Mai Goada ida Kara Dika Oi Dadaraia

“EGU mauri lagani be 15 sibona bona aniani hoia sitoana ta dekenai lau gaukara neganai, egu gaukara turana ta ese ena ruma dekenai lau ia boiria. Ia gwau ena tama sina be do idia noho lasi, kekeni do idia mai, bona unai be nega namona idia danu ai mahuta hebou totona.” Unai be Timothy ena sivarai ena kahana ta. Hari inai negai matamata taudia momo be unai bamona hereva dekenai kara haraga do idia hereva, Oibe. To Timothy ena haere be dahaka? “Maoromaoro lau hamaoroa goevagoeva do lau lao lasi bona lauegu Keristani lalona ena mamina dainai, lau ura lasi lau adavaia lasi tauna ida lau mahuta hebou.”

Do ia lao lasi ena badina ia gwauraia neganai, Timothy ia diba lasi idia danu ia gaukara hebou hahine matamata ta be unai ia kamonai. Timothy ena kara goeva ese unai hahine ia veria, bona gabeai Timothy ese ia davaria unai hahine ena veria karana danu ia dadaraia be namo​—⁠nega momo unai ia vara, gabeai do ita itaia bamona.

Hahetoho momo ita davaria be iseda nega ai ia vara gauna sibona lasi. Lagani 3,000 bamona gunanai, King Solomona ia gwau: “Egu natuna e, kara dika taudia ese, oiemu lalona idia koia gwauraia neganai, edia ura do oi abia dae lasi. . . . Idia dekena amo do oi raka siri.” (Aonega Herevadia 1:10, 15) Iehova ese Israela besena ia hagania, ia gwau: “Bema taunimanima momo idia kerere, edia laloa do umui abia dae lasi.” (Esodo 23:2) Momokani, nega haida kara dika karaia totona ita idia veria gaudia idia vara bona ita dadaraia be namo ena be momo be unai bamona idia karaia lasi.

Kara Dika Dadaraia Karana be mai Anina Bada Hari Inai Negai

Kara dika dadaraia be hanaihanai ia auka, bona hari inai negai ia be auka momokani, badina ita be Baibel ese ia gwauraia “nega ena dokona” dekenai ita noho. Baibel ena peroveta herevana be momokani, taunimanima be lebulebu karadia bona dagedage karadia idia ura henia bada, lauma gaudia bona kara maoromaoro idia ura henia lasi. (2 Timoteo 3:1-5) Jesuit iunivesiti ena presiden ta ia gwau: “Guna ita badinaia taravatu be hari taunimanima ese idia ura henidia lasi bona momo idia laloa edia anina be maragi eiava idia be anina lasi. Toana be hari kara maoromaoro ena taravatu be ia noho lasi.” Unai lalohadai hegeregerena, kota badana ia hakaua diadi tauna ta ia gwau: “Hari gau ibounai be korema bona kurokuro lasi. Gau ibounai be sisina kurokuro bona sisina korema. . . . Momo ese kerere bona maoro edia idau idia diba lasi. Hari, bema dika oi karaia neganai oi idia davaria be kara dika, to unai dika oi karaia be kara dika lasi.”

Aposetolo Paulo ese unai bamona kara idia hahedinaraia taudia ia gwauraia: “Edia laloa be dibura. Dirava ena mauri be idia davaria diba lasi, badina be ia dekena amo edia laloa idia koua, bona iena dala idia diba lasi. Idia be hemarai lasi momokani. Lebulebu daladia idia ura dikadika, bona matabodaga karadia idia tahua doko lasi.” (Efeso 4:18, 19) To dika be idia ia naria noho. Isaia ia gwau: “Momokani, do umui be dika! Umui ese dika umui gwauraia namo, bona namo umui gwauraia dika. Ma dibura umui gwauraia diari, bona diari umui gwauraia dibura.” (Isaia 5:20) Hari inai negai unai bamona taudia be idia hadoa hegeregerena anina idia abia sibona lasi, to kahirakahira “dika” bada hereana do idia abia​—Iehova amo hahemaoro aukana unai.​—Galatia 6:7.

Salamo 92:7 ia gwau: “Kara dika taudia be do idia tubu daekau, ava idia tubu daekau bamona. Bona kerere idia karaia taudia, be kohu momo bona noho namo idia abia diba, to oi ese idia do oi hadikaia ore.” Ita gwau diba, taunimanima edia mauri ia hadikaia noho gwau-edeede karana badana be do ia noho daudau lasi, taunimanima edia mauri do ia hadikaia noho lasi. Momokani, Iesu ia gwau Dirava ese “inai nega idia noho taudia,” gwau-edeede karadia idia habadaia taudia, be “hisihisi bada herea” lalonai do ia haoredia. (Mataio 24:3, 21, 34) Unai dainai, bema ita ura unai hisihisi amo do ita roho mauri, namona be Dirava ena taravatu hegeregerena ai maoro bona kerere edia idau ita diba; bona momokani, kara maoromaoro ita goadalaia be gau badana, kara dika ibounai do ita dadaraia totona. Ena be unai be ia auka, Baibel negadiai bona hari inai negai idia noho taudia edia sivarai amo Iehova ese ita ia hagoadaia.

Kara Dika Ia Dadaraia Matamata Tauna Ta Ena Kara amo Diba Ita Abia

Toana be taunimanima ese sihari kava bona heudahanai karadia idia dadaraia be auka. Keristani kongregesen lalonai idia noho taudia haida dekenai unai be auka. Paragraf ginigunana ai ita gwauraia matamata tauna, Timothy, ese Baibel lalonai Genese 39:1-12 dekenai matamata tauna Iosepa ena haheitalai ia laloa bada. Aigupito ena dagi tauna Potifara ena adavana ese Iosepa ia boiria loulou ia danu idia mahuta hebou negadiai Iosepa ese kara maoromaoro goadalaia karana ia hahedinaraia. Unai sivarai ese ia hahedinaraia, Iosepa “ia ura lasi, ia haere henia . . . ‘Inai kerere badana do lau karaia, bona Dirava ena vairana dekenai inai bamona do lau kara dika be edena bamona?’ ”

Dahaka ese Iosepa ia hagoadaia kara maoromaoro ia badinaia bena dina ta ta ai Potifara ena adavana ia dadaraia totona? Gau ginigunana be, ia laloa ena hetura karana Iehova ida ese nega sisina ai do ia abia moalena ia hanaia momokani. Danu, ena be ia be Dirava ena taravatu ta henunai ia noho lasi (Mose ena taravatu be vairai ia do mai), to Iosepa ese kara maoromaoro ena hakaua herevadia ia diba namonamo; ia diba bema Potifara ena hahine, ena ura ese ia veria hahinena, danu ia sihari kava, unai be Potifara dekenai sibona do ia kara dika lasi to Dirava dekenai danu.​—​Genese 39:8, 9.

Iosepa ia diba goevagoeva, namona be ena ura idia hanogaia bona habadaia daladia ia koua ena hemami ia biagua diba lasi garina. Keristani tauna ese Iosepa ena haheitalai ia tohotohoa be aonega karana. Watchtower, July 1, 1957 gauna, ia gwau: “Gau badana be tau ta ese ena manoka gaudia ia dibaia bona ia laloa lasi ia ese ena tauanina ena ura ia badinaia diba ela bona Baibel ena hereva ese ia gwauraia hetoana dekenai bena ia hadokoa. Ena be nega sisina lalonai unai do ia karaia diba, to gabeai unai ese ia do ia veria bona unai hetoana do ia hanaia bena do ia kara dika. Unai be do ia vara, badina bema ta ese tauanina ena ura ia badinaia ia tubu bona ia bada neganai, unai tau ese ia dadaraia be do ia auka. Do ia hekwarahi bada, ena lalona amo ia kokia totona. Heduru gauna badana be, matamanai unai ura ia koua.”

Matamanai ita koua karana do ia haraga bema ita ese kara maoro ita lalokau henia bona kara kerere ita inai henia. (Salamo 37:27) To unai ita karaia noho, ita karaia hanaihanai be namo. Bema unai bamona ita karaia, Iehova ena heduru dainai iseda lalokau kara maoro dekenai bona iseda inai henia karana kara dika dekenai be do ia goada. To momokani, unai ita karaia lalonai, ita gima noho be gau badana, Iesu ese ia hadibaia hegeregerena, hanaihanai do ita guriguri Iehova ese hedibagani amo ita do ia hakaua bona Satani ena imana amo ita do ia hamauria.​—Mataio 6:13; 1 Tesalonika 5:17.

Bamodia Edia Lalo-Ani Karana Oi Dadaraia

Kara dika karaia totona ita ia veria gauna ma ta be bamodia edia lalo-ani karana. Matamata kekenina ta ia gwau: “Lau be mauri dala rua lau badinaia​—⁠ta be sikuli dekenai bona ta be ruma dekenai. Sikuli dekenai kahirakahira nega ibounai edia uduna idia kehoa neganai hereva dikadia idia gwauraia memero kekeni danu lau loaloa. Bona hari lau be idia hegeregerena ai lau lao. Dahaka do lau karaia be namo?” Namona be goada ia abia ia idau totona, bona unai goada abia dalana ta be Dirava idia badinaia hesiai taudia edia sivarai Baibel lalonai Iosepa bamona ia duahia bona laloa dobu. Haheitalai namodia ma haida be Daniela, Sataraka, Misaka, bona Abetenigo​—⁠idia be matamata tataudia hani bona mai edia goada ida edia bamodia amo idia idau.

Babulonia pavapavana ena ruma dekenai ma matamata tataudia haida danu idia hadibaia neganai, inai Israela matamata tataudia hani be “king ese ia ania gaudia be do idia ania.” Mose ena Taravatu ena aniani taravatudia idia ura lasi utua dainai, unai aniani idia dadaraia. Unai bamona idia karaia totona idia goada be namo​—bona unai be ia auka momokani badina toana be unai aniani, “king ese ia ania gaudia,” be namo herea. Unai tatau matamatadia ese haheitalai namona idia hahedinaraia hari inai negai idia noho Keristani taudia totona, inuinu kekero o drag bona kuku ania karana dekenai idia tohodia eiava doridia neganai!​—⁠Daniela 1:3-17.

Sataraka, Misaka, bona Abetenigo ese gabeai Iesu ese ia gwauraia herevana idia hamomokania: “Gau maragina ia karaia maoro tauna ese gau badadia do ia karaia maoro.” (Luka 16:10) Gau maragina, aniani, dekenai gari lasi karana idia hahedinaraia dainai, Iehova ese ia havaraia gauna namona ese idia ia hagoadaia gabeai hahetoho badana ai idia haheauka totona. (Daniela 1:18-20) Unai hahetoho badana be, idia hagania kaivakuku badana idia tomadiho henia, bema lasi lahi lalonai do idia mase. Mai gari lasi ida, unai matamata tataudia toi ese edia lalona idia hadaia Iehova sibona do idia tomadiho henia, bona Iehova idia abidadama henia momokani, herevana dahaka do ia vara. Iehova ese ma ia hanamodia lou edia abidadama bona gari lasi karana dainai​—unai nega ai lahi siahu hereana ena hururu lalonai idia negedia vareai neganai hoa dalanai ia gimadia.​—⁠Daniela 3:1-30.

Dirava ena Hereva lalonai kara dika idia dadaraia taudia ma haida edia haheitalai idia noho. Mose “ia ura lasi ia idia gwauraia Farao natuna hahine ena natuna,” ena be unai ese dala ia kehoa diba “kara dika ena moale, nega daudau lasi idia noho gaudia” Aigupito dekenai ia abia totona. (Heberu 11:24-26) Peroveta tauna Samuela ese lalo-ani monina ia abia lasi bona unai amo ena siahu gaukaralaia kerere karana ia dadaraia. (1 Samuela 12:3, 4) Iesu ena aposetolo taudia idia oda henia edia haroro gaukara idia hadokoa neganai, mai gari lasi ida idia gwau do idia karaia noho. (Kara 5:27-29) Iesu danu be mai goada ida kara dika ibounai ia dadaraia​—ena mauri ena dokonai danu “uaina bona muro idia mikisi” gauna be tuari taudia ese idia henia toho neganai. Unai nega dikana ai bema ia abia dae, ena lalona ia hamanokaia diba.​—Mareko 15:23; Mataio 4:1-10.

Kara Dika Dadaraia Karana ​—Mauri Ia Havaraia Diba

Iesu ia gwau: “Iduara maragina dekenai do umui raka vareai. Badina be [mase] ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.”​—Mataio 7:13, 14.

Momo ese dala badana idia ura henia badina ia latanai loaloa be auka lasi. Ia latanai idia loaloa taudia be auka lasi dalana idia ura henia, tauanina ena lalohadai bona dala idia ura henia, bona idia ura, do idia idau lasi, to Satani ena tanobada danu idia hegeregere. Idia laloa edia kara be Dirava ena taravatu bona ena hakaua herevadia ese idia koua. (Efeso 4:17-19) To, Iesu ia gwau ‘dala lababana be mase dekenai ia lao.’

To dahaka dainai Iesu ia gwau dala aukana dekenai idia raka taudia be momo lasi? Badina badana be haida sibona idia ura Dirava ena taravatu bona ena hakaua herevadia ese do idia biagudia bona durudia kara dika dekenai edia lalona idia veria gaudia bona daladia idia dadaraia totona. Ma danu, haida sibona idia hegeregere sihari kava urana, bamodia edia lalo-ani karana, bona idia abia hidi dalana dainai reana haida ese idia kirikirilaidia ena gari karana idia dadaraia.​—1 Petero 3:16; 4:4.

Unai taudia ese aposetolo Paulo ena hemami kara dika dadaraia totona ia karaia tuarina lalonai idia lalo-pararalaia. Hari inai tanobada hegeregerena, Roma bona Greek taudia edia negai, Paulo ia noho negana ai, kara dika bada karaia totona dala momo idia hedinarai. Paulo ia gwau ena lalona, kara namo ia diba gauna, be ena tauanina danu ia “tuari” noho, badina unai tauanina be kara dika karaia totona ia ia veria. (Roma 7:21-24) Oibe, Paulo ia diba ena tauanina be hesiai tauna namona to biaguna dikana, unai dainai ia hekwarahi tauanina ena ura ia dadaraia totona. Paulo ia gwau: “Lauegu tauanina lau botaia momokani.” (1 Korinto 9:27) Dahaka ese ia durua unai bamona ia karaia totona? Ia sibona ena goada lasi, ia be hegeregere lasi unai gaukara totona, to Dirava ena lauma ena heduru amo unai ia karaia diba.​—⁠Roma 8:9-11.

Unai dainai, Paulo, ena be kara dika tauna, to ia ese ena kara maoromaoro ia badinaia ela bona dokona. Kahirakahira ia mase neganai, inai bamona ia hereva diba: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni. Harihari lauegu kwalimu ahuna, kara maoromaoro ena davana namona, be lau dekenai ia noho hegaegae.”​—2 Timoteo 4:7, 8.

Iseda kara dika ita tuari henia lalonai, ita idia durua haheitalai namodia ita abia, Paulo ena kara sibona dekenai lasi, to ia dekenai haheitalai namona idia hahedinaraia taudia danu​—⁠Iosepa, Mose, Daniela, Sataraka, Misaka, Abetenigo, bona ma momo. Ena be idia be kara dika taudia, idia ta ta ese kara dika idia dadaraia, idia be lalo-auka taudia dainai lasi, to Iehova ena lauma dainai kara maoromaoro idia goadalaia. (Galatia 5:22, 23) Idia be lauma dalanai goada taudia. Idia be Iehova ena uduna amo idia mai herevadia idia ura henia. (Deuteronomi 8:3) Iena hereva be mauri gauna idia dekenai. (Deuteronomi 32:47) To gau badana be, Iehova idia lalokau henia bona gari henia, bona iena heduru dainai, mai haheauka ida kara dika inai henia karana idia habadaia.​—Salamo 97:10; Aonega Herevadia 1:7.

Namona be idia ita tohotohoa. Oibe, do ita haheauka noho kara dika iboudiai ita dadaraia totona, idia hegeregerena Iehova ena lauma ita abia be namo. Iehova be mai ena hariharibada ida ita dekenai ena lauma ia henia diba bema mai momokani ida unai totona ita guriguri, ena hereva ita stadilaia, bona hanaihanai Keristani heboudia dekenai ita lao.​—⁠Salamo 119:105; Luka 11:13; Heberu 10:24, 25.

Timothy, guna ita herevalaia merona, ia moale badina ia ese lauma gaudia ia laloaboio lasi. Timothy bona ena gaukara turana edia herevahereva ia kamonai hahinena be Timothy ia goeva dainai Timothy ia ura henia, bona gabeai ena tau ia noho lasi neganai ena ruma dekenai Timothy ia boiria. Timothy ese unai ia dadaraia. Unai ese ia koua lasi, Potifara ena hahine bamona, nega idauidau ai ia boiria loulou. Unai nega ta ta ai Timothy ia gini goada bona dala namona ai ena noinoi ia dadaraia. Dirava ena Hereva amo unai hahine ia haroro henia danu. Iehova ia tanikiu henia badina ia ese goada ia henia kara dika ia dadaraia totona, bona hari Timothy ia moale bada, badina Keristani hahine namona ta ia adavaia. Momokani, Iehova ese idia ura edia Keristani kara maoromaoro idia goadalaia bona kara dika idia dadaraia taudia dekenai ena hahenamo bona goada ia henia.​—Salamo 1:1-3.