Dirava ese Tanobada Ia Karaia Ena Badina be Dahaka?

1. Dahaka dainai Dirava ese tanobada ia karaia?

Iehova ese tanobada be taunimanima dekenai ia henia. Momokani, tanobada be eda noho gabuna. Unai dainai, Dirava ese Adamu bona Heva ia karaia neganai, guba ai ia atodia lasi. Badina Dirava ese aneru momo ia karaia, guba ai idia noho totona. (Iobu 38:4, 7) To, Dirava ese Adamu be paradaiso mai hairaina ta ladana, Eden umana ai ia atoa. (Genese 2:15-17) Iehova ese tano be Adamu bona gabeai do ia havaraia besedia dekenai ia henia, unuseniai idia noho hanaihanai totona.​—Salamo 37:29; 115:16 duahia.

Matamana neganai, Eden umana sibona be paradaiso. Adamu bona Heva be edia bese do idia havaraia, bona tanobada do idia hahonua. Gabeai, idia ese tanobada ibounai do idia biagua, bona paradaiso ai do idia halaoa. (Genese 1:28) Tanobada be gau ta ese do ia hadikaia diba lasi. Ia be hanaihanai taunimanima ese do idia noholaia gabuna.​—Salamo 104:5 duahia.

2. Dahaka dainai hari tanobada be paradaiso lasi?

Adamu bona Heva idia gwau-edeede dainai, Iehova Dirava ese uma murimurinai ia atodia. Unai negai paradaiso ia boio, bona taunimanima ta be ia hegeregere lasi paradaiso ia havaraia lou totona. Baibel ia gwau: “Dirava ese inai tanobada, be kara dika taudia edia imadia dekenai ia atoa.”​—Iobu 9:24.​—Genese 3:23, 24 duahia.

Iehova ia ura taunimanima ese tanobada do idia noholaia, a? Oibe! Ia be siahu ibounai Diravana dainai, ena ura do ia hagugurua momokani. (Isaia 45:18) Ia ese taunimanima edia noho dalana do ia hanamoa lou, guna ia lalohadailaia gauna be unai.​—Salamo 37:11, 34 duahia.

3. Paradaiso be edena bamona do ia vara lou?

Dirava ena King, Iesu, ia lohia neganai, tanobada be paradaiso ai do ia halaoa lou. Tuari ladana, Aramagedono ai, Iesu ese Dirava ena aneru do ia gunalaidia, bona Dirava idia inai henia taudia ibounai do idia haorea. Bena Iesu ese Satani be lagani 1,000 lalonai do ia hadiburaia. To, Dirava ena taunimanima be Iesu ese do ia hakaua bona gimaia dainai, idia be do idia roho mauri. Idia be tanobada Paradaisona ai, mauri hanaihanai do idia moalelaia.​—Apokalupo 20:1-3; 21:3, 4 duahia.

4. Edena negai hisihisi do idia ore?

Edena negai Dirava ese tanobada ai idia vara dika idauidau do ia haorea? Iesu ese nega dokona ia kahirakahira ena “toana” ia gwauraia hedinarai. Hari tanobada ai, taunimanima edia mauri idia hadikaia karadia idia vara noho dainai, ita diba ita be “inai nega oromana ena dokona” ai ita noho.​—Mataio 24:3, 7-14, 21, 22 duahia.

Iesu be lagani 1,000 lalonai, guba amo tanobada ia lohiaia neganai, ia ese hisihisi idauidau ibounai do ia haorea. (Isaia 9:6, 7; 11:9) Iesu be King gaukara sibona do ia karaia lasi, to Hahelaga Tauna Badana ena gaukara danu do ia karaia. Unai negai, Iesu ese Dirava idia lalokau henia taudia edia kara dika do ia kokia. Momokani, Dirava be Iesu amo gorere, buruka, bona mase do ia haorea.​—Isaia 25:8; 33:24 duahia.

5. Vaira nega ai, daidia be Paradaiso ai do idia noho?

Dirava ena ura idia karaia taudia be Paradaiso ai do idia noho. (1 Ioane 2:17) Iesu be ia murinai idia raka taudia ia siaia, manau taudia do idia tahua bona idia dekenai Dirava ese idia do ia abia dae dalana do idia hadibaia. Hari, Iehova be taunimanima milioni momo ia hegaegaelaia, vaira negai do ia havaraia tanobada Paradaisona ai idia noho totona. (Sepanaia 2:3) Iehova ena Witnes taudia edia Kingdom Hall ai, taunimanima idia hadibaia edena bamona ta be headava tau o hahine namona, eiava tama o sina namona ai do ia lao. Danu unuseniai, natudia be edia tama sina ida Dirava idia tomadiho henia, bona sivarai namona ese edia mauri ia hanamoa daladia idia dibaia.​—Mika 4:1-4 duahia.