Gorere Hanamoa Karadia

Anina: Tauanina goreredia, kwara goreredia, eiava lauma goreredia hanamoa karadia. Dirava ena lauma ese Heberu peroveta taudia haida bona Iesu Keriso bona Keristen kongregesen taudia ginigunadia haida danu ia hasiahudia, hoa dalana amo gorere taudia do idia hamauridia totona.

Hari inai negai hoa dalana amo taunimanima edia gorere hanamoa karadia be Dirava ena lauma amo idia karaia, a?

Hoa karadia karaia siahuna be Dirava korikori mo sibona ena amo ia mai, eiava ma ta ena amo ia mai diba danu, a?

Mose bona Aaron be Aigupito ena Farao idia noia ia ese Israel taudia do ia ruhadia, tano gagaena dekenai boubou gaudia Iehova dekenai do idia karaia totona. Mose ese ia hagania neganai, Aaron ese ena itotohi ia negea diho tano dekenai bena gaigai badana ai ia lao, unai amo idia hahedinaraia Dirava ese ia durudia. Dirava ena siahu amo unai hoa karana idia karaia. To Aigupito ena meamea taudia danu ese edia itotohi idia negedia diho tano dekenai, bena idia danu be gaigai badadia ai idia lao. (Eso. 7⁠:​8-12) Daika ena siahu amo edia hoa karana idia karaia?​—⁠Deuteronomi 18⁠:​10-12 itaia.

Iseda nega lalonai, Kerisendom ena haroro taudia haida ese hebou idia karaia, abidadama amo gorere taudia hamauridia totona. Keristen lasi tomadiho oreadia lalodiai, meamea taudia, babalau taudia, bona ma haida ese gorere hanamoa karadia idia karaia; nega momo mea bona babalau gaudia idia gaukaralaia. Idia haida idia gwau edia hahemauri karadia be tomadiho karadia lasi. Unai taudia idauidau edia hahemauri siahuna be Dirava korikori ena amo idia abia, a?

Mat. 24:24: “Keriso koikoi taudia bona peroveta koikoi taudia do idia toreisi, toa bona hoa gaudia do idia hedinaraia. Inai bamona do idia karaia, Dirava ia abia hidi taudia do idia hakaua kerere totona, bema mai dalana.”

Mat. 7:​15-23: “Umui naria namonamo, peroveta koikoi taudia garina. . . . Unai dina ia ginidae neganai taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ”

Hari inai negai hoa dalana amo gorere taudia hamauridia karadia be Iesu bona ena hahediba taudia ginigunadia ese idia karaia karadia hegeregeredia, a?

Edia kara ena davana: “Gorere taudia do umui hanamoa, mase taudia do umui hatorea isi, lepera taudia do umui hagoevaia, lauma dikadia do umui lulua murimuri dekenai. Gau momo umui abia vadaeni, davana lasi. Unai dainai gau momo do umui henia, davana lasi.” (Mat. 10⁠:⁠8) (Hari inai negai gorere taudia idia hamauridia taudia be Iesu ena hahegani bamona idia hamauridia davana lasi, a?)

Hida idia hanamodia: “Taunimanima ibounai idia ura ia dekenai edia imana idia atoa, badina siahu be ia dekena amo ia mai, ibounai ia ese ia hanamoa.” (Luka 6⁠:19) “Gorere taudia danu idia huaia lao, dala dekenai idia atodia diho geda bona patapata latanai, Petero ia raka hanai neganai iena laulau be dohore idia dekenai ia kau totona. Ierusalema kahirakahira hanua taudia hutuma danu idia haboua. Idia ese gorere taudia bona mai lauma dika taudia idia abia lao, bona ibounai mauri idia abia.” (Kara 5⁠:​15, 16) (Hari inai negai, hoa dalana amo idia hanamodia toho taudia dekenai idia lao taudia bona tomadiho gabudia helagadia dekenai idia lao taudia, iboudiai idia namo vadaeni, a?)

“Gorere hanamoa taudia” edia orea taudia edia mauri dalana ese ia hahedinaraia Dirava ena lauma idia abia, a?

Unai orea taudia ese lauma ena huahua​—⁠lalokau, haheauka, manau, bona tauanina ena ura koua karana​—⁠idia hahedinaraia bada, a?​—⁠Gal. 5:​22, 23.

“Idia be tanobada ena lasi” dainai tanobada ena politikol karadia iboudiai amo idia siri, a? Tuari neganai taunimanima edia rara amo idia goeva, a? Idia be mai edia ladana namona badina inai tanobada ena miro karadia amo idia siri, a?​—⁠Ioane 17:16; Isa. 2:4; 1 Tes. 4:​3-8.

Hari inai negai, hoa dalana amo gorere taudia hamauridia karana be Keristen korikori taudia edia toana ta, a?

Ioane 13:35: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Iesu ena hereva unai. Bema ita abidadama henia, Keristen dalana korikorina ena toana do ita tahua neganai, lalokau do ita tahua, hoa dalana amo gorere hanamoa karana do ita tahua lasi.)

Kara 1:8: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai . . . tanobada ena kahana ibounai.” (Iesu be guba dekenai ia lou lao totona ena aposetolo ia rakatanidia gwauraia neganai, ia hamaorodia unai gaukara do idia karaia be gau badana, hoa dalana amo gorere taudia hamauridia karana ia gwauraia lasi. Mataio 24⁠:14; 28⁠:​19, 20 itaia danu.)

1 Kor. 12:​28-30: “Iena ekalesia lalonai Dirava ese ibounai edia gabu ta ta ia henia vadaeni, inai bamona: Ginigunadia be aposetolo taudia, iharuadia be peroveta taudia, ihatoidia be hereva hadibaia taudia. Idia murinai be hoa kara karaia taudia. Ma idia murinai be gorere idia hanamoa diba taudia, bona durua taudia, taunimanima hakaua taudia, bona idau momokani gadodia idia hereva diba taudia. Ibounai be aposetolo taudia, a? Ibounai be peroveta taudia, a? Ibounai be hereva hadibaia taudia, a? Ibounai be hoa kara idia karaia taudia, a? Ibounai be gorere idia hanamoa diba, a?” (Baibel ese ia hahedinaraia Keristen korikori taudia haida mo ese gorere hanamoa siahuna idia abia.)

Mareko 16⁠:​17, 18 ese ia hahedinaraia, abidadama taudia edia toana ta be, gorere taudia do idia hamauridia diba, ani?

Mar. 16:​17, 18: “Abidadama taudia ese inai hoa karadia do idia karaia, lauegu ladanai lauma dikadia do idia lulua oho, gado matamata idauidau do idia hereva. Gaigai do idia abia isi, bema mase muramura idia inua kerere neganai, do ia hadikadia lasi, edia imadia gorere taudia latanai idia atoa neganai, gorere do ia ore.”

Unai siri be lagani 400 C.E. murinai idia torea revarevadia lalodiai idia noho. To Greek revarevadia ginigunadia, Sinaiticus bona Vatican MS. 1209, lagani 400 C.E. vairanai idia torea hanai gaudia, lalodiai idia noho lasi. Doketa B. F. Westcott, Baibel revarevadia ia diba momo tauna, ia gwau, “Unai siri . . . be matamana neganai idia torea sivaraina ena kahana ta lasi, to idia be gabeai idia torea kau gaudia.” (An Introduction to the Study of the Gospels, London, 1881, p. 338) Baibel be Roma gado dekenai ia hahanaia tauna, Jerome, be lagani 400 C.E. murinai ia gwau, “Unai siri be Greek revarevadia kahirakahira iboudiai lalodiai idia noho lasi.” (The Last Twelve Verses of the Gospel According to S. Mark, London, 1871, J. W. Burgon, p. 53) New Catholic Encyclopedia (1967) ia gwau: “[Mr 16 Siri 9-20] ena hereva bona ena mamina be idau vaitani, unai Evanelia bukana orena ena hegeregerena lasi, unai dainai ai laloa Mareko ese ia torea lasi.” (Vol. IX, p. 240) Keristen taudia ginigunadia ese edia abidadama hamomokania totona mase muramurana idia inua eiava gaigai dikadia idia abia isi sivaraina ta be lasi.

Dahaka dainai Dirava ese Keristen taudia ginigunadia siahu ia henidia, hoa dalana amo gorere taudia do idia hamauridia totona?

Heb. 2:​3, 4: “Edena bamona ita mauri diba bema Lohiabada ena hahemauri ita negea neganai? Lohiabada sibona ese inai hahemauri ia gwauraia, bona inai hereva idia kamonai taudia ese ita dekenai idia gwauraia gauna be ita diba ia momokani. Dirava ese danu hoa bona toa karadia dekena amo inai hahemauri ia hamomokania. Ia ese siahu karadia idauidau ia hedinaraia, bona Lauma Helaga ena harihari gaudia abidadama taudia dekenai Dirava ese ia henidia, iena ura hegeregerena.” (Unai ese ia hamomokania Keristen ekalesiana matamatana be Dirava ena orea. To ia gini goada vadaeni neganai, unai ia hamomokania loulou be anina lasi, ani?)

1 Kor. 12:​29, 30; 13:​8, 13: “Ibounai be peroveta taudia, a? . . . Ibounai be gorere idia hanamoa diba, a? Ibounai be idau momokani gadodia idia hereva diba, a? . . . Lalokau be do ia doko lasi. Peroveta hereva be do idia ore. Idau momokani gadodia danu do idia doko. . . . Vadaeni, inai gau toi idia noho hanaihanai: abidadama, bona Dirava ena nega namona naria noho kara, bona lalokau. To namo herea momokani gauna be lalokau.” (Unai hoa karadia ese edia anina idia havaraia vadaeni neganai, idia doko. To kara hereadaedia, Dirava ena lauma ena huahua unai, be Keristen korikori taudia edia mauri lalonai idia hedinarai noho.)

Gorere tauna bema idia hanamoa lou, edena dala amo idia hanamoa be herevana, a?

2 Tes. 2:​9, 10: “Satani ena siahu dekena amo unai Tau Dikana be do ia mai, vadaeni hoa bona toa karadia idauidau momo dekena amo ia ese taunimanima momo do ia hakaua kerere. Ia ese kara kerere bada dekena amo mase dalana dekenai idia raka noho taudia do ia koidia. Inai taudia bema hereva momokani idia abia dae bona lalokau henia neganai, Dirava do ia hamauridia, to idia ura lasi.”

Luka 9:​24, 25: “Ena mauri ia dogoatao tauna be ena mauri do ia abia lasi, to lau totona iena mauri do ia negea tauna be ena mauri do ia abia. Tau ta tanobada ibounai do ia abia, to sibona ena mauri do ia halusia, iena namo be dahaka?”

Nega vairai gorere iboudiai do idia ore, a?

Apok. 21:​1-4: “Guba matamatana bona tanobada matamatana lau itaia. Badina be guba gunana bona tanobada gunana be idia lao ore vadaeni. . . . ‘[Dirava] ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ ”

Isa. 25:8: “Ia ese mase baine ha-orea ela bona hanaihanai; Ḡaubada Iehova ese irurumata na vaira iboudiai amo baine dahu oho.” (Apokalupo 22⁠:​1, 2 danu)

Isa. 33:24: “Hanua tauna ta basineto ‘E goreregumu’.”

Bema Ta Ia Gwau​—⁠

‘Oi laloa gorere taudia be abidadama amo idia hamauridia diba, a?’

Reana inai bamona oi haere henia diba: ‘Bema ta ia gwau Dirava be siahu lasi gorere taudia do ia hamauridia, ia ese Baibel ia abia dae lasi. To lau laloa momo gauna be inai: Hari inai negai, taunimanima ese gorere hanamoa karana be dala maorona ai idia karaia, eiava?’ Bena reana ma oi gwau: (1) ‘Lau ura Baibel ena siri ta lau duahia hedinarai oi dekenai. Mani lau duahia neganai oi laloa, edena kara ia gwauraia, hari inai negai idia karaia lasi karana unai. (Mat. 10⁠:​7, 8) . . . Iesu ia gwau iena hahediba taudia ese edena kara idia karaia diba, unai kara be gorere hanamoa taudia hari inai negai ese idia karaia diba lasi? (Mase taudia idia hatoredia isi lou diba lasi.)’ (2) ‘Ai ese taunimanima ai hahemaoro henidia lasi, to namona be Mataio 24⁠:24 ese ia gwauraia gauna dekenai ita naria namonamo.’

Eiava inai bamona oi hereva diba: ‘Baibel ena hereva gorere hanamoa karana dekenai lau abia dae momokani. To hari inai negai gorere hanamoa karana ena namo be ia noho daudau lasi, ani? Gabeai ita ibounai do ita mase, ani? Nega ta do ia mai, taunimanima iboudiai do idia goada, do idia gorere lasi, bona do idia mase lasi, a? (Apok. 21⁠:​3, 4)’