Oiemu Gaukara Korikorina Dirava Vairanai Oi Hagugurua Noho, A?
“Dirava ese iseda kara ibounai do ia kota henia, kara namodia bona kara dikadia, hunia dekenai ita karaia gaudia danu.”—HADIBAIA TAUNA 12:14.
1. Iehova ese ena taunimanima dekenai ia henia gaudia be dahaka?
EDIA Havaraia Tauna Badana hegeregerena ai Iehova idia laloa noho taudia be ia ese ia durudia. Iena lauma amo ia havaraia Herevana ese idia dekenai diba ia henia dainai, idia hegeregere ia idia hamoalea. Dirava ena ura idia karaia bona ‘kara namodia edia anina idia havaraia’ lalonai, Dirava ena lauma helaga ese idia ia hakaua. (Kolose 1:9, 10) Danu, Iehova ese “hesiai tauna mai ena kamonai, bona mai ena kara maoromaoro” oreana amo lauma aniani ia henidia bona tiokratik dalanai ia hakaudia. (Mataio 24:45-47) Unai dainai, Iehova idia hesiai henia bona Basileia ena sivarai namona harorolaia gaukarana mai anina bada idia karaia lalonai, Dirava ena taunimanima be guba amo hahenamo idia abia.—Mareko 13:10.
2. Iehova ena hesiai gaukara ita laloa neganai, edena bamona henanadai idia vara diba?
2 Keristani taudia momokanidia idia moale badina Iehova ena hesiai gaukara helagana idia karaia diba. To, reana haida idia lalo-manoka bona idia laloa edia hekwarahi be anina lasi. Hegeregere, nega haida gwauhamata Keristani taudia reana idia daradara, mai edia goada ibounai ida idia karaia gaudia be mai anina eiava lasi. Ruma bese kwarana ta ese ruma bese stadi bona edia gaukara ma haida ia laloa neganai, reana ia henanadai: ‘Iehova ese ai karaia gaudia ia moalelaia momokani, a? Emai gaukara korikorina Dirava vairanai ai hagugurua noho, a?’ Hadibaia tauna ena aonega herevadia ese ita idia durua unai bamona henanadai ita haerelaia totona.
Gau Ibounai be Anina Lasi, A?
3. Hadibaia Tauna 12:8 ena hereva hegeregerena, edena bamona mauri be anina lasi momokani?
3 Reana haida idia laloa unai aonega tauna ena hereva ese taunimanima ta—matamata taudia eiava buruka taudia—idia hagoadaia lasi. “Hadibaia Tauna ia gwau, ‘Anina lasi, anina lasi, gau ibounai be anina lasi.’ ” (Hadibaia Tauna 12:8) Momokani, bema ta ia matamata negana ai Havaraia Tauna Badana ia laloa lasi, ia buruka ia lao lalonai Dirava ia hesiai henia lasi, bona ena mauri daudauna lalonai ia abia gauna tamona be buruka toana, vadaeni, ena mauri be anina lasi momokani. Unai bamona tauna dekenai gau ibounai be anina lasi, herevana Satani Diabolo ese ia biagua tanobada dikana lalonai kohu bada bona ladana bada ia abia.—1 Ioane 5:19.
4. Dahaka dainai ita gwau lasi gau ibounai be anina lasi?
4 To Iehova ena hesiai taudia mai edia kamonai, guba dekenai kohu idia haboua taudia, be idia laloa lasi gau ibounai be anina lasi. (Mataio 6:19, 20) Lohiabada ena gaukara mai ena davana namona lalonai idia gaukara goada, bona unai bamona hekwarahi be mai anina bada. (1 Korinto 15:58) To bema ita be gwauhamata Keristani taudia, inai dokona negana lalonai, Dirava ia henia gaukarana ita karaia goadagoada noho, a? (2 Timoteo 3:1) Eiava hari iseda mauri dalana be iseda dekena taudia edia mauri dalana amo ia idau momokani lasi, a? Reana idia ese tomadiho idauidau idia goadalaia, edia guriguri rumadia dekenai idia lao hanaihanai bona edia tomadiho ena dala idia badinaia. To, idia ese Basileia ena sivarai idia harorolaia lasi. Idia ese diba maoromaoro idia abia lasi dainai idia lalo-parara lasi hari inai nega be “dokona negana” bona idia laloa lasi hari inai negai ita ese karaharaga lalohadaina ita abia be namo.—Daniela 12:4.
5. Bema dina ta ta gaudia be iseda mauri ena gau badadia ai idia lao, dahaka ita karaia be namo?
5 Iesu Keriso ese iseda nega dikana ia herevalaia, ia gwau: “Noa ena nega bamona, Taunimanima ena Natuna do ia mai neganai, be unai bamona gaudia do idia vara. Badina be unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao. Taunimanima ena Natuna do ia mai neganai danu unai bamona do ia vara.” (Mataio 24:37-39) Aniani bona inuinu karadia be kerere lasi bema dala maorona ai ita karaia, bona headava be Dirava ese ia hamatamaia gauna. (Genese 2:20-24) To, bema ita itaia dina ta ta gaudia be iseda mauri ena gau badadia ai idia lao, namona be unai do ita gurigurilaia, ani? Iehova ese ita ia durua diba, Basileia ita tahua guna, kara maorona ita karaia, bona iseda gaukara korikorina ia vairanai ita hagugurua totona.—Mataio 6:33; Roma 12:12; 2 Korinto 13:7.
Gwauhamata Bona Iseda Gaukara Korikorina Dirava Vairanai
6. Edena dala badana ai, bapatiso idia abia taudia haida ese edia gaukara korikorina Dirava vairanai idia hagugurua lasi?
6 Bapatiso idia abia Keristani taudia haida be mai momokani ida idia guriguri be gau badana, badina idia ese Dirava dekenai edia mauri idia gwauhamatalaia neganai idia abia hesiai gaukarana ena maduna idia huaia namonamo lasi. Vanegai idia hanaia laganidia ta ta ibounai lalonai bapatiso idia abia taudia edia namba be 300,000 ia hanaia, to idia gaukara noho Iehova ena Witness taudia edia namba be unai bamona ia bada daekau lasi. Guna Basileia ena pablisa taudia ai idia lao taudia haida be hari sivarai namona idia harorolaia lasi. To, taunimanima ta ta be bapatiso idia do abia lasi neganai Keristani haroro gaukara idia karaia goadagoada vadaeni. Unai dainai, Iesu ese ena murinai idia raka taudia ibounai dekenai ia henia haheganina idia diba, ia gwau: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Bema bapatiso idia abia taudia be gorere eiava idia biagua diba lasi gau badadia ma haida ese idia koua lasi to hari Dirava bona Keriso ena Witness taudia edia gaukara idia karaia lasi, idia be edia gaukara korikorina Havaraia Tauna Badana vairanai idia hagugurua lasi.—Isaia 43:10-12.
7 Idaunegai Israela besena be Dirava idia gwauhamata henia besena, bona Taravatu gwauhamatana henunai, unai taunimanima be mai edia gaukara korikorina Iehova vairanai. Hegeregere, tatau iboudiai be lagani ta ta idia karaia aria toi dekenai idia lao be gau badana, bona mai ena ura ida Pasova aria ia karaia lasi tauna be mase dekenai idia “negea.” (Numera 9:13; Levitiko 23:1-43; Deuteronomi 16:16) Israela taudia be Dirava ena gwauhamata taudia dainai, edia gaukara korikorina Ia vairanai be tomadiho totona idia hebou. (Deuteronomi 31:10-13) Taravatu dekenai hereva ta ia gwau lasi, ‘Unai do oi karaia bema oi dekenai ia hegeregere.’ Unai dainai, hari Iehova dekenai edia mauri idia gwauhamatalaia taudia ese Paulo ena hereva idia laloa bada, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:24, 25) Oibe, edia tadikaka ida idia hebou hanaihanai be gwauhamata Keristani taudia edia gaukara korikorina Dirava vairanai.
Do Oi Abia Hidi Gaudia Oi Laloa Namonamo!
8. Dahaka dainai gwauhamata matamata tauna ta ese ena hesiai gaukara helagana be mai guriguri ida ia laloa be namo?
8 Reana oi be matamata tauna ta bona Iehova dekenai oiemu mauri oi gwauhamatalaia vadaeni. Bema oiemu mauri lalonai Basileia oi tahua guna, hahenamo badadia do oi abia. (Aonega Herevadia 10:22) Bema oi guriguri bona oi abia hidi gaudia oi laloa namonamo, reana oiemu matamata laganidia lalonai ful-taim hesiai gaukarana ta oi karaia diba—unai dala namona ai oi hahedinaraia diba oiemu Havaraia Tauna Badana oi laloa. Bema unai oi karaia lasi, reana tauanina gaudia tahua karana ese oiemu nega bada do ia haorea bona oiemu lalona ia veria. Taunimanima ma haida hegeregerena, reana oi do matamata neganai oi headava bona abitorehai karana amo kohu oi hoia. Reana moni bada gaukarana ese oiemu nega bona goada bada ia haorea. Bema natudia oi abia, lagani momo herea lalonai ruma bese maduna idauidau do oi huaia. (1 Timoteo 5:8) Reana oiemu Havaraia Tauna Badana oi laloaboio lasi, to aonega karana be oi lalo-parara hari palani oi karaia, eiava oi karaia lasi, ese oiemu vaira maurina ibounai ia haidaua diba. Reana gabeai, emu matamata laganidia do oi laloa bona oi laloa bema unai nega lalonai iseda Havaraia Tauna Badana ena hesiai gaukara helagana oi goadalaia be namo. Oiemu matamata laganidia lalonai Iehova ena hesiai gaukara helagana amo moale bada oi abia totona, hari oiemu palani be mai guriguri ida oi lalohadailaia be namo, ani?
9. Hari ia buruka ia lao bona guna kongregesen lalonai maduna ia huaia tauna ta be reana dahaka ia karaia diba?
9 Tau ma ta ena mauri mani oi laloa—guna Dirava ena “mamoe orea” ia naria tauna. (1 Petero 5:2, 3) Badina ta dainai, sibona ese unai hahenamo ia rakatania. Momokani, hari ia buruka ia lao bona Dirava ena gaukara ia karaia be auka sisina. To reana tiokratik gaukara karaia totona do ia hekwarahi lou be namo, a? Bema unai bamona tauna ese kongregesen lalonai maduna do ia huaia diba, ma haida dekenai hahenamo badadia do ia mailaia! Bona ta be sibona totona ia mauri lasi dainai, iena turadia bona lalokau taudia be do idia moale, bema Dirava ia hanamoa totona ena hesiai gaukara ia habadaia diba. (Roma 14:7, 8) Bona inai be gau badana, Iehova ese iena hesiai gaukara lalonai taunimanima idia karaia gaudia be do ia laloaboio lasi. (Heberu 6:10-12) Unai dainai, dahaka ese ita ia durua diba, iseda Havaraia Tauna Badana ita laloa totona?
Iseda Havaraia Tauna Badana Ita Laloa Totona Ita Abia Heduru
10 Hadibaia tauna be heduru namona ia henia diba, iseda Havaraia Tauna Badana ita laloa totona. Mai ena kudouna ibounai ida Iehova ia guriguri henia neganai, Iehova ese aonega bada ia henia. (1 King Taudia 3:6-12) Solomona ese taunimanima edia gaukara iboudiai ia tahua namonamo. Danu, Dirava ese ena lauma amo Solomona ia hasiahua ia davaria gaudia be ia torea bona unai amo ma haida do ia durua. Ia gwau: “Hadibaia Tauna be mai ena aonega, bona ia ese danu taunimanima dekenai diba ia henia. Ia ese aonega herevadia ia laloa, bona ia tahua, bona edia momokani ia tohoa. Hadibaia Tauna ese danu taunimanima hagoadaia herevadia ia tahua, bona ia torea herevadia be momokani, bona maoromaoro.”—Hadibaia Tauna 12:9, 10.
11. Dahaka dainai Solomona ena aonega sisibana ita abia dae be namo?
11 Greek Septuagint Baibel dekenai unai hereva be inai bamona: “Bona danu, badina be unai haroro tauna be mai ena aonega, badina taunimanima dekenai aonega ia hadibaia; taiana ese parabole amo gau namodia ia kamonai totona, unai haroro tauna ia hekwarahi bada hereva namodia ia davaria totona bona hereva maorodia—hereva momokanidia—ia torea totona.” (The Septuagint Bible, Charles Thomson ese ia hahanaia) Solomona ia ura hereva namodia bona gau namodia amo ena toretore idia duahia taudia edia kudouna ia veria. Buka Helaga lalonai ena hereva be lauma helaga amo idia vara dainai, ita ese ia davaria gaudia bona ena aonega sisibadia ita abia dae haraga diba.—2 Timoteo 3:16, 17.
12. Hadibaia Tauna 12:11, 12 ena hereva be edena bamona oi gwauraia diba?
12 Ena be hari idia noho printa masinidia be Solomona ena negai idia noho lasi, to unai negai buka momo herea idia torea. Unai bamona bukadia be edena bamona idia laloa be namo? Ia gwau: “Aonega taudia edia hereva be au ta mai matana, mamoe naria taudia ese idia iusilaia, mamoe hakaua totona gauna bamona. Bona aonega herevadia, idia haboua namonamo gaudia, be mai edia goada, idia kokoa auka ikokodia bamona. Mamoe Naria Tauna tamona, Dirava ese, inai aonega hereva ita dekenai ia henia. Egu natuna e, inai aonega hereva dekenai, tau haida sedira edia hereva ma do idia atoa kau. To inai kara do oi naria namonamo. Buka momo idia torea noho, doko lasi, bona edia anina do oi tahua neganai, oi dekenai hesiku do ia havaraia.”—Hadibaia Tauna 12:11, 12.
13 Dirava amo aonega idia abia taudia edia hereva be au ta mai matana bamona. Edena dala ai? Idia ese duahia eiava kamonai taudia idia hakaua idia duahia eiava idia kamonai aonega herevadia hegeregerena idia kara totona. Danu, “idia haboua namonamo gaudia,” eiava mai edia anina aonega herevadia idia laloa taudia be “idia kokoa auka ikokodia bamona,” eiava idia goada. Unai be momokani badina unai bamona taudia edia hereva ese Iehova ena aonega idia hahedinaraia bona unai dainai idia ese duahia eiava kamonai taudia idia hagoadaia bona durua diba. Bema oi be Dirava gari henia tama o sina ta, emu natuna ena lalona bona kudouna dekenai unai bamona aonega oi atoa vareai be namo, ani?—Deuteronomi 6:4-9.
14 To, dahaka dainai Solomona ese inai tanobada ena buka ia gwauraidia dika? Iehova ena Hereva ida ita hahegeregerea neganai, ita itaia idia momo herea ese taunimanima sibona edia lalohadai idia hahedinaraia. Unai lalohadai momo herea ese Satani Diabolo ena lalohadai idia hahedinaraia. (2 Korinto 4:4) Unai dainai, unai bamona buka “edia anina do [ita] tahua” karana be namo ia havaraia daudau diba lasi. Momokani, unai bamona buka momo ese lauma dalanai ita idia hadikaia diba. Solomona bamona, mauri dalana dekenai Dirava ena Hereva ia gwauraia gaudia ita lalohadailaia be namo. Unai ese iseda abidadama do ia hagoadaia bona Iehova kahirakahira dekenai ita do ia veria lao. Ma buka haida eiava idia amo diba ita abia gaudia ma haida ita tahua bada karana dainai ita hesiku diba. Bona bema unai bamona gaudia be Dirava ia henia aonega herevadia amo idia idau momokani, unai be idia dika momokani bona iseda abidadama Dirava bona ena ura dekenai idia hadikaia diba. Unai dainai, namona be ita laloatao ita idia durua bada toretoredia Solomona ena negai bona hari iseda negai be “Mamoe Naria Tauna tamona,” Iehova Dirava, ena aonega idia hahedinaraia toretoredia. Ia ese Buka Helaga ena buka 66 ia havaraia, bona namona be idia ita stadilaia goadagoada. Baibel bona “hesiai tauna” oreana ese ia henia buka namodia ese ita idia durua, ‘Dirava ita diba’ totona.—Aonega Herevadia 2:1-6.
Iseda Gaukara Korikorina Dirava Vairanai
15. (a) Solomona ena hereva “taunimanima edia gaukara korikori” be edena bamona do oi gwauraia? (b) Dahaka ita karaia be namo iseda gaukara korikorina Dirava vairanai ita hagugurua totona?
15 Hadibaia tauna, Solomona, ese ena tahua karana amo ia dibaia gaudia ibounai ia laloa bona ia gwau: “Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona. Dirava ese iseda kara ibounai do ia kota henia, kara namodia bona kara dikadia, hunia dekenai ita karaia gaudia danu.” (Hadibaia Tauna 12:13, 14) Iseda Havaraia Tauna Badana gari henia karana maorona, eiava mai hemataurai ida ita gari henia karana, ese ita bona iseda ruma bese taudia do ia gimaia, kavakava mauri dalana, ita bona iseda lalokau taudia dekenai hekwakwanai bona lalohisihisi bada ia havaraia diba mauri dalana, ita badinaia lasi totona. Dirava gari henia karana maorona be goeva bona ia amo aonega bona lalo-parara do ita abia. (Salamo 19:9; Aonega Herevadia 1:7) Bema Dirava ese ena lauma amo ia havaraia Herevana amo lalo-parara ita abia bona ena sisiba be iseda mauri lalonai ita badinaia, ita ese eda “gaukara korikori” Dirava vairanai ita hagugurua noho. Momokani, ita gwau lasi unai ena anina be gaukara idauidau edia lista ta ita karaia bona badinaia. Lasi, to ena anina be mauri lalonai idia vara hekwakwanai idauidau ita hanaia toho lalonai, Baibel ena heduru ita tahua bona hanaihanai gau iboudiai be Dirava ese ia gwauraia dalana hegeregerena ita karaia.
16 Namona be ita lalo-parara iseda Havaraia Tauna Badana ese gau iboudiai ia itaia. (Aonega Herevadia 15:3) Ia ese “iseda kara ibounai do ia kota henia.” Oibe, Atai Herea Diravana ese gau iboudiai do ia kota henia, taunimanima ese idia itaia diba lasi gaudia danu. Unai gauna ita diba ese ita ia hagoadaia, Dirava ena taravatu ita badinaia totona. To namona be ita ia hagoadaia gauna badana be iseda lalokau iseda guba Tamana dekenai, badina aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioane 5:3) Bona Dirava ese unai taravatu ia henia nega daudau iseda namo idia havaraia totona, unai dainai idia ita badinaia be kara maorona sibona lasi to ia be aonega karana. Havaraia Tauna Badana idia lalokau henia taudia dekenai unai be metau gauna lasi. Idia ura edia gaukara korikorina ia vairanai idia hagugurua.
Emu Gaukara Korikorina Oi Hagugurua
17. Dahaka do ita karaia bema ita ura momokani iseda gaukara korikorina Dirava vairanai ita hagugurua?
17 Bema ita aonega bona ita ura momokani iseda gaukara korikorina Dirava vairanai ita hagugurua, iena taravatu do ita badinaia bona ia ita habadua garina ita gari mai hemataurai ida. Momokani, Iehova “gari henia kara be aonega hamatamaia ena dala,” bona ena taravatu idia badinaia taudia ese “diba namona idia abia noho.” (Salamo 111:10; Aonega Herevadia 1:7) Unai dainai, namona be ita aonega bona gau iboudiai lalonai Iehova ena ura ita badinaia. Hari inai negai unai be mai anina bada, badina King Iesu Keriso ia noho vadaeni, bona Dirava ese ia dekenai Hahemaoro Tauna ena dagi ia henia dainai ena hahemaoro dinana be kahirakahira.—Mataio 24:3; 25:31, 32.
18. Dahaka do ita abia diba bema iseda gaukara korikorina Iehova Dirava vairanai ita hagugurua?
18 Hari ita ta ta be Dirava ese ia tahua noho. Lauma gaudia ita laloa bada, eiava tanobada ena lalona veria gaudia ese iseda hetura karana Dirava ida idia hamanokaia vadaeni, a? (1 Korinto 2:10-16; 1 Ioane 2:15-17) Herevana ita be matamata eiava buruka, namona be ita hekwarahi noho iseda Havaraia Tauna Badana hamoalea totona. Bema Iehova ita kamonai henia bona ena taravatu ita badinaia, ia ore gwauraia tanobadana ena anina lasi gaudia do ita dadaraia. Bena iseda helaro be, Dirava ese ia gwauhamatalaia tanobada matamatana lalonai do ita noho ela bona hanaihanai. (2 Petero 3:13) Edia gaukara korikorina Dirava vairanai idia hagugurua taudia edia vaira negana be namo herea!
Edena Bamona Do Oi Haere?
◻ Dahaka dainai oi gwau lasi gau ibounai be anina lasi?
◻ Dahaka dainai matamata Keristani tauna ta ese mai guriguri ida ena hesiai gaukara helagana ia lalohadailaia be namo?
◻ Edena bamona bukadia ita “tahua” bada lasi be namo?
◻ “Taunimanima edia gaukara korikori” be dahaka?
7. Dahaka dainai tomadiho totona ita hebou hanaihanai be gau badana?
10. Dahaka dainai hadibaia tauna ese heduru namona ia henia diba, iseda Havaraia Tauna Badana ita laloa totona?
13. Edena dala ai Dirava amo aonega idia abia taudia edia hereva be au ta mai matana bamona, bona daidia be “idia kokoa auka ikokodia bamona”?
14. (a) Edena bamona bukadia ita “tahua” bada lasi be namo? (b) Edena bamona bukadia ita stadilaia goadagoada be gau badana, bona dahaka dainai?
16. Iehova ese kota karana be edena bamona do ia karaia?
[Picture on page 20]
Iehova idia hesiai henia taudia idia laloa lasi gau ibounai be anina lasi
[Picture on page 23]
Dirava ena Hereva ese ita ia hagoadaia bona durua, ia be inai tanobada bukadia bamona lasi