Kudouna Ibounai Ida Hesiai Gaukara Ita Karaia
Kahana 1: Iehova Laloa Bada Ena Namo
1 Iehova ita laloa bada bona ia ese ita ia durua bada dainai ita moale, unai dainai iseda kudouna ibounai ida iena hesiai gaukara ita karaia diba. (2 Sam. 22:2, 3) Namona be Dirava idia turana henia lasi taudia iboudiai ita hebogahisi henidia bona ita goada karaia iseda hesiai gaukara amo ita durudia totona. (Mat. 9:36; 2 Kor. 5:14, 15) Iseda abidadama Iehova dekenai ia bada neganai, bona taunimanima ita hebogahisi henidia bada neganai, do ita ura bada hesiai gaukara ita karaia. (Mat. 22:37-39) Unai neganai iseda haroro gaukara be davana bada gauna ta bamona ai ia lao bona do ita laloa bada. (2 Kor. 4:7) To hesiai gaukara laloa bada karana be edena bamona do ita habadaia diba?
ISEDA MOALE HESIAI GAUKARA DEKENAI HABADAIA DALANA
2 Mai guriguri bona laloa namonamo karana amo ita sibona ita stadi bona kongregesen dekenai stadi ita karaia neganai, unai ese ita ia durua Iehova ita tura henia momokani totona. Ita ia durua Iehova ena kara bona lalohadai toana ita diba totona. Sediual oi torea bona badinaia pura ta ta iboudiai Bible duahiduahi oi karaia totona, a? Nega oi atoa pura ta ta iboudiai Society ena buka bona magasin oi stadilaidia totona, a? Hebou ena hereva oi hegaegaelaia guna, hebou iboudiai dekenai oi lao, bona haere oi henia, a? (Heb. 10:24, 25) Stadi oi karaia lalonai bona murinai danu, namona be oi stadilaia herevana oi laloa namonamo, unai neganai emu kudouna ena moale be iseda hebogahisi bona kara namo Diravana dekenai do oi habadaia, badina ia ese dala ia hegaegaelaia tomadiho momokanina oi karaia totona.—Sal. 27:4.
3 Iehova ita laloa bada ena dala ma ta be inai: Dirava ena hesiai taudia haida edia haheitalai namodia ita laloa. Peroveta tauna Ieremia ese ia abia gaukarana be ena goada ibounai ida ia karaia. (Ier. 20:9) Iesu ese dala ia hahedinaraia ita tohotohoa totona, ia be mai ena moale bona mai ena goada danu ia gaukara. (Ioane 4:34) Ena hesiai gaukara amo aposetolo Paulo ese ia hahedinaraia ia moale Dirava ese ia hebogahisi henia dainai. (1 Tim. 1:12, 13, 17) Idau negai taudia bona hari inai nega taudia edia haheitalai namodia ita laloa neganai, unai ese iseda moale ia habadaia bona iseda kudouna ibounai ida ita ura hesiai gaukara ita karaia.
4 Iehova ena hairai dagina ita diba neganai bona iena hoa karadia ita laloa bada neganai, unai ese ita ia doria mai moale danu iena siahu bada ita gwauraia hedinarai ia do ita hanamoa totona. (Sal. 145:5-7) Bema dala idauidau ita tahua Basileia ena sivarai gaukara ita habadaia totona, unai ese ia hahedinaraia ita ura Dirava ena ladana ita harorolaia.—Luka 6:45.
5 To ma gau haida ese ita idia durua iseda kudouna ibounai danu hesiai gaukara ita karaia totona, a? Bema oibe, unai heduru gaudia be dahaka? Elda taudia, hesiai taudia, pioneer taudia, bona Basileia harorolaia gaukarana idia manadalaia taudia be edena bamona ita idia durua diba? Hesiai gaukara lalonai do ita tahua gaudia be edena bamona ita idia durua gaukara do ita goadalaia totona? Dahaka namo do ita davaridia diba? Unai henanadai bona ma henanadai haida be inai sivarai ena kahana 4 oredia dekenai do idia haerelaia. Gabeai Iseda Basileia Gaukara pepana lalonai do idia hedinarai.