Kaivakuku

Anina: Taunimanima eiava gau edia laulau, taunimanima ese idia tomadiho henidia gaudia. Kaivakuku idia tomadiho henidia taudia momo idia gwau unai dala amo lauma idia tomadiho henidia. Keristen lasi taudia momo ese kaivakuku amo unai bamona idia tomadiho. New Catholic Encyclopedia (1967, Vol. VII, p. 372) ese Roman Katolik taudia edia kara inai bamona ia gwauraia: “Ta idia tomadiho henia hegeregerena, iena laulau danu idia tomadiho henia be maoro, badina be ena laulau idia henia tomadihona be ia ese ia abia.” Unai be Baibel ena hahediba herevana ta lasi.

Tomadiho lalonai idia iusilaia laulaudia karaia karana be Dirava ena Hereva ese edena bamona ia gwauraia?

Eso. 20⁠:​4, 5: “Laulau ta do oi karaia lasi, guriguri henia totona kaivakuku gauna ta, o gau ta ena laulau, guba gauna ta, o tanobada gauna ta, o ranu lalonai gauna ta. Laulau o kaivakuku ta do oi tomadiho henia lasi, bona oi hesiai henia lasi. Badina be lau Iehova oiemu Dirava be lau ura oi be lau sibona egu.” (Mani inai oi laloa, kaivakuku karadia karana bona tomadiho henidia karana ia taravatua unai.)

Lev. 26⁠:1: “Kaivakuku basio kara. Dirava laulauna nadi amo basio koroa bona basio haginia; au-tubua helaḡana ta eiava nadi helaḡana ta danu basio haginia, bona basio toma henia diho, emui tano idoinai; badina be lau na Iehova, emui Dirava.” (Taunimanima ese do idia tomadiho henia gauna ta idia haginia be taravatu.)

2 Kor. 6⁠:16: “Dirava ena dubu helaga bona kaivakuku be edena bamona idia hakapua tamona diba? Badina ita be Mauri Dirava ena dubu helaga!”

Laulau amo Dirava momokanina ita tomadiho henia be hegeregere, a?

Ioane 4⁠:​23, 24: “Tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho. Dirava be Lauma, bona do idia tomadiho henia taudia ese lauma bona momokani dekena amo do idia tomadiho henia.” (Kaivakuku amo idia tomadiho henia taudia ese Dirava na ‘lauma dekena amo’ idia tomadiho henia lasi; edia matadia ese idia itaia gaudia amo idia tomadiho henia.)

2 Kor. 5⁠:​7, BH: “Abidadama dainai a rakamu, dia ita-itana dainai.”

Kara 17⁠:29: “Ita be iena natuna dainai, namo lasi ita laloa Dirava be golo eiava siliva eiava nadi, diba herea bona aonega taudia edia imana dekenai idia karaia gauna bamona.”

Isa. 42⁠:8: “Lau na Iehova, ladagu bunai; hairaigu na ta asina heniamu, i’imodaigu na e koro kaivakukudia asina henidiamu.”

“Helaga taudia” edia amo Dirava ita noinoi henia bona edia laulau amo ita tomadiho henia be namo, eiava?

Kara 10⁠:​25, 26: “Petero ia raka vareai noho lalonai Korenelio ia danu idia hedavari, bona iena aena badinai ia moru diho, ia tomadiho henia. To Petero ese ia veria isi, ia gwau, ‘Oi toreisi, lau danu taunimanima.’ ” (Petro ese unai tomadiho ia dadaraia. Vadaeni, ita ia hagoadaia lasi iena laulau vairanai do ita tomadiho totona, ani? Apokalupo 19⁠:10 itaia danu.)

Ioane 14⁠:​6, 14: “Iesu ia haere, ia gwau, ‘Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona. Bema gau ta lauegu ladana dekenai umui noia, lau be do lau karaia.’ ” (Iesu ese ia hahedinaraia goevagoeva, Tamana ita lao henia dalana tamona be ia ena amo, bona Iesu ena ladana ai ita noia be namo.)

1 Tim. 2⁠:5: “Dirava be tamona, Dirava bona taunimanima ia hakapudia tauna danu be tamona. Unai tauna be Keriso Iesu.” (Inai ese ia hahedinaraia Dirava bona Keriso ena ekalesia taudia hakapudia tauna ma ta be lasi.)

Rau 184-5 itaia danu, inai sinado “Helaga Taudia” henunai.

Tomadiho taudia ese iena laulau idia tomadiho henia tauna sibona idia laloa a, eiava idia laloa iena laulau ta ese ena laulau idauna ta ia hereaia, a?

Tomadiho taudia edia lalohadai be mai anina bada, badina be laulau ta idia kara henia dalana amo idia hahedinaraia “kaivakuku” ta bamona idia tomadiho henia eiava lasi.

Bema tomadiho tauna ese ta ena laulau ta ia laloa bada bona ena laulau idauna ta ia laloa maragi, unai amo ia hahedinaraia unai laulau sibodia ia laloa. Dahaka dainai haida be gabu daudaudia dekenai idia lao, gabu helagadia dekenai idia tomadiho totona? Badina be idia laloa unuseniai idia noho laulaudia be mai edia siahu idauna, ani? Unai hegeregerena, buka ta ladana Les Trois Notre-Dame de la Cathédrale de Chartres lalonai, pris tauna ta ladana Yves Delaporte ese Maria ena laulau idauidau Chartres ena dubu badana lalonai ia gwauraia, ia gwau: “Inai laulau, nadi amo idia koroa gaudia, idia peinia gaudia, bona uindo edia galasi mai edia kala dekenai idia hedinarai gaudia, haida be mai edia ladana bada, haida be lasi. . . . Toi sibodia idia tomadiho henidia momokani: Iseda Hahine Lohia, Dubu ena Henu Daiutuna ena; Iseda Hahine Lohia, Du ena; bona Iseda Hahine Lohia, ‘Belle Verriere’ ena.” To bema tomadiho taudia ese idia tomadiho henia hahinena idia laloa bada bona ena laulau idia laloa maragi, idia laloa iena laulau iboudiai be hegeregere, ani?

Taunimanima ese idia tomadiho henidia laulaudia be Dirava ese edena bamona ia lalodia?

Ier. 10⁠:​14, 15: “Gold iḡaukaralaina taudia iboudiai na edia kaivakuku ese e hahemaraidiamu; badina be edia kaivakuku na koikoi ḡaudia, bona asi laḡadia. Idia na asi anidia, haero-kerere ese e havaradia.”

Isa. 44⁠:​13-19: “Kamuta tauna ese ena hahetoho varona e veria roromu, bona puri amo toana e toremu; naunau auridia amo e nauamu, bona kuboru-hahetohona aurina amo e hahetohoa heḡeḡemu. Bena e koroamu, tau oromana ai, tau raho-namona heḡereḡerena ai, ruma ai baine hamiaia e tomu. Ia ese sida audia e hagaridiamu; eiava budabuda eiava diharoha e abia hidimu, e nariamu ela bona baine kiriri, uda audia padadiai; sida auna ta danu e hadoamu, bena medu ese e hatubuamu. Bena tau ta ese ena lahi auna ai e halaoamu; kahana e ha-araiamu sibona e heganamu, ma kahana e ha-araiamu, flaoa e gabulaiamu. Bena ena dirava ta e karaiamu, e toma henia dihomu; laulau ta e koroamu, vairanai e igo dihomu. Kahana na lahi ai e araiamu; ma kahana latanai ana vamu e gabuamu; e gabuamu ḡauna e aniamu, bogana e kunumu. E heganamu danu, e tomu ‘Aha! Taugu na e siahumu, lahi vada name itaia.’ Bena au orena na dirava ta e karalaiamu, ena kaivakuku; bena vairanai e igo dihomu, e toma henia dihomu; e ḡuriamu, e tomu ‘A hamaurigu, badina be oi na egu dirava’. Idia na asi dibadia, lalodia na asie pararamu; badina be ia ese matadia vada e hakapudia, bena basie itaia diba, bona lalodia vada e haduhudia, bena lalodia na basie parara diba. Ta ese lalona se hadaiamu, ta asi aonegana eiava asi lalo-pararana, bena e tomu: Kahana na lahi ai vada na araia; bona gida latadiai flaoa bona vamu vada na gabudia, vada na aniani; matona, orena amo ḡau dika-hereana baina karaia a? Au kavakava vairanai baina toma diho a?”

Esek. 14⁠:6: “Ḡaubada Iehova na ini e gwau tomamu: A helalo kerehai, emui kaivakuku bona emui kara dika-rohorohodia iboudiai amo ba mede daudau.”

Esek. 7⁠:20: “Edia herahera mai hairaidia e heaḡilai, bona edia kaivakuku dika-rohorohodia bona edia ḡau dika-hereadia na unu amo e karadia; taunabunai lau ese ḡau mirona ai baina halaoa idia ediai.”

Guna ita tomadiho henidia laulaudia be edena bamona ita lalodia be namo?

Deut. 7⁠:​25, 26: “Edia dirava laulaudia na lahi ai ba doudia; iheralaidia gold-na bona silver-na na basio hekise-hekise heni bona basio abi, ba hekwakwanai na garina. Iehova, emui Dirava, ese unu ḡau e dadaraimu. Vada e dadaraia ḡauna na emui ruma ai basio vareailaia, ena dika ai ba dika na garina: ena amo ba raka oho, ba rakatania, ba gari henia bona ba inai henia, badina be ia na heuduguirai ḡauna.” (Ena be Iehova ese ena orea taudia hari inai negai ia oda henidia lasi idau taudia edia kaivakuku do idia hadikaia ore, to inai oda herevana Israel taudia ia henidia ese ia hadibadia, guna idia tomadiho henidia laulaudia be edena bamona do idia lalodia be namo. Kara 19⁠:19 itaia danu.)

1 Ioane 5⁠:21: “Lauegu natuna e, do umui naria namonamo, dirava koikoidia garina.”

Esek. 37⁠:23: “Edia kaivakuku . . . amo sibodia basie hahemiro lou . . . Idia na lauegu bese ai baela, bona lau na edia Dirava ai bainala.”

Bema kaivakuku ita tomadiho henidia, dahaka be ita dekenai do ia vara?

Deut. 4⁠:​25, 26: “Boma kerere, ḡau ta laulauna boma koroa, Iehova, emui Dirava, vairanai boma kara havara bona ena badu boma havaraia, lau ese hari dina ai guba ladana ai bona tanobada ladana ai na hamaoromuimu umui na asi vanahana ba mase ore.” (Dirava ese ena lalohadai ia haidaua lasi. Malaki 3⁠:​5, 6 itaia.)

1 Kor. 10⁠:​14, 20: “Unai dainai, lauegu turana lalokau e, kaivakuku umui tomadiho henia lasi, umui rakatania. . . . Edia boubou gaudia be lauma dikadia dekenai idia henia, Dirava dekenai idia henia lasi. Lau ura lasi lauma dikadia danu umui gaukara hebou.”

Apok. 21⁠:8: “Gari taudia, abidadama lasi taudia, kara bodaga taudia, taunimanima idia alaia taudia, lebulebu taudia, meamea taudia, kaivakuku idia tomadiho henia taudia, bona koikoi taudia ibounai, idia ibounai edia davana be dika. Idia be unai gohu, lahi bona salifa idia araia noho gabunai do idia lao. Inai be mase iharuana.”

Sal. 115⁠:​4-8: “Idia edia kaivakuku na silver bona gold, taunimanima imadia e kara ḡaudia. Mai ududia, to asie herevamu; mai matadia, to asie itamu; mai taiadia, to asie kamonaimu; mai udu-baubaudia, to asie bonabonamu; mai imadia, to ḡau ta asie daua tohomu; mai aedia, to asie rakamu; bona gadodia na asi reḡedia. Ikaradia taudia na idia heḡereḡeredia, bona e abidadama henidiamu taudia iboudiai danu.”