Emu Famili Lalonai Dirava Ena Ura Oi Tahua Guna, A?

“[Iehova] oiemu Dirava oi ura henia, mai oiemu kudouna ibounai.”​—MAREKO 12:​29, 30.

“TARAVATU ibounai dekenai, edena be taravatu badana?” Taravatu hadibaia tauna ta ese Iesu unai bamona ia nanadaia neganai, Iesu be sibona ena lalohadai amo ia haere lasi, to Dirava ena Hereva Deuteronomi 6:​4, 5 ai be ia gwauraia, ia gwau: “Ginigunana be inai, ‘Israela taudia e, umui kamonai, [Iehova] iseda Dirava be [Iehova] tamona. [Iehova] oiemu Dirava oi ura henia, mai oiemu kudouna ibounai, mai oiemu lauma ibounai, mai oiemu lalona ibounai, bona mai oiemu goada ibounai.’ ”​—Mareko 12:​28-30.

² Iesu ese ia gwauraia taravatuna, ia gwau ia be ginigunana bona bada hereana, ita badinaia totona, namona be nega ibounai Iehova hamoalea karadia ita karaia. Ena be nega ta aposetolo Petero ese Iesu ena kara ia badulaia bona ma nega ta sibona ena varavara ese, to Iesu be unai bamona ia kara. (Mataio 16:​21-23; Mareko 3:21; Ioane 8:29) Bema unai oi davaria, dahaka do oi karaia? Bema emu ruma bese taudia idia ura emu Baibel stadi bona Iehova ena Witness taudia bamodia karana do oi hadokoa, Dirava ena ura tahua guna totona, hamoalea karana do oi karaia, a? Iena hesiai oi lao henia toho neganai, bema emu famili taudia ese oi idia koua toho, iena ura oi tahua guna, eiava?

Famili Ena Badu Ena Tarapu

³ Iesu ia gwau lasi iena hereva ia abia dae tauna ese ena famili taudia edia badu dainai do ia abia hekwarahina be maragi. Ia gwau: “Ruma taudia ese ruma ena biaguna do idia badu henia.” To Iesu ese ia hahedinaraia, ena be unai do ia vara, to ia do ita laloa guna be namo, ia gwau: “Bema tau ta ese iena tamana o iena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi. O bema tau ta ese iena natuna mero o iena natuna kekeni ia ura henia bada, to lau be ia ura henia maragi, ia be lau dekenai do ia hegeregere lasi.” (Mataio 10:​34-37) Iehova Dirava ena ura ita tahua guna dalana be, iena Natuna, Iesu Keriso, ena hahediba herevadia ita badinaia, “iena toana be Dirava ena toana hegeregerena momokani.”​—Heberu 1:3; Ioane 14:9.

⁴ Nega ma ta ai Iesu ese ia do idia badinaia momokani dalana ia herevalaia, ia gwau: “Bema tau ta lau dekenai do ia mai, to iena tamana, iena sinana, iena adavana, iena natuna, iena tadikakana, bona iena mauri danu, bema ia laloaboio lasi, ia be hegeregere lasi lauegu diba tahua tauna do ia lao.” (Luka 14:26) Iesu ia ura lasi iena orea taudia ese edia famili taudia do idia inai henidia, badina be taunimanima ia haganidia edia inai taudia danu do idia lalokau henidia. (Mataio 5:44) To Iesu ena hereva ena anina be, namona be ena orea taudia ese edia famili taudia do idia laloa maragi, to Dirava do idia laloa bada. (Mataio 6:24 itaia.) Unai hegeregerena, Baibel ia gwau Iakobo ese Lea ia “inai henia” (NW) bona Rahela ia ura henia, anina be Lea ia ura henia maragi, to Rahela ia ura henia bada. (Genese 29:​30-32) Iesu ia gwau siboda eda mauri danu do ita inai henia, anina be do ita ura henia maragi, to Iehova do ita ura henia bada!

⁵ Iehova ese taunimanima ia havaradia bona mauri ia henidia dainai, ena hesiai taudia ese ia idia badinaia vaitani be namo. (Apokalupo 4:11) Aposetolo Paulo ia gwau: “Tamana ena vairanai lau tui diho. Iena famili ibounai, guba dekenai bona tanobada dekenai, be Tamana dekena amo edia ladana idia abia.” (Efeso 3:​14, 15) Iehova ese famili be hoa dalana ai ia karadia, famili taudia do idia lalokau heheni. (1 King Taudia 3:​25, 26; 1 Tesalonika 2:7) Edia lalokau ena anina ta be, idia ura edia lalokau taudia do idia hamoalea, to Satani Diabolo ese unai lalokau ia gaukaralaia, sibona ena ura hagugurua totona. Ia ese haida edia famili taudia edia badu ia habadaia, bena momo idia davaria unai idia haheaukalaia bona Baibel ena hereva idia badinaia be auka.​—Apokalupo 12:​9, 12.

Hahetoho Haheaukalaia

⁶ Bema emu famili tauna ta hamoalea dalana o Dirava hamoalea dalana amo dala ta abia hidi karana amo oi siri diba lasi, edena bamona do oi kara? Emu lalona ai do oi gwau, Dirava ena Hereva ita stadilaia bona ita badinaia dainai bema iseda famili lalonai heai idia vara, Iehova be unai ia ura lasi, a? To mani inai oi laloa: Bema oi manoka dainai emu Baibel stadi oi hadokoa o Iehova ena Witness taudia oi bamodia lou lasi, emu lalokau taudia edia lalona be edena bamona do idia parara Baibel dibaia maoromaoro karana be mauri abia dalana tamona?​—Ioane 17:3; 2 Tesalonika 1:​6-8.

⁷ Sivarai hegeregerena ta be inai: Reana emu famili tauna ta ese bia ia ura henia bada. Bema ena hekwakwanai oi laloa lasi o oi gwau unai be kerere lasi, unai ese do ia hanamoa momokani, a? Maino do oi hadikaia garina, ena kara oi abia dae bona ena hekwakwanai oi hanamoa toho lasi be namo, a? Lasi, oi diba namona be do oi durua toho, bia dainai ia abia hekwakwanaina do ia hanaia totona. Ena be oi do ia badu henia bona do ia hagaria toho, to unai do oi boga-aukalaia be namo. (Aonega Herevadia 29:25) Unai hegeregerena, bema emu ruma bese taudia oi lalokau henidia momokani, oi do idia koua toho Baibel do oi stadilaia lasi totona negadiai, do oi manoka lasi. (Kara 5:29) Do oi gini auka neganai mo, reana do oi durudia diba, inai do idia diba totona: Mauri abia totona Keriso ena hahediba herevadia ita badinaia be namo.

⁸ Nega haida, Dirava ena ura ita tahua guna be auka herea. To mani oi laloa, Satani ese Iesu danu ia hahekwarahia dainai, Dirava ena ura ia karaia be auka. To Iesu be nega ta ia manoka lasi; ita dainai satauro ena hisihisi danu ia haheaukalaia. Baibel ia gwau: “Iesu Keriso [be] iseda Hamauria Tauna.” “Ia be ita dainai ia mase.” (Tito 3:6; 1 Tesalonika 5:10) Iesu be ena inai taudia vairadiai ia manoka lasi dainai, ita tanikiu henia, ani? Boubou gauna ta bamona ia mase dainai, ita be mai eda helaro, kara maoromaoro tanobadana matamatana dekenai maino ai do ita mauri noho ela bona hanaihanai, iena hebubu rarana ita abidadama henia dainai.​—Ioane 3:​16, 36; Apokalupo 21:​3, 4.

Davana Badana Oi Abia Diba

⁹ Oi danu ese emu varavara lalokaudia bona ma haida hamauridia gaukarana oi durua diba​—unai oi diba a? Aposetolo Paulo ese Timoteo ia sisiba henia, ia gwau: “Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.” (1 Timoteo 4:16) Timoteo ena famili ia parara, badina be ena tamana, Helene tauna, be Keristani tauna lasi. (Kara 16:1; 2 Timoteo 1:5; 3:14) Ena be ita diba lasi gabeai Timoteo ena tamana be Keristani tauna ai ia lao eiava lasi, to ia be mai ena dala namona, badina be ena adavana, Eunike, bona Timoteo edia kamonai karadia dainai.

¹⁰ Baibel ese ia hahedinaraia ena hereva momokani idia badinaia goadagoada taudia ese edia adavadia, Keristani lasi taudia, idia durudia, Keristani taudia ai idia lao totona, unai amo idia ese hamauridia karana idia durua diba. Aposetolo Paulo ia gwau: “Sedira emui Keristani varavara tauna ta be mai ena adavana, abidadama lasi hahine. Bema unai hahine ia ura iena tau danu ia noho neganai, iena tau ese do ia rakatania lasi. Bona Keristani varavara hahine ta danu sedira mai ena adavana, abidadama lasi tauna. Bema unai tau ia ura iena hahine danu ia noho neganai, iena hahine ese do ia rakatania lasi. Oi Keristani hahine, sedira bema ia danu oi noho, oi ese oiemu tau do oi durua [“hamauria,” NW] diba. . . . Bona oi Keristani tauna, sedira bema ia danu oi noho. oi ese oiemu hahine do oi durua [“hamauria,” NW] diba.” (1 Korinto 7:​12, 13, 16) Hahine ese edia adavadia idia hamauria diba dalana be aposetolo Petero ese ia gwauraia; ia sisiba henidia, ia gwau: “Emui adavana do umui kamonai henia. Badina be idia haida ese Dirava ena hereva idia badinaia lasi, to bema kara namodia umui karaia, bona umui emui hereva be momo lasi neganai, sedira do idia laloa namonamo. Vadaeni sedira edia lalona do idia giroa, bona Dirava do idia abidadama henia.”​—1 Petero 3:1.

¹¹ Idia lao vadaeni laganidia lalodiai taunimanima tausen momo be Iehova ena Witness taudia ai idia lao; unai be hua momo o lagani momo lalodiai idia ese edia varavara, Witness taudia, edia Keristani gaukarana idia inai henia murinai. Unai be davana namo hereana, idia gini auka Keristani taudia ese idia abia, bona ia be hahenamo badana, guna idia inai henidia taudia dekenai! Keristani elda tauna ta, lagani 74 tauna, ia hereva mai ena hebogahisi ida, ia gwau: “Nega momo egu adavana bona egu natuna lau tanikiu henidia, badina be lau inai henidia laganidia lalodiai hereva momokani idia badinaia noho dainai.” Ia gwau, lagani toi lalodiai ena adavana ia koua, ia dekenai Baibel do ia herevalaia lasi. Ma ia gwau: “To aonega ia gaukaralaia lau dekenai; egu aena palapaladia ia dahudia neganai, lau ia haroro henia matamaia. Lau tanikiu henia bada, egu badu ia haheaukalaia dainai!”

¹² Tau ma ta, guna ena famili ena dala ia koua toho, be ia gwau: ‘Egu adavana ese hereva momokani ia abia murinai, lau ese ia lau inai henia bada. Lau hagaria toho, bona dina iboudiai ai hepapahuahu; nega iboudiai lau ese hepapahuahu lau hamatamaia. To unai ibounai be anina lasi; egu adavana ese Baibel ia badinaia noho. Hereva momokani bona egu adavana bona egu natuna danu be lagani 12 unai bamona lau tuari henia. Ruaosi dekenai lau be Diabolo bamona.’ Unai murinai unai tau ese sibona ena kara ena anina ia tahua. Ia gwau: ‘Egu lalona ia parara egu kara be dika herea. Bena Baibel lau duahia, bona ena hahediba dainai hari lau be Witness tauna ta, bapatiso lau abia vadaeni.’ Unai hahine ese ia abia davana namona be mani oi laloa: ‘Ena adavana hamauria karana ia durua,’ badina be lagani 12 iena badu ia haheaukalaia mai ena kamonai ida dainai!

Iesu Ena amo Diba Abia

¹³ Namona be headava taudia, tatau bona hahine, idia diba Iesu ese ena mauri dalana amo ia hadibalaidia gauna badana be Dirava kamonai henia karana. Iesu ia gwau: “Lau sibona egu ura lau karaia lasi, to Dirava ena ura sibona lau karaia.” “Iena ura be nega ibounai lau karaia.” (Ioane 5:30; 8:29) Iesu ese Dirava ena ura ena kahana ta ese ena hemami ia hadikaia neganai danu, ia kamonai henia. Ia guriguri henia, ia gwau: “Oiemu lalona bema ia hegeregere, inai kapusi be lau dekena amo do oi kokia.” To karaharaga ma hereva ta ia atoa, ia gwau: “To lauegu ura lasi, oiemu ura sibona.” (Luka 22:42) Iesu ese Dirava ia noia lasi Iena ura do ia haidaua; Iehova ena ura ibounai ia dekenai be ia badinaia mai ena kamonai ida, unai amo ia hahedinaraia Dirava ia lalokau henia momokani. (1 Ioane 5:3) Headava lasi taudia mo lasi, to headava taudia danu be edia mauri lalonai idia kwalimu totona, gau badana be Iesu hegeregerena Dirava ena ura idia tahua guna. Unai ena badina mani oi laloa.

¹⁴ Ai herevalaia vadaeni hegeregerena, Keristani taudia ese Dirava ena ura idia tahua guna neganai, idia be edia adavadia, Keristani lasi taudia, ida do idia noho dalana idia tahua, bona idia momo ese idia durudia diba, hahemauri abia dalana ai do idia raka vareai totona. Ena be tatau mai edia adavadia ida be Keristani taudia, reana edia headava maurina ia dika. Edia ura dikadia dainai, nega haida tatau bona edia adavadia be idia lalokau heheni lasi. (Roma 7:​19, 20; 1 Korinto 7:28) Haida, ena be Baibel ena taravatu hegeregerena edia adavadia do idia rakatanidia badina ta be lasi, to adavadia matamatadia idia tahua. (Mataio 19:9; Heberu 13:4) Idia laloa unai bamona idia karaia be namo, badina be Dirava ena ura hegeregerena edia adavadia ida do idia noho hebou be auka herea. (Malaki 2:16; Mataio 19:​5, 6) Momokani, badina be taunimanima edia lalohadai idia laloa, Dirava ena lasi.

¹⁵ Dirava ena ura tahua guna karana be ita ia gimaia karana namona! Headava taudia be unai bamona idia kara neganai, idia badinaia heheni toho, bona Dirava ena sisiba badinaia karana amo edia hekwakwanai idia haoredia toho. Unai dala amo idia be lalohisihisi idauidau amo idia roho mauri, iena ura idia laloa lasi taudia ese idia davaria gaudia unai. (Salamo 19:​7-11) Haheitalai ta be inai: Tau ta mai ena adavana, taunimanima matamatadia, be kahirakahira edia headava idia hadokoa gwauraia neganai, edia lalona idia hadaia Baibel ena sisiba do idia badinaia. Bena lagani haida idia ore murinai, hahine ese ena headava lalonai ia abia vadaeni moalena ia laloa neganai, ia gwau: “Unai lagani iboudiai lalodiai lau bona egu adavana bema ai parara, unai be dika. Unai lau laloa neganai, lau tai. Bena Iehova Dirava lau guriguri henia bona lau tanikiu henia, badina be ena sisiba bona ena hahekau amo moale bada headavana lalonai ai ruaosi ia hatamonaia dainai.”

Tatau, Hahine e​—Keriso Tohotohoa!

¹⁶ Iesu be nega ibounai Dirava ena ura ia tahua. Unai amo haheitalai namo hereana be tatau bona hahine dekenai ia hahedinaraia, bona namona be unai idia laloa namonamo. Baibel ese tatau ia sisiba henidia, Iesu ena dala, Keristani ekalesiana taudia ia biagudia mai ena hebogahisi ida dalana, be do idia tohotohoa. (Efeso 5:23) Bona Keristani hahinedia ese Iesu ena haheitalai goevadaena amo diba idia abia diba; Dirava ia kamonai henia goevagoeva karana unai.​—1 Korinto 11:3.

¹⁷ Baibel ia hahegani: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efeso 5:25) Iesu ese ena lalokau iena ekalesia taudia dekenai ia hahedinaraia dalana badana ta be, ia tura henidia namonamo. Ia gwau: “Umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.” (Ioane 15:15) Mani inai oi laloa: Iesu be hora momo lalodiai ena hahediba taudia ida idia herevahereva​—nega momo ia be idia ida idia herevahereva​—bona ia abidadama henidia danu! Unai be haheitalai namo hereana tatau dekenai, ani?

¹⁸ Iesu ese ena hahediba taudia ia ura henidia momokani bona edia namo ia tahua mai ena momokani ida. (Ioane 13:1) Ena hahediba herevadia idia lalo-pararalaia lasi neganai, idia sibodia ia hadibadia lou mai ena haheauka ida. (Mataio 13:​36-43) Tau e, emu adavana be lauma dalana ai do ia noho namo dalana be oi ese unai bamona oi laloa bada, a? Nega be ia dekenai oi haorea, umui ruaosi ese Baibel ena hereva be emui darana ai bona emui lalona ai umui lalo-pararalaidia totona, a? Iesu ese ena aposetolo be haroro gaukarana lalonai ia bamodia, reana haroro dalana be idia ta ta ia hadibadia. Haroro gaukarana lalonai emu adavana oi bamoa a? Ia ida ruma ta ruma ta umui lao bona Baibel stadi umui karaia danu, a?

¹⁹ Ena aposetolo edia kerere dainai ia karaia karadia lalodiai, Iesu ese haheitalai namo hereana be tatau ia henidia. Ia be ena aposetolo ida idia aniani hebou negana ginigabena ai, mamina ia abia idia mama heheni lou. Ia gwau dika henidia, a? Lasi, to idia ta ta edia aedia ia huria mai ena lalo-manau ida. (Mareko 9:​33-37; 10:​35-45; Ioane 13:​2-17) Emu adavana be unai bamona oi haheauka henia, a? Iena kerere ta, ia vara loulou karana, be oi maumauraia lasi, to emu haheitalai namona amo oi durua toho bona ena lalona oi veria toho, a? Hahine momo be unai bamona lalokauna bona hebogahisina dainai idia kara namo, aposetolo be gabeai idia kara bamona.

²⁰ Hahine danu ese Iesu idia laloa be namo; ia be nega ibounai ia laloaboio lasi “Keriso ena kwarana be Dirava.” Nega ibounai iena Tamana guba dekenai ia noho ia kamonai henia. Unai hegeregerena, namona be hahine idia laloaboio lasi “hahine edia kwarana be edia tau,” oibe, edia adavana be edia kwarana. (1 Korinto 11:3; Efeso 5:23) Aposetolo Petero ese Keristani hahinedia ia sisiba henidia, “sene hahine helagadia” edia haheitalai do idia laloa bona Sara ena do idia laloa bada; “ia ese Aberahamo ena hereva ia kamonai henia, bona ‘lohia’ ia gwauraia.”​—1 Petero 3:​5, 6.

²¹ Sara ese ruma namona, taga momo hanuana ta dekenai, ia rakatania, bena idau tanona dekenai palai rumana lalonai ia noho. Badina be dahaka? Badina be unai noho dalana ia ura bada dainai, a? Lasi. Badina be ena adavana ese ia noia do ia lao, a? Momokani, badina ta be unai, badina be Sara ese Aberahamo ia lalokau henia bona ia matauraia, iena kara namodia dainai. (Genese 18:12) To ena adavana ida ia lao badina badana be, ia ese Iehova ia lalokau henia bona ia ura bada ena hahegani do ia badinaia. (Genese 12:1) Dirava kamonai henia karana ia moalelaia. To Lota ena adavana be idau; Dirava ena ura ia karaia haraga lasi, bena ena hanua Sodoma dekenai ia rakatania gaudia ia ura henidia dainai, iena kwarana ia giroa lou. (Genese 19:​15, 25, 26; Luka 17:32) Unai headava be dala dikana ai ia doko​—unai ibounai be Dirava ia kamonai henia lasi dainai!

²² Vadaeni, tau o hahine e, gau badana be sibona emu lalona ai oi henanadai, oi gwau, ‘Egu famili lalonai Dirava ena ura lau tahua guna, eiava? Dirava ese famili lalonai lau ia henia dagina karadia be lau karaia toho momokani, a? Mai egu momokani ida egu adavana lau lalokau henia bona lau durua toho, Iehova do ia badinaia matamaia o do ia badinaia noho totona, a?’ Famili momo lalodiai be natu danu. Hereva gabena lalonai ai ese tama sina edia kara do ai herevalaia, idia bona edia natudia danu ese Dirava ena ura idia tahua guna be namo.

Oi Laloatao A?

◻ Iesu ena hahediba herevadia dainai, dahaka be famili momo lalodiai ia vara diba?

◻ Keristani taudia goadadia tausen momo ese dahaka davana namona idia abia?

◻ Dahaka ese headava taudia do ia durudia, do idia heudahanai lasi bona edia adavadia do idia rakatania lasi totona?

◻ Tatau ese Iesu ena haheitalai amo dahaka idia dibaia diba?

◻ Hahine ese edia headava hamoalea karana be edena bamona idia durua diba?

[Study Questions]

1. Iehova ita lalokau henia be mai anina bada, a?

2. (a) Daidia ese Iesu ena kara idia moalelaia lasi? (b) Dahaka dainai nega haida Iehova hamoalea be auka?

3. (a) Iesu ena hahediba herevadia dainai reana famili be edena bamona? (b) Famili taudia ta ta be edena bamona idia hahedinaraia diba Iesu idia ura henia bada eiava lasi?

4. (a) Iesu ia gwau, tau ta ese ia do ia badinaia anina be dahaka? (b) Keristani taudia ese edia famili taudia edena bamona idia laloa be namo?

5. Famili taudia idia kara heheni dalana be Satani ese edena bamona ia gaukaralaia mai ena aonega dikana ida?

6, 7. (a) Iseda famili taudia be edena bamona ita durua diba, bena do idia lalo-parara Baibel stadi bona Keristani taudia edia hebamo be mai anina bada? (b) Edena bamona ita hahedinaraia diba iseda famili taudia ita lalokau henidia momokani?

8. Iesu ese Dirava ena ura ia karaia mai ena kamonai ida dainai, dahaka namo ita abia?

9. (a) Keristani taudia ese ma haida hamauridia gaukarana edena bamona idia durua diba? (b) Timoteo ena famili ena mauri be edena bamona?

10. Keristani taudia ese edia adavadia, Keristani lasi taudia, dainai, dahaka idia karaia diba?

11, 12. (a) Keristani taudia tausen momo ese dahaka davana namona idia abia, bona unai be dahaka idia karaia dainai? (b) Hahine ta ena ekspiriens oi gwauraia, ena famili lalonai ia haheauka mai ena kamonai ida dainai, davana namona ia abia.

13. (a) Tatau bona hahine ese Iesu ena mauri dalana sivaraina amo idia dibaia be namo gauna badana be dahaka? (b) Idia davaria Dirava ena ura idia badinaia be auka taudia ese Iesu ena haheitalai amo dahaka namo idia abia diba?

14. Keristani taudia haida be edena bamona idia laloa kerere?

15. Dahaka dainai Dirava ena ura tahua guna karana be ita ia gimaia karana?

16. Iesu ese dahaka haheitalai be tatau bona hahine danu ia hahedinarai henidia?

17, 18. Edena dala amo Iesu ese haheitalai namona be tatau dekenai ia hahedinaraia?

19. Iesu ese ena aposetolo idia karaia loulou kereredia dainai ia kara henidia dalana amo haheitalai namona be edena bamona ia hahedinaraia tatau dekenai?

20. Keristani hahinedia ese dahaka idia laloaboio lasi be namo, bona daika ese unai ia haheitalaia?

21. Dahaka dainai Aberahamo bona Sara edia headava be namo to Lota bona ena adavana edia be dika?

22. (a) Famili taudia ta ta ese sibodia edia kara be edena bamona idia tahua be namo? (b) Stadi gabena lalonai dahaka do ita herevalaia?

[Picture on page 10]

Sara ese ena headava edena bamona ia hanamoa?