Egu Haroro Gaukara be Hegeregere Eiava?
1. Tadikaka taihu haida be reana dahaka lalohadai idia abia?
1 Nega ta unai bamona oi henanadai, a? Reana haroro gaukara oi karaia lasi badina oi buruka, gorere o ruma bese maduna ia bada bona oi lalomanoka. Taihu ta ena natuna be toi, bona ia gwau, nega haida ia lalohisihisi badina haroro gaukara ia karaia momo lasi to ena taim bona goada ibounai ia henia ena ruma bese ia naria totona. Dahaka ese ita do ia durua lalohadai maorona ita abia totona?
2. Iehova ena ura ita dekenai be dahaka?
2 Iehova Ena Ura: Ita ibounai ita ura haroro gaukara do ita habadaia. To, ita ura do ita karaia karana be idau bona ita karaia diba karana be ma idau. Ita ura kara ta do ita karaia badabada, anina be iseda gaukara ita laloa bada. Namona be ita laloatao, Iehova be iseda goada ena hetoana ia diba, bona iseda goada hegeregerena ita karaia gaukara ia laloa bada. (Sal. 103:13, 14) Iehova ena ura ita dekenai be dahaka? Ia ura mai iseda lalona ibounai ida haroro gaukara ita karaia.—Kol. 3:23.
3. Edena dala ai iseda goada haroro gaukara dekenai ita lalopararalaia diba?
3 Dahaka ese ita do ia durua ita karaia diba karana ita lalopararalaia totona? Iehova Dirava ita noia diba iseda noho dalana ita lalopararalaia namonamo totona. (Sal. 26:2) Eiava oi abidadama henia tauna, lo Keristani tauna, o oi do ia durua namonamo turana ta ida unai umui herevalaia. (Aon. 27:9) Oi laloatao danu, noho daladia be idia idauidau dainai, nega ibounai iseda noho dalana ita sekea be namo.—Efe. 5:10.
4. Kongrigeisen heboudia bona iseda buka edia hadibaia hereva be edena bamona ita laloa?
4 Hadibaia Herevadia Laloa Dalana: Nega momo heau helulu idia itaia taudia idia boiboi bona heau helulu taudia idia hagoadaia. Idia boiboi heau helulu taudia idia lusi totona lasi, to idia hagoadaia idia kwalimu totona. Unai hegeregerena, kongrigeisen heboudia bona iseda buka dekena amo sisiba bona hadibaia herevadia idia henia, ita hamanokaia totona lasi to ‘Sivarai Namona ita harorolaia goadagoada’ totona. (2 Tim. 4:2) Ita diba momokani, herevana ita be gaukara badana o maragina ita karaia, to Iehova be eda ‘gaukara bona lalokau’ karana ia laloatao bona ia moalelaia.—Heb. 6:10.