Gari Mamina Idia Koua

HARORO gaukara ita karaia totona nega haida gari mamina ita koua be auka. Momokani, aposetolo Paulo ia gwau nega ta ia gari lasi totona ia hekwarahi bada. (1 Tesalonika 2:⁠2, NW ) Haroro totona ita hekwarahi be mai anina, a? Ita gwau lasi hanaihanai ekspiriens namodia do ita abia, to nega momo Dirava ena taunimanima idia moale badina gari mamina idia koua. Haheitalai haida mani ita laloa.

Lagani 8 kekenina ta ladana Tara ia kamonai namonamo, iena tisa tauna ese natudia ia hadibaia Tanobada Ibounai Tuarina Iharuana lalonai dibura kamepa lalodiai Iuda taudia edia toana hahedinaraia totona edia dabua dekenai Star of David laborana do idia atoa. Tara ia laloa noho do ia hereva be namo eiava. Ia gwau: “Egu matana idia kehoa lalonai lau guriguri.” Bena ena imana ia abia isi bona ia gwau Iehova ena Witness taudia be unai dibura kamepa lalodiai idia noho danu, bona edia dabua ai purple triangle ia hedinarai. Tisa tauna ia moale bona Tara ia tanikiu henia. Tara ena hereva ese dala ia kehoa ena tisa ida do ia herevahereva, bona gabeai unai tisa ese klas taudia ibounai dekenai vidio ladana Jehovah’s Witnesses Stand Firm Against Nazi Assault ia hahedinaraia.

Guinea, West Africa ai, bapatiso lasi pablisa ta ladana Irène ia ura ena haroro gaukara ia hanamoa. Ia ida Baibel stadi ia karaia misinari taihuna ese ia hagoadaia ena sikuli dekenai stiuden taudia ma haida dekenai Gima Kohorona bona Awake! magasin do ia hariharilaia. Irène ia gari sisina badina guna ena klas turadia idia kamonai lasi. To, unai misinari taihuna ese ia hagoadaia dainai, Irène ese ena lalona ia hadaia, guna ura lasi toana goadana ia hahedinaraia badabada stiuden kekenina do ia hereva henia. Bena Irène ia hoa, badina unai kekeni ia kamonai bona mai ena ura ida magasin ia abidia. Stiuden ma haida be unai bamona idia karaia danu. Unai hua lalonai Irène ese ia hariharilaia magasin edia namba ese idia hanaia hua ima lalonai ia hariharilaia magasin iboudiai edia namba ia hanaia.

Trinidad dekenai, elda ta ia gari sikuli ta ena tisa badana dekenai ia lao bona Awake! magasin ena namo hadibaia gaukarana lalonai do ia hahedinaraia totona. To, ena gari mamina ia koua. Ia gwau: “Sikuli gabuna lau vareai neganai lau guriguri. Bona lau hoa bada badina unai tisa badana ena kara be namo herea.” Ia ese hereva ladana “What Hope for Today’s Youths?” ia kikilaia Awake! magasin ia abia bona ia gwau ena hadibaia gaukarana lalonai do ia gaukaralaia. Unai nega amo ema bona hari, ia ese gau idauidau idia herevalaia magasin 40 ia abia.

Tau matamata ta, Vaughn, ia laloa haroro gaukara be auka. “Lau gari, egu imana be varahu dainai idia paripari, bona lau hereva haraga​—⁠metairametaira lau hereva diba lasi.” To, ful-taim hesiai gaukara ia karaia matamaia. Unai neganai danu nega haida ia hereva be auka. Nega ta, dina ibounai moni gaukara ia tahua to ta ia davaria lasi murinai, ia ura trein lalonai ta dekenai do ia haroro, “dina dikana amo gau namona ta do ia vara totona.” To trein lalonai mai ena toana namona bisinesi tauna ia helai dainai ia gari. Gabeai, gari mamina ia koua bona ia badinai ia helai tau burukana ia hereva henia. Sisina daudau idia herevahereva. Unai bisinesi tauna ia gwau: “Oi be matamata to henanadai namodia oi henia,” bena ia nanadaia: “Oi be tomadiho stadilaia tauna ta, a?” Vaughn ia haere: “Lasi, lau be Iehova ena Witness tauna ta.” Unai tau ia kiri bona ia gwau: “Vadaeni, hari lau lalo-parara.”

Unai Witness taudia ibounai​—⁠bona ma haida​—⁠idia moale badina gari mamina idia koua bona idia haroro. Do oi karaia danu, a?

[Picture on page 25]

Tara

[Picture on page 25]

Vaughn