karaia taudia ibounai do ia haorea momokani.​​—⁠Mataio 13:​41, 42; Luka 17:​26-​30.

Unai amo tanobada dekenai maino do ia noho, hahemaoro maoromaoro bona kara maoromaoro dainai ia vara mainona unai. Unai be momo idia diba peroveta herevana Iesu dekenai ese ia hahedinaraia, ia gwau: “Badina be ita totona natuna ta ia vara! Dirava ese ita dekenai, natuna mero do ia henia! Bona ia be iseda gunalaia tauna do ia lao, bona iena ladana do idia gwauraia, ‘Sisiba Henia Tauna Namo Herea,’ ‘Siahu Bada Dirava,’ ‘Hanaihanai Noho Tamana,’ ‘Maino ena Lohia.’ Iena King siahuna, be do ia bada daekau lao, bona iena basileia be nega ibounai, mai maino danu do ia noho. Ia ese Davida ena king siahuna do ia abia, bona ia ese Davida ena basileia, do ia haginia bona naria noho, mai kota maoromaorona, bona kara momokani danu, hari ela bona hanaihanai. Inai kara be Siahu Ibounai Lohiabada ese do ia karaia momokani.”​​—⁠Isaia 9:​6, 7.

Badina namona dainai, Keristani taudia ese Dirava ena lauma amo guna idia torea sisibana idia kamonai henia be namo, ia gwau: “Dagedage taudia do oi mama henia lasi. Edia mauri daladia ta danu do oi ura henia lasi, badina be Lohiabada ese kara gagevagageva taudia, ia ura henia lasi momokani, to kara maoromaoro taudia be ia ese ia abidadama henia noho.”​​—⁠Aonega Herevadia 3:​31, 32.

[Footnote]

[Blurb on page 29]

HARI INAI NEGA ENA GOADA TAUDIA BE MOMO ESE IDIA LALOA BADA, BADINA IDIA GOADA BONA DAGEDAGE KARADIA BE DAGEDAGE KARA BADADIA AMO IDIA KOUA

[Picture Credit Line on page 26]

Alinari/Art Resource, NY