Dirava amo Idia Mai Hunia Herevadia Bona Dirava Ena Ura
BEMA ta ia diba lasi ia be dahaka, vadaeni ia be gau ta; to bema ta ia diba ia be dahaka, vadaeni ia be gau ta lasi. Ia be dahaka? Ia be hehuni herevana ta.
Hari inai bisi bada negana lalonai, taunimanima idia laloa hunia herevadia be maragidia edia gadara ta, to The Interpreter’s Dictionary of the Bible ia gwau idaunegai hunia herevana (riddle) be “aonega tohoa gauna.”—Aonega Herevadia 1:5, 6 itaia.
Nega haida Iehova ese ena ura bona ena palani be ia gwauraia hedinarai goevagoeva lasi, to ia ura ena peroveta herevadia be hahegeregerea herevadia, “dibura herevadia,” eiava hunia hereva aukadia amo ia gwauraia. (Salamo 78:2, King James Version; Numera 12:8, The Emphasized Bible) Momokani, ena be hunia herevana ia hahedinaraia Heberu gado herevana be nega 17 sibona Baibel lalonai idia gaukaralaia, to Baibel be hunia herevadia bona aonega herevadia amo ia honu.
Baibel Ena Hunia Herevadia be Momo
King Solomona ena sivarai ese ia hahedinaraia ia dekenai idia henia henanadai aukadia, eiava hunia herevadia ibounai, ia haerelaia diba. (1 King Taudia 10:1) Unai be Dirava ia henia aonegana dainai ia karaia. Bema idaunega sivaraidia idia torea taudia edia hereva, Solomona be Turo ena King Hirama ida nega ta hunia hereva gadarana ta lalonai ia lusi herevana, be momokani, unai be dirava koikoidia ia tomadiho henia dainai Iehova ena lauma ia haboioa neganai ia vara. Hahemaoro Tauna Samson danu ese hunia herevadia ia ura henia bada. Nega ta ai, lauma helaga ese ia hasiahua dainai, hunia herevana ta amo Dirava ena inai taudia edia kudouna ia hagaria bada.—Gunalaia Taudia 14:12-19.
Baibel ena hunia herevadia momo be mai anina Dirava ena ura dekenai. Hegeregere, Genese 3:15 mani oi laloa. Unai peroveta herevana, Baibel ena hereva badana ia hahedinaraia herevana, danu be daradara gauna ta, ‘hunia herevana’ helagana ta. (Roma 16:25, 26) Aposetolo Paulo be matahanai idauidau bona hunia gaudia idia hahedinaraia herevadia momo ia abia, to Dirava ena palani ena kahana haida be ia “itaia goeva lasi,” eiava idia be idia “hunia” bamona. (1 Korinto 13:12; 2 Korinto 12:1-4) Bona taunimanima ese idia laloa momo dagedage gauna ena namba hehunina—“666”—Apokalupo 13:18 dekenai ia hedinarai haraga bona anina idia gwauraia hedinarai lasi gauna be edena bamona? Daika ese unai Dirava amo idia mai hunia herevadia edia anina ia diba, bona edia badina be dahaka?
Hunia Herevadia Edia Anina Ia Hahedinaraia
Ita momo dekenai, matana be gau badana iseda tauanina ena kahana ibounai huanai. To bema diari be lasi, iseda matana be anina lasi. Kahirakahira do ita matakepulu. Taunimanima edia harana danu be unai bamona. Ia ese gau rua ia hahegeregerea diba, idia vara gaudia edia badina ia laloa diba, bona unai dala ai hunia gaudia edia anina ia davaria diba. To, ma gau ta ita abia be namo hunia hereva helagadia edia anina ita diba totona. Ena be haida ese Baibel lalonai idia noho hunia herevadia edia anina idia gwauraia toho, to idia ia Torea Tauna, Iehova, diari ena Dirava, ese edia anina korikori ia hahedinaraia diba.—1 Ioane 1:5.
To madi, taunimanima be mai edia hekokoroku bona idia ura idia sibona ese gau idauidau idia karaia dainai, idia naria lasi ela bona Iehova ese haere ia henia. Hunia gaudia ese edia lalona idia veria dainai, haida be, hereva momokani lasi to taunimanima edia aonega idia tahua dainai, Dirava ena Hereva murimurinai haere idia tahua. Hegeregere, Iuda taudia edia hehuni karadia bona edia Cabala lalonai Heberu gado revarevadia bona namba be meamea dalanai idia lalohadailaia. Lagani 100 C.E. murinai, idia noho Gnostic taudia danu ese Heberu bona Greek Revarevadia idia gaukaralaia, hunia gaudia be idia amo idia abia totona.
To, unai bamona tahua karadia ese kaivakuku tomadiho henia karadia eiava babalau karadia dekenai idia ia hakaua lao bona Dirava ena hereva momokani amo idia daudau. Gnostic taudia idia laloa, ‘Bema tanobada be dika amo ia honu, vadaeni, ia Havaraia Tauna, Yahweh, be Dirava namona lasi.’ Unai be idia henia haere namona, a? Taunimanima edia lalohadai be dobu lasi! Unai dainai, ita hoa lasi aposetolo Paulo be Gnostic taudia edia orea ese idia habadaia hereva momokani idia negea taudia edia lalohadai ia hakoikoia neganai, mai goada ida ena revareva lalonai ia gwau: “Buka Helaga ena hereva do umui utua lasi”!—1 Korinto 4:6.
“Dibura Herevadia” Dekenai Diari Ia Hedinarai
To, dahaka dainai diari ena Dirava ese “dibura herevadia” ia gwauraia? Hunia herevadia ese ta ena lalona bona ena tahua karana ia gaukaralaia siahuna idia tohoa. Unai dainai, nega ta ta Baibel lalonai idia atoa be hegeregere aniani namona ta lalonai herahera gaudia idia atoa bamona, nega haida idia gaukaralaidia kamonai taudia edia lalona idia veria eiava unai sivarai idia hamauria totona. Unai negadia ai maoromaoro idia herevalaia murinai, edia anina idia gwauraia hedinarai.—Esekiela 17:1-18; Mataio 18:23-35.
Iehova ese aonega ia henia mai ena hariharibada ida to ia hahedinaraia kava lasi. (Iamesi 1:5-8) Mani Aonega Herevadia bukana oi laloa, ena hereva be Dirava ena lauma amo ia vara taunimanima idia hadaradaraia diba herevadia, bona haida idia gwau diba idia be hunia herevadia. Ita lalo-pararalaia totona namona be ita lalodia dobu bona nega bada ita atoa. To taunimanima hida be mai edia ura ida unai do idia karaia? Edia aonega be idia ura tahua taudia sibona dekenai ia hedinarai diba.—Aonega Herevadia 2:1-5.
Iesu danu ese parabole idauidau ia gaukaralaia ena hereva idia kamonai taudia edia kudouna ena toana ia hahedinaraia totona. Hutuma ese idia gegea. Iena sivarai idauidau idia ura henia. Iena hoa karadia idia ura henia bada. To, idia hida idia ura edia mauri dalana idia haidaua bona iena murinai idia raka totona? Idia be Iesu ena hahediba taudia amo idia idau, hanaihanai dala idia tahua Iesu ena hahediba herevadia edia anina idia diba totona bona sibodia idia henia iena murinai idia raka totona!—Mataio 13:10-23, 34, 35; 16:24; Ioane 16:25, 29.
Diari Idia Itaia
Buka ta ia gwau: “Hunia herevadia ura henia karana be diba idia laloa bada negadiai ia bada.” Hari ita be hahenamo badana ita abia, badina ita noholaia negana be lauma dalanai Dirava ese ena taunimanima dekenai “diari ia henia noho” negana. (Salamo 97:11; Daniela 12:4, 9) Ita ese mai haheauka ida ita naria diba Iehova ese ena nega korikori ai ena ura gaudia do ia hahedinaraia totona, a? Mai anina bada gauna be, karaharaga ita ura eda mauri ita haidaua bema ita itaia unai amo Dirava ese ena ura ia hahedinaraia dalana do ita badinaia namonamo, a? (Salamo 1:1-3; Iamesi 1:22-25) Bema unai ita karaia, Iehova ese eda hekwarahi do ia hanamoa, unai amo, mata-galasi ese ia itaia namonamo lasi matana ia durua hegeregerena, lauma helaga ese iseda lalona ena matana do ia durua Dirava ena ura ena toana ibounai do ita itaia namonamo diba, bena lauma dalanai do ita itaia namonamo.—1 Korinto 2:7, 9, 10.
Momokani, Baibel lalonai idia noho hehuni herevadia ese idia hamomokania Iehova be ‘hunia gaudia ia Hahedinaraia’ Tauna. (Daniela 2:28, 29) Danu, ia be taunimanima edia kudouna ia Tahua Tauna. (1 Sivarai 28:9) Dirava ese ena hereva momokani ia hahedinaraia dalana ia tubu noho be ita hoalaia lasi. (Aonega Herevadia 4:18; Roma 16:25, 26) Namo lasi Dirava ena dobu gaudia be babalau eiava taunimanima edia aonega maragi amo ita tahua, unai ese dika dekenai sibona ita do ia hakaua lao, to namona be Iehova dekenai mai abidadama ida ita tabekau ia ese ena “dibura herevadia” dekenai ena hereva momokani ena diari do ia hahedinaraia, unai amo nega korikori ai ena palani namo hereana be ena abidadama hesiai taudia dekenai do ia hahedinaraia.—Amosa 3:7; Mataio 24:25-27.
[Picture Credit Line on page 26]
Biblia Hebraica Stuttgartensia, Deutsche Bibelgesellschaft Stuttgart