Karoa 15

Dirava Ia Hanamoa Besena Haginia Dalana

1-3. Dahaka dainai haida ese edia famili edia hekwakwanai idia haorea diba lasi, to dahaka dainai Baibel ese ia durudia diba?

BEMA sibomu emu ruma oi haginia gwauraia, tano oi hoia guna, bena emu ruma ena toana oi lalohadailaia mai emu ura bada ida. To bema oi be mai emu tulu lasi bona ruma haginia dalana oi diba lasi be edena bamona? Emu palani ena anina do ia vara lasi dainai do oi hesiku bada!

² Headava matamata taudia momo idia laloa edia famili do ia moale, to idia be mai edia tulu lasi bona mai edia diba lasi, famili namona haginia totona. Idia headava, bena nega daudau lasi idia be dina iboudiai idia heai bona idia maumau. Edia natudia idia vara neganai, idia davaria idia be naridia dalana idia diba lasi, headava naria dalana idia diba lasi hegeregerena.

³ To Baibel be ia heduru diba. Ena hakaua herevadia be tulu bamona; idia amo ruma bese ta mai moalena be oi haginia diba. (Aonega Herevadia 24:3) Vadaeni, haginia dalana mani ita tahua.

HEADAVA MAI MOALENA HAGINIA TULUDIA

4. Dahaka dainai hekwakwanai be headava lalonai idia vara, bona Baibel ese unai edena bamona ia sisibalaia?

⁴ Ena be toana be headava matamata tauna bona ena adavana be idia lalo-tamona, to iena lalona, iena maragi negana, bona iena varavara be idau bona iena adavana ena be ma idau. Unai dainai hekwakwanai be edia headava lalonai do idia vara. Edena bamona do idia hanaidia? Kamuta taudia ese ruma ta idia haginia gwauraia neganai, palani idia itaia, haginia dalana do idia diba totona. Baibel lalonai be Dirava ena hahegani, idia ese famili mai moalena haginia dalana idia hahedinaraia. Mani idia haida do ita tahua.

5. Baibel ese edena bamona ia hahedinaraia tau bona ena adavana idia badinaia heheni be gau badana?

⁵ Adavana badinaia. Iesu ia gwau: “Dirava ese ia hakapua taudia, be taunimanima ese do idia hapararaia lasi.”a (Mataio 19:6) Aposetolo Paulo ia gwau: “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia henia momokani.” (Heberu 13:4) Unai dainai, namona be headava taudia do idia laloa, Iehova vairanai do idia maoro totona edia adavadia do idia badinaia be namo.—Genese 39:7-9.

6. Badinaia karana ese headava edena bamona do ia naria?

⁶ Ena adavana ia badinaia tauna ese ena headava ia matauraia bona ia naria. Unai bamona idia kara heheni taudia idia diba, herevana dahaka do ia vara to do idia heduru heheni. (Hadibaia Tauna 4:9-12) To dika sisina ia vara neganai edia headava idia rakatania taudia be idau vaitani! Unai bamona tauna be kara haraga ia laloa ena adavana ia abia hidi kerere, ena lalokau ia dekenai ia ore, bona matamatana do ia abia be namo. To ia bona ena adavana be lo taudia ai do idia lao dalana ia koua unai. Reana ena adavana matamatana danu ia noho be unai hekwakwanai tamona ia abia lou. Bema tau ta ia davaria ena ruma namona ena guhi be mai ena matu maragina, ruma ma ta dekenai ia lao lasi, to ia hanamoa toho. Unai hegeregerena, ta ese ena adavana ia rakatania bena ma ta ia abia, be headava ena hekwakwanai edia badina haorea dalana lasi. Hekwakwanai do idia vara neganai, namona be emu headava do oi hadokoa toho lasi, to do oi naria mai emu goada ida. Unai amo do oi hahedinaraia oi laloa emu headava oi gimaia, oi naria, bona oi laloa bada be namo.

7. Dahaka dainai haida be edia adavadia ida idia hereva be auka, bona “mauri matamata” atoa karana ena namo be dahaka?

⁷ Hereva heheni. Baibel ia gwau: “Sisiba do oi abia lasi neganai, do oi moru.” (Aonega Herevadia 15:22) To, headava taudia haida be edia adavadia ida idia hereva heheni be auka. Badina be dahaka? Reana idia ta ta be mai edia hereva daladia idauidau dainai, idia lalo-parara heheni lasi bona idia badu. Reana unai be idia tubu daekau lalonai idia manadalaia karadia dainai. Hegeregere, haida idia tubu daekau lalonai, edia tamadia sinadia idia heai loulou. Hari idia bada bona idia headava vadaeni, to idia be edia adavadia hereva henia mai hebogahisi bona mai lalokau ida dalana be idia diba lasi. To, emu ruma be “heai bona hepapahuahu” rumana ai do ia lao lasi be namo. (Aonega Herevadia 17:1) Baibel ese ia hahedinaraia namona be “mauri matamata” dabua bamona do ita atoa, ma ia gwau badu, heai, bona hereva dikadia be maoro lasi.—Efeso 4:22-24, 31.

8. Oi bona emu adavana do umui lalo-tamona lasi neganai, dahaka do oi karaia be namo?

⁸ Oi bona emu adavana be gau ta dekenai umui lalo-tamona lasi neganai, edena bamona do oi kara be namo? Bema umui badu matamaia, namona be Aonega Herevadia 17:14 ena sisiba do oi badinaia: “Heai do ia vara lasi neganai, do oi raka siri.” Oibe, reana namona be do oi naria ela bona umui ruaosi emui lalona do idia keru, bena do oi hereva henia lou. (Hadibaia Tauna 3:1, 7) Herevana dahaka do ia vara, namona be ‘hereva dekenai do oi kamonai haraga, to hereva do oi gwauraia haraga lasi, bona do oi badu haraga lasi.’ (Iamesi 1:19) Namona be badu do oi haorea toho; heai dekenai emu adavana do oi halusia toho be dika. (Genese 13:8, 9) Hereva namodia bona gwauraia dalana namona do oi abia hidi be namo, umui ruaosi emui lalona hakerua totona. (Aonega Herevadia 12:18; 15:1, 4; 29:11) Gau badana be, do umui badu daudau lasi, to guriguri amo Dirava ena heduru do umui noia hebou mai emui manau ida.—Efeso 4:26, 27; 6:18.

9. Dahaka dainai ita gwau herevahereva namonamo dalana be kudouna lalonai ia matamaia?

⁹ Baibel ia gwau: ‘Aonega tauna ena kudouna ese iena hereva ia hamaoromaoroa noho, bona iena hereva ese iena diba idia habadaia noho.’ (Aonega Herevadia 16:23) Anina be, hereva heheni namonamo dalana be kudouna lalonai, uduna lalonai lasi. Emu adavana be edena bamona oi laloa? Baibel ia gwau namona be Keristani taudia be ‘ta ta dekenai do idia bogahisihisi henia.’ (1 Petero 3:8) Emu adavana ena lalona do ia hekwarahi neganai, unai bamona do oi karaia diba, a? Unai ese oi do ia durua, hereva henia dalana namona do oi diba totona.—Isaia 50:4.

10, 11. Tau ese 1 Petero 3:7 ena sisiba be edena bamona ia badinaia diba?

¹⁰ Hemataurai. Baibel ese Keristani tataudia ia hagania, ia gwau: “Emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia.” (1 Petero 3:7) Ena adavana ia matauraia tauna be ena namo ia diba. Ia ese ena adavana ena namo ia diba dainai, ena lalona ena mamina, iena goada, bona iena aonega be ia laloa bada. Namona be ia ese danu Iehova ena lalohadai hahine dekediai bona kara henidia dalana ia haganilaia herevadia do ia tahua.

¹¹ Bema emu ruma lalonai uro severaseverana namona ta ia noho, oi naria namonamo, ani? Greek gado ai Petero ia gwau hahine ena tauanina be unai bamona urona hegeregerena. Unai dainai Keristani tauna do ia ura ena adavana lalokauna dekenai hebogahisi do ia hahedinaraia.

12. Hahine be edena bamona ia hahedinaraia diba ia ese ena tau ia matauraia bada?

¹² To Baibel ese hahine be edena bamona ia sisiba henia? Paulo ia gwau: “Hahine danu ese iena adavana do ia matauraia.” (Efeso 5:33) Hahine ese ena adavana ena hemataurai bona ena lalokau edia mamina ia abia be namo; unai hegeregerena, tau ese ena adavana ena hemataurai ena mamina ia abia be namo. Ena adavana ia matauraia hahinena ese ena kerere ia gwauraia hedinarai lasi, herevana ia be Keristani tauna eiava lasi. Ia gwau henia hehuni lasi bona taunimanima vairadiai ia gwauraia dika lasi, matauraia karana do ia hadikaia garina.—1 Timoteo 3:11; 5:13.

13. Ta ese ena lalohadai be maino dalanai edena bamona ia gwauraia hedinarai diba?

¹³ To hahine ese sibona ena lalohadai ia gwauraia hedinarai be kerere lasi. Bema gau ta ia laloa momo, ia gwauraia diba mai ena hemataurai ida. (Genese 21:9-12) Ena lalohadai ta be ena adavana ia hamaorolaia be bolo ta ia dekenai ia tahoa bamona. Bema ia tahoa metaira, ena adavana ese do ia gobea be haraga, to bema ia tahoa auka, reana do ia haberoa. Namona be ruaosi do idia gwau dika heheni lasi, to do idia hereva heheni mai edia hebogahisi bona mai edia manau ida be namo.—Mataio 7:12; Kolose 4:6; 1 Petero 3:3, 4.

14. Bema emu adavana ese Baibel ena hereva headava lalonai badinaia dalana ia laloa lasi, edena bamona do oi kara be namo?

¹⁴ Ita diba vadaeni Baibel ena hakaua herevadia ese oi idia durua diba, headava mai moalena do oi haginia totona. To bema emu adavana ese Baibel ena hereva ia laloa lasi, be edena bamona? Oiemu diba, Dirava dibaia karana amo dibana, be oiemu dagi lalonai bema oi gaukaralaia, unai ese anina bada do ia havaraia. Petero ia gwau: “Hahine taudia e, emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, . . . badina be emui kara goevagoeva, bona emui mataurai kara do idia itaia dainai.” (1 Petero 3:1, 2) Momokani, bema tau ta ena adavana ese Baibel ia laloa lasi, unai tau danu be unai bamona ia kara be namo. Herevana emu adavana be edena bamona ia kara, to Baibel ena hakaua herevadia ese oi be adavana namona ai do idia halaoa be namo. Dirava oi diba dainai, emu natudia do oi naria namonamo diba danu.

DIRAVA DIBA KARANA HEGEREGERENA EMU NATUDIA OI NARIA

15. Haida ese edia natudia naria daladia kereredia be edena bamona idia abia, bona unai dika hadokoa dalana be dahaka?

¹⁵ Ena be tau ta be mai ena iri o mai ena hama, to unai ese kamuta namona ai ia halaoa lasi. Unai hegeregerena, ena be ta be mai ena natuna, to unai ese tama o sina namona ai ia halaoa lasi. Haida be edia tamadia sinadia ese guna idia naridia maoromaoro lasi dainai, hari idia danu ese edia natudia unai bamona idia naridia maoromaoro lasi. Edia kerere be uru ta amo ia hanai ma uru ta dekenai. Idaunegai Heberu aonega herevana ta be inai: “Tamana taudia ese vain huahua, kasiri gaudia idia ania vadaeni, bona edia natudia ese unai huahua edia mamina dikana idia abia.” To, Baibel ese ia hahedinaraia, ta ena tamana sinana idia karaia dalana be ia ese ia rakatania diba. Dala idauna ta ia abia hidi diba, Iehova ena taravatu badinadia dalana unai.—Esekiela 18:2, 14, 17.

16. Dahaka dainai emu famili oi naria be gau badana, bona naria gaukarana ena anina be dahaka dahaka?

¹⁶ Iehova ia ura Keristani tama sina ese edia natudia do idia hakaua maoromaoro bona do idia naria namonamo. Paulo ia gwau: “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni. Iena dika ese abidadama lasi murimuri tauna ena dika ia hanaia vadaeni.” (1 Timoteo 5:8) Hereva aukadia unai! Unai hegeregerena, namona be emu natudia be lauma dalanai bona tauanina dalanai do oi naridia bona edia lalona do oi hanamodia danu. Dirava ia badinaia tauna ena maduna namona be unai. Baibel ena hereva ese tama sina ia durudia, idia be mai edia natudia ida moale dekenai do idia noho dalana do idia karaia totona.

17. Dirava ena taravatu be emu natudia edia kudoudia lalonai do ia noho totona, dahaka do oi karaia guna be namo?

¹⁷ Dala maorona umui haheitalaia. Dirava ese Israela taudia ia hagania, ia gwau: “[Dirava ena hereva be] oiemu natuna oi hadibalaidia mai emu goada ida bona oi herevalaidia, ruma ai oi helai neganai, bona dala ai oi raka neganai, bona oi hekure neganai.” To unai oda ena matamanai ia gwau: “Inai hereva, hari dina ai oi lau haganilaia herevadia, be oiemu lalona ai do idia noho be gau badana.” (Deuteronomi 6:6, 7, NW) Oibe, tama sina be idia dekenai idia noho lasi gaudia idia henidia diba lasi. Bema oi ura Dirava ena taravatu be emu natudia edia kudoudia dekenai do oi torea, namona be umui sibona emui kudouna dekenai do umui toredia guna.—Aonega Herevadia 20:7; ma danu Luka 6:40 itaia.

18. Dirava ese lalokau hahedinaraia dalana hereadaena be tama sina edena bamona ia haheitalaidia, do idia tohotohoa totona?

¹⁸ Emui lalokau umui hahedinaraia. Iesu be bapatiso ia abia neganai, Iehova ia gwau: “Oi be lauegu Natuna, lauegu lalokau, lau be lau moale oi dekenai.” (Luka 3:22) Unai amo Iehova ese ena Natuna ia gwauraia hedinarai, ia hahedinaraia ia lalo-namo henia, bona Iena lalokau ia hamaorolaia. Gabeai Iesu ese ena Tamana ia hereva henia, ia gwau: “Tanobada do oi karaia lasi neganai, oi ese lau dekenai oi lalokau henia.” (Ioane 17:24) Vadaeni, Dirava badinaia taudia hegeregeredia, nega momo emui hereva bona emui kara amo do umui hahedinaraia emui natudia umui lalokau henia. Nega ibounai do umui laloatao “lalokau ese goada ia havaraia.”—1 Korinto 8:1.

19, 20. Natu edia lalona hamaoromaoroa dalana maorona be dahaka, bona edia tamadia sinadia ese Iehova ena kara be edena bamona idia tohotohoa be namo?

¹⁹ Matahakani. Baibel ese ia hahedinaraia namona be tama sina ese edia natudia do idia biagua mai edia lalokau ida. (Aonega Herevadia 1:8) Unai maduna hari idia dadaraia taudia be nega vairai do idia lalohisihisi. To Baibel ese danu tama sina ia sisiba henidia, do idia kara auka lasi. Paulo ia gwau: “Tamana bona sinana, emui natudia do umui habadua kava lasi, do idia hesiku garina.” (Kolose 3:21) Namona be tama sina do idia naria namonamo, edia natudia do idia kara auka henidia o edia kerere bona edia gaukara do idia maumauraia loulou garina.

²⁰ Iehova Dirava, iseda Tamana guba dekenai, ese matahakani henia dalana maorona ia hahedinaraia. Iena matahakani be auka herea lasi. Ena bese ia hamaoroa, ia gwau: “Oiemu dika ena davana korikori, be oi dekenai do lau henia.” (Ieremia 46:28) Namona be tama sina ese Iehova ena kara idia tohotohoa. Matahakani bada hereana, ta ena kerere ena davana ia hanaia gauna, ese ia do ia habadua.

21. Tama sina be edena bamona idia diba edia matahakani be mai anina eiava lasi?

²¹ Tama sina be edena bamona idia diba edia matahakani be mai anina eiava? Idia ta ta be inai bamona idia henanadai be namo, ‘Egu matahakani ese dahaka anina ia havaraia?’ Namona be matahakani amo emu natuna oi hadibaia, bona oi henia ena badina ia lalo-pararalaia be namo. Namona be tama sina ese edia matahakani ena anina gabena danu idia laloa. Momokani, matamanai kahirakahira natu iboudiai ese matahakani do idia badulaia. (Heberu 12:11) To namo lasi matahakani dainai ta ia gari, o mamina ia abia ena tamana sinana ese idia dadaraia o idia laloa ia be dika rohoroho. Dirava ese ena bese ia matahakani henia gwauraia neganai, ia gwau: “Do oi gari lasi, badina lau be oi danu lau noho.” (Ieremia 46:28) Oibe, namona be dala maorona amo emui natuna do umui matahakani henia, bena mamina do ia abia umui lalokau henia bona umui durua toho.

“HAHEKAU MAI AONEGANA” DO OI ABIA

22, 23. Hahekau be edena bamona do oi abia diba, famili mai moalena do oi haginia totona?

²² Iehova ita tanikiu henia, badina be tulu be ita ia henia, idia amo famili mai moalena do ita haginia diba. To tulu ita abidia sibona be hegeregere lasi. Namona be gaukaralaidia daladia do ita manadalaia. Hegeregere, reana kamuta ta be ena tulu gaukaralaidia kerere karana do ia manadalaia dainai, ia karaia rumana be namo lasi. Unai hegeregerena, reana hari oi diba emu famili ena kara haida, guna umui be metairametaira umui abia dae karadia, be namo lasi. Reana unai kara haida umui manadailaia momokani dainai, do umui haidaua be auka. To, Baibel ena sisiba do umui badinaia be namo; ia gwau: “Aonega tauna do ia kamonai bena ena diba do ia habadaia, bona lalo-parara tauna ese hahekau mai aonegana ia davaria.”—Aonega Herevadia 1:5, NW.

²³ Bema Dirava oi dibaia noho, hahekau mai aonegana do oi abia diba. Famili sisibalaia herevadia Baibel lalonai be oi laloa, bona emu kerere oi hamaoromaorodia. Keristani taudia goadadia, edia adavadia bona edia natudia be dala namona ai idia kara henidia taudia, oi itaia namonamo. Oi hereva henidia. Gau badana be, guriguri amo emu lalo-hekwarahi be Iehova oi hamaorolaia. (Salamo 55:22; Filipi 4:6, 7) Umui ia durua diba, emui famili lalonai do umui moale bona Ia do umui hanamoa totona.

[Footnotes]

EMU DIBA OI TOHOA

Badinaia heheni, hereva heheni, bona hemataurai ese headava taudia edena bamona ia hamoaledia?

Edena dala amo tama sina ese edia lalokau be edia natudia dekenai idia hahedinaraia diba?

Matahakani dalana maorona be dahaka?

[Full-page picture on page 147]