“Basileia Harorolaia Taudia” be Sinavai Momo Tanona ai Idia Haroro—Guyana

GUYANA.a Unai be America ena Indian taudia edia hereva ta, ena anina be “ranu momo tanona.” Unai hereva ese unai tano ena toana ia gwauraia maoro. South America dekenai, unai tano taudia sibodia be English gado ai idia hereva. Sinavai badadia bona maragidia be unai tano dekenai, idia be Guiana Highlands amo gageva daladia amo idia diho, siahu to medu bada uda gabuna idia hanaia bena idia aru lao Atlantic Davara dekenai. Unai sinavai be hanua bona uma momo idia hamauridia.

Iehova ena Witness taudia Guyana dekenai idia diba Iesu ia peroveta inai bamona, “Basileia ena Sivarai Namona be tanobada ibounai dekenai do idia harorolaia,” ena anina be sinavai badinai idia noho taudia dekenai unai sivarai namona do idia harorolaia danu. (Mataio 24:14) Unai dainai, lagani momo lalodiai, Witness haida, idia momo be pioneer taudia, ese bouti badadia bona maragidia idia gaukaralaidia, bona Guyana ena ranu daladia momo dekenai idia lao taunimanima dekenai sivarai namona idia laohaia totona.

Unai gaukara idia durua totona, Guyana ena Watch Tower Society ese au amo idia karaia bouti ima idia gaukaralaidia, edia ladadia be Basileia Harorolaia Gauna Namba 1, 2, 3, 4, bona 5. Unai au amo idia karaia bouti edia lata be mita seven, bona edia kununa toana be V bamona; idia gwauraidia balahoo, bona Witness bese ta ese idia karadia bona idia naridia. Mai lalokau ida unai gabu ena Witness taudia ese unai bouti idia gwauraidia Harorolaia Gaudia, bona idia karaia bouti ginigunadia rua be lagani momo idia gaukaralaidia murinai idia rakatanidia. To namba 3, 4, bona 5 gaudia be Pomeroon, Mahaica, bona Demerara sinavaidia dekenai idia do gaukaralaidia noho.

Demerara Dekenai

Britain bona Europe gabudia haida dekenai, unai hereva “demerara” idia gwauraia neganai, reana suga nadina ta idia laloa, ena kala be golo bona korema sisina bamona, unai tohu be Demerara ena kopukopu bona miri gabudia ai ia tubu. Sinavai ena west kahana ai, tohu umadia edia dokona ai, kone amo ia mai dalana ia doko danu. Unai gabu idia hanaia totona, Witness taudia be Basileia Harorolaia bouti idia gaukaralaidia sinavai badinai idia noho taudia​—Hindu, Muslim, bona sibodia idia gwauraidia Keristen taudia​—dekenai Iehova ena Basileia ena sivarai namona idia mailaia totona.

Haroro nega ena daudau Demerara dekenai be nega haida dina tamona bona nega haida wiki momo lalodiai idia karaia, bouti diho gabuna ta amo idia lao bouti diho gabuna ma ta ai, daba amo ia lao adorahi. Dina bona hanuaboi tamona idia lao neganai, pioneer taudia be bouti dekenai idia nadunadu bona idia aniani sibona lasi, to unuseniai idia mahuta danu. Dina ia diho neganai, Harorolaia Gauna be hagwa au dekenai idia kwatua eiava bema bouti diho gabuna ta ia noho unai badinai idia atoa. Edia lata be mita rua bona mai kahana au rua be bouti ena vairana bona gabena latanai idia haginidia. Varo ta be unai au rua dekenai idia kwatua, bona hetaru ta idia atoa, guhi bamona. Au reireidia be edia bedi, bona ia latanai bilankesi bona dabua idia atoa be geda bamona. To herevana, dina ena gaukara bada herea murinai idia mahuta haraga diba.

Pioneer taudia idia henanadai henidia, “Kopukopu ranuna dekenai umui digu, a?”

Idia haere: “Bema ai be ma dala ta, unuseniai ai digu lasi! Ranu ia goeva sinavaina ta ai davaria neganai, aiemai ranu urodia ai hahonudia, bona unai ranu ai gaukaralaia ai nadunadu, ai inua, bona ai digudigu totona.”

Edia haheauka dainai ekspiriens namodia momo idia davaria. Nega ta, tau ta be bouti diho gabuna ai ia gini, ena aena huanai be mai padana, imadia be koekoe dekenai ia atoa, bona ai karaia gaudia ia itaia namonamo. “Basileia Harorolaia Gauna Namba 5!” Bouti ena vairana dekenai ladana ia duahia. “Sedira umui be Iehova ena Witness taudia. Umui sibodia be unai dala dekenai unai hereva ‘basileia’ umui gaukaralaia. Umui be mai emui Kingdom Hall bona hari danu mai emui Basileia Harorolaia Gauna.”

Gilead amo Ia Lao Pomeroon Dekenai

Frederick McAlman ia laloatao Pomeroon Sinavaina dekenai gaukara ena toana be idau. Watch Tower Bible School of Gilead be 1970 ai ia haorea, bena lagani tamona murinai ia mai Charity dekenai, unai be Pomeroon ena mairiveina kahana ai, sinavai amo uda dekenai ia vareai kilomita 34 hanuana ta, unuseniai be Basileia harorolaia taudia ima idia noho.

Tadikaka McAlman ia sivarailaia, ia gwau: “Lagani ima lalodiai, ai ‘moale’ Harorolaia Gauna Namba 2 be Pomeroon dekenai ai bara dainai, ela bona 6 horsepower outboard motor gunana ta ai hoia. Aru ia heau bamona ai bara lao, bona sinavai ena mairiveina kahana dekenai ai haroro ela bona Hackney dekenai ai ginidae, unai be sinavai ena uduna amo kilomita 11 ia noho. Unuseniai, Taihu DeCambra ena ruma dekenai hanuaboi tamona ai mahuta namo; unai taihu be unai gabu dekenai idia mara hahinedia ia durudia. Dabai, ma ai lao noho ela bona sinavai ena uduna dekenai, bena sinavai ena west kahanai ai hanai. Bena ai gaukara noho kilomita 34 ia lao ela bona Charity dekenai ai giroa lou.”

Lagani ten lalodiai unai 6 horsepower motor idia gaukaralaia namo. Bena 1986 lalonai, 15 horsepower gau matamatana idia hoia. Lagani 21 lalodiai Pomeroon dekenai ia hesiai mai abidadama ida, bona Tadikaka McAlman be iena gaukara ena anina ia itaia diba; Charity dekenai be Kingdom Hall matamatana ta idia haginia, bona sinavai ena atai bona ena diho kahana amo kongregesen pablisa taudia 43 be unuseniai idia hebou. Hebou dekenai idia mai hanaihanai taudia edia namba be 60 ia hanaia, bona Iesu Keriso ena mase ena 1992 Anibou dekenai, taunimanima hutuma bada 190 idia mai!

“Gima Kohorona Tauna” Idia Tahua

Monday be maketi dinana Charity dekenai. Unai dainai ia be nega namona sivarai namona harorolaia totona, bona Witness taudia idia noho mai edia Gima Kohorona bona Noga! magasin. Lagani 1970 murinai, Monica Fitzallen be Moruka sinavai ena Warimuri hanua amo ia mai maketi dekenai bona Tadikaka McAlman amo magasin rua ia abidia. To ruma dekenai ia giroa neganai, iena dabua maua ena henuna dekenai ia atodia.

Monica ia gwau: “Unuseniai lagani rua idia noho bona lau duahidia lasi. Murinai lau gorere bona nega daudau lalonai bedi dekenai lau noho. Lauegu gorere ia namo sisina neganai, lau be ruma lalonai duahiduahi gaudia iboudiai lau tahua badina ma gau ta lau karaia diba lasi. Gabeai, lau laloatao dabua maua lalonai be magasin rua bona lau tahudia.” Maoromaoro ia laloa idia dekenai hereva momokani ia noho.

Monica ena gorere ia ore neganai, iena adavana, Eugene, ia noia Pomeroon dekenai gaukara ia tahua bona unai amo ia dekenai magasin ia henia tauna do ia davaria diba. Eugene be unai bamona ia karaia, to Pomeroon dekenai ia noho uma ta dekenai wiki tamona sibona, Monday ia lao Saturday dina tubua, ena gaukara ia davaria.

Unai Saturday ia mai neganai, Monica be ia dekenai magasin ia henia tauna ia do davaria lasi. Dina tubua bamona, iena adavana ia nanadaia bema sinavai ena aru ia hegeregere Charity dekenai idia bara lao “Gima Kohorona tauna” idia tahua totona. Ia hereva hadokoa neganai, dala dekenai ta ia raka ena rege ia kamonai, bona mai vairana ia moale taihuna ta ia mai magasin matamatadia ia henidia toho totona.

Monica ia henanadai, “Umui be Gima Kohorona taudia ta, a?” Ia be henanadai momo dainai unai taihu ia giroa bouti dekenai heduru ia abia totona. Durua tauna be daika? Unai be Tadikaka McAlman sibona!

Revareva amo Baibel stadi karaia dalana idia hegaegaelaia. Nega sisina murinai, Monica be Anglican Dubuna dekenai dubu amo ia doko revareva ta ia siaia. Pris tauna be ia haere neganai, ia torea, ia gwau: “JW taudia oi kamonai henidia lasi. Edia diba Baibel dekenai be bada lasi. Do lau mai oi danu unai kara ita herevalaia hebou totona.” Ema bona hari, unai pris ia mai lasi. Unai negana lalonai, Monica be 1975 ai bapatiso ia abia. Lagani tamona murinai, iena tau, mai lalokau danu tadikakadia ese idia gwauraia Uncle Eugene, be Baibel ia tahua namonamo murinai, bapatiso ia abia. (Kara 17:​10, 11) Ena be kongregesen be sisina daudau, Charity dekenai, hora 12 vanagi dekenai idia mai, to ema bona hari idia be Basileia harorolaia pablisa taudia goadadia.

Misinari Taudia be Daudau Gabudia ai Idia Lao

Vanegai laganidia lalodiai Watch Tower Society be daudau gabudia ai misinari laolao gaukara idia durua. Mai edia outboard motor bouti dekenai, idia ura volantia taudia be America ena Indian taudia edia noho gabudia ai sivarai namona harorolaia gaukarana idia moalelaia, unai taudia be daudau gabudia ena ranu daladia ai au utua bona biru hanuadia ai idia noho. Idia be pioneer momokani taudia dainai, taunimanima ia hamauridia gauna, “[Iehova] ena ladana,” be nega ginigunana unai daudau gabudia dekenai idia mailaia. (Roma 10:​13-15) Tadikaka be hekwarahi momo idia haheaukalaidia, nega haida unai gabu haida dekenai idia lao totona idia be dina toi lalonai sinavai dekenai idia laolao. To davana namo herea idia abia.

Tau matamatana ta, Pentekoste orea merona, be Waini Sinavai ena Kwebanna hanuana dekenai ia noho, unai hanua taudia be au utua gaukara idia karaia; July 1991 neganai, misinari taudia be nega ginigunana unuseniai idia laolao bona idia davaria. October ai idia lou henia, bona Baibel stadi idia hamatamaia. Nega ginigunana lalonai, sibona ena Baibel dekenai ia itaia Dirava ena ladana be Iehova, Iesu be Siahu Ibounai Diravana lasi, bona Toi Tamona hahedibana be Baibel ena amo lasi. (Salamo 83:18; 1 Korinto 11:3) Ia moale bada dainai, tadikaka idia rakatania murinai, iena Pentekoste turadia ia haboudia bona sibodia edia Baibel amo Iehova Dirava bona Iesu Keriso ena hereva momokani ia hahedinaraia. Idia momo be hereva momokani idia abia dae lasi neganai, ia laloa namona be “Babulono badana” ia rakatania. (Apokalupo 18:​2, 4) February 1992 neganai, tadikaka ese idia lou henia neganai, ia hamaorodia dahaka ia vara, bona ma ia gwau: “Lau ura umui danu lau gaukara. Lau ura Iehova ena Witness ta ai lau lao. Lau ura taunimanima dekenai hereva momokani lau hadibaia!”

Unai bamona ekspiriens ese tadikaka ia durudia unai gaukara aukana idia karaia noho totona. Unai misinari laolao idia karaia taudia be edia ruma ena noho namo dalana idia rakatania, gorere dikadia malaria bamona idia davaria diba, bona uda dekenai idia noho ena hekwarahi idia haheaukalaia. To ruma dekenai idia noho taudia be gau namodia haida idia reaia danu. Ruma bese taudia be edia lalokau taudia idia itaia lasi, nega haida unai be wiki momo lalodiai. Kongregesen taudia edia elda bona ma tadikaka matamatadia be lasi, bona nega haida tadikaka tamona sibona ia noho kongregesen ia naria totona. To, unai taudia idia giroa neganai, kongregesen ese edia sivarai namodia idia kamonai neganai, idia moale bada herea bona goada idia abia! Unai moale dainai idia reaia gaudia be anina lasi bamona.

Sivarai namona ida Guyana ena ranu momo dekenai idia laolao Basileia harorolaia taudia be ekspiriens idauna bona namona idia moalelaia. Tanobada hegegemadai edia gaukara tamona taudia ida, mai edia goada bona ura ibounai ida ‘Dirava idia hanamoa, Iesu ena ladana dainai . . . edia uduna bibina Iesu dekenai idia henia.’​—Heberu 13:15.

[Footnotes]

[Maps on page 24]

HONDURAS

NICARAGUA

COSTA RICA

PANAMA

VENEZUELA

COLOMBIA

GUYANA

SURINAME

FRENCH GUIANA

BRAZIL

BOLIVIA

ATLANTIC OCEAN

[Pictures on page 26, 27]

Laurina: Maketi dinana ai idia haroro

Atai: Demerara Sinavai dekenai sivarai namona idia harorolaia

Atai, idibana: Misinari taudia be bouti idia baraia mahuta gabuna ai idia giroa totona