“Tanobada Ena Diari” Herevalaia
1 Iehova be peroveta tauna Isaia amo ia gwau: “Dibura dekenai idia raka noho taudia ese, diari badana idia itaia vadaeni. Idia be dibura masemase tano dekenai idia noho, to hari be diari ese, idia ia hadiaria noho.” (Isa. 9:2) Unai “diari badana” be Dirava ena Natuna, Iesu Keriso ese ia karaia gaudia amo ita itaia. Tanobada ai ia karaia haroro gaukara bona ena mauri ia bouboulaia karana amo ita abia hahenamo ese lauma dalanai dibura dekenai idia noho taudia ia hamauridia. Unai bamona diari be hari inai dibura negana lalonai idia noho taudia ese idia abia be namo. Lohiabada ena Anibou negana be nega namona “tanobada ena diari” ita laloa totona. (Ioa. 8:12) Vanegai laganina ai, taunimanima milioni momo be Iesu ena hahegani idia badinaia karana amo edia abidadama idia hahedinaraia. Unai hahegani be inai: “Inai bamona do umui karaia, lau dekenai do umui laloa totona.” (Luka 22:19) Inai lagani ena Memorial hebouna ia kahirakahira dainai, edena dala ai ma haida do ita durua, Iehova ese ia hahedinaraia diari badana idia laloa bada totona?—Fili. 2:15.
2 Anibou Laloa Bada: Memorial negana be nega namona Iehova bona Iesu ese taunimanima totona idia henia mauri davalaia boubouna amo idia hahedinaraia lalokauna ita laloa dobu totona. (Ioa. 3:16; 2 Kor. 5:14, 15) Unai bamona ita karaia neganai, unai ese iseda kudouna do ia hamarerea unai dina badana ita laloa bada totona. Dirava ena taunimanima ibounai do idia ura nega idia atoa Memorial ena Baibel duahiduahi, Dina Iboudiai Buka Helaga Tahua ai idia noho gaudia, idia duahia bona idia laloa dobu. Iehova ena kara hereadaedia, ia henia boubou gauna ese ia hahedinaraia namo herea karadia unai, ita laloa neganai, unai ese ita ia hamoalea. Boubou gauna ena anina ita ta ta dekenai ita laloa dobu neganai, unai ese iseda kudouna ia hamarerea Dirava bona iena Natuna dekenai iseda lalokau ita habadaia, bona Dirava ena ura ita karaia goadagoada noho totona.—Gal. 2:20.
3 Bema Iehova ese ia hegaegaelaia hahemauri dalana ita laloa bada, Memorial dekenai ita hahedinaraia ura goadana ese Baibel stadi taudia, lou henia, varavara, dekena taudia, sikuli turadia, gaukara turadia, bona ita boiria taudia ma haida do ia hagoadaia. (Luka 6:45) Unai dainai, namona be ita hekwarahi unai bamona taudia ita boiridia bona idia dekenai Memorial ena boiboi pepadia ita henia diba idia laloaboio lasi totona. Ta ita laloaboio lasi totona, momo idia davaria Memorial dekenai hanaihanai idia boiria taudia edia lista idia karaia be dala namona ta, bona lagani ta ta ai ladana matamata ta be edia lista dekenai idia torea diba. Bona Iehova Dirava ena “hariharibada namo herea” dainai, iseda tanikiu ita hahedinaraia dalana namona ta be kamonai taudia ita boiria mai.—2 Kor. 9:15.
4 Haroro Gaukara Oi Habadaia: March bona April ai emu haroro gaukara oi habadaia diba, a? Bema ita hekwarahi ma haida dekenai Keriso ena sivarai namona ena diari ita halasia totona, Dirava ese ita do ia hanamoa. Lauma diarina ia henia Tauna Iehova, ia gwau: “Dibura dekena amo diari do ia hedinarai.” (2 Kor. 4:4-6) Bema namo, elda taudia ese nega bona gabu ma haida idia abia hidi diba, unai amo pablisa taudia idia durua diba edia haroro gaukara idia habadaia totona. Unai ena anina be daba ai dala gaukara umui karaia diba eiava adorahi ai bisinesi teritori bona telefon haroro umui karaia. Emu haroro gaukara oi habadaia totona, oi sibona totona tahua gauna ta oi atoa. Unai be hua ta lalonai hora hida do oi abia, bona oi gaukara goada unai oi hagugurua totona. Momo be heduru painia idia karaia neganai, idia hahedinaraia edia goada bona nega idia henia Iehova dekenai.—Kol. 3:23, 24.
5 Oi Heduru Painia Diba, A? Heduru painia ena hora idia haidaua neganai, lagani seven bamona idia hanaia vadaeni. Unai idia haidaua dainai dala ia kehoa momo ese heduru painia idia karaia totona. Oi tohoa vadaeni, a? Haida be lagani ta ta ai idia karaia. Kongrigeisen momo ai, pablisa momo be unai bamona gaukara idia karaia hebou, bona unai lagani ai kongrigeisen be ripoti namona ia abia. Dala oi karaia diba Memorial negana ai heduru painia oi karaia totona, a? April ena wikeni be faiv dainai, ia be hua namona ma haida ese heduru painia idia karaia totona.
6 Bema sekit naria tauna be March eiava April ena hua ai do ia vadivadi, unai be hahenamo ta. Badina vanegai ai hadibaia bamona, 2006 ena hesiai laganina lalonai, heduru painia idia karaia taudia ibounai be sekit tauna ena vadivadi purana ai idia karaia painia hebouna lalonai idia vareai diba. Unai hebou ai ia gwauraia hagoadaia hereva namodia ese heduru painia taudia momo do ia hagoadaia regula painia gaukara idia karaia totona.
7 Heduru painia taudia ese idia abia hora 50 oi laloa, bona sediual namona ta oi karaia, unai amo pura ta ta ai hora 12 lalonai hereva momokani ena diari oi hahedinaraia diba. Heduru painia idia karaia vadaeni taudia bona ma haida ida emu palani oi herevalaia. Unai ese idia ia hagoadaia diba oi idia bamoa totona. Bema bapatiso matamata eiava buruka pablisa taudia be palani namona idia karaia, do idia davaria unai gaukara idia karaia be auka lasi. Oi gurigurilaia. Bema hegeregere, palani oi karaia bona emu heduru painia gaukara oi moalelaia!—Mal. 3:10.
8 Ruma bese momo idia davaria bema idia hegaegae namonamo, edia ruma bese tauna ta be heduru painia ia karaia diba. Ruma bese ta be edia lalona idia hadaia idia faiv be heduru painia idia karaia totona. Idia do bapatiso lasi natudia rua be edia haroro gaukara idia habadaia danu. Unai bamona idia karaia dainai, dahaka hahenamo idia davaria? Idia gwau: “Unai be hua namona ta, bona ai mamia unai ese emai ruma bese ena hetura karana ia hagoadaia. Iehova ai tanikiu henia inai hahenamo namona dainai!”
9 March bona April ai ita karaia gaukara badana ese ita do ia hagoadaia, iseda guba Tamana Iehova kahirakahira ita lao totona, a? Oibe, bema ita ta ta ita hekwarahi Dirava bona iena Natuna dekenai iseda lalokau bona iseda haroro gaukara ita habadaia, anina namona do ita havaraia diba. Namona be iseda lalona ita hadaia Iehova ita hanamoa totona, salamo torea tauna ia karaia bamona, ia gwau: “Egu uduna dekena amo, Lohiabada do lau hanamoa. Taunimanima momo edia huanai, Lohiabada do lau hanamoa.” (Sal. 109:30) Inai Memorial negana ai Iehova ese iseda gaukara do ia hanamoa. Unai dainai namona be diari badana ita hahedinaraia noho, unai amo momo ita durua diba dibura amo idia raka-lasi totona, unai amo ‘mauri ena diari do idia abia.’—Ioa. 8:12.
[Study Questions]
1. Baibel ese edena diari badana ia perovetalaia, bona edena hebou ese unai ia hahedinaraia namo herea?
2. Edena dala ai boubou gauna ita laloa bada diba, bona unai bamona ita karaia neganai, dahaka anina namona do ia havaraia?
3. Edena bamona ita hahedinaraia Memorial negana ita laloa bada?
4. March bona April ai dahaka ese ita ia durua diba iseda haroro gaukara ita habadaia totona?
5. Heduru painia gaukara ena hora idia hamaragia dainai, edena dala ai momo be namo idia davaria?
6. Dahaka heduru gaudia be hari idia noho?
7, 8. (a) Heduru painia ena sediual namona ita karaia totona, dahaka ese ita do ia durua? (b) Edena dala ai ruma bese idia gaukara hebou neganai, heduru do idia abia, bona bese ibounai be edena dala ai namo idia abia diba?
9. Memorial negana ai edena dala ai iseda diari do ita hahedinaraia?