Hebogahisi Bona Hemami

TAUNIMANIMA edia mauri lalonai hemami be mai anina bada. Ta ese ena hemami ia hahedinaraia neganai, iena kudouna ai idia noho gaudia, ena lalona korikori, taunimanima bona gau idauidau dekenai ena lalohadai ia hahedinaraia. Taunimanima momo ese edia mauri lalonai idia vara gaudia aukadia​—bona nega haida edia mauri dalana​—dainai edia hemami idia hunia. To Iehova ese ita ia hagoadaia, iseda lalona korikori ai kara namodia ita habadaia bena dala maorona ai unai ita hahedinaraia.​—Roma 12:10; 1 Tes. 2:​7, 8.

Ita hereva neganai, reana ita gaukaralaia herevadia ese hemami idia hahedinaraia maoro. To bema unai hereva ita gwauraia dalana ese unai hemami ia hahedinaraia lasi, reana kamonai taudia do idia laloa iseda hemami korikorina ita hahedinaraia lasi. To, bema ita hereva dalana ese hemami maorona ia hahedinaraia, iseda hereva ia hahairaia bona hanamoa bona kamonai taudia edia kudouna ia hamarerea diba.

Hebogahisi Oi Hahedinaraia. Hebogahisi be taunimanima dekenai ita hahedinaraia hemami ta. Unai dainai, Iehova ena kara namodia ita herevalaia neganai bona Iehova ena kara namo ita laloa bada karana ita herevalaia neganai, namona be iseda gado regena ese hebogahisi ia hahedinaraia. (Isa. 63:​7-9) Bona taunimanima ita hereva henia neganai, namona be iseda hereva dalana ese hebogahisi mamina ia hahedinaraia.

Lepera tauna be Iesu dekenai ia mai bona Iesu ia noia do ia hanamoa. Iesu ena gado regena ena mamina oi laloa, ia gwau: “Lau ura. Hari oi goeva.” (Mar. 1:​40, 41) Mani oi laloa danu, lagani 12 lalonai rara gorerena ia haheaukalaia hahinena ta be Iesu ena murina kahana amo ia mai bona Iesu ena dabua ia dogoatao. Hahine ia itaia ena kara ia hunia diba lasi neganai, mai heudeheude ida ia mai, Iesu ena vairana dekenai ia moru, bona taunimanima ibounai vairanai iena dabua ia dogoatao ena badina bona edena bamona ia namo ia hahedinaraia. Iesu ena hereva dalana oi laloa, unai hahine dekenai ia gwau: “Egu natuna e, oiemu abidadama ese oi ia hanamoa vadaeni, mai maino danu oi lao.” (Luka 8:42b-48) Iesu ese unai negadia ai ia hahedinaraia hebogahisi ese iseda kudouna ia hamarerea ema bona hari.

Iesu bamona, taunimanima ita hebogahisi henia momokani bona ita ura bada idia ita durua neganai, unai be idia ita hereva henia dalana ai ia hedinarai. Unai bamona hebogahisi be mai momokani ida ita hahedinaraia gauna, ita habadaia koikoi lasi. Iseda hebogahisi ese taunimanima edia kamonai karana ia haidaua diba. Ta ida ita hereva, ia ita hagoadaia, bona ena lalona ita hanamoa neganai, bona haroro gaukara lalonai ita herevalaia gaudia ibounai lalonai hebogahisi ita hahedinaraia diba.

Bema ma haida oi hebogahisi henia, emu vairana ena toana amo unai oi hahedinaraia. Hebogahisi oi hahedinaraia neganai, kamonai taudia be oi idia ura henia, taunimanima ese keru hanuaboina ai lahi idia ura henia hegeregerena. Bema emu vairana ena toana ese hebogahisi ia hahedinaraia lasi, kamonai taudia idia abia dae lasi idia oi laloa bada. Hebogahisi ita hahedinaraia kava diba lasi​—namona be ia be eda hemami korikorina.

Hebogahisi be emu gado regena ai danu ia hedinarai be namo. Bema emu gado regena be auka, emu hereva ai hebogahisi oi hahedinaraia be reana auka. To mai momokani ida oi hekwarahi neganai, do oi kwalimu. Reana inai oi diba be heduru gauna, hereva kwadogidia oi gwauraia haraga neganai hereva ena mamina ia auka. Manau dalanai hereva edia kahadia haida do oi hahedinaraia dalana oi dibaia. Unai ese oi do ia durua, emu hereva ai hebogahisi oi hahedinaraia totona.

To, mai anina bada herea gauna be oi laloa bada gauna. Bema mai momokani ida, oi hereva henia taudia oi laloa bona oi ura idia do ia durua gauna ta oi hahedinaraia, unai hemami be emu hereva dalana ai do ia hedinarai.

Emu hereva ia mauri bamona neganai kamonai taudia edia lalona ia veria, to hebogahisi be mai anina bada danu. Reana lalona ita veria sibona be hegeregere lasi; namona be kudouna ita hamarerea danu.

Hemami Ma Haida Oi Hahedinaraia. Ia lalohisihisi tauna ese lalo-hekwarahi, gari, bona daradoko ia hahedinaraia diba. Namona be iseda mauri lalonai iseda hemami badana be moale bona ma haida ita hereva henia neganai ita hahedinaraia momo. To, hemami haida ita koua be namo. Idia be Keristani kara hegeregerena lasi. (Efe. 4:​31, 32; Fili. 4:4) Hemami idauidau be ita gaukaralaia herevadia, iseda gado regena ena mamina, iseda hereva dalana, iseda vairana ena toana, bona imana ita gaukaralaia dalana amo ita hahedinaraia diba.

Baibel ese taunimanima edia hemami idauidau ia herevalaia. Nega haida idia ta ta ia gwauraia sibona. Nega haida hemami idia hahedinaraia sivarai eiava ta ena hereva amo unai ia hedinarai sivaraina ia gwauraia. Unai bamona gauna oi duahia badabada neganai, emu gado regena ese unai hemami ia hahedinaraia be mai anina bada oi bona kamonai taudia dekenai. Unai oi karaia diba totona namona be oi laloa oi be edia sivarai oi duahia taudia ta ta. To, hereva be drama lasi, unai dainai emu kara oi habadaia kava lasi. Namona be emu duahia dalana dainai oi duahia sivaraidia be kamonai taudia edia lalona ai idia mauri bamona.

Oi Herevalaia Gauna Hegeregerena. Namona be oi hahedinaraia hebogahisi bona hemami ma haida be oi herevalaia gauna hegeregerena, guna ita herevalaia ura bada bamona.

Mataio 11:​28-30 oi kehoa, bona ena hereva oi laloa. Bena Mataio karoa 23 lalonai Iesu ese taravatu hadibaia taudia bona Farisea taudia dekenai ia gwauraia hahemaoro herevadia oi duahia. Ita laloa diba lasi ia ese unai hahemaoro hereva aukadia be hemami ia hahedinaraia lasi dalanai ia gwauraia.

Dahaka oi laloa, Genese karoa 44 lalonai Iuda be ena tadina Beniamina totona ia noinoi sivaraina lalonai, edena bamona hemami idia hahedinaraia? Siri 13 ai idia hahedinaraia hemami, siri 16 ai Iuda ena hemami dika idia davaria ena badina dekenai, bona Iosepa ese Genese 45:1 ai ia hahedinaraia hemami oi laloa.

Unai dainai, herevana ita duahiduahi eiava ita hereva, anina ita havaraia totona hereva bona lalohadai sibona lasi to idia hahedinaraia hemami ita laloa danu be gau badana.