Tomadiho

Anina: Tomadiho lalonai be tomadiho lalohadaidia, tomadiho herevadia, bona tomadiho karadia. Reana idia be taunimanima ta ta edia o tomadiho oreadia ta ta edia. Tomadiho taudia ese Dirava idia tomadiho henia, eiava dirava haida idia tomadiho henidia; eiava idia ese taunimanima o gau idauidau, o ura idauidau o siahu idauidau idia tomadiho henidia. Tomadiho momo be taunimanima sibodia ese idia laloa davari gaudia. Dirava ese ia hahedinaraia tomadihona danu ia noho. Tomadiho momokani ia noho bona tomadiho koikoi danu.

Dahaka dainai tomadiho idauidau momo herea idia noho?

Vanegai, tomadiho iboudiai idia hagaudia neganai, idia davaria tomadiho daladia badadia be 10 bona idia be orea idauidau 10,000 dekenai idia parara. Unai orea 6,000 bamona be Africa dekenai, 1,200 be United States dekenai, bona handred momo tano idaudia dekenai idia noho.

Tomadiho oreadia matamatadia idia vara bona idia tubu ena badina be idauidau momo. Haida idia gwau tomadiho idauidau iboudiai ese dala idauidau amo hereva momokani idia hahedinaraia. To edia hahediba herevadia bona edia kara be Baibel ida ita hahegeregerea toho neganai, ita davaria tomadiho be idauidau badina be taunimanima ese Dirava idia kamonai henia lasi to taunimanima ma haida idia badinadia dainai. Inai ita laloa namonamo be namo: Edia hahediba herevadia momo, idia lalo-tamonalaia to Baibel ese ia hamomokania lasi herevadia, be gunaguna Babulono dekenai idia halasia matamaia. (Rau 50-1 itaia, inai sinado “Babulono Badana” henunai.)

Daika ese unai heiriheiri tomadiho lalonai ia havaraia? Baibel ia gwau Satana Diabolo be “inai tanobada ena Dirava.” (2 Kor. 4⁠:⁠4) Ma ita ia hadibaia, ia gwau: “Iuda lasi taudia edia boubou gaudia be lauma dikadia dekenai idia henia, Dirava dekenai idia henia lasi.” (1 Kor. 10⁠:20) Unai dainai gau badana be, ita hamomokania ita ese Dirava momokanina, guba bona tanobada ia havaraia Diravana, ita tomadiho henia momokani, bona ia ese iseda tomadiho ia moalelaia!

Dirava ese tomadiho idauidau iboudiai ia abia dae, eiava?

Hhem. 10:​6, 7: “Israel taudia ma e kara havara Iehova vairanai, dirava idaudia e toma henidia diho: Baal, bona Astaroto, bona Suria taudia edia dirava, bona Sidono taudia edia dirava, bona Moab taudia edia dirava, bona Amono taudia edia dirava, bona Filistia taudia edia dirava. A idia ese Iehova e rakatania, ia isiaina asie lao heni. Bena Iehova ena badu vada e siahu Israel taudia latadiai.” (Inai ese ia hahedinaraia, ta ese guba bona tanobada ia havaraia Diravana momokani mo sibona bema ia tomadiho henia lasi to gau ta o lauma ta o taunimanima ta ia tomadiho henia, Iehova ese iena tomadiho ia abia dae lasi.)

Mar. 7:​6, 7: “[Iesu] ia hereva [Iuda ena Farisea taudia bona taravatu hadibaia taudia] dekenai, ia gwau, ‘Umui be koikoi taudia, Isaia ese emui kara ia hedinaraia vadaeni. Ia torea inai bamona, ia gwau, “Inai bese taudia edia uduna sibona idia hanamoa lau, to edia lalona be daudau masemase. Idia tomadiho lau dekenai, to anina lasi. Idia edia hadibaia hereva be taunimanima edia taravatu mo.” ’ ” (Ena be orea ta idia gwau Dirava idia tomadiho henia, to bema taunimanima edia hahediba herevadia idia badinaia bona Dirava ena Hereva idia dadaraia, edia tomadiho be anina lasi.)

Roma 10:​2, 3: “Lau diba idia ese Dirava ena hesiai gaukara idia ura karaia namonamo, to karaia dalana be idia diba lasi. Dirava ese taunimanima ia gwauraidia maoromaoro ia vairanai dalana be idia badinaia lasi, to idia sibona ese unai maoromaoro dalana idia tahua. Unai dainai Dirava ena dala idia abia dae lasi.” (Reana taunimanima haida be Dirava ena Buka Helaga idia abia vadaeni, to ena anina idia diba namonamo lasi badina be edia gunalaia taudia ese idia hadibadia namonamo lasi dainai. Reana idia laloa Dirava ena ura idia goadalaia, to ena ura karadia idia karaia noho lasi. Vadaeni, edia tomadiho ese Dirava ia hamoalea lasi, ani?)

Tomadiho idauidau iboudiai be mai edia namo, a?

Tomadiho momo ese koikoi, henaohenao, bona unai bamona karadia idia taravatua. To unai be hegeregere a? Ranu mai mase muramurana galasi ta do oi inua mai emu moale ida a, badina be tau ta ese oi ia hamaoroa galasi lalonai ranu be bada bona mase muramurana be sisina sibona?

2 Kor. 11:​14, 15: “Satani sibona ese iena kara ia senisia diba, bona ia ese diari aneruna ena kopina ia atoa diba. Unai dainai Satani ena hesiai taudia, bema edia kara idia senisia, bona taunimanima vairanai idia be kara maoromaoro taudia bamona, inai be hoa gauna, a?” (Inai ese ita ia hadibaia do ita naria namonamo, badina be Satana ena amo idia mai gaudia haida edia toana be dika momokani lasi reana. Taunimanima ia koidia dalana badana be tomadiho koikoidia idauidau iboudiai; idia haida edia toana ia senisia, kara maoromaoro gaudia hegeregeredia do idia hedinarai totona.)

2 Tim. 3:​2, 5: “Taunimanima ese . . . Dirava badinaia kara be toana sibona do idia hedinaraia, to iena anina momokani do idia negea. Inai bamona taudia ibounai dekena amo do oi raka siri.” (Ena be idia ida oi tomadiho henia taudia idia gwau Dirava idia ura henia, to bema iena Hereva be sibodia edia mauri lalonai idia badinaia lasi mai edia momokani ida, Baibel ia gwau oi rakatanidia be namo.)

Ta ese ena tamana sinana edia tomadiho ia rakatania be maoro, a?

Bema iseda tamadia sinadia ese ita idia hadibalaia gaudia be momokani Baibel amo, ita dogoatao be namo. Ena be ita davaria edia tomadiho karadia bona herevadia be Dirava ena Hereva hegeregerena lasi, to iseda tamadia sinadia ita matauraidia noho be namo. To bema oi davaria oiemu tamana sinana edia kara ta ese ia hagoreredia bona ia dainai do idia mauri daudau lasi reana, dahaka do oi karaia? Unai edia kara do oi tohotohoa bona emu natudia do oi hagoadadia idia danu do idia tohotohoa totona a, eiava oi diba gauna be emu tamana sinana do oi hamaorolaidia mai emu hemataurai ida, a? Unai hegeregerena, Baibel ena hereva momokani ita dibalaia neganai, maduna ta ita abia. Bema mai dalana, ita dibalaia gaudia be iseda bese taudia ita hadibalaidia be namo. Namona be inai ita lalohadailaia: Dirava ita lalokau henia momokani eiava? Ita ura momokani Dirava ena Natuna do ita kamonai henia eiava? Bema oibe, reana namona be iseda tamadia sinadia edia tomadiho do ita rakatania, tomadiho momokani do ita badinaia totona. Iseda tamadia sinadia ita lalokau henidia bada to Dirava bona Keriso ita lalokau henidia maragi be maoro lasi, ani? Iesu ia gwau: “Bema tau ta ena tamana o ena sinana ia ura henia bada, to lau dekenai ia ura henia maragi, ia be lau dekenai do ia hegeregere lasi. O bema tau ta ena natuna mero o ena natuna kekeni ia ura henia bada, to lau be ia ura henia maragi, ia be lau dekenai do ia hegeregere lasi.”​—⁠Mat. 10:37.

Ios. 24:14: “Taunabunai, Iehova garina ba gari, ia isiaina ba lao heni mai momokanimui bona mai kamonaimui ida. Senemui ese Eufrate sinavaina unukahana ai bona Aigupto ai e toma henidia diho diravadia ba rakatanidia, Iehova isiaina ba lao heni.” (Anina be edia tubudia edia tomadiho do idia negea, ani? Iehova ese edia tomadiho do ia abia dae totona, namona be unai tomadiho gunana lalonai idia tomadiho henidia laulaudia do idia negea bona unai gau ura henidia urana be edia kudouna amo do idia huria oho.)

1 Pet. 1:​18, 19: “Umui diba namonamo, guna umui be emui sene taudia edia anina lasi karadia umui karaia. To Dirava ese inai karadia dekena amo umui ia hamauria. Umui ia hamauria ena davana be do idia dika ore gaudia lasi, hegeregere siliva o golo. Lasi momokani. Umui ia hamauria dekena amo gauna be Keriso ena rarana. Inai rara be davana bada herea gauna. Keriso be mamoe natuna goevagoeva momokani hegeregerena, ia be maka dikana ta lasi, bona toto ta lasi.” (Unai hegeregerena, Keristen taudia ginigunadia ese edia tubudia edia kara idia rakatania, badina be unai kara amo mauri hanaihanai idia davaria diba lasi. Keriso ena boubou gauna idia laloa bada dainai, idia ura lasi edia mauri be anina lasi gauna ai do ia lao Dirava idia hanamoa lasi dainai. Namona be ita danu be unai lalohadai ita abia, ani?)

Tomadiho idaudia ida gaukara hebou karana be Baibel ese edena bamona ia gwauraia?

Tomadiho gunalaia taudia, idia kara maoromaoro koikoi to Dirava idia matauraia lasi taudia unai, be Iesu ese edena bamona ia lalodia? Ia hereva henidia, ia gwau: “Bema Dirava be umui emui Tamana, be lau do umui lalokau henia, badina be Dirava dekena amo lau mai, bona hari lau noho inai. Lau be sibona lau mai lasi, ia ese lau ia siaia. . . . Umui be emui tamana Satani dekena amo umui mai, bona umui ura emui tamana ena ura dikadia do umui karaia. Hamatamaia nega dekena amo ia be alaia tauna, bona hereva momokani be ia badinaia lasi, badina iena lalona dekenai hereva momokani be lasi. Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana. Lau be hereva momokani lau gwauraia, unai dainai lau dekenai umui abidadama lasi. . . . Umui be umui kamonai lasi, badina umui be Dirava ena natudia lasi.”​—⁠Ioane 8:​42-47.

Taunimanima haida be Dirava ese ia gwauraia dika karadia idia karaia eiava unai kara idia karaia taudia idia abidia dae; bema Dirava ena hesiai taudia be idia ida tadikaka bamona idia tomadiho hebou, unai be Dirava bona ena taravatu maorodia badinaia karana, a? “Iseda ekalesia tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi. . . . Lebulebu taudia, kaivakuku idia tomadiho henia taudia, heudahanai taudia, eiava lebulebu hahine edia kara idia tohotohoa tatau, eiava tatau ese tatau danu hemarai karadia idia karaia taudia. Eiava henaoa taudia, mataganigani taudia, kekero taudia, edia hereva dekenai haida idia hadikaia taudia, eiava haida edia gau idia dadia taudia. Inai bamona taudia ta lasi be Dirava ena Basileia do ia davaria diba.” (1 Kor. 5:11; 6:​9, 10) “Bema umui ura tanobada danu umui turana karaia neganai Dirava umui tuari henia noho.” (Iak. 4:4) “Iehova ese kara dika e inai heniamu taudia na e ura henidiamu; ia ese ena helaḡa taudia e hamauridia.”​—⁠Sal. 97:10.

2 Kor. 6:​14-17: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? Edena bamona diari bona dibura idia noho hebou diba? Keriso bona Satani be edena bamona idia laloa tamona diba? Abidadama tauna bona abidadama lasi tauna ruaosi be idia hegeregere diba, a? Dirava ena dubu helaga bona kaivakuku be edena bamona idia hakapua tamona diba? . . . Lohiabada ma ia hereva, ia gwau, ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri. Vadaeni umui do lau abia dae.’ ”

Apok. 18:​4, 5: “Gado ta guba dekena amo lau kamonai, ia gwau, ‘Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina! Badina be iena kara dikadia be momo herea momokani, ororo bamona idia daekau lao ela bona guba dekenai. Bona Dirava ese iena kara dikadia do ia laloaboio lasi.’ ” (Inai sinado badana “Babulono Badana” itaia.)

Tomadiho oreana ta lalonai ita noho be gau badana eiava?

Taunimanima be edia tomadiho oreadia lalodiai idia tomadiho hebou bona idia gaukara hebou be dika lasi. To unai orea momo ese huahua dikadia idia havaraia, bona edia tomadiho daladia be hahediba koikoi herevadia latadiai idia haginia; edia orea taudia be lauma dalanai idia hakaudia momokani lasi, to idia hadibadia anina lasi karadia idia karaia loulou totona; orea gunalaidia taudia ese orea taudia idia biagudia, sibodia edia namo davaria totona; moni gogoa karadia bona dubu mai hairaidia idia laloa bada, abidadama bona kara mamoromaoro idia laloa maragi; edia orea taudia momo be kara maoromaoro taudia bamona idia hedinarai, to kara dika idia karaia hehuni. Momokani, kara maoromaoro tauna ia ura lasi unai bamona orea ta ena memba ai do ia lao. Tomadiho momokani be idau vaitani, unai tomadiho hegeregeredia lasi. To, Baibel ena hahegani badinaia totona, tomadiho momokani taudia be edia orea lalonai idia tomadiho hebou be namo.

Heb. 10:​24, 25: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Unai hahegani badinaia totona, namona be Keristen heboudia ita karaia, ita lao henidia loulou diba totona. Unai dala amo, ita ta ta ena namo ena namo ita tahua sibona lasi to iseda lalokau ita hahedinarai heheni danu.)

1 Kor. 1:10: “Lauegu varavara taudia e, iseda Lohiabada Iesu Keriso ena ladana dainai umui lau noia, umui parara lasi. Hereva tamona do umui gwauraia, bona do umui gaukara hebou mai laloa tamona danu.” (Bema orea taudia idia hebou lasi, bema lauma aniani be dala tamona amo idia ania lasi, bona bema edia hadibaia oreana idia matauraia lasi, idia be unai bamona idia lalo-tamona diba lasi. Ioane 17⁠:​20, 21 itaia danu.)

1 Pet. 2:17: “Keristani taudia ibounai do umui lalokau henia.” (Unai ena anina be ruma ta dekenai idia hebou loulou taudia sibodia, a? Lasi vaitani; anina be Keristen taudia iboudiai bese idauidau lalodiai idia noho, Galatia 2:​8, 9 bona 1 Korinto 16:19 ese idia hahedinaraia hegeregerena.)

Mat. 24:14: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Bese iboudiai be unai sivarai namona do idia kamonai diba totona, namona be Keristen taudia ese dala maorodia amo edia haroro gaukara idia karaia namonamo, bona haida ese idia gunalaidia be namo. Tanobada hegegemadai unai gaukara idia karaia hebou noho, badina be Dirava bona edia dekena taudia idia lalokau henidia dainai.)

Inai sinado badana “Orea” itaia danu.

Iseda dekena taudia ita lalokau henidia be gau badana, a?

Momokani, unai bamona lalokau be mai anina bada. (Roma 13⁠:​8-10) To Keristen taudia edia kara korikori be edia dekena taudia kara namo henidia karana sibona lasi. Iesu ia gwau taunimanima iboudiai do idia diba idia be iena hahediba taudia badina be idia lalokau heheni dainai. (Ioane 13⁠:35) Baibel lalonai idia hahedinaraia loulou unai be mai anina bada. (Gal. 6:10; 1 Pet. 4:8; 1 Ioane 3:​14, 16, 17) To Iesu ese ia hahedinaraia Dirava lalokau henia karana ena anina ese unai ena anina ia hanaia; unai lalokau hahedinaraia totona iena hahegani ita badinaia be namo. (Mat. 22:​35-38; 1 Ioane 5:3) Namona be Dirava ena Hereva ita tahua namonamo bona ita badinaia, bona tomadiho totona Dirava ena hesiai taudia ida ita hebou be namo.

Ita ta ta be Dirava ita tura henia be gau badana, a?

Momokani unai be mai anina bada. Tomadiho heboudia dekenai ita lao bona tomadiho karadia ita karaia sibona be hegeregere lasi. To namona be ita naria namonamo, badina be Iesu ena nega lalonai haida idia laloa Dirava ese ia moale henidia, to Iesu ia hahedinaraia idia kerere bada. (Ioane 8⁠:​41-44) Aposetolo Paulo ese haida ia gwauraidia, edia abidadama idia goadalaia bona idia laloa Dirava idia badinaia namonamo, to Dirava ena lalo-namo abia dalana korikori be idia diba lasi.​—⁠Roma 10⁠:​2-4.

Bema Dirava ena hahegani ita laloa maragi, ita be ia ida ita hetura heheni diba lasi bona ia ese ita ia lalo-namo henia diba lasi, ani? Iena hahegani ta be Keristen taudia ida do ita hebou loulou.​—⁠Heb. 10:​24, 25.

Ita sibona ese Baibel ita duahia be hegeregere, a?

Momokani taunimanima momo be gau momo idia dibaia, idia sibodia ese Baibel idia duahia dainai. Bema idia duahia badina be idia ura Dirava bona ena palani do idia diba maoromaoro, edia kara dainai ita hanamodia bada be namo. (Kara 17⁠:11) To namona be ita be sibona ita koia lasi; ita diba bema heduru ita abia lasi unai ibounai ena anina do ita lalo-pararalaia lasi, ani? Baibel ese dagi bada tauna ta ia gwauraia, unai tau be mai ena lalo-manau ida ia gwau namona be ma ta ese do ia durua Baibel ena peroveta herevadia edia anina do ia lalo-pararalaia totona. Vadaeni Keristen ekalesiana tauna ta ese unai bamona ia durua.​—⁠Kara 8⁠:​26-38; Filipo sivaraidia Kara 6⁠:​1-6 bona 8⁠:​5-17 dekenai itaia danu.

Momokani, bema ta ese Baibel ia duahia to ena hereva ia badinaia lasi, namo do ia davaria lasi. Bema unai hereva ia abia dae bona ia badinaia, Dirava ena hesiai taudia ida do ia hebou loulou edia kongregesen heboudia lalodiai, bona “Sivarai Namona” be idia ida do ia harorolaia taunimanima ma haida dekediai.​—⁠Heb. 10:​24, 25; 1 Kor. 9:16; Mar. 13:10; Mat. 28:​19, 20.

Ta ese tomadiho ta ta edena bamona ia tohodia diba tomadiho maorona davaria totona?

(1) Ena hahediba herevadia be dahaka latanai idia haginia? Unai hereva be Dirava ena amo eiava idia momo be taunimanima edia amo, a? (2 Tim. 3⁠:16; Mar. 7⁠:⁠7) Inai bamona oi henanadai be namo: Edena hereva Baibel lalonai ese ia hahedinaraia Dirava be Toi Tamona? Edena siri ia gwau taunimanima be mai edia mase diba lasi laumadia?

(2) Inai oi laloa: Dirava ena ladana idia gwauraia hedinarai eiava? Iesu ese Dirava ia guriguri henia, ia gwau: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai.” (Ioane 17:6) Ma ia gwau: “[Iehova] oiemu Dirava do oi tomadiho henia, ia sibona dekenai hesiai gaukara do oi karaia.” (Mat. 4:10; ma danu Deuteronomi 6⁠:13 itaia.) Oiemu tomadiho oreana ese oi ia hadibaia ‘Iehova do oi tomadiho henia,’ a? Iehova Dirava bona iena palani bona iena kara oi diba vadaeni dainai, oi laloa ia kahirakahira dekenai oi lao diba mai emu lalo-goada ida, a?

(3) Iesu Keriso abidadama henia momokani karadia idia hahedinaraia, eiava? Iesu ese sibona ena mauri ia bouboulaia ita ia hamauria totona, bona hari ia be Pavapava ai ia lao vadaeni guba dekenai. (Ioane 3⁠:36; Sal. 2⁠:​6-8) Bema unai ita laloa bada, Iesu ita kamonai henia bona ena orea taudia ia henidia gaukarana ita karaia mai eda goada ida. Tomadiho momokani taudia be mai edia abidadama unai bamona, bona edia abidadama be mai ena kara.​—⁠Iak. 2⁠:26.

(4) Ia be tomadiho karadia karaia kava dalana, eiava ia be mauri dalana, a? Anina lasi tomadiho karadia be Iehova ese ia badulaia momokani. (Isa. 1⁠:​15-17) Tomadiho momokani ese Baibel ena taravatu maorodia ia badinaia; tanobada taudia edia kara mirodia bona edia hereva mirodia ia tohotohoa lasi. (1 Kor. 5⁠:​9-13; Ef. 5⁠:​3-5) Tomadiho momokani oreana taudia ese Dirava ena lauma ena huahua idia hahedinaraia edia mauri lalodiai. (Gal. 5⁠:​22, 23) Ita diba daidia be tomadiho momokani badinaia taudia, badina be edia mauri lalodiai Baibel ena hahegani idia badinaia, edia hebou rumadia lalodiai sibona lasi, to edia ruma lalodiai, edia gaukara gabudia dekenai, sikuli dekenai, bona idia laga-ani negadiai danu.

(5) Orea taudia idia lalokau heheni momokani, a? Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Unai bamona lalokau dainai, bese idauidau taudia, taga taudia bona ogogami taudia danu be tadikaka bamona idia kara heheni mai edia momokani ida. Edia lalokau be bada herea dainai idia be idau vaitani, taunimanima oredia hegeregeredia lasi. Bese idauidau idia tuari heheni negadiai, daidia ese edia Keristen tadikakadia tano idaudia dekenai idia lalokau henidia bada dainai idia ura lasi tuari gaudia do idia abia idia aladia mase totona? Keristen taudia ginigunadia be unai bamona.

(6) Tanobada amo ia siri momokani, a? Iesu ia gwau iena orea taudia momokanidia be “tanobada ena lasi.” (Ioane 15⁠:19) Dirava ia moalelaia dalana amo do ita tomadiho henia totona, namona be ‘tanobada ena kara mirodia dekena amo do ita raka siri.’ (Iak. 1⁠:27) Haroro taudia bona orea taudia oredia, politik lalonai idia vareai eiava moni, kohu bona tauanina ena ura gaudia idia tahua momo taudia, be unai bamona ita gwauraidia diba lasi, ani?​—⁠1 Ioane 2⁠:​15-17.

(7) Orea taudia ese Dirava ena Basileia idia gwauraia hedinarai, a? Iesu ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mat. 24:14) Edena tomadiho ese taunimanima ia hadibadia namona be edia gavamani gunalaia taudia do idia abidadama henidia lasi to Dirava ena Basileia do idia naria be namo? Oiemu tomadiho ese oi ia hahegaegaea, Iesu ese ena aposetolo ia hadibalaidia dalana amo ruma ta ruma ta dekenai do oi haroro totona, a?​—⁠Mat. 10:​7, 11-13; Kara 5:42; 20:20.

Iehova ena Witness taudia idia laloa edia tomadiho mo sibona be maoro, a?

Rau 203-4 itaia, inai sinado “Iehova ena Witness Taudia” henunai.

Dahaka dainai taunimanima haida be mai edia abidadama, to ma haida be mai edia abidadama lasi?

Inai sinado badana “Abidadama” itaia.

Bema Ta Ia Gwau​—⁠

‘Lau ese tomadiho lau laloa lasi’

Reana inai bamona oi haere henia diba: ‘Emu hereva lau hoalaia lasi. Taunimanima momo edia lalohadai be oiemu hegeregerena. Mani lau oi hamaoroa, Nega ibounai unai bamona oi laloa eiava?’ Bena reana ma oi gwau: ‘Lau laloa momo gauna be inai: Lau davaria dubu oreadia edia hahediba herevadia badadia momo herea be Baibel lalonai idia noho lasi. (Rau 203-4 dekenai inai sinado “Iehova ena Witness Taudia” henunai idia noho herevadia oi herevalaia, oi hahedinaraia Iehova ena Witness taudia idia abia dae herevadia be idau, bona rau 199-200 dekenai idia noho herevadia amo oi hahedinaraia goevagoeva Basileia sivaraina be mai anina bada idia dekenai.)’

Rau 18-19 itaia danu.

‘Tomadiho lalonai koikoi karadia be momo’

Reana inai bamona oi haere henia diba: ‘Oibe, lau danu be unai bamona lau laloa. Momo ese dala ta idia harorolaia to dala idauna idia badinaia. To mani lau oi hamaoroa, Dahaka oi laloa Baibel dekenai? (Sal. 19⁠:​7-10)’

‘Lau be kara namo lau karaia hanaihanai. Lauegu dekena taudia lau kara maoro henidia. Unai be hegeregere lau dekenai’

Reana inai bamona oi haere henia diba: ‘Emu hereva ese ia hahedinaraia mauri oi moalelaia noho, ani? . . . Vadaeni, oi ura Apokalupo 21⁠:4 ese ia gwauraia negana lalonai do oi noho, a? . . . Mani Ioane 17⁠:3 ena hereva oi kamonaia; unai mauri namona do ita abia dalana be ia ese ia gwauraia.’

Rau 413 itaia danu.

‘Tomadiho oreadia lau ura henia lasi. Lau laloa lau sibona ese Dirava lau badinaia be gau badana’

Reana inai bamona oi haere henia diba: ‘Lau ura emu lalohadai ena badina lau diba. Oi be nega ibounai unai bamona oi laloa a? . . . Guna oi be tomadiho oreana ta lalonai oi noho, a? . . . (Bena rau 412-3 dekenai idia noho herevadia oi gwauraia.)’

‘Lauegu dubu oreana ena hahediba herevadia haida lau abia dae lasi, to lau laloa orea idauna dekenai do lau hanai be anina lasi. Lau ura egu orea lalonai do lau gaukara iena kerere hamaoromaoroa totona’

Reana inai bamona oi haere henia diba: ‘Lau moale, emu lalohadai lau oi hamaoroa dainai. Ita ibounai ita diba Dirava ese ita ia lalo-namo henia be gau badana, ani?’ Bena reana ma oi gwau: (1) ‘Dirava ena hereva metauna Apokalupo 18⁠:​4, 5 dekenai ita laloa namonamo be namo. . . . Baibel ese ia hahedinaraia, ena be unai kara dikadia ita karaia lasi, to bema unai orea ita durudia, ita danu be mai eda kerere. (Inai sinado badana “Babulono Badana” itaia danu.)’ (2) (Rau 414-5 dekenai idia noho herevadia danu oi gwauraia reana.) (3) ‘Dirava ese hereva momokani idia ura henia taudia ia tahudia noho, bona ia haboudia noho lalo-tamona ai do idia tomadiho totona. (Ioane 4⁠:​23, 24)’

‘Tomadiho iboudiai be namo; oi be mai emu, bona lau be mai egu’

Reana inai bamona oi haere henia diba: ‘Emu hereva ese ia hahedinaraia oi be lalo-namo tauna. Oi diba ita ibounai be Baibel ena sisiba ita abia be namo, bona unai dainai oi be mai emu tomadiho, ani?’ Bena reana ma oi gwau: ‘Inai siri Mataio 7⁠:​13, 14 dekenai, Iesu ena hereva amo Baibel ese sisiba namo herea ita ia henia. (Oi duahia.) . . . Dahaka dainai unai be momokani?’

Rau 408 itaia danu.

‘Bema Iesu oi abidadama henia, edena tomadiho oreana lalonai oi noho be herevana’

Reana inai bamona oi haere henia diba: ‘Momokani, Iesu ita abidadama henia be gau badana. Unai ena anina be iena hahediba herevadia iboudiai ita abia dae, ani? Ita ruaosi ita diba vadaeni, sibodia be Keristen taudia idia gwauraia taudia momo ese Keriso ena dala idia badinaia lasi.’ Bena reana ma oi gwau: (1) ‘Mani Iesu ena hereva Mataio 7⁠:​21-23 dekenai oi laloa.’ (2) ‘Dirava ena ura idia tahua bena idia badinaia taudia edia vaira dinadia do idia namo herea. (Sal. 37⁠:​10, 11; Apok. 21⁠:⁠4)’

‘Dahaka dainai umui laloa tomadiho tamona sibona be momokani?’

Reana inai bamona oi haere henia diba: ‘Momokani, tomadiho oreadia momo herea lalodiai lalo-momokani taudia idia noho. To Dirava ena Hereva ita laloa be namo. Ia ese abidadama daladia momokanidia hida ia gwauraia? Mani inai hereva Efeso 4⁠:​4, 5 dekenai oi itaia.’ Bena reana ma oi gwau: (1) ‘Unai be siri ma haida edia hereva hegeregeredia. (Mat. 7:​13, 14, 21; Ioane 10:16; 17:​20, 21)’ (2) ‘Vadaeni, unai tomadiho ita dibalaia be namo. Edena bamona ita davaria diba? (Rau 414-5 dekenai idia noho herevadia oi gwauraia reana.)’ (3) (Rau 199-200 itaia danu, inai sinado “Iehova ena Witness Taudia” henunai.)

‘Ruma dekenai egu Baibel lau duahia bona Dirava lau noia egu lalona do ia hapararaia’

Reana inai bamona oi haere henia diba: ‘Baibel ibounai oi duahia ore vadaeni, a?’ Bena reana ma oi gwau: ‘Oi duahia noho lalonai, hereva ta mai anina bada be Mataio 28⁠:​19, 20 dekenai do oi davaria. . . . Inai be mai anina bada, badina be ia hahedinaraia Keriso ese taunimanima ia hagaukaradia, Keristen taudia edia kara korikori ita ia hadibalaia totona. Unai hegeregerena, Iehova ena Witness taudia ese taunimanima idia hamaorodia, bema idia ura neganai pura ta ta iboudiai do idia lao henidia bona hora tamona bamona lalonai Baibel be idia ida do idia herevalaia hebou, davana lasi. Mani, ai karaia dalana be nega sisina lalonai do lau hahedinaraia oi dekenai.’

Rau 413-4 itaia danu.

‘Lau laloa tomadiho be taunimanima ta ta sibona ena gau sibona ena gau’

Reana inai bamona oi haere henia diba: ‘Hari inai negai taunimanima momo be unai bamona idia laloa, bona bema taunimanima haida idia ura lasi momokani Baibel ena hereva idia kamonai, ai rakatanidia bena ruma ma haida dekenai ai lao mai emai moale ida. To inai oi diba a, harihari lau be oi dekenai lau mai badina be Iesu ena oda dainai? Ia ese ena orea taudia ia oda henidia herevadia be inai . . . (Mat. 24:14; 28:19, 20; 10:40)’