Iseda Helaro Dainai Ita Moale
“Ia be mauri hanaihanai helarona ena badina. Ia koikoi diba lasi Diravana ese idaunegai unai helaro ia gwauhamatalaia.”—TITO 1:2.
OI HAERE DIBA, A?
Edena bamona ita diba horoa tauna ta be Dirava ia badinaia ela bona ia mase neganai, guba ai moale bada ia vara?
Edena dala ai “Dirava ena natudia edia hairai do ia hedinarai negana” be hutuma bada taudia edia helaro ia hamomokania?
Iseda helaro ia guguru negana ita itaia totona, edena bamona kara ita hahedinaraia be namo?
1. Iseda helaro ese edena dala ai ita ia durua?
APOSETOLO Paulo ia gwau Iehova be “helaro ia henia Diravana.” Ma ia gwau Iehova ese ita dekenai moale bona maino do ia henia, unai amo ‘lauma helaga ena siahu amo eda helaro be do ia bada ia lao.’ (Roma 15:13) Bema iseda helaro ita laloa noho, herevana dahaka hekwakwanai idia vara, iseda lalona ai maino do ia noho bona do ita moale. Unai dainai herevana ita be horoa taudia eiava mamoe ma haida, to lai badadia bamona hekwakwanai ita davaria neganai, iseda helaro be “dogo bamona, ia be ia momokani bona ia goada.” (Heb. 6:18, 19) Iseda helaro ita dogoatao auka neganai, “do ita hure oho lasi.” Unai ese iseda abidadama ia hagoadaia bona ita daradara lasi.—Heberu 2:1; 6:11 duahia.
2. Keristani taudia edia helaro be dahaka? Bona dahaka dainai “mamoe ma haida” ese horoa tadikaka oredia idia durua be gau badana?
2 Keristani taudia totona helaro be rua. Horoa orena taudia edia helaro be guba ai mase diba lasi maurina do idia abia. Bona Keriso ida ena Basileia lalonai king bona hahelaga gaukarana do idia karaia. (Luka 12:32; Apok. 5:9, 10) “Mamoe ma haida,” hutuma bada unai, be Mesia Basileia henunai tanobada paradaisona ai do idia noho ela bona hanaihanai. (Apok. 7:9, 10; Ioa. 10:16) To namona be mamoe ma haida idia laloatao: Hahemauri idia abia totona, Keriso ena horoa tadikaka oredia idia durua be gau badana. (Mat. 25:34-40) Oibe, horoa taudia bona mamoe ma haida be edia ahuna do idia abia. (Heberu 11:39, 40 duahia.) Mani horoa taudia edia helaro ita herevalaia guna.
HOROA TAUDIA EDIA HELARO
3, 4. Edena dala ai idia “vara lou” horoa taudia be “mauri noho helarona” idia abia? Unai helaro be dahaka?
3 Aposetolo Petero be horoa taudia totona revareva rua ia torea. Idia ia gwauraia “Dirava ena abia hidi taudia.” (1 Pet. 1:1) Petero ena revareva ginigunana ai seri maragi edia helaro ia herevalaia. Ia gwau: “Namona be Dirava, iseda Lohiabada Iesu Keriso ena Tamana, ita hanamoa. Iena hebogahisi bada dainai ita vara lou, bona Iesu Keriso be mase amo ia toreisi lou karana amo, ita dekenai ia mauri noho helarona ia henia. Do ita abia maurina be ia bodaga diba lasi, ia miro lasi bona ia boio diba lasi. Unai mauri be guba ai umui totona ia noho hegaegae. Umui be Dirava ese ena siahu amo ia gimaia, badina umui be mai emui abidadama. Oibe, Dirava ese umui ia gimaia noho hahemauri umui abia totona, unai hahemauri be nega dokona ai do ia hedinarai. Unai gaudia ibounai dainai umui moale bada.”—1 Pet. 1:3-6.
4 Iehova ese ia abia hidi Keristani taudia haida sibona be do idia “vara lou” bona guba ai Keriso ida do idia lohia. Iehova ese lauma helaga amo ia horoa bona ena natudia ai ia halaodia, bona ia abidia hidi Keriso ida guba dekenai king bona hahelaga gaukarana idia karaia totona. (Apok. 20:6) Idia “vara lou” dainai, “mauri noho helarona” idia abia diba. Unai helaro be dahaka? Petero ia gwau do idia abia mauri hanaihanai be ia “bodaga diba lasi, ia miro lasi bona ia boio diba lasi. Unai mauri be guba ai [idia] totona ia noho hegaegae.” Unai helaro namona dainai, horoa taudia idia moale bada. To bema idia haheauka ela bona dokona, edia helaro idia abia diba.
5, 6. Dahaka dainai horoa taudia ese Dirava idia badinaia noho be gau badana?
5 Petero ena revareva iharuana ai, horoa taudia ia hamaoroa guba helarona idia abia totona, Dirava idia badinaia noho be gau badana. (2 Pet. 1:10) Bona inai bamona kara hegeregere, abidadama, Dirava badinaia karana, tadikaka bona taunimanima ibounai lalokau henia karana idia hahedinaraia be namo. Petero ia gwau: “Bema unai gaudia be umui lalonai idia noho bona idia honudae, vadaeni . . . do umui noho kava lasi, to huahua do umui havaraia.”—2 Petero 1:5-8 duahia.
6 Asia Minor ai, Keriso ese Piladelepia kongrigeisen ena horoa elda taudia ia hamaoroa: ‘Lauegu haheauka karana umui tohotohoa dainai, lau ese hahetoho negana amo umui do lau gimaia danu, unai hahetoho be tanobada ibounai dekenai do ia vara, tanobada dekenai idia noho taudia tohoa totona. Lau be do lau mai haraga. Umui dekenai ia noho gauna umui dogoatao auka noho, dika ta ese emui korona ia abia.’ (Apok. 3:10, 11) Dirava idia badinaia ela bona idia mase horoa taudia be “hairai korona” do idia abia. To, bema horoa tauna ta be Iehova ia rakatania, unai korona do ia abia lasi.—1 Pet. 5:4; Apok. 2:10.
MAI HAIRAI IDA BASILEIA AI DO IDIA VAREAI
7. Iuda be edena helaro ia herevalaia?
7 Lagani 65 C.E. ai, Iesu ena tadina Iuda ese horoa taudia ia tore henia neganai, ia gwau idia be “Dirava ese ia boiria taudia.” (Iuda 1; Heberu 3:1 sekea.) Matamanai, ia ura Dirava ese idia do ia hamauria dalana ia herevalaia. (Iuda 3) To, mai anina bada gaudia ma haida ia herevalaia, bena dokonai horoa taudia edia helaro ia herevalaia. Ia gwau: “Dirava be umui ia naria diba, vadaeni do umui moru lasi, bona umui do ia durua ia vairanai umui goeva noho bona mai moale bada ida ena hairai do umui itaia. Lohiabada Iesu Keriso amo, Dirava iseda Hahemauri Tauna dekenai hairai, lohia siahuna, goada, bona gau ibounai biagua siahuna ia noho be maoro, gunaguna, hari, ela bona hanaihanai.”—Iuda 24, 25.
8. Edena bamona ita diba horoa tauna ta be Dirava ia badinaia ela bona ia mase neganai, guba ai moale bada ia vara?
8 Oibe, abidadama horoa taudia ibounai idia ura Dirava ese idia do ia gimaia, unai amo do idia “moru lasi.” Horoa taudia edia helaro be Iesu Keriso ese idia do ia hatorea isi bona goevadae lauma tauanina idia abia, bona Dirava vairanai do idia hedinarai. Horoa tauna ta be Dirava ia badinaia ela bona ia mase neganai, ia be “mai hairai ida ia toreisi lou” bona “lauma tauanina,” “ia bodaga diba lasi tauanina” ia abia. (1 Kor. 15:42-44) Ita diba “kara dika tauna ta ia helalo-kerehai neganai, guba ai moale bada ia vara.” Unai hegeregerena, Keriso ena tadikaka ta be Dirava ia badinaia ela bona ia mase neganai, guba ai moale bada ia vara. (Luka 15:7) Horoa taudia ta ta be mai “moale bada” ida edia ahuna idia abia neganai, Iehova bona aneru idia moale.—1 Ioane 3:2 duahia.
9. Horoa taudia be edena bamona guba Basileia lalonai do idia vareai? Bona unai ese edena dala ai horoa orena taudia ia hagoadaia?
9 Petero danu ia gwau horoa taudia be Dirava idia badinaia ela bona idia mase neganai, edia ahuna do idia abia. Ia hamaorodia: “Iseda Lohiabada bona Hahemauri Tauna, Iesu Keriso, ena noho hanaihanai basileia lalonai mai hairai ida do umui vareai.” (2 Pet. 1:10, 11) Danu, “mai hairai ida do umui vareai” ena anina ma ta be, horoa taudia be guba ai hahenamo momo do idia davaria. Dirava idia badinaia dainai do idia moale bona ia do idia tanikiu henia. Unai helaro ese horoa orena taudia ia hagoadaia Dirava idia badinaia noho totona.—1 Pet. 1:13.
MAMOE MA HAIDA EDIA “HELARO”
10, 11. (a) Hutuma bada edia helaro be dahaka? (b) Keriso bona “Dirava ena natudia edia hairai do ia hedinarai negana” ese edena dala ai hutuma bada taudia edia helaro ia hamomokania?
10 Aposetolo Paulo ese “Dirava ena natudia” ia tore henidia neganai, Keriso ida ‘ahuna do idia abia hebou’ helarona ia herevalaia. Bena Iehova ese hutuma bada taudia ia henia helarona ia herevalaia, ia gwau: “Dirava ese ia havaraia gaudia ibounai be mai edia ura bada ida, Dirava ena natudia edia hairai do ia hedinarai negana idia naria noho. Dirava ese ia havaraia gaudia ibounai be anina lasi maurina idia abia, unai be sibodia edia ura dainai lasi, to Dirava ena ura dainai, to unai neganai danu helaro ia henia, vadaeni Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.”—Roma 8:14-21.
11 Dirava ia gwauhamata “garana” ta amo taunimanima be Satani Diabolo ena igui amo do ia ruhaia neganai, idia dekenai “helaro” ia henia. (Apok. 12:9; Gen. 3:15, BHğ) Unai garana ena kahana ginigunana be Iesu Keriso. (Gal. 3:16) Iesu ena mase bona toreisi lou ese taunimanima be kara dika bona mase amo ia ruhaia. Guba ai “Dirava ena natudia edia hairai do ia hedinarai negana” ese unai helaro ia hamomokania. Idia be garana ena kahana iharuana. Bona Keriso ida Satani ena tanobada dikana idia hadikaia ore negana ai do idia hedinarai. (Apok. 2:26, 27) Unai ia vara neganai, hutuma bada be hisihisi badana amo do idia roho mauri.—Apok. 7:9, 10, 14.
12. “Dirava ena natudia edia hairai” ia hedinarai neganai, hutuma bada taudia be dahaka hahenamo do idia abia?
12 Keriso ena lagani 1,000 lohia negana ai taunimanima edia mauri be do ia namo herea! Unai nega ai, “Dirava ena natudia edia hairai” be dala ma ta ai do ia hedinarai. Keriso ida hahelaga gaukara do idia karaia bona taunimanima do idia durua mauri davalaia boubouna ena hahenamo idia abia totona. Dirava ena Basileia ese tanobada ia lohiaia neganai, Dirava idia kamonai henia taudia be “dika ena igui amo do ia ruhadia.” Anina be kara dika bona mase amo do ia ruhadia. Bema lagani 1,000 lalonai bona hahetoho ginigabena ai taunimanima ese Iehova idia badinaia noho, edia ladana be “mauri bukana” lalonai do ia noho ela bona hanaihanai. Bona “Dirava ena natudia edia ura kwalimu hereadaena” do idia abia. (Apok. 20:7, 8, 11, 12) Momokani, unai be helaro hereadaena!
EMU HELARO OI LALOA NOHO
13. Edena bamona ita diba iseda helaro be do ia vara momokani? “Keriso do ia hedinarai negana” ai dahaka do ia vara?
13 Petero ena revareva rua ese horoa taudia bona mamoe ma haida ia hagoadaia edia helaro idia laloa noho totona. Ia gwau edia kara namodia dainai lasi, to Iehova ena hebogahisi hereadaena dainai, unai helaro idia abia. Ia gwau: “Umui laloa maoromaoro. Iesu Keriso do ia hedinarai negana ai do umui abia hebogahisi hereadaena umui naria noho.” (1 Pet. 1:13) “Iesu Keriso do ia hedinarai negana” ai, ia idia abidadama henia taudia do ia hanamodia bona kara dika taudia do ia hadikaia ore.—2 Tesalonika 1:6-10 duahia.
14, 15. (a) Dahaka ita laloatao be namo? (b) Petero ena sisiba be dahaka?
14 Namona be nega ibounai ita laloatao “Iehova ena dina” be ia kahirakahira vadaeni. Bona iseda mauri dalana amo unai ita hahedinaraia be namo. Iehova ese “guba,” taunimanima edia gavamani unai, bona kara dika taudia o “tanobada” bona ena “gaudia” be do ia hadikaia ore. Petero ia gwau: “Namona be emui kara idia helaga bona Dirava badinaia karadia umui hahedinaraia. Bona Iehova ena dina ia mai negana umui naria bona umui laloa noho. Unai nega ai guba be lahi ese do ia araia ore, bona guba bona tanobada gaudia be do idia siahu momokani bona do idia veve!”—2 Pet. 3:10-12.
15 Unai murinai, Iehova ese “guba matamata bona tanobada matamata” do ia havaraia. Hari idia noho gavamani bona kara dika taudia be Keriso ena gavamani bona kara maoromaoro taudia ese edia gabu do idia abia. (2 Pet. 3:13) Guba bona tanobada matamata ita laloa bona “naria noho” lalonai, do ita karaia gaudia be Petero ese ia herevalaia. Ia gwau: “Unai dainai lalokau taudia e, unai gaudia umui naria noho dainai, do umui gaukara goada bona Dirava vairanai do umui miro lasi, umui kerere lasi, bona mai maino ida umui noho.”—2 Pet. 3:14.
EMU HELARO OI LALOA NOHO
16, 17. (a) Edena bamona kara ita hahedinaraia be namo? (b) Edena dala ai eda helaro do ia vara momokani?
16 Namona be eda mauri dalana amo ita hahedinaraia ita be eda helaro ita laloa noho. Petero ia gwau, namona be Iehova ese ia ura henia mauri dalana ita badinaia. Iseda “kara idia helaga” anina be “tanobada taudia huanai kara namodia” do ita karaia bona kara maoromaoro ita badinaia. (1 Pet. 2:12; 2 Pet. 3:11) Danu, tanobada hegegemadai tadikaka oreana do ita lalokau henia, bona ita gaukara goada kongrigeisen lalonai lalotamona ita havaraia totona. (Ioa. 13:35) Ma danu, Petero ia gwau eda hetura karana Iehova ida ia goada totona, namona be “Dirava badinaia karadia” ita karaia. Hegeregere, ita guriguri, dina ta ta ai Baibel ita duahia, sibona eda stadi, bona ruma bese ena tomadiho ita karaia, bona “Basileia ena sivarai namona” ita harorolaia.—Mat. 24:14.
17 Ita ibounai ita ura Iehova ese ita do ia lalonamo henia, bona inai tanobada dikana ia haorea neganai, ita do ia hamauria. Bema Iehova ese ita ia lalonamo henia, iseda “mauri hanaihanai helarona,” “koikoi diba lasi Diravana ese idaunegai unai helaro ia gwauhamatalaia,” do ia hamomokania.—Tito 1:2.
[Picture on page 22]
Idia “vara lou” horoa taudia be “mauri noho helarona” idia abia
[Picture on page 24]
Ruma bese ida emui helaro umui laloa noho