Iehova Ena Hebogahisi ese Lalo-Metau amo Ita Ia Hamauria

“Lau oi hanamoa, Dirava e, oiemu lalokau hebogahisi hegeregerena. Oiemu hebogahisi momo amo lauegu kerere oi kokidia.”​—SALAMO 51:1.

1, 2. Iehova ena hesiai tauna ta ese kara dika badana ta ia karaia neganai, ena mamina be edena bamona?

IEHOVA ena taravatu ita hamakohia neganai ita laloa lasi dika do ita davaria lasi. Unai ia hedinarai goevagoeva Dirava dekenai dika badana ta ita karaia neganai! Ena be reana lagani momo lalodiai mai iseda abidadama danu ena hesiai gaukara ita karaia, to bema iena taravatu ta ita hamakohia do ita lalohisihisi bada eiava do ita lalo-metau bada. Reana ita laloa Iehova ese ita ia rakatania bona iena hesiai gaukara ita karaia be maoro lasi.

² Idau negai, Israel ena Pavapava David ena lalohadai be unai bamona. Dahaka dainai unai bamona mamina ia abia?

Kerere Ta be Kara Dika Badana ai Ia Lao Diba

³ David ese Dirava ia lalokau henia to ia kara kerere dainai kara dika badadia ia karaia. (Galatia 6:1 itaia danu.) Unai bamona do ia vara goevadae lasi taudia iboudiai dekenai, bona do ia vara haraga diba ta ese ma taunimanima haida ia biagudia neganai. David be taga momo pavapavana, taunimanima idia laloa bada bona ena siahu be bada. Ta ese iena hereva ia hakoikoia toho be mai garina, ani? Mai edia diba taudia idia hegaegae iena gaukara idia karaia totona, bona mai edia ura danu taunimanima be iena hereva hegeregerena idia karaia. To, David ia kerere badina adavana momo ia abia bona taunimanima ia duahidia dainai.​—Deuteronomi 17:​14-20; 1 Sisiga 21:1.

3, 4. David be ia taga noho neganai, dahaka ia vara ia dekenai?

⁴ Ia taga noho negana lalonai, David be Dirava bona taunimanima dekediai kara dika badadia haida ia karaia. Oibe, ia kara dika murinai ma kara haida ia karadia, hegeregerena Satana ese ia karaia dabuana ta ena koton ia kwatudia hebou bamona! Ena Israel bese taudia ese Amono taudia idia tuari henidia lalonai, ia ese ena ruma guhina dekena amo Uria ena hairai adavana, Bataseba ia digu neganai, ia raraia noho. Uria be tuari dekenai, unai dainai pavapava ena oda dainai Bataseba idia mailaia pavapava ena ruma badana dekenai bona ia danu idia heudahanai. Gabeai David ia gari badina ia kamonai unai hahine be mai bogana! David ese Uria be tuari amo ia boiria mai, ia ura Bataseba danu do idia mahuta hebou bona do ia laloa unai natuna be iena. Ena be David ese unai tauna ia hakekeroa, to Uria ia ura lasi ena adavana danu ia mahuta hebou. Ia gari bada dainai, David be hehuni dalanai ami biaguna tauna Ioab dekenai oda ia henia, ia gwau Uria be tuari ia auka gabunai do ia atoa do idia alaia mase totona. Uria be tuari dekenai idia hamasea, bona iena vabu be vaia edia kara ia taitailaia negana ia badinaia, bona ia be mai bogana taunimanima idia do diba lasi neganai, David ese ia adavaia.​—2 Samuel 11:​1-27.

5. David be Bataseba danu idia heudahanai murinai dahaka ia vara, bona iena kara dikadia dainai dahaka ia diba?

⁵ Peroveta tauna Natan dekena amo, Dirava ese David ena kara dikadia ia hahedinaraia, ia gwau: “Oi sibona emu ruma lalona amo dika do lau havaraia oi latanai.” Unai hereva hegeregerena, Bataseba ia havaraia natuna ia mase. (2 Samuel 12:​1-23) David ena natuna mero ginigunana, Amnon, ese ena taihuna Tamara ia hadikaia bona murinai Tamara ena taihuna ese Amnon ia alaia mase. (2 Samuel 13:​1-33) Pavapava David ena natuna, Absalom, ese ena tamana ena lohia dagina ia henaoa toho bona David ena adavana haida danu idia mahuta hebou dainai ena tamana ia hahemaraia. (2 Samuel 15:1–16:22) Israel sibodia idia tuari heheni lalonai Absalom ia mase. (2 Samuel 18:​1-33) To, ena be David ia kara dika, to unai amo manau ia diba, bona ia diba iena hebogahisi Diravana kahirakahira dekenai ia noho be gau badana. Bema kerere ta ita karaia, namona be mai manau danu ita helalo-kerehai bona Iehova ita kahirakahira henia.​—Iakobo 4:8 itaia danu.

6. Dahaka dainai Pavapava David ena kerere be kara dika badana?

⁶ David be Israel ena pavapava bona Iehova ena Taravatu ia diba dainai ia karaia karana be kara dika bada. (Deuteronomi 17:​18-20) Ia be Agupito taudia edia farao eiava Babulono taudia edia pavapavana ta bamona lasi, idia be Dirava ena taravatu idia diba lasi dainai ia ura lasi karadia haida idia karaia noho. (Efeso 2:12; 4:18 itaia danu.) Iena bese be gwauhamata idia karaia Iehova dekenai bona David be unai bese tauna ta dainai, ia diba heudahanai bona ala-ala karadia be kara dika badadia. (Esodo 20:​13, 14) Keristen taudia danu be Dirava ena taravatu idia diba. To, David hegeregerena, idia haida be taravatu idia hamakohia badina Adam dekena amo kara dika idia dekenai ia hanai dainai, idia manoka dainai, bona hedibagani idia dadaraia lasi dainai. Bema unai ia vara ita ta dekenai, namo lasi dibura bamona karana lalonai do ita noho badina unai neganai lauma gaudia do ita itaia lasi bona lalo-metau bada amo do ita honu.

Dika Gwauraia Hedinarai ese Namo Do Ia Havaraia

⁷ Bema Dirava ena taravatu ia utua kara dika badana ta ita karaia, reana taunimanima dekenai bona Iehova dekenai danu, iseda kara dikana ita gwauraia hedinarai be ia auka. Bema unai bamona dahaka do ia vara diba? Salamo 32 ai, David ia gwau: “Egu kara dika lau gwauraia hedinarai lasi neganai, lauegu tauanina ia manoka, dina ibounai lau ganagana dainai. Badina be [Iehova] imana metauna be lau dekenai ia noho, dina bona hanuaboi ai danu; egu tauanina be ia kakoro, lahara negana ena dina siahu ese lau ia raraia bamona.” (Siri 3, 4) Ia kerere tauna David ese ena kara dika ia hunia toho dainai bona ena lalona ena mamina dikana ia koua toho dainai, ena tauanina ia hametaua bada. Oibe, reana lalona dekenai bona tauanina dekenai gorere ia davaria. To ita diba gauna be, ena moale ia haboioa. Bema ita ta be unai bamona namona be dahaka ita karaia?

7, 8. (a) David ese ena kara dikadia ia hunia toho neganai, dahaka ia vara? (b) Iseda dika ita gwauraia hedinarai bona ita rakatanidia ena badina be dahaka?

⁸ Iseda kara dika be Dirava dekenai ita gwauraia hedinarai neganai reana do ia gwauatao bona lalo-maino do ita abia diba. Ane amo David ia gwau: “Gabeai, lauegu kara dika lau gwauraia hedinarai oi dekenai, bona lauegu kerere lau hunia lasi. Lau gwau: ‘Lauegu kara dika dainai do lau gwauraia hedinarai Iehova dekenai.’ Bona oi sibona ese lauegu kara dika edia kerere oi gwauatao.” (Salamo 32:5) Kara dika ta oi hunia dainai oi lalo-metau, a? Dala namona be unai dika oi gwauraia hedinarai bona oi rakatania, bena Dirava ena hebogahisi oi tahua, ani? Namona be kongregesen elda taudia oi boiridia mai emu lauma gorerena idia hanamoa totona, ani? (Hereva Lada-isidia 28:13; Iakobo 5:​13-20) Oiemu helalo-kerehai karana do idia abia dae, bona sisina sisina emu Keristen moale karana do oi abia lou diba. David ia gwau: “Ena gwau-edeede dikana Dirava ese ia gwauatao tauna ia namo, ena kara dika ia koua tauna unai. Iehova ese ia habadelaia lasi, bona ena laumana dekenai koikoi ia noho lasi tauna ia namo.”​—Salamo 32:​1, 2, NW.

9. Salamo 51 be edena negai idia torea bona badina be dahaka?

⁹ David bona Bataseba idia kara dika dainai Iehova Dirava dekena amo davana dikana idia abia be maoro. Ena be edia kara dika dainai ia hamasedia diba, to Dirava ese ia hebogahisi henidia. Basileia gwauhamatana dainai danu ia ese David ia hebogahisi henia. (2 Samuel 7:​11-16) Salamo 51 dekenai, ia hahedinaraia Bataseba dekenai ia kara dika dainai David ia helalo-kerehai. Peroveta tauna Natan be David ena lalona ia hamarerea, bona ia diba ia ese Dirava ena taravatu ia hamakohia bada, unai murinai ia helalo-kerehai pavapavana David ese unai salamo ia torea. Gari lasi dekenai Natan be David dekenai ena kara dika ia gwauraia hedinarai, hari inai negai danu, gari lasi dekenai dagi idia abia Keristen elda taudia be unai bamona idia karaia. Bema ia ura David ese Natan ena hereva do ia gwauraia koikoi diba bona oda ia henia diba idia hamasea totona, to mai ena manau danu pavapava ese ena dika ia gwauraia hedinarai. (2 Samuel 12:​1-14) Salamo 51 dekenai iena guriguri herevana amo Dirava dekenai iena kara dika ia gwauraia hedinarai, danu bema kara dika ita karaia dainai Iehova ena hebogahisi ita ura abia, namona be unai guriguri herevana ita lalohadailaia namonamo.

Iseda Kara Hegeregerena Dirava Ena Hahemaoro Do Ita Abia

¹⁰ David be ena kara dika ia gwauraia maragi lasi, to ia noinoi inai bamona: “Lau oi hanamoa, Dirava e, oiemu lalokau hebogahisi hegeregerena. Oiemu hebogahisi momo amo lauegu kerere oi kokidia.” (Salamo 51:1) David be ia kara dika neganai, Dirava ena Taravatu ena hetoana ia hanaia. To, bema Dirava ese Ena lalokau-hebogahisina, eiava ena abidadama lalokauna amo ia lalo-namo henia, lauma dalanai ia namo lou diba. Guna, Dirava ena hebogahisi karadia be momo, unai dainai unai helalo-kerehai pavapavana be mai ena abidadama iena Havaraia Tauna ese iena kara dika do ia gwauatao.

11. Herohemaino Dinana ai idia karaia boubou karadia ese dahaka idia hahedinaraia, bona hari inai negai, dahaka ita karaia hahemauri ita abia totona?

¹¹ Herohemaino Dinana dekenai idia bouboulaia gaudia amo Iehova ese ia hahedinaraia dala ia noho helalo-kerehai taudia edia kara dika amo ia hagoevadia totona. Harihari ita diba ita ia hebogahisi henia bona iseda kara dika ia gwauatao diba, badina ita abidadama Iesu Keriso ese ena mauri ia bouboulaia ita totona. Ena be idia bouboulaia gaudia idia laulaulaia gaudia ia diba lasi, to David ese Iehova ena lalokau-hebogahisi karadia dekenai ia abidadama diba, vadaeni, hari inai negai, Dirava ena hesiai taudia ia hamauridia totona Iesu ese ena mauri ia bouboulaia karana dekenai idia abidadama be gau badana!​—Roma 5:8; Heberu 10:1.

12. Ita kara dika ena anina be dahaka, bona David ena lalohadai iena kara dika dekenai be dahaka?

¹² Dirava ia noia neganai, David ma ia gwau: “Lauegu kara kerere amo lau oi huria namonamo, bona lauegu kara dika amo lau oi hagoevaia. Lauegu kerere lau diba, bona lauegu kara dika be lauegu vairana ai nega ibounai.” (Salamo 51:​2, 3) Ita kara dika neganai Iehova ia gwauraia goeva karana ita karaia lasi. David be unai bamona ia karaia. To, ia be heudahanai bona ala-ala taudia amo ia idau, idia be davana dikana do idia abia eiava gorere ta do idia abia garina dainai idia lalohisihisi, to David be ena kara dika dainai ia lalohisihisi. Ia be Iehova ia lalokau henia dainai, David be dika karadia ia inai henia. (Salamo 97:10) Ia karaia kara dikana dainai sibona ia lalo-namo henia lasi, bona ia ura Dirava ese unai dika amo do ia hagoevaia. David ia diba ia kara dika bona ena ura dikana ia koua lasi dainai ia sori bada herea. Hanaihanai iena kara dika ia laloa noho, badina Dirava ia gari henia tauna ena lalona ena mamina ese do ia gwadaia ela bona ia helalo-kerehai, ena dika ia gwauraia hedinarai, bona Iehova ena gwauatao herevana ia abia.

13. Dahaka dainai David ia gwau Dirava sibona dekenai ia kara dika?

¹³ Ia diba Iehova ese ena kara do ia tahua, badina David ia gwau: “Oi dekenai, oi sibona dekenai, kara dika lau karaia, bona dahaka be dika oiemu vairana dekenai lau karaia vadaeni, oiemu hereva dohore ia momokani, oi hahemaoro neganai oi maoromaoro totona.” (Salamo 51:4) David ese Dirava ena taravatu ia hamakohidia, iena pavapava dagina dekenai hemarai ia mailaia, bona “unai kara amo Iehova [ia] dadaraia,” ia dainai taunimanima ese Dirava idia habadelaia diba. (2 Samuel 12:14; Esodo 20:​13, 14, 17) David ena kara dika dainai Israel taudia bona iena ruma bese taudia idia lalohisihisi, hari inai negai bapatiso tauna ta ia kara dika neganai Keristen kongregesen taudia bona ena lalokau taudia idia lalo-hekwarahi eiava idia lalohisihisi hegeregerena. Ena be ia helalo-kerehai pavapavana ia diba taunimanima haida, hegeregere Uria dekenai ia kara dika, to danu ia diba Iehova dekenai ia kara dika bada. (Genese 39:​7-9 itaia danu.) David ia diba Iehova ese do ia hahemaoro henia neganai unai hahemaoro do ia maoromaoro. (Roma 3:4) Idia kara dika Keristen taudia ese iena lalohadai do idia abia be namo.

Kara Ena Badina

¹⁴ Ena be David ese ena kara ena dika ia gwauraia maragi toho lasi, to ia gwau: “Itaia! Vara ena hisihisi dekenai lau be kara kerere ai lau vara, bona kara dika ai lauegu sinana ese lau ia havaraia.” (Salamo 51:5) David ia vara neganai ia be mai ena kara dika, bona ena sinana be ia mara neganai hisihisi ia mamia unai kara dika ia noho dainai. (Genese 3:16; Roma 5:12) Ia gwau lasi ena hereva edia anina be headava taudia idia mahuta hebou, hahine ia rogorogo, bona ia mara karadia be kara dikadia. Unai karadia idia maoro badina Dirava ese headava bona natuna havaraia dalana ia havaraia; danu David ese iena sinana ena kara dika ta ia gwauraia lasi. Ia vara neganai ia be mai ena kara dika badina goevadae lasi taudia iboudiai hegeregerena, iena tamana bona sinana be mai edia kara dika dainai.​—Iobu 14:4.

15. Ena be Dirava ese iseda kara dika ena badina ia laloa, to dahaka ita karaia lasi be gau badana?

¹⁵ Bema kara dikana ta ita karaia, Dirava ita guriguri henia neganai unai kara dikana ita karaia ena badina do ita gwauraia hedinarai diba. To namo lasi lebulebu karadia ita karaia diba totona Dirava ena hebogahisi karana ita gaukaralaia kerere, eiava namo lasi ita gwau ita be mai iseda kara dika dainai, ita kara dika be iseda kerere lasi. (Iuda 3, 4) David be lalohadai dikadia ia abia bona hedibagani ia dadaraia lasi dainai ia diba ia kerere. Namona be ita guriguri hedibagani ita dadaraia totona bona iseda guriguri hegeregerena ita karaia.​—Mataio 6:13.

Ita Noinoi Ita Goeva Totona

¹⁶ Ena be oi laloa taunimanima be idia namo badina edia toana be mai edia abidadama Dirava dekenai, to Dirava ese edia kopina ia laloa lasi ia ese edia lalona korikorina ia tahua. David ia gwau: “Itaia! Oi [Iehova] moale hereva momokani sibona ita lalona dekenai ia noho dainai; bona egu lalona ena hunia gauna ai aonega bada oi hadibaia.” (Salamo 51:6) David ia kerere badina koikoi bona hehuni dalanai Uria ena mase ia hegaegaelaia bona Bataseba ena rogorogo ia hunia dainai. To, ia diba Dirava ese hereva momokani bona helaga karana ia moalelaidia. Namona be unai ese ita ia doria ita kara maoromaoro totona, badina bema ita koikoi Iehova ese ita do ia gwauraia dika. (Hereva Lada-isidia 3:32) Danu, David ia diba ena be ia be helalo-kerehai pavapavana, to bema Dirava ese ‘ena aonega do ia habadaia,’ ia be mai ena dala ena mauri ibounai lalonai Dirava ia gwauraia mauri taravatudia ia badinadia diba.

17. Ia guriguri hyssop amo idia hagoevaia ena anina be dahaka?

¹⁷ Salamo torea tauna ia diba ena tauanina ena ura dikana ia dadaraia totona Dirava ena heduru ia tahua be gau badana, bona inai bamona ia noinoi: “Mani hyssop amo kara dika amo lau oi hagoevaia, lau goeva totona; mani lau oi huria, sinou ena kurokuro lau hanaia diba totona.” (Salamo 51:7) Tubutubu gauna, hyssop (reana unai be marjoram, eiava Origanum maru) idia gaukaralaia danu guna idia abia lepera gorere idia abia taudia dekenai hagoevaia karana idia karaia neganai. (Levitiko 14:​2-7) Unai dainai David ia guriguri hyssop gauna amo ena kara dika amo idia hagoevaia be ia maoro. Ia noinoi Iehova ese ia huria bona ia goeva momokani, gau ta ese ia hamiroa lasi bena sinou ena kurokuro ia hanaia diba totona. (Isaia 1:18) Bema ita ta ita kara dika dainai iseda lalona ena mamina ese ita ia gwadaia, namona be ita diba, bema ita helalo-kerehai bona Dirava ena gwauatao herevana ita tahua, ia be dala ia kehoa Iesu ese ena mauri ia bouboulaia dainai, ita do ia huria bona hagoevaia diba.

Ia Noinoi Ia Namo Lou Totona

¹⁸ Keristen iboudiai edia lalona edia mamina idia gwadaia neganai, idia ese David ena hereva idia hamomokania diba, ia gwau: “[Iehova e,] moale bona lalo-namo amo lau oi hahonua; oi hakwaidua turiadia do idia moale.” (Salamo 51:8) David ia do helalo-kerehai lasi bona ena kara dika ia do gwauraia hedinarai lasi neganai, ena lalona ena mamina ese ia gwadaia dainai ia lalohisihisi. Ane abia bona miusik gadaralaia diba momo taudia edia moale bona lalo-namo herevadia ia moalelaidia lasi. Dirava ese ia lalo-namo henia lasi dainai, David ia lalohisihisi bada herea ena kara dika dainai, bona iena hisihisi mamina be tau ta ese ena turiadia ia hakwaidudia ena hisihisi mamina bamona. Ia ura dikadika gwauatao herevana ia abia. Ia ura lauma dalanai ia namo lou, bona guna ia abia moalena ma ia abia lou. Hari inai negai danu, ena turana karana Dirava dekenai ia hadikaia to ia helalo-kerehai kara dika tauna be guna ia abia moalena ma ia abia lou totona, Iehova ena gwauatao herevana ia abia be gau badana. Ia helalo-kerehai kara dika tauna be “lauma helaga ena moale” ia abia lou neganai, unai ese ia hahedinaraia Iehova ese ena kara dika ia gwauatao bona ia lalokau henia. (1 Tesalonika 1:6, NW) Unai be namo momokani!

19. Bema Dirava ese ena kerere iboudiai do ia kokidia, David ena mamina be edena bamona?

¹⁹ David ma ia guriguri, ia gwau: “Oiemu vairana be lauegu kara dika amo oi hunia, bona lauegu kerere iboudiai oi kokidia.” (Salamo 51:9) Iehova be kara dika karadia ia ura henidia lasi. Unai dainai, David ia noinoi iena kara dika amo ena vairana do ia hunia. Danu, pavapava ese Dirava ia noia ena kerere iboudiai do ia kokidia totona, ena kara maoromaoro lasi karadia do ia haoredia momokani totona. Iehova ese unai bamona do ia karaia neganai be namo momokani!

Bema Oi Kara Dika be Edena Bamona?

²⁰ Salamo 51 ese ia hahedinaraia bema Iehova ena gwauhamata hesiai taudia be kara dika badana ta idia karaia, to idia helalo-kerehai momokani, guriguri amo Dirava idia noia diba do ia lalo-namo henidia bona edia kara dika amo idia ia hagoevaia totona. Bema oi be Keristen ta bona kara dikana ta oi karaia, namona be manau gurigurina amo iseda guba Tamana oi noia emu dika ia gwauatao totona, ani? Oi hahedinaraia Dirava ese oi ia lalo-namo henia lou totona ia dekena amo heduru oi abia be gau badana, bona oi noia guna oi abia moalena ma ia henia lou totona. Idia helalo-kerehai Keristen taudia be mai edia abidadama danu Iehova idia guriguri henia diba unai do ia vara totona, badina “ia ese [edia] dika do ia gwauatao.” (Isaia 55:7; Salamo 103:​10-14) Momokani, namona be kongregesen elda taudia edia heduru idia tahua badina lauma dalanai idia durudia diba.​—Iakobo 5:​13-15.

21. Murina sivarai dekenai edena hereva do ita kikilaia?

²¹ Iehova ena hebogahisi ese iena taunimanima be lalo-metau amo ia hamauridia. To namona be Salamo 51 dekenai ia helalo-kerehai tauna David ena hebogahisi noinoi hereva ma haida do ita tahudia. Murina stadi ese do ia hahedinaraia Iehova ese manau kudouna ia dadaraia lasi.

Edena Bamona Do Oi Haere?

◻ Iehova ena hesiai tauna ta be kara dika badana ta ia karaia neganai, ia dekenai dahaka do ia vara diba?

◻ David ese ena kara dika ia hunia toho neganai ena mamina be edena bamona?

◻ Dahaka dainai David ia gwau Dirava sibona dekenai ia kara dika?

◻ Ita kara dika neganai, reana Dirava ese ena badina do ia laloa, to dahaka ita karaia be namo lasi?

◻ Keristen ta be kara dika badana ta ia karaia neganai, dahaka do ia karaia be gau badana?

10. Lauma dalanai David ia namo lou diba dalana be dahaka?

14. David ia gwau ia kara dika ena badina be dahaka?

16. Dirava ese dahaka kara ia moalelaia, bona namona be unai ese ita ia doria dahaka ita karaia totona?

18. David ia do helalo-kerehai lasi bona ena dika ia do gwauraia hedinarai lasi neganai, ena noho be edena bamona, bona unai ita diba neganai edena bamona ita ia durua hari?

20. Bema Keristen ta be kara dika badana ia karaia neganai, namona be dahaka do ia karaia?