Ta ese Ita Ia Hamauria be Namo!
PENNSYLVANIA, U.S.A. dekenai, maini ta be Pittsburgh kahirakahira ai ia noho. Nega ta ai, unai maini be abata ranu ese ia koua. Tatau 9 be guri ena dobu 73 mita henunai idia gaukara noho lalonai unai ia vara, bona daekau dalana be ia auka dainai, idia be ranu ia vareai lasi gabu maragina ta dekenai idia naria noho. Dina toi murinai, idia be guri amo idia abia raka-lasi bona idia namo. Daidia ese unai tatau 9 idia hamauria?
Heduru taudia be maini ena mapu haida bona masini ta ladana Global Positioning System (eiava GPS) sibona idia gaukaralaia lasi, to 65 sentimita guri badana ta idia geia. Bena keij ta (laulau dekenai itaia) be unai guri lalonai idia atoa diho ela bona unai tatau idia davaria. Bena heduru taudia be unai keij amo unai tatau tamona tamona idia abia raka-lasi. Unai tatau idia moale bada bona heduru taudia idia tanikiu henia.
Reana ita be unai tatau 9 ese idia davaria hekwakwanai o dika badana ma ta ita davaria lasi. To, ta ese iseda gorere, buruka, bona mase amo ita ia hamauria be namo. Dirava ia badinaia tauna Iobu ia gwau: “Ita ibounai, hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea. Ita tubu, vadaeni karaharaga ita kakoro, uma ena avadia bamona. Dina ena laulau bamona ita boio haraga, ita noho daudau lasi.” (Iobu 14:1, 2) Ena be lagani 3,500 bamona gunanai Iobu be unai hereva ia gwauraia, to hari inai negai, unai hereva ena anina be ia guguru noho, badina taunimanima be idia mase. Herevana edeseniai ita noho o eda tauanina ita naria namo herea, to ta ese gorere, buruka, bona mase amo ita ia hamauria be namo.
Saiens taudia bona ma haida idia gaukara goada, taunimanima edia mauri lagani idia halataia totona. Orea ta ia gwau: “Ai gaukara goada mase ai halusia bona taunimanima do idia mase lasi totona.” Herevana saiens taudia edia aonega ia bada ia lao bona idia ura gau idauidau idia karaia, to idia ese eda mauri lagani idia halataia diba lasi. Unai dainai, lagani 3,500 gunanai, Mose ese ia gwauraia mauri lagani 70 o 80 ita hanaia lasi.—Salamo 90:10.
Herevana oi be Iobu 14:1, 2 ena hereva—mauri bona mase herevadia—oi abia dae o lasi, to lagani momo idia hanaia murinai, oi danu be emu turadia, famili, ruma, bona oi karaia gaudia idauidau amo do oi daudau, “dina ena laulau bamona [do oi] boio haraga”—anina be nega ta do oi mase. Idaunegai Israela ena aonega tauna King Solomona ia gwau: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi, bona taunimanima ese mase taudia idia laloaboio momokani.”—Hadibaia Tauna 9:5.
Baibel ese ia hahedinaraia, mase be mai ena “siahu taunimanima ibounai edia latanai ia noho”—king ta be taunimanima ibounai ia lohiaia bamona. Oibe, taunimanima be mase idia inai henia dainai, idia ura ta ese idia ia durua be namo. (Roma 5:14; 1 Korinto 15:26, BHğ) Inai tanobada dekenai, nega dikadia lalonai, taunimanima idia durua taudia mai edia diba bada bona masini idauidau edia heduru karana be nega sisina sibona. To, taunimanima edia Havaraia Tauna, Iehova Dirava be dala ta ia karaia heduru ita abia hanaihanai totona.
[Picture Credit Line on page 3]
Photo by Gene J. Puskar-Pool/Getty Images