Iehova be Oiemu Kudouna Ibounai ida Oi Karaia Gaukarana Ia Laloa Bada

“Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona.”​—⁠KOLOSE 3:23.

1, 2. (a) Ita abia diba hahenamo badana ta be dahaka? (b) Dahaka dainai Dirava ena hesiai gaukara lalonai ita ura ita karaia gaudia ibounai ita karaia diba lasi?

IEHOVA hesiai henia karana be ita abia hahenamo badana ta. Mai badina namona dainai, inai magasin ese nega daudau lalonai Keristani taudia ia hagoadaia haroro gaukara do idia karaia, bona bema idia hegeregere unai gaukara do idia “habadaia.” (1 Tesalonika 4:⁠1) To, Dirava hesiai henia gaukara lalonai iseda kudouna ia ura gaudia ibounai ita karaia diba lasi. Lagani 40 ia bapatiso vadaeni headava lasi taihu ta ia gwau: “Egu noho dalana dainai lau be ful-taim moni gaukara lau karaia. Lau gaukara ena badina be dava bada dabua namodia lau hoia eiava loaloa sisima dekenai lau laga-ani totona lasi, to ia be mauri durua gaudia, medikol bona isena hanamoa gaudia danu, edia davana lau karaia totona. Egu mamina be hegeregere lau ese Iehova dekenai egu nega bona goada orena kahana sibona lau henia.”

² Dirava ita lalokau henia dainai ita ura haroro gaukara lalonai ita karaia diba gaukara ibounai ita karaia. To nega momo iseda noho dalana ese ita karaia diba gaudia idia koua bamona. Baibel ese ia gwauraia maduna idauidau, ruma bese naria ena maduna danu, ita karaia neganai reana iseda nega bona goada bada ita haorea. (1 Timoteo 5:​4, 8) Inai “metau dikadia momo do idia vara” negana lalonai, mauri be mai ena hekwarahi. (2 Timoteo 3:⁠1) Haroro gaukara lalonai ita ura ita karaia gaudia ibounai ita karaia diba lasi neganai, reana iseda kudouna ia metau. Reana Dirava be iseda tomadiho karana ia moalelaia eiava lasi ita lalo-hekwarahilaia.

Kudouna Ibounai ida Gaukarana Ena Hairai

3. Iehova be dahaka ia ura ita ibounai amo?

³ Salamo 103:14 ai, Baibel ese ita ia hamaoroa Iehova “ia diba, ita be tanobada ena kahu dekena amo ita ia karaia.” Ia lalo-parara iseda goada be mai ena hetoana; unai dala dekenai ma ta be ia bamona lasi. Ita henia diba lasi gauna dainai ia noinoi lasi. Iehova be dahaka ia ura? Herevana edia noho dalana be edena bamona, taunimanima ibounai ese idia henia diba gauna be inai: “Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona.” (Kolose 3:23) Oibe, Iehova ese ita​—⁠ita ibounai​—⁠amo ia ura gauna be mai iseda kudouna ibounai ida ia ita hesiai henia.

4. Mai iseda kudouna ibounai ida Iehova ita hesiai henia ena anina be dahaka?

⁴ Mai iseda kudouna ibounai ida Iehova ita hesiai henia ena anina be dahaka? Greek gado herevana idia hahanaia “kudouna ibounai,” ena anina korikorina be “ena soul amo.” “Soul” be tau ta, ena tauanina bona ena aonega ibounai ia herevalaia. Unai dainai mai eda kudouna ibounai ida ita gaukara ena anina be sibona ita henia, iseda diba bona iseda goada ibounai be Dirava ena hesiai gaukara lalonai ita gaukaralaia badabada. Ita gwau diba, ena anina be iseda soul ese ia karaia gaudia iboudiai ita karaia.​—⁠Mareko 12:​29, 30.

5. Aposetolo taudia edia haheitalai ese edena bamona ia hahedinaraia ita ibounai eda gaukara ena bada be tamona lasi?

⁵ Mai iseda kudouna ibounai ida ita gaukara ena anina be haroro gaukara lalonai ita ibounai eda gaukara ena bada be tamona, a? Lasi, badina be soul ta ta edia noho dalana bona edia diba be idauidau. Mani Iesu ena kamonai aposetolo taudia ita laloa. Idia ibounai idia hegeregere lasi gaukara ena bada tamona hegeregerena idia karaia totona. Aposetolo taudia haida ita diba namonamo lasi, hegeregere Kanane tauna Simona bona Iamesi Alepeo ena natuna. Reana idia ese aposetolo ena gaukara badana idia karaia diba lasi. (Mataio 10:​2-4, NW) To, Petero be idau, ia be maduna metau momo ia abia dae diba​—⁠oibe, Iesu ese “Guba Basileia ena ki” ia henia danu! (Mataio 16:19) To, Petero be aposetolo taudia ma haida ataiai idia abia isi lasi. Ioane ese Ierusalema Matamatana be matahanai (lagani 96 C.E. bamona) lalonai ia itaia neganai, ia ese magu ena badina nadidia 12 ia itaia bona idia latanai “aposetolo taudia 12 edia ladana idia torea.”a (Apokalupo 21:14) Iehova ese aposetolo taudia ibounai edia gaukara ia laloa bada, ena be toana be idia haida edia gaukara ia bada bona ma haida edia gaukara ia maragi.

6. Iesu ena uhe hadoa tauna ena parabole lalonai, “tano namona” dekenai ia moru uhe dekenai dahaka ia vara, bona dahaka henanadai idia vara?

⁶ Unai hegeregerena, Iehova be ita ibounai amo haroro gaukara ena bada tamona ia tahua lasi. Iesu ese uhe hadoa tauna ena parabole ia gwauraia neganai unai ia hahedinaraia. Uhe hadoa karana be haroro gaukara ida ia hahegeregerea. Uhe be tano idauidau latanai idia moru ese sivarai idia kamonai taudia edia lalona idauidau ia haheitalaia. Iesu ia gwau: “To tano namona dekenai ia moru gauna be tau ta ese Dirava ena hereva ia kamonaia, bona iena lalona ia kehoa momokani. Unai bamona taudia be edia anina idia atoa, ta 100, ta 60, ta 30.” (Mataio 13:​3-8; 18-23) Unai anina be dahaka, bona dahaka dainai idia havaraia anina edia momo be idauidau?

7. Unai uhe ese ia havaraia anina be dahaka, bona dahaka dainai anina ena momo be idauidau?

⁷ Idia hadoa uhena be “Basileia ena sivarai” dainai, anina idia havaraia karana be unai hereva do idia halasia, ma haida dekenai do idia gwauraia hedinarai. (Mataio 13:19) Idia havaraia anina edia momo be idauidau​—⁠30 ia lao 100​—⁠badina taunimanima edia mauri lalonai edia diba bona edia noho dalana be idauidau. Ena tauanina be ia goada bona ia gorere lasi tauna be nega bada ia atoa diba haroro gaukara lalonai, to nega momo ia gorere eiava ia buruka dainai ia goada lasi tauna be nega bada ia atoa diba lasi. Reana ia headava lasi bona ruma bese ena maduna ta ia huaia lasi uhau eiava ulato ta ese gaukara badana ia karaia diba, to ena ruma bese ia naria totona ful-taim moni gaukara ia karaia tauna be unai bamona gaukara ia karaia diba lasi.​—⁠Aonega Herevadia 20:29 itaia.

8. Edia soul edia goada ibounai hegeregerena idia gaukara taudia be Iehova ese edena bamona ia laloa?

⁸ Dirava ena matana ai, mai ena kudouna ibounai ida ia gaukara bona anina 30 ia havaraia tauna ena abidadama be maragi bona anina 100 ia havaraia tauna ena abidadama ia bada, a? Lasi momokani! Ita havaraia anina edia momo be reana do idia idauidau, to Iehova ia moale bema iseda hesiai gaukara be iseda soul ena goada ibounai hegeregerena ita karaia. Namona be ita laloatao, anina edia momo be idauidau to “tano namona” kudouna amo idia vara. Greek gado herevana (ka·losʹ) idia hahanaia “namo” ese “hairai” gauna ta, “kudouna bona matana ia hamoalea” gauna ia herevalaia. Bema iseda goada hegeregerena ita gaukara goadagoada, Iehova ena matana ai iseda kudouna be ia hairai, bona unai ese ita ia hagoadaia momokani!

Ta Ta ida Emui Gaukara Umui Hahegeregerea Lasi

9, 10. (a) Iseda lalona be dahaka lalohadai kererena ia abia diba? (b) Korinto Ginigunana 12:​14-26 lalonai ia noho haheitalai ese edena bamona ia hahedinaraia Iehova be ma haida ida iseda gaukara ia hahegeregerea lasi?

⁹ To, iseda goevadae lasi lalona ai reana lalohadai idauna ia vara. Reana iseda haroro gaukara be ma haida edia ida ita hahegeregerea. Reana ita laloa, ‘Ma haida be haroro gaukara lalonai gaukara bada idia karaia to lau be lasi. Edena bamona Iehova be lauegu gaukara ia moalelaia diba?’​—⁠1 Ioane 3:​19, 20 itaia.

¹⁰ Iehova ena lalohadai bona ena dala be iseda lalohadai bona iseda dala edia ataiai momokani. (Isaia 55:⁠9) Korinto Ginigunana 12:​14-26 amo, Iehova ese ita ta ta eda gaukara be edena bamona ia laloa ia hahedinaraia. Unai siri lalonai, kongregesen be tauanina ta mai ena kahana momo​—⁠matana, imana, aena, taiana, bona ma haida​—⁠ida ia hahegeregerea. Mani nega sisina lalonai, tauanina korikorina ita laloa. Ia be kavakava karana bema emu matana be emu imana ida oi hahegeregerea eiava oiemu aena be emu taiana ida oi hahegeregerea! Kahana ta ta ena gaukara be idauidau, to idia ibounai be mai edia gaukara bona idia be mai anina bada. Unai hegeregerena, Iehova ese oiemu kudouna ibounai ida oi karaia gaukarana ia laloa bada, herevana ma haida be gaukara badana idia karaia eiava gaukara maragina idia karaia.​—⁠Galatia 6:⁠4.

11, 12. (a) Dahaka dainai haida idia laloa idia “goada lasi” eiava idia be “namo bada lasi” taudia? (b) Iehova ese iseda hesiai gaukara be edena bamona ia laloa?

¹¹ Ita gorere, ita buruka ita lao, eiava ma gau haida dainai, iseda goada be mai ena hetoana neganai, reana nega ta ta ita haida ita laloa ita “goada lasi” eiava ita be “namo bada lasi” taudia. To Iehova be unai bamona ia laloa lasi. Baibel ia gwau: “Ita laloa idia goada lasi kahadia be mai edia gaukara bada herea. Bona tauanina kahadia haida ita laloa be namo bada lasi, to idia ita naria namonamo, . . . Dirava ese kahana ibounai ia haboua vadaeni, tauanina tamona idia lao, bona ia ese namo lasi kahadia dekenai matauraia bada ia henia vadaeni.” (1 Korinto 12:​22-24) Unai dainai Iehova ese ita ta ta ibounai ia laloa bada diba. Iseda diba bona goada hegeregerena ai ita karaia hesiai gaukarana ia laloa bada. Oiemu kudouna ese oi ia doria mai emu goada ibounai ida unai bamona lalo-parara bona lalokau Diravana oi hesiai henia totona, a?

¹² Mai anina bada gauna Iehova dekenai be oiemu soul​—⁠oi​—⁠ese oi karaia diba gaukara oi karaia, to oiemu gaukara ena bada be ma ta ena gaukara ena bada hegeregerena ia laloa lasi. Iesu ena tanobada maurina ena dokona kahanai, edia noho daladia be idauidau hahine rua ia kara henidia dalana amo, Iehova ese ita ta ta eda gaukara ia laloa bada karana ia hahedinaraia.

Iesu Ia Laloa Bada Hahinena ta Ena “Davana Bada” Harihari Gauna

13. (a) Dahaka idia karaia noho lalonai, Maria ese Iesu ena kwarana bona aena dekenai dehoro ia bubua? (b) Maria ena dehoro ena davana be hida?

¹³ Nisan 8, Friday adorahi ai, Iesu be Betania dekenai ia ginidae, ia be hanua maragina ta Olive Ororona ena ist kahana dekenai, bona ena daudau Ierusalema amo be kilomita toi bamona. Unai taoni dekenai Iesu ena lalokau turadia haida idia noho​—⁠Maria, Mareta, bona edia taihuna, Lasaro. Reana nega momo Iesu be edia ruma dekenai ia noho. To Saturday hanuaboina ta ai, Iesu bona ena turadia be Simona, guna lepera gorerena ia abia bona reana Iesu ese ia hanamoa tauna, ena ruma dekenai idia aniani. Iesu be teibolo dekenai ia helai noho lalonai, Maria ese ena taihuna ia hatorea isi tauna ia lalokau henia bada ia hahedinaraia inai manau karana ta amo. Ia ese mai bonana namona dehoro, “davana bada gauna,” ena kavabu ia kehoa. Ia be dava bada gauna momokani! Iena davana be 300 kina, unai be lagani tamona ena gaukara ena davana hegeregerena. Iesu ena kwarana bona ena aena dekenai unai bonana namona dehoro ia bubua. Bona ia ese ena huina amo ena aena ia dahua kaukau danu.​—⁠Mareko 14:3; Luka 10:​38-42; Ioane 11:​38-44; 12:​1-3.

14. (a) Maria ena kara dainai hahediba taudia be edena bamona idia kara? (b) Iesu ese Maria be edena bamona ia durua?

¹⁴ Hahediba taudia idia badu! Idia henanadai: ‘Dahaka dainai ia negea kava?’ Iuda be ogogami taudia durua koikoi herevana amo ena henaohenao urana ia hunia, ia gwau: “Badina dahaka inai dehoro be ia hoia lasi? 300 kina do ia abia, ogogami taudia dekenai do idia harihari henia.” Maria be ia hereva lasi. To, Iesu ese iena hahediba taudia ia hamaoroa: “Umui rakatania. Iena kara umui koua lasi. Ia be kara namona [ka·losʹ karana ta] lau dekenai ia karaia. . . . Ia diba gauna ia karaia, lauegu tauanina ia dahua, idia be do idia guria lau totona. Momokani lau hamaoroa umui, tanobada ena kahana ibounai dekenai inai Sivarai Namona do idia haroro karaia, bona inai hahine ena kara danu do idia gwauraia, bona iena kara do idia laloatao.” Iesu ena hereva namodia ese Maria ena lalona ia hamainoa!​—⁠Mareko 14:​4-9; Ioane 12:​4-8.

15. Dahaka dainai Maria ia karaia karana ese Iesu ena kudouna ia hamarerea, bona kudouna ibounai ida henia karana dekenai dahaka ita dibaia?

¹⁵ Maria ia karaia karana ese Iesu ena kudouna ia hamarerea momokani. Iena matana ai, ia ese hanamoa karana ta ia karaia. Iesu ese unai dehoro ena davana ia laloa lasi, to ia laloa bada gauna be Maria ese “ia diba gauna ia karaia.” Dala ia noho neganai ia henia diba gauna ia henia. Baibel ma haida be inai bamona idia hahanaia, “Ia ese ia karaia gaudia ibounai be ia karaia vadaeni,” eiava, “Mai ena goada ibounai ida ia karaia diba gauna ia karaia.” (An American Translation; The Jerusalem Bible) Maria ena henia karana be mai ena kudouna ibounai ida ia karaia, badina iena gau namo hereana ta ia henia. Kudouna ibounai ida henia karana ena anina be unai.

Vabu Ena “Moni Maragimaragi Rua”

16. (a) Iesu ese vabu ogogamina ena moni udaia karana be edena bamona ia itaia diba? (b) Vabu ena moni ena bada be hida?

¹⁶ Dina haida murinai, Nisan 11 ai, Iesu be dubu dekenai dina ta ibounai ia noho, unuseniai ena siahu idia henanadailaia bona henanadai aukadia takisi monina, toreisi lou, bona ma gau haida dekenai ia haerelaia. Ia ese taravatu hadibaia taudia bona Farisea taudia ia gwau henidia gauna ta “vabu edia rumadia idia henaoa.” (Mareko 12:40) Bena Iesu be Hahine Edia Hebou Gabuna dekenai ia helai diho, unuseniai Iuda taudia edia sene karadia hegeregerena, moni udaia maua 13 idia noho. Nega taina daudau ia helai, bona taunimanima be edia kontribusen monina idia udaia neganai ia herarai. Taga taudia momo idia mai, reana haida edia toana be idia laloa idia be kara maoromaoro taudia, reana haida be mai heagi bada toana danu. (Mataio 6:2 itaia.) To Iesu ese hahine tamona sibona ia raraia. Taunimanima ma ta ese reana unai hahine bona ena harihari gauna ia itaia neganai do ia laloa bada lasi. To taunimanima edia kudouna ia itaia diba tauna, Iesu, ia diba ia be “vabu ogogamina.” Bona ena harihari gauna ena bada ia diba danu​—⁠“moni maragimaragi rua ia udaia, hegeregere toea rua bamona.”b​—⁠Mareko 12:​41, 42.

17. Iesu ese vabu ena henia karana dekenai dahaka ia laloa, bona unai amo Dirava henia karana dekenai dahaka ita dibaia?

¹⁷ Iesu ese ena hahediba taudia ia boiria ia dekenai, badina ia ura do ia hadibadia gauna idia itaia. Iesu ia gwau: “Unai vabu ogogamina ese ia udaia moni be bada, idia ibounai udaia moni be maragi.” Iesu ia laloa ia udaia monina ese ma haida idia udaia moni ibounai ia hanaia. Vabu ese “iena moni ibounai ia henia”​—⁠iena moni orena. Unai ia karaia neganai, sibona ia atoa Iehova ena imana lalonai ia naria totona. Dirava dekenai henia karana ena haheitalai namona be davana maragi herea harihari gauna ia henia hahinena ena haheitalai. To Dirava ena matana dekenai ia be dava bada gauna!​—⁠Mareko 12:​43, 44; Iamesi 1:⁠27.

Iehova Ena Lalohadai Kudouna Ibounai ida Hesiai Gaukara Dekena amo Diba Ita Abia

18. Iesu ese unai hahine rua ia kara henidia dalana amo dahaka ita dibaia?

¹⁸ Iesu ese unai hahine rua ia kara henidia dalana amo, Iehova ena lalohadai mai kudouna ibounai ida hesiai gaukara karana dekenai ita dibaia bona iseda lalona ia hagoadaia. (Ioane 5:19) Iesu ese unai vabu be Maria ida ia hahegeregerea lasi. Ia ese Maria ena “davana badana” dehoro ia laloa bada, to vabu ena moni rua ia laloa bada danu. Unai hahine ta ta ese edia gau namodia idia henia, unai dainai Dirava ena matana ai edia harihari gaudia be dava bada gaudia. Unai dainai bema oi laloa oi be anina lasi, badina Dirava oi hesiai henia diba lasi emu ura hegeregerena, oi lalohisihisi lasi. Oi henia diba gauna namona be Iehova ese mai moale ida do ia abia dae. Oi laloatao, Iehova be iseda “kudouna ia itaia,” unai dainai ia ese iseda kudouna ia ura gaudia ia diba goevagoeva.​—⁠1 Samuela 16:⁠7.

19. Dahaka dainai ma haida edia hesiai gaukara Dirava dekenai ita hahemaorolaia be maoro lasi?

¹⁹ Namona be Iehova ena lalohadai kudouna ibounai ida hesiai gaukara dekenai ese ma haida ita laloa bona ita kara henia dalana ia biagua. Ia be lalokau karana lasi bema haida edia gaukara ita hadikaia eiava ta ena gaukara be ma ta ida ita hahegeregerea! Madi, Keristani hahine ta ia gwau: “Nega haida ma haida edia hereva eiava kara amo idia hahedinaraia idia laloa bema oi be painia ta lasi, oi be anina lasi. Namona be ai hekwarahi bada noho Basileia ena sivarai ai harorolaia hanaihanai totona pablisa taudia emai gaukara idia laloa bada danu.” Namona be ita laloatao, ita be gwaumaoro ita abia lasi iseda Keristani tadikaka ta be mai ena kudouna ibounai ida ia gaukara eiava lasi do ita hahemaorolaia totona. (Roma 14:​10-12) Iehova ese mai abidadama ida Basileia idia harorolaia pablisa taudia milioni ta ta edia kudouna ibounai ida idia karaia gaukarana ia laloa bada bona namona be unai ita laloa bada danu.

20. Namona be iseda Keristani tadikaka dekenai dahaka ita laloa be namo?

²⁰ To, edena bamona bema toana be haida be haroro gaukara idia karaia badabada diba to idia karaia lasi? Keristani tadikaka ta ena haroro horadia idia diho neganai, idia itaia elda taudia dekenai ia hahedinaraia reana heduru eiava hahegoada idia henia be namo. Ma danu, namona be do ita laloatao, haida mai edia kudouna ibounai ida idia karaia gaukarana be Maria ena dava bada dehoro bamona lasi, to vabu ena moni maragidia ia henia bamona. Namona be ita laloa iseda tadikaka bona taihu be Iehova idia lalokau henia bona unai lalokau ese ia doridia gaukara maragina lasi, to idia karaia diba gaukara badana idia karaia totona. Momokani, Iehova ia hesiai tauna namona be do ia laloa lasi Dirava ena hesiai gaukara lalonai do ia karaia diba gaukarana do ia karaia lasi!​—⁠1 Korinto 13:​4, 7.

21. Dahaka ahuna namona gaukarana be momo ese idia karaia noho, bona dahaka henanadai idia vara?

²¹ To, Dirava ena taunimanima momo dekenai, mai edia kudouna ibounai ida idia gaukara ena anina be mai ena ahuna namona gaukarana ta idia karaia​—⁠painia gaukara. Dahaka hahenamo idia abia? Bona ita do painia diba lasi taudia be edena bamona​—⁠edena dala amo painia urana ita hahedinaraia diba? Unai henanadai be hereva gabena lalonai do ita herevalaidia.

[Footnotes]

Edena Bamona Do Oi Haere?

◻ Mai iseda kudouna ibounai ida Iehova ita hesiai henia ena anina be dahaka?

◻ Korinto Ginigunana 12:​14-26 ese edena bamona ia hahedinaraia Iehova be ma haida ida ita ia hahegeregerea lasi?

◻ Iesu ese Maria ena dava bada dehorona bona vabu ena moni maragidia rua ia herevalaia dalana amo, mai kudouna ibounai ida henia karana dekenai dahaka ita dibaia?

◻ Iehova ena lalohadai mai kudouna ibounai ida hesiai gaukara karana dekenai ese edena bamona ita ta ta ita laloa dalana ia biagua?

[Picture on page 15]

Maria be ena gau namo hereana ia henia, “davana bada” bona bonana namona dehoro ia atoa Iesu ena tauanina dekenai

[Picture on page 16]

Vabu ena moni​—⁠tauanina dalanai idia be siahu lasi to Iehova ena matana ai idia be mai anina bada