Mai Gado Namo ida Ita Hereva ese Hebamo Karana Ia Hanamoa
“Nega ibounai mai laloa namona bona mai gado namo do umui hereva.”—KOL. 4:6.
1, 2. Tadikaka ta be mai gado namo ida ia hereva dainai dahaka ia vara?
TADIKAKA ta ia gwau: “Ruma-ta-ruma-ta haroro gaukara ai, lau hereva henia ruma tauna be ia badu dikadika dainai, ena udu bibina bona ena tauanina ibounai ia heudeheude. Mai manau ida Baibel siri amo ia lau durua toho, to unai ese ena badu ia habadaia sibona. Iena adavana bona natudia danu be lau idia gwau henia bona lau diba idia lau rakatania be namo. Idia lau hamaoroa lau be mai maino ida lau mai bona mai maino ida do lau lao. Idia dekenai lau hahedinaraia Galatia 5:22 bona 23 ese lalokau, manau, tauanina ena ura koua karana, bona maino ia herevalaia. Bena idia lau rakatania.
2 “Gabeai, dala kahanai, ruma-ta-ruma-ta haroro gaukara lau karaia neganai, lau itaia unai ruma bese be edia ruma vairana ena vadavada dekenai idia helai. Lau idia boiria, bona lau laloa: ‘Hari be ma dahaka do idia hereva?’ Ruma tauna be mai ena ranu keruma bona lau dekenai ranu galasi ta ia henia. Ia karaia karana dainai sori herevana ia gwauraia, bona egu abidadama goada dainai lau ia hanamoa. Maino ai karaia bona idia lau rakatania.”
3. Dahaka dainai ma haida edia kara dainai ita badu lasi be namo?
3 Hari inai lalometau negana ai, haroro gaukara dekenai badu taudia momo do ita davaria. Unai ia vara neganai, gau badana be “mai mataurai bona manau danu” ita haere henidia. (1 Pet. 3:15) Bema ataiai ita herevalaia tadikaka be ruma tauna ena badu bona hereva auka dainai ia badu danu, reana ruma tauna ena badu do ia habadaia. To, tadikaka be ena badu ia biagua bona mai gado namo ida ia hereva dainai, maino idia karaia.
Mai Gado Namo ida Ita Hereva Dalana
4. Dahaka dainai mai gado namo ida ita hereva be mai anina bada?
4 Herevana ita be murimuri taudia o kongrigeisen tadikaka taihu o ruma bese taudia ita hereva henidia, gau badana be aposetolo Paulo ena sisiba ita badinaia: “Nega ibounai mai laloa namona bona mai gado namo do umui hereva.” (Kol. 4:6) Unai bamona ita karaia neganai, herevahereva namonamo karana bona maino do ia noho.
5. Herevahereva namonamo karana ena anina be dahaka? Haheitalai gwauraia.
5 Namo lasi ita laloa herevahereva namonamo karana anina be ita badu neganai, ita lalohisihisilaia gaudia ibounai ita gwauraia. Lasi, unai be maoro lasi, herevahereva namonamo karana ena anina be ita badu neganai, iseda badu ita biagua. Baibel ese ia hahedinaraia bema tau ta be ena badu ia biagua lasi, unai be manoka ena toana. (Aonega Herevadia 25:28; 29:11 duahia.) Baibel ia gwau: “Mose be tanobada taudia ibounai edia huanai ia sibona be manau herea.” To, nega ta Israela taudia edia gwau-edeede karana dainai, ia badu bona Dirava ia hanamoa lasi. Mose be ena badu ena badina ia gwauraia hedinarai, to Iehova be ia moale lasi. Unai dainai, ena be Mose ese Israela besena be lagani 40 lalonai ia gunalaia, to Iehova ia ura lasi Mose ese Israela taudia be Gwauhamata Tanona dekenai do ia hakaua vareai.—Num. 12:3; 20:10, 12; Sal. 106:32.
6. Mai gado namo ida ita hereva anina be dahaka?
6 Baibel ese ita ia hagoadaia, iseda malana do ita naria namonamo bona mai hemataurai bona gado namo ida do ita hereva. “Hereva momo ese kara kerere idia havaraia noho, to iena uduna ena hereva ia koua noho tauna, be mai ena aonega.” (Aon. 10:19; 17:27) To, namo lasi ita laloa mai gado namo ida ita hereva ena anina be ita laloa gauna do ita gwauraia lasi. Lasi, to “mai gado namo ida” do ita hereva, anina be iseda hereva do ita abia hidi namonamo, unai amo eda hereva idia kamonai taudia do idia lalohisihisi lasi.—Aonega Herevadia 12:18; 18:21 duahia.
Regerege Lasi Bona Herevahereva be mai Edia Nega
7. Edena bamona kara do ita dadaraia, bona dahaka dainai?
7 Iseda gaukara taudia o haroro ai ita davaria taudia sibona lasi, to iseda ruma bese bona kongrigeisen taudia danu be mai hemataurai bona gado namo ida ita hereva henidia be namo. Bema ita badu dainai do ita karaia gaudia ita laloa namonamo lasi, unai ese ita bona ma haida eda hetura karana Dirava ida do ia hadikaia, iseda hemami do ia dika, bona ita gorere diba. (Aon. 18:6, 7) Badu dikadika karana bona dagedage be iseda goevadae lasi tauanina ena kara bona ita biagua be namo. Badu dikadika, dagedage, lalodika bona ma ta inai henia karadia be kerere. (Kol. 3:8; Iam. 1:20) Unai bamona kara ese iseda hetura karana namona ma haida bona Iehova ida ia hadikaia diba. Iesu ia gwau: “Iena tadikakana do ia badu henia tauna be dohore kota biaguna ese do ia kota henia, bona iena tadikakana do ia hereva dika henia tauna be Kaunsolo taudia edia vairana dekenai do ia lao. Bona iena tadikakana be kavakava anina lasi do ia gwauraia tauna, be lahi ia araia gabuna dekenai do ia lao.”—Mat. 5:22.
8. Edena nega ai iseda badu gauna ita gwauraia hedinarai be namo, bona edena dala ai ita hamaoromaoroa diba?
8 Momokani hekwakwanai haida idia vara neganai, ita herevalaia hebou be maoro. Bema ta ese ia gwauraia herevana o ia karaia karana ese oi ia habadua bona oi lalohisihisi, namo lasi emu lalona ai unai tauna oi badu henia noho. (Aon. 19:11) To, namona be emu badu o lalohisihisi oi biagua bona dala oi tahua unai hekwakwanai oi hamaoromaoroa totona. Paulo ia gwau: “Dina do ia diho lasi neganai, emui badu do umui haorea.” Unai hekwakwanai oi do lalohisihisilaia dainai, nega maorona ai mai manau ida oi hamaoromaoroa be namo. (Efeso 4:26, 27, 31, 32 duahia.) Emu hetura karana hanamoa lou totona, mai gado namo ida, emu tadikaka o taihu danu unai hekwakwanai umui hamaoromaoroa be namo.—Lev. 19:17; Mat. 18:15.
9. Dahaka dainai iseda badu ia ore murinai hekwakwanai ita hamaoromaoroa be aonega karana?
9 Momokani, nega maorona oi abia hidi be namo. “Regerege lasi dekenai ita noho be mai ena nega, bona do ita herevahereva danu be mai ena nega.” (Had. 3:1, 7) Danu, “kara maoromaoro taudia ese, haere idia henia neganai idia laloa namonamo guna.” (Aon. 15:28) Unai ena anina be reana nega haida do ita naria ela bona nega maorona ai hekwakwanai do ita hamaoromaoroa. Badina bema ita do badu noho bona ita ura ita hamaoromaoroa, reana hekwakwanai ita habadaia sibona. To, danu naria daudau karana be aonega karana lasi.
Kara Namodia ese Hebamo Karana Ia Hanamoa
10. Edena dala ai kara namodia ese iseda hebamo karana ia hanamoa diba?
10 Mai gado namo ida hereva bona herevahereva namonamo karana ese ta tura henia karana ia hamatamaia bona hagoadaia noho. Bona iseda hebamo karana ma haida ida ita hanamoa totona, ita kara namo henidia neganai, unai ese iseda herevahereva karana do ia hanamoa danu. Mai iseda kudouna ibounai ida ma haida dekenai kara namodia, hegeregere idia ita durua, harihari gauna ta ita henia, o heabidae karana ita hahedinaraia neganai, dala ia kehoa idia ida ita herevahereva namonamo totona. Unai be hegeregere ‘lahi gidadia be edia kwarana ai ita haboua bamona’ bona unai ese do ia durua iena kara namo ia hahedinaraia totona. Unai amo do ia auka lasi hekwakwanai gaudia ita herevalaia bona hamaoromaoroa totona.—Roma 12:20, 21, NW.
11. Iakobo be Esau ida ena hetura karana ia hanamoa totona dahaka ia karaia, bona dahaka ia vara?
11 Bese kwarana Iakobo be unai kara ia diba. Iena kakana, Esau, ese ia badu henia dikadika bona do ia alaia garina, Iakobo ia gari bona ia heau boio. Lagani momo murinai, Iakobo ia giroa lou. Esau be mai ena tatau 400 ida ia mai Iakobo ia hedavari henia totona. Iakobo be Iehova ena heduru totona ia guriguri. Bena ia ese Esau dekenai animal haida be harihari gaudia bamona ia siaia guna. Unai harihari gaudia ese maino ia havaraia. Vadaeni, idia hedavari neganai, Esau ena badu be ia ore, bona ia heau lao Iakobo ia rosia.—Gen. 27:41-44; 32:6, 11, 13-15; 33:4, 10.
Mai Gado Namo ida Ma Haida Hagoadaia
12. Dahaka dainai mai gado namo ida iseda tadikaka taihu ita hereva henia be namo?
12 Keristani taudia be Dirava idia hesiai henia, taunimanima lasi. To, vaia ita ura ma haida ese ita do idia gwauraia namo. Mai gado namo ida iseda tadikaka taihu ita hereva henia neganai, unai ese idia ia durua diba edia lalohisihisi o lalohekwarahi gaudia idia haheaukalaia totona. To, hereva auka ese edia lalohisihisi ia habadaia diba bona reana do idia mamia Iehova be idia ia laloa bada lasi. Unai dainai, namona be mai iseda kudouna ibounai ida ‘hereva namodia do ita gwauraia, unai amo iseda hereva idia kamonai taudia do ita hagoadaia.’—Efe. 4:29, NW.
13. Elda taudia be dahaka idia laloatao be namo (a) sisiba idia henia neganai? (b) revareva idia torea neganai?
13 Oibe, elda taudia ese mamoe oreana be mai “manau” ida idia kara henia be namo. (1 Tes. 2:7, 8) Elda taudia ese haida idia sisiba henia neganai, edia ura gauna be “mai manau danu” do idia hereva, ena be unai taudia ese edia “hereva idia utua.” (2 Tim. 2:24, 25) Elda taudia be ma elda taudia ma haida o brens opesi dekenai revareva idia siaia neganai, namona be mai hemataurai ida unai revareva do idia torea. Mataio 7:12 ena hereva hegeregerena, namona be mai hemataurai bona manau ida idia kara.
Ruma Bese Lalonai mai Gado Namo ida Hereva
14. Paulo ese dahaka sisiba ia henia headava tatau dekenai, bona dahaka dainai?
14 Iseda hereva, vairana ena toana bona kara ese ma haida ia hahekwakwanaia diba. Hegeregere, tatau haida idia laloparara lasi edia hereva dalana ese hahine edia lalona ia hahisia diba. Taihu ta ia gwau: “Egu adavana be mai badu ida lau ia hereva henia neganai, lau gari bada.” Hereva aukadia ese hahine ta ia hagaria diba bona nega daudau lalonai do ia laloatao. Tatau be unai bamona lasi. (Luka 2:19) Bema hahine ese ia lalokau henia bona ia matauraia tauna be ia dekenai ia hereva auka, hahine be do ia lalohisihisi bada. Paulo ese headava tatau ia sisiba henidia ia gwau: “Tatau e, emui adavana do umui lalokau henia, idia do umui dagedage henia lasi.”—Kol. 3:19.
15. Mani haheitalai ta amo tau ese iena adavana be mai lalokau ida do ia kara henia dalana oi gwauraia.
15 Nega daudau lalonai ia headava tadikaka ta ia gwau, hahine ena “tauanina be ia goada herea lasi” dainai, tau ese iena adavana be mai lalokau ida do ia kara henia, be haheitalai ta amo ia gwauraia. Ia gwau: “Oi be nadi galasi urona ta oi dogoatao neganai, oi gigia auka lasi badina ia makohia garina. Ena be oi hanamoa toho, bona glu amo oi hakapua, to ia makohi gabuna ena maka do ia hedinarai noho. Bema tau be iena adavana dekenai hereva aukadia ia gwauraia, hahine ia lalohisihisi diba, bona unai maka ese edia headava maurina ia hadikaia diba.”—1 Petero 3:7 duahia.
16. Edena dala ai hahine be iena ruma bese ia hagoadaia diba?
16 Tatau danu be ma haida edia hereva bona adavadia edia hereva ese edia lalona do idia hagoadaia o hahisia diba. “Hahine mai aonegana” be iena tau ese do ia “abidadama henia noho”; unai bamona hahinena ese iena tau ena hemami do ia laloa bada, ena tau ese ia laloa bada hegeregerena. (Aon. 19:14; 31:11) Momokani, hahine ena kara ese iena ruma bese ia hanamoa o ia hadikaia diba. “Aonega hahine ese gaukara namona ia karaia, bona iena famili taudia ia haginidia goada. To kavakava hahine ese, iena ruma bona famili ia hadikaia noho.”—Aon. 14:1.
17. (a) Edena dala ai natudia ese edia tama sina idia hereva henia be namo? (b) Edena dala ai tama sina bona elda taudia ese natudia idia hereva henidia, bona dahaka dainai?
17 Tama sina bona natudia danu be mai gado namo ida ta ta do idia hereva henia. (Mat. 15:4) Matamata taudia ita hereva henidia neganai, do ita laloa namonamo guna, badina ita ura lasi idia do ita “habadua,” badina idia “hesiku garina.” (Kol. 3:21; Efe. 6:4) Tama sina bona elda taudia ese natudia idia matahakani henia neganai, mai hemataurai ida idia hereva henia be namo. Unai dala amo, idia ese matamata taudia idia durua sisiba idia abia dae bona edia hetura karana Iehova ida do ia goada noho. Unai bamona ita kara henidia be namo, badina ita ura lasi idia mamia ita be idia ita lalokau henia lasi, bona idia lalohisihisi garina. Matamata taudia be reana sisiba herevadia ibounai do idia laloatao lasi, to haida ese idia hereva henia dalana do idia laloatao.
Iseda Kudouna amo Hereva Namodia Ita Gwauraia
18. Edena dala ai badu bona lalohisihisi ita kokia diba?
18 Namo lasi ita laloa badu biagua karana ena anina be iseda vairana toana amo do ita hahedinaraia. Bona namo lasi ita laloa ena anina be iseda badu do ita hunia. Ita ura badu lasi toana sibona ita hahedinaraia, to iseda lalona dekenai ita badu dikadika karana ese ita ia hagorerea diba. Unai be hegeregere pani ai ia noho ranu ia boela lalonai pani ena ikouna ita atoa kau. Do ia boela daekau bona ranu do ia bubua. Unai dainai, namo lasi iseda lalona ai badu ita haboua noho bona gabeai ia pou bamona. Iehova do oi guriguri henia unai badu be emu lalona amo do ia kokia totona. Namona be Iehova ena lauma helaga ese emu lalona bona kudouna ia durua, unai amo iena ura dalana oi badinaia diba.—Roma 12:2; Efeso 4:23, 24 duahia.
19. Dahaka ita karaia diba hepapahuahu ia vara lasi totona?
19 Namona be mai aonega ida ita kara. Bema hepapahuahu ta ia vara bona oi mamia do oi badu dikadika, oi ia durua karana ta be unai hepapahuahu amo oi raka siri, unai amo emu badu ia ore diba. (Aon. 17:14) Bema oi hereva henia tauna ia badu matamaia, oi hekwarahi mai gado namo ida oi hereva noho totona. Laloatao: “Mai manau danu ia haere tauna, ese badu ia koua noho, to hereva auka ese badu ia havaraia noho.” (Aon. 15:1) Ena be ta ese badu lasi dalana ai hereva dikana o habadua hereva ta ia gwauraia, unai ese hepapahuahu do ia habadaia momokani. (Aon. 26:21) Unai dainai, hepapahuahu ta ia vara neganai, namona be “hereva do umui gwauraia haraga lasi, bona do umui badu haraga lasi.” Iehova ena lauma helaga ena heduru totona do oi guriguri, bona oi do ia durua hereva namodia oi gwauraia bona hereva dikadia oi dadaraia totona.—Iam. 1:19.
Gwauatao Momokani Karana
20, 21. Dahaka ese ita ia durua diba ma haida edia dika ita gwauatao totona, bona dahaka dainai unai ita karaia be namo?
20 To, madi, ita be goevadae lasi dainai eda malana ita biagua diba lasi. (Iam. 3:2) Ena be idia hekwarahi bada, to ruma bese taudia eiava iseda Keristani tadikaka taihu be nega haida idia laloa namonamo lasi dainai, edia hereva amo iseda lalona idia hahisia diba. Namo lasi ita badu haraga, to ita haheauka bona mai manau ida ita tahua dahaka dainai unai hereva idia gwauraia. (Hadibaia Tauna 7:8, 9 duahia.) Reana, idia lalohisihisi, idia gari, idia gorere eiava lalometau dainai unai bamona idia hereva, a?
21 Momokani, ta be unai gaudia dainai ita dekenai ia hereva auka be maoro lasi. To, bema ita laloparara ia be unai kara ta dainai ita ia kara auka o hereva auka henia, reana iena kara dika do ita gwauatao. Oibe, ita ibounai be reana nega ta ai, ma ta ita kara auka o hereva auka henia, bona ita ura idia ese mai manau ida iseda kara dika do idia gwauatao, ani? (Had. 7:21, 22) Iesu ia gwau Dirava ese iseda dika ia gwauatao totona, ita ese ma haida edia dika do ita gwauatao be namo. (Mat. 6:14, 15; 18:21, 22, 35) Unai dainai, sori herevana do ita gwauraia haraga bona ma ta ena dika ita gwauatao haraga be namo. Unai amo lalokau, “laloa tamona” ia havaraia gauna, be iseda ruma bese bona kongrigeisen lalonai do ia noho.—Kol. 3:14.
22. Dahaka dainai ma haida dekenai mai gado namo ida ita hereva be mai anina bada?
22 Inai badu tanobadana ena dokona ia kahirakahira lalonai, iseda moale bona lalotamona hadikaia karadia momo do idia vara. Dirava ena Hereva lalonai idia noho hakaua herevadia ita badinaia neganai, ita do idia durua iseda malana ita gaukaralaia namonamo bona hereva dikadia do ita gwauraia lasi. Iseda ruma bese bona kongrigeisen lalonai do ita noho hebou namonamo bona iseda haheitalai amo ma haida dekenai ita hahedinaraia ita be “moale Diravana,” Iehova, ita tomadiho henia.—1 Tim. 1:11, NW.
Anina Oi Gwauraia Diba, A?
• Dahaka dainai hekwakwanai ita hamaoromaoroa totona, nega maorona ita abia hidi be gau badana?
• Dahaka dainai ruma bese taudia be ta ta dekenai “mai gado namo” ida idia hereva be namo?
• Edena dala ai ma haida hahisia herevadia ita gwauraia lasi?
• Dahaka ese ita ia durua diba haida edia dika ita gwauatao totona?
[Pictures on page 21]
Namona be emu badu o lalohisihisi oi biagua bona nega maorona oi tahua unai hekwakwanai oi hamaoromaoroa totona
[Picture on page 23]
Tau be nega ibounai mai gado namo ida iena adavana do ia hereva henia