Iehova Ena Ura Idia Karaia

Maria ese “Gau Namona Ia Abia Hidi”

IESU ena nega lalonai, Iuda hahinedia be rabi taudia edia taravatu ese ia koudia. Unai dainai, idia ese Taravatu idia stadilaia diba lasi. Mishnah lalonai idia torea lalohadaina ta ia gwau: “Bema tau ta ese ena natuna kekeni dekenai Taravatu ia hadibaia unai be hegeregere ena natuna dekenai matabodaga karana ia hadibaia.”​—Sotah 3:4.

Unai dainai, aposetolo edia nega ai idia noho Iuda hahinedia momo ese edukeisen idia abia lasi. The Anchor Bible Dictionary ia gwau: “Gau ta ese ia hahedinaraia lasi Iesu ese ena haroro gaukara ia do hamatamaia lasi neganai, Iuda hahinedia be gwau maoro idia abia lasi hadibaia tauna badana ta ena hahediba taudia ai idia lao totona, bona unai bamona hadibaia tauna danu idia loaloa lasi, eiava ma haida idia hadibaia diba lasi, to natudia sibona.” Hahine hamaragia karana habadaia totona, tomadiho gunalaia taudia haida ese taravatu ta idia atoa idia gwau taunimanima vairadiai tau ta ese hahine ta do ia hereva henia lasi!

Iesu ese unai bamona Dirava badinaia lasi karadia ia dadaraia. Ia ese hahine bona tatau ia hadibaia, bona ia murinai idia raka taudia huanai tatau bona hahine idia noho. (Luka 8:​1-3) Nega ta, Mareta bona Maria ese edia ruma dekenai Iesu idia boiria. (Luka 10:38) Unai hahine rua be Lasaro ena taihudia, bona idia ibounai toi be Iesu ena hahediba taudia bona ena turana namodia. (Ioane 11:5) Reana unai ruma bese be mai ena ladana bada, badina Lasaro ia mase neganai taunimanima momo herea idia mai Mareta bona Maria idia hagoadaia totona. Unai be herevana, to Iesu be edia ruma dekenai idia abia dae neganai ia vara gauna ese mai anina bada gauna ta ia hadibaia idia dekenai sibona lasi, to ita dekenai danu.

Iesu Ena Aena Badinai Diba Ia Abia

Ita diba momokani, Mareta bona Maria be idia ura dikadika aria namona momokani idia henia Iesu dekenai, bona edia moni be ia hegeregere. (Ioane 12:​1-3 itaia.) To, edia vadivadi tauna ia ginidae neganai, Maria be “Lohiabada ena aena badinai ia helai, iena hadibaia hereva ia kamonaia.” (Luka 10:39) Taunimanima edia taravatu ta ese Iesu ia koua diba lasi, bena ia ura diba ia abia lalo-momokani hahinena ia hadibaia! Ita laloa diba Maria be Iesu ena vairanai ia helai, mai ena ura bada ida Hadibaia Tauna ena hereva ia kamonai namonamo stiuden ta bamona.—Mani Deuteronomi 33:3; Kara 22:3 itaia.

Maria amo Mareta be idau, ia “be vadivadi taudia abia dae karadia dekenai ia hekwarahi.” Aria badana ia hegaegaelaia totona, ena gaukara be momo dainai ia bisi bada. Nega sisina murinai, Mareta ia lalohisihisi badina ia sibona ia hekwarahi gaukara ibounai ia karaia totona, to ena tadina be Iesu ena aena badinai ia helai noho! Unai dainai Mareta ese Iesu ena hereva Maria dekenai ia utua, reana kara haraga ia karaia, ia gwau: “Lohiabada e, oi be laloa lasi, egu tadina ese lau ia rakatania, vadaeni lau sibona lau hekwarahi, a? Mani oi hamaoroa, do ia durua lau.”​—Luka 10:40.

Mareta ena hereva be kerere lasi. Momokani, taunimanima momo edia aniani nadua be gaukara badana, bona unai maduna be ta sibona ese ia huaia be namo lasi. To, Iesu ese Mareta ena hereva ia gaukaralaia, mai anina bada gauna ta ia hahedinaraia totona. Ia gwau: “Mareta e, Mareta e, gau momo totona oi laloa momo bona oi hekwarahi, to gau tamona sibona be ia bada herea. Maria ese inai gau namona ia abia hidi, bona ia dekena amo do ita kokia lasi.”​—Luka 10:41, 42.

Iesu ia gwau lasi Mareta be lauma gaudia ia ura henia lasi. Lasi, to Iesu ia diba Mareta be Dirava badinaia momokani hahinena ta.a Unai dainai ena ruma dekenai Iesu ia boiria. To, mai manau danu ia henia sisibana lalonai, Iesu ese ia hahedinaraia, Mareta be ia ura dikadika aniani ia hegaegaelaia dainai, ia ese taunimanima ta ta sibona dekenai ia vara gauna, Dirava ena Natuna amo hahediba abia karana, ia reaia.

Momokani, unai nega ena mauri dalana hegeregerena hahine ta be hahine namona bema ena ruma gaukara ia karaia namonamo. To Iesu ena hereva ese ia hahedinaraia, tatau hegeregerena, hahine danu be Dirava ena Natuna ena aena badinai idia helai diba bona mauri ena sivarai idia kamonai! (Ioane 4:​7-​15; Kara 5:​14) Unai dainai, Mareta ese aniani haida sibona​—⁠eiava tamona​—⁠ia hegaegaelaia be namo bena ia danu Biaguna ena aena badinai ia helai bona ia amo diba ia abia diba.​—⁠Mataio 6:​25 itaia.

Ita Dibaia Gauna

Hari, tatau bona hahine ese Iesu ia henia ‘davana lasi mauri ranuna’ idia abia dae. (Apokalupo 22:17) Lalokau ese ia doridia dainai, haida​—Mareta bamona​—idia hekwarahi bada edia abidadama tamona taudia idia durua totona. Idia be gaukara karaia namonamo taudia bona gaukara idia abia neganai idia karaia haraga, bona Iehova ia gwauhamata mai lalokau ida idia hekwarahi dainai davana do ia henidia. (Heberu 6:​10; 13:16) Haida be reana Maria hegeregerena. Idia be manau bona idia ura lauma gaudia idia laloa namonamo. Mai edia ura ida Dirava ena Hereva idia laloa dobu karana ese ia durudia abidadama dekenai idia gini goada totona.​—Efeso 3:​17-​19.

Keristani kongregesen dekenai unai bamona kara rua idia hahedinaraia taudia be mai anina bada. To, namona be ibounai ese ‘gau namona idia abia hidi’ bona edia mauri lalonai lauma gaudia idia laloa bada. Anina bada gaudia ita diba neganai, ita ese Iehova ena lalo-namo bona hahenamo do ita abia diba.​—⁠Filipi 1:​9-11.

[Footnote]