Helaga Taudia

Anina: Roman Katolik Dubu Oreana ese mase taudia haida idia gwauraidia helaga taudia, idia gwau hari idia be Keriso ida guba lalonai idia noho hebou, bona edia kara helagadia bona edia kara goevadia dainai edia ladana idia abia isi. Gunaguna unai dubu oreana ena kaunsolo badana ta ese edia abidadama herevadia idia gwauraia hedinarai neganai, idia gwau namona be taunimanima ese helaga taudia do idia guriguri henidia, do idia noidia idia dainai Dirava do idia noinoi henia, bona edia turiadia bona edia laulau do idia tomadiho henidia be namo. Tomadiho oreadia ma haida danu ese helaga taudia edia heduru idia noia. Tomadiho oreadia haida idia gwau edia memba taudia iboudiai be helaga taudia bona idia be mai edia dika lasi. Baibel ena siri momo ese helaga taudia idia gwauraidia. Keriso murinai idia raka taudia, lauma amo Dirava ese ia horodia taudia 144,000, be Baibel ese helaga taudia ia gwauraidia.

Baibel ia gwau ta be helaga tauna ita gwauraia diba lasi ela bona guba dekenai hairai ia abia vadaeni, a?

Baibel ese guba ai idia noho taudia ia gwauraidia helaga taudia. Ia gwau Iehova be “helaga [Greek gado, haʹgi·on].” (1 Pet. 1:​15, 16; ma danu Levitiko 11:45 itaia.) Iesu Keriso be tanobada ai ia noho neganai idia gwauraia “Dirava ena Helaga Tauna [haʹgi·os],” bona guba ai ia noho neganai idia gwau ia be “helaga [haʹgi·os].” (Mar. 1⁠:24; Apok. 3⁠:⁠7) Aneru danu idia ‘helaga.’ (Kara 10⁠:22) Unai Greek gado herevana idia gwauraia, tanobada ai idia noho taudia momo idia herevalaidia neganai.

Kara 9:​32, 36-41, BH: “Petro na hanua hanua e rakadia hanai ela bona Luda ai e kau, helaḡa taudia [ha·giʹous] dekediai e nohova. Iopa ai Iesu ibadinana hahinena ta e nohova, ladana na Tabita . . . e mase. . . . [Petro] ese mase hahinena e haḡerea, eto, Tabita e, a tore isi. Bena matana e noga, Petro e itaia, e helai tore. Bena Petro ese imana ai e abi, e haginia tore. Bena helaḡa taudia bona vado hahinedia e boiridia, mai maurina ida e henidia.” (Unai negai unai helaga taudia be guba ai idia do daekau lasi, bona Petro bamona taudia sibodia lasi to taunimanima idaudia haida danu be helaga taudia idia gwauraidia.)

2 Kor. 1:1; 13:​13, BH: “Lau Paulo, Keriso Iesu ena aposetolo taugu Dirava ena ura dainai, varavarada Timoteo ida, Dirava ena ekalesia taumui Korinto ai, bona helaḡa taumui iboumui ai Akaia tanona idoinai, a tore henimuimu.” “Helaḡa taudia iboudiai ese e hahenamo henimuimu.” (Keristen taudia ginigunadia iboudiai, Keriso ena rarana ese ia hagoevadia bona Dirava ese ia abidia hidi iena hesiai gaukara do idia karaia bena Keriso ida do idia noho hebou totona taudia be helaga taudia idia gwauraidia. Idia naria lasi ela bona idia mase murinai bena unai bamona idia gwauraidia.)

Baibel ese ia hahedinaraia ta ese “helaga taudia” ia guriguri henidia ia dainai Dirava do idia noia totona be maoro, a?

Iesu Keriso ia gwau: “Inai bamona do umui guriguri. ‘Aiemai Tamana e, guba dekenai oi noho, . . . ’ ” Unai dainai ita guriguri neganai namona be Tamana ita guriguri henia. Iesu be ma ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona. Bema gau ta lauegu ladana dekenai umui noia, lau be do lau karaia.” (Mat. 6⁠:9; Ioane 14⁠:​6, 14) Unai amo Iesu ese ia hahedinaraia idau tauna ta ena amo Dirava ita guriguri henia diba lasi. Aposetolo Paulo ia gwau: “Keriso Iesu ia mase, to ma ia toreisi lou. Ia be Dirava ena imana idiba kahana dekenai ia noho, bona ita totona Dirava dekenai ia noinoi noho!” “Ia be mai ena siahu, iena ladana dekenai Dirava idia lao gwauraia taudia do ia hamauridia. Badina be inai: ia noho hanaihanai, bona ia ese inai taudia totona Dirava ia noia hanaihanai.” (Roma 8⁠:34; Heb. 7:25) Bema ita ura momokani Dirava ese iseda guriguri do ia kamonai, namona be iena Hereva lalonai ia gwauraia dalana amo ita guriguri henia, ani? (Rau 271 itaia danu, inai sinado “Maria” henunai.)

Ef. 6:​18, 19, BH: “Ḡuriḡuri bona noinoi iboudiai Lauma lalonai ba gwaurai, nega idoinai. Ba gima malaka-malaka; helaḡa taudia daidiai ba noinoi, lau daigu ai danu ba noinoi, baina haroro negadia ai sivarai namo ena hereva hehunidia baina hahedinarai ḡoevaḡoeva.” (Paulo ese Keristen taudia ia hagoadadia helaga taudia dainai do idia guriguri totona; ia gwau lasi do idia guriguri henidia eiava idia edia amo do idia guriguri. New Catholic Encyclopedia bukana [1967, Vol. XI, p. 670] ia gwau: “T[aravatu] M[atamatana] lalonai idia gwauraia guriguridia momo herea, taunimanima ta ta sibodia edia bona hebou lalodiai idia gwauraia guriguridia, be Tamana Dirava dekenai idia gwauraidia, Keriso ena amo.”)

Roma 15:​30: “Egu varavara taudia e, umui dekenai lau noinoi, iseda Lohiabada Iesu Keriso dainai bona Lauma Helaga ese ia henia lalokauna dainai, lau danu Dirava dekenai do umui guriguri goadagoada lau totona.” (Helaga tauna aposetolo Paulo ena Keristen varavaradia danu be helaga taudia; ia noidia idia be ia dainai do idia guriguri. To mani inai oi laloa, Paulo ese unai helaga taudia ia guriguri henidia lasi, bona ena be idia be ia dainai idia guriguri, to ia sibona ese Tamana ia guriguri henia noho danu. Efeso 3⁠:​11, 12, 14 itaia danu.)

“Helaga taudia” edia turiadia bona edia laulau tomadiho henidia karana be edena bamona ita laloa be maoro?

New Catholic Encyclopedia bukana ia gwau: “Mase taudia edia turiadia tomadiho henidia karana hamomokania herevana be T[aravatu] G[unana] lalonai ita davaria diba lasi; bona T[aravatu] M[atamatana] ese mase taudia edia turiadia ia gwauraia momo lasi danu. . . . [Dubu Oreana ena hahediba herevadia torea tauna badana] Origen ia laloa unai kara be etene taudia edia kara ta, tanobada gauna matauraia karana unai.”​—⁠(1967), Vol. XII, pp. 234, 235.

Baibel ia gwau Dirava ese Mose ia guria, bona ia guria gabuna be tau ta ia diba lasi ema bona hari. (Deut. 34⁠:​5, 6) To Iuda 9 ia gwau Mikael, aneru edia kwarana, be Diabolo ida Mose ena tauanina idia hepapahuahulaia. Badina be dahaka? Baibel ese ia hahedinaraia goevagoeva Dirava ese Mose ena tauanina unai bamona ia hunia taunimanima ese do idia davaria diba lasi totona. Reana Diabolo ia ura taunimanima be Mose ena mase tauanina dekenai do ia hakaudia lao, do idia abia bena taunimanima vairadiai do idia atoa hedinarai idia tomadiho henia totona, ani?

Inai sinado badana “Kaivakuku” henunai idia noho herevadia oi itaia, idia haida be “helaga taudia” edia laulau tomadiho henia karana herevadia.

Dahaka dainai Katolik taudia edia “helaga taudia” edia laulau dekenai diari kuborudia (heilou) ese edia kwaradia idia gegea?

New Catholic Encyclopedia bukana ia gwau: “Helaga taudia edia laulau momo dekenai ia hedinarai gauna ta be ori kuboruna mai diarina, helaga tauna ena kwarana ia gegea gauna. Unai gau be Keristen negana be do lasi neganai idia karaia matamaia. Helene taudia ese edia laulau ai unai gau idia torea; etene taudia idia tohotohodia unai. Nadinadi mai edia kala idauidau amo idia karaia laulaudia bona moni dekenai idia koroa laulaudia, dirava idauidau, Neptune, Jupiter, Bacchus bona Apollo (dina diravana) edia laulau, dekenai unai diari gauna [heilou] ia noho.”​—⁠(1967), Vol. XII, p. 963.

The New Encyclopædia Britannica bukana ia gwau: “Helene taudia bona Roma taudia ese dina diravana ladana Helios ena laulau bona Roma ena pavapava edia laulau idia torea neganai, edia kwarana dekenai kwara gauna mai diarina idia torea. Unai kara be etene taudia edia amo ia mai karana, unai dainai Keristen taudia ginigunadia ese unai bamona laulau idia torea lasi, to gabeai Keristen pavapavadia edia laulau idia torea neganai edia kwarana ataiai ori kuboruna ta idia torea. Lagani 350 A.D. bamona murinai, Keriso ena laulau idia torea neganai unai ori kuboruna mai diarina idia torea . . . lagani momo murinai, lagani 500 A.D. murinai, Maria, Haneulato Rami-hebou, bona helaga taudia ma haida edia laulau dekenai heilou idia torea.”​—⁠(1976), Micropædia, Vol. IV, p. 864.

Keristen tomadihona bona etene taudia edia toa ita haboudia be maoro, a?

“Edena bamona diari bona dibura idia noho hebou diba? Keriso bona Satani be edena bamona idia laloa tamona diba? Abidadama tauna bona abidadama lasi tauna ruaosi be idia hegeregere diba, a? Dirava ena dubu helaga bona kaivakuku be edena bamona idia hakapua tamona diba? Badina ita be Mauri Dirava ena dubu helaga! . . . ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri. Vadaeni umui do lau abia dae. Lau be umui emui Tamana do lau noho, bona lauegu natuna, tau bona hahine, umui do lau halaoa. Siahu ibounai Lohiabadana be unai bamona ia hereva.’ ”​—⁠2 Kor 6⁠:​14-18.

Tomadiho oreana ta ena orea taudia iboudiai be helaga taudia a, bona unai dainai idia be mai edia dika lasi, a?

Momokani, aposetolo edia negai, Keristen kongregesen taudia iboudiai be helaga taudia. (1 Kor. 14⁠:​33, 34; 2 Kor. 1⁠:1; 13⁠:​13, BH) Baibel ia gwau Dirava ese ‘edia kara dika ia gwauatao’ bona ‘ia boiridia iena helaga taudia ai do idia lao totona.’ (Kara 26⁠:18; 1 Kor. 1⁠:⁠2) To idia gwau lasi idia be mai edia dika lasi. Idia be kara dika tauna Adam ena bese ai idia vara. Adam ena amo dika idia abia, unai dainai kara maoromaoro idia karaia toho dalana be auka, aposetolo Paulo be mai ena lalo-manau ida ia hereva bamona. (Roma 7⁠:​21-25) Bona aposetolo Ioane ia gwau: “Bema ita gwau ita kara dika lasi, ita sibona ita koia noho, bona hereva momokani be ita lalonai ia noho lasi.” (1 Ioane 1⁠:⁠8) Unai dainai, ena be Baibel ese Keriso murinai idia raka momokani taudia ia gwauraidia helaga taudia, to tauanina dekenai idia do noho neganai kara dika ibounai amo idia goeva lasi.

Keristen korikori taudia iboudiai be helaga taudia a, bona idia iboudiai edia helaro be guba dekenai do idia mauri, a? Rau 146-53 dekenai idia noho herevadia ese unai henanadai idia haerelaia.

Bema Ta Ia Gwau​—⁠

‘Oi laloa helaga taudia idia noho, a?’

Reana inai bamona oi haere henia diba: ‘Edena helaga taudia oi gwauraidia?’ Oi hereva henia tauna ese Maria eiava aposetolo taudia bema ia gwauraidia, reana unai murinai oi gwau: (1) ‘Oibe, Buka Helaga ese ia gwauraidia, bona unai hereva lau abia dae. To hari inai negai idia karaia karadia bona edia kara ena anina ita dekenai lau laloa bada; oi danu oi laloa bada a? . . . Buka Helaga ese edia kara ia gwauraia; lau ura ena hereva ta lau hahedinaraia oi dekenai. (Apok. 5⁠:​9, 10)’ (2) ‘Unai bamona gavamani ena siahu henunai taunimanima be edena bamona mauri do idia abia? (Apok. 21⁠:​2-4)’

Eiava (bema guna oi be Katolik tauna) inai bamona oi hereva diba: ‘Lagani momo lalodiai helaga taudia hanamodia karadia lau karaia bona lau guriguri henidia loulou. To gabeai Buka Helaga ena hereva ta lau duahia neganai lauegu kara lau tahua namonamo. Mani, lau ura unai hereva lau hahedinaraia oi dekenai. (Rau 184-5 itaia.)’