Karaia Namonamo Karana bona Moale
GAUKARA ita karaia namonamo neganai iseda gaukara ia namo. Gaukara ita karaia maoro karana ese ita ia durua nega bona kohu ita gaukaralaia dala namonai. (Galatia 6:16; Filipi 3:16; 1 Timoteo 3:2) To iseda mauri dekenai gaukara karaia namonamo karana sibona ita laloa be hegeregere lasi. Dirava ena lauma siahuna dainai salamo ia torea tauna, ia gwau: “Edia Dirava be Iehova taudia idia moale.” (Salamo 144:15) Ita karaia gaudia ibounai dekenai hekwarahi gauna be gaukara ita karaia namonamo bona ita moale danu.
Gaukara Karaia Namonamo bona Oi Moale
Gaukara karaia namonamo ia haheitalaia momokani tauna be Iehova Dirava. Ia havaraia gaudia iboudiai, cell maragidia bona mauri gaudia badadia, atom maragidia bona hisiu oreadia badadia, idia hahedinaraia gau iboudiai idia gaukara namonamo bona dala maorodia ai. Iena guba bona tanobada taravatudia dainai iseda mauri daladia be gari lasi dekenai ita hegaegaelaia diba. Ita diba daba neganai dina do ia daekau bona keru negana murinai siahu negana do ia mai.—Genese 8:22; Isaia 40:26.
To Iehova be gau iboudiai haheaua namonamo Diravana sibona lasi. Ia be “moale Diravana” danu. (1 Timoteo 1:11, NW; 1 Korinto 14:33) Iena moale be ia havaraia gaudia dekenai ita itaia. Idia gadara pusikasidia, dina ia diho negadia edia hairai, aniani namodia, iseda lalona ia hamoalea miusik, ita ura henia gaukara, bona ma gau momo herea ese idia hahedinaraia ia ura mauri ita moalelaia. Iena taravatu be iseda moale idia naria gaudia.
Iesu Keriso ena kara be iena Tamana ena kara hegeregeredia. Ia be “Lohia Badana bona ia moale” bona iena Tamana ia karaia bamona ia karaia. (1 Timoteo 6:15, NW; Ioane 5:19) Iena Tamana ida gau iboudiai havaraia gaukarana ia karaia neganai, ia be “gaukara ia diba momo tauna” sibona lasi. Iena gaukara dekenai ia moale. Ia be ‘Iehova ena vairanai ia moale nega ibounai. Ena tanobada dekenai idia tubu gaudia ibounai dekenai ia moale, bona taunimanima edia natuna iboudiai dekenai idia noho gaudia ia moalelaia.’—Hereva Lada-isidia 8:30, 31.
Unai hegeregerena, iseda kara ibounai dekenai ita ura taunimanima dekenai ita hebogahisi, ita moale, bona ita lalokau henidia. To, nega haida, ita ura gaukara ita karaia namonamo dainai, reana ita laloaboio “[Dirava ena] Lauma Helaga ese . . . iseda mauri ia biagua” dainai Dirava ena lauma huahua ita hahedinaraia danu. (Galatia 5:22-25) Unai dainai namona be ita henanadai, Iseda gaukara dekenai bona ma haida edia gaukara ita biagua neganai edena dala ai gaukara ita karaia namonamo bona ita moale danu?
Oi Sibona Dekenai Oi Dagedage Lasi
Namona be Hereva Lada-isidia 11:17 dekenai ia noho sisiba namona oi laloa. Dirava ena lauma siahuna dainai ia torea tauna be ita ia hadibaia, ia gwau “lalokau ia hahedinaraia tauna ese sibona ena mauri ia hanamoa.” To ma ia gwau: “To dagedage tauna be sibona ena tauanina ia hahisia.”
Ita laloa namonamo lasi neganai edena bamona ita sibona ita dagedage henia? Dala ta be iseda ura ia namo to gaukara ita hegaegaelaia namonamo lasi bona ita karaia namonamo lasi. Dahaka ia vara? Diba momo tauna ta ia gwau: “Gau ta ita laloaboio, pepa ta ita atoa kerere, taravatu ta ena anina ita abia namonamo lasi, telefon amo sivarai ta ita torea kerere—unai gau maragidia iboudiai dainai gaukara ia dika.”—Teach Yourself Personal Efficiency.
Unai be Dirava ena lauma siahuna dainai ia toretore tauna ia hereva bamona, ia gwau: “Ena gaukara dekenai ia lahedo tauna be dika ia havaraia tauna ena tadikaka.” (Hereva Lada-isidia 18:9) Oibe, gaukara idia karaia namonamo lasi taudia, gaukara karaia kava taudia be sibodia bona ma haida dekenai dika idia havaraia.
Mauri Sisiana ta Eiava Mase Leona Ta?
To ita sibona ita hahisia diba danu bema taravatu auka hereadia ita atoa. Gaukara ibounai karaia maoromaoro herea dalana ia torelaia tauna ta, atai ai gwauraia, ia gwau, namo lasi ita be “taunimanima ese idia hagugurua diba lasi taravatu aukana” ita atoa. Ia gwau, gabeai ia vara gauna be “iseda lalona do ita hahisia.” Ia ura gaukara ibounai ia karaia maoromaoro herea tauna be reana gaukara ia karaia maoromaoro herea diba bona ia haheaua namonamo, to moale momokani do ia davaria lasi.
Bema hanaihanai ita ura gaukara ibounai ita karaia maoromaoro herea, namona be ita laloa, “Ia mauri noho sisia ena namo be ia mase vaitani leona ena namo ia hanaia.” (Kohelete 9:4) Reana hanaihanai ita ura gaukara ibounai ita karaia maoromaoro herea, to iseda goada ibounai ita haorea neganai ita sibona ita hadikaia diba. Diba tauna ta ia gwau unai be “tauanina dalana ai, lalona ena mamina dalana ai, lauma dalana ai, darana dekenai, bona ma taunimanima haida dekenai ita hesiku.” (Job Stress and Burnout) Bema ita ura hanaihanai gaukara ibounai ita karaia maoromaoro herea to ita atoa taravatudia ita hagugurudia diba lasi dainai iseda goada ita haorea, momokani ita sibona ita dagedage henia bona gabeai iseda moale ia boio.
Oi Sibona Emu Mauri Oi Hanamoa
Namona be oi laloatao: “Lalokau ia hahedinaraia tauna ese sibona ena mauri ia hanamoa.” (Hereva Lada-isidia 11:17) Ita hagugurua diba taravatudia ita atoa neganai iseda mauri ita hanamoa, namona be ita laloatao moale Diravana, Iehova, ia diba iseda goada ena dokona be edena bamona. (Salamo 103:8-14) Ita danu ita moale diba bema iseda manoka gabudia ita diba bena iseda goada hegeregerena, “mai iseda goada ibounai”, ita gaukara iseda maduna ita huaia namonamo totona.—Heberu 4:11; 2 Timoteo 2:15; 2 Petero 1:10.
Momokani, ita naria ma kerere ta garina—namo lasi ita sibona ita hebogahisi henia hanaihanai. Iesu ena haere aposetolo Petro dekenai ita laloatao, Petro ia gwau, ‘Lohiabada e, oi sibona oi hanamoa,’ to Iesu be kara goadana ta ia karaia be namo. Petro ena lalohadai be kerere dainai Iesu ia gwau: “Satani e, lauegu murina kahana oi lao. Lau [oi] hamorua totona oi hereva, badina oiemu laloa be Dirava ena lasi, to taunimanima edia.” (Mataio 16:22, 23) Bema ita sibona ita hamoalea hanaihanai, unai danu ese iseda moale ia kokia diba. Namona be ita lalohadai namonamo, namo lasi hanaihanai ita sibona bona ma taunimanima haida metau ita henidia.—Filipi 4:5.
Ma Haida Ita Kara Namo Henidia
Sedira Iesu ena dina lalonai toretore taudia bona Farisea taudia idia laloa edia gaukara ia heau namonamo bona idia karaia namonamo. To A Dictionary of the Bible bukana ese edia tomadiho dalana ia herevalaia, ia gwau: “Baibel ena hahegani iboudiai dekenai taravatu maragimaragidia momo idia atoa kau. Herevana dahaka dahaka ia vara to unai taravatu idia haidaudia lasi; danu taravatu idia atoa Iuda taudia ta ta iboudiai be unai Taravatu ena kahana kahana iboudiai idia badinaia be gau badana . . . Taravatu ena hereva idia habadaia noho ela bona tomadiho be bisinesi ai ia lao, bona mauri be metau bada herea dainai idia hegeregere lasi. Edia lalona ena mamina idia koua; Dirava ena hereva ena siahu be idia koua bamona bona taravatu momo herea badinaia karadia amo idia hunia.”
Ita hoa lasi Iesu Keriso be unai dainai ia samanidia. Ia gwau: “Idia ese huaia gaudia mai metau danu idia kwatua, taunimanima latanai idia atoa, to edia imana kwakikwakina sibona dekena amo durua taina idia henia lasi.” (Mataio 23:4) Lalokau elda taudia idia ura lasi mamoe orea taudia be taravatu maragidia bona koua herevadia amo idia hametaudia. Dirava ena mamoe taudia idia hanamodia, goada idia henidia lou, Keriso Iesu ena hebogahisi, haheitalai namona idia gavaia dainai.—Mataio 11:28-30; Filipi 2:1-5.
Orea dekenai edia maduna idia bada idia lao neganai danu, hebogahisi elda taudia do idia laloaboio lasi idia be taunimanima idia durudia—Dirava ese ia lalokau henidia taudia unai. (1 Petero 5:2, 3, 7; 1 Ioane 4:8-10) Orea haheaua gaukaradia idia laloa bada, to do idia laloaboio lasi edia gaukara ginigunana be mamoe idia ubua, mamoe idia naria, bona mamoe hadikaia gaudia idia koua.—Hereva Lada-isidia 3:3; 19:22; 21:21; Isaia 32:1, 2; Ieremia 23:3, 4.
Reana sediual bona namba gaudia laloa bada karana dainai, ta ese taunimanima lalodia karana ia laloaboio diba. Basi taria tauna ita laloa: reana ia laloa iena gaukara ginigunana be herevana dahaka ia vara to namona be iena sediual ia badinaia sibona. Ia ura ia dekenai idia henia negana lalonai, iena hamatamaia gabuna amo ia lao gabu dokona dekenai. To madi, basi ai idia guia gwauraia taudia ese ia idia koua. Idia raka metaira bona idia hegaegae namonamo lasi, bona basi ese unai gabu ia rakatania gwauraia neganai idia ginidae. Ia laloaboio gauna be iena gaukara anina be basi guia taudia ia durudia, to ia laloa idia be iena gaukara karaia namonamo dalana idia koua, bona ia ura lasi ia abidia.
Taunimanima Ta Ta Iboudiai Laloa
Nega momo gaukara karaia namonamo totona taunimanima haida ese ma haida edia namo idia laloa lasi. Reana idia laloa idia manoka bona gaukara idia karaia namonamo diba lasi taudia be gaukara idia koua bamona. Unai ia vara neganai, gau dikadia idia vara diba. Haheitalai be, idau negai Greek hanua gabuna Sparta dekenai, idia manoka bona idia gorere natudia idia rakatania bena idia mase. Idia laloa bema idia tubu daekau neganai idia goada lasi, tuari taudia goadadia ai idia lao diba lasi, bona ia heau namonamo gavamani goadana idia durua diba lasi. Aonega tauna Bertrand Russell ia gwau: “Natuna ta ia vara neganai, tamana ese ia mailaia iena ruma bese ena elda taudia edia vairanai idia itaia totona: bema ia goada, tamana dekenai idia henia lou naria totona; bema idia itaia ia goada lasi, ia be ranu guri dobuna lalonai idia negea.”—History of Western Philosophy.
Moale idia laloa lasi, to taravatu aukadia badinaia karana be unai kudou auka gavamanina ena toana. (Kohelete 8:9 itaia danu.) Reana Sparta siahu taudia idia laloa edia dala be maoro badina edia gaukara ia heau namonamo, to edia kara dekenai hebogahisi bona taunimanima lalodia karana be lasi. Edia dala be Dirava ena dala lasi. (Salamo 41:1; Hereva Lada-isidia 14:21) To Keristen kongregesen naria taudia be idau, idia laloatao Dirava ena mamoe taudia iboudiai be mai anina bada iena matana dekenai, bona idia ta ta iboudiai idia hanamodia. Idia goada taudia 99 sibona lasi, to ia manoka tauna eiava iena lalona ia heiriheiri tauna tamona danu idia naria.—Mataio 18:12-14; Kara 20:28; 1 Tesalonika 5:14, 15; 1 Petero 5:7.
Mamoe Orea Kahirakahira ai Idia Noho
Elda taudia be idia naria mamoe taudia kahirakahira ai idia noho. Hari inai nega ena bisinesi daladia idia tahua neganai, reana ita laloa gaukara ia heau namonamo totona, namona be biaguna eiava naria tauna be iena gaukara taudia ida ia turana karaia momo lasi. Tahua tauna ta be air force ofisa tauna ena kara ia herevalaia iena gaukara taudia ida ia turana karaia neganai eiava ia turana karaia lasi neganai: “Iena gaukara taudia ida ia turana karaia neganai, gaukara taudia idia gari lasi bona edia orea gaukara heau namonamo dalana idia laloa momo lasi. To iena dagi ia laloa bada bona ia turana henidia lasi neganai, iena gaukara taudia be edia gaukara idia laloa momo . . . bona edia gari dainai edia gaukara idia laloa bada. Unai dainai, tuari taudia gabuna dekenai gaukara heau dalana ia namo ia lao.”—Understanding Organizations.
To Keristen kongregesen be tuari oreana ta lasi. Ma haida edia gaukara idia biagua Keristen elda taudia be Iesu Keriso ena haheitalai idia tohotohoa. Nega ibounai iena hahediba taudia ida ia turana karaia. (Mataio 12:49, 50; Ioane 13:34, 35) Ia ura lasi ia hagaridia edia gaukara idia habadaia totona. Ia bona ia murinai idia raka taudia be idia abidadama heheni bona idia tabekau heheni karana ia habadaia. Iena hahediba taudia edia kara be idia lalokau heheni. (1 Tesalonika 2:7, 8) Unai bamona turana karana ia noho neganai, Dirava idia lalokau henia dainai, moale mamoe taudia be do idia doridia lasi to hakaua hereva do idia kamonai, bona idia hesiai henia neganai do idia karaia mai edia ura bada danu.—Esodo 35:21 itaia danu.
Baibel siridia momo be Keristen karadia, hegeregere moale bona tadikaka iboudiai lalokau henidia kara, idia gwauraia bada. (Mataio 5:3-12; 1 Korinto 13:1-13) Siri haida sibona be gaukara heau namonamo dalana idia gwauraia bada. Momokani, gaukara ia heau namonamo karana ita laloa be namo. Dirava ena taunimanima be guna ema bona hari edia gaukara idia karaia namonamo. To oi laloa, nega momo salamo torea taudia be Dirava ena hesiai taudia idia gwauraidia idia moale. Salamo 119 ese Iehova ena taravatu, ena hahegani herevadia, bona ena hahetoho herevadia ia herevalaidia momo, ena hamatamaia herevana ia gwau: “Kerere dalana ai idia raka lasi taudia idia moale, Iehova ena taravatu ai idia raka taudia idia namo. Ena hahediba herevadia idia badinaia bona mai edia lalona ibounai ida ia idia tahua taudia idia moale.” (Salamo 119:1, 2) Do oi hegeregere, oiemu gaukara oi karaia namonamo bona oi moale danu, a?
[Picture on page 28]
“Armillary sphere”—gunaguna idia gaukaralaia gauna guba lalonai kuboru gaudia ia hahedinaraidia totona
[Picture on page 31]
Iehova, lalokau Mamoe Naria Tauna, be gaukara heau namonamo Diravana sibona lasi, to moale Diravana danu
[Credit Line]
Garo Nalbandian