Iehova Ena Ura Ita Karaia amo Goada Matamata Ita Davaria

“Egu huaia auna do umui huaia . . . bona goada matamata do umui davaria.”​—⁠MAT. 11:​29, NW.

1. Sinai Ororona ai Dirava ese dahaka taravatu ia henia, bona dahaka dainai?

SINAI ORORONA ai idia hahelagaia Taravatu gwauhamatana be pura ena Sabati taravatuna ia herevalaia danu. Iehova be Mose amo Israela taudia ia hamaoroa: “Dina 6 do umui gaukara, to dina namba 7 ena lalonai do umui gaukara lasi. Inai dekena amo emui boromakau bona emui doniki danu do idia laga-ani, bona emui hesiai taudia davana lasi, bona emui huana dekenai noho idau tauna be idia laga-ani dainai, edia goada do idia abia lou.” (Eso. 23:12) Oibe, Iehova be Taravatu henunai idia noho taudia ia laloa bada dainai, dina namba 7 ia abia hidi ena taunimanima do idia laga-ani, unai amo “edia goada do idia abia lou” totona.

2. Israela taudia ese Sabati taravatuna idia badinaia karana amo dahaka namo idia davaria?

² Sabati dinana be laga-ani negana sibona, a? Lasi, unai be Israela taudia ese Iehova idia tomadiho henia negana danu. Sabati negana be nega namona ruma bese kwaradia ese edia ruma bese dekenai Dirava ena kara maoromaoro taravatudia idia hadibaia totona. (Gen. 18:19) Danu, unai be nega namona ruma bese bona turadia ese Iehova ena kara namodia idia laloa dobu bona ta ta edia hebamo karana idia moalelaia totona. (Isa. 58:​13, 14) To mai anina bada gauna be inai: Sabati dinana ese Keriso Ena Lagani 1,000 Lohia Negana lalonai taunimanima ese goada matamata do idia abia lou negana ia laulaulaia. (Roma 8:​21) To iseda negai be edena bamona? Iehova ena dala idia ura henia Keristani taudia momokanidia be edeseniai bona edena dala ai goada matamata idia davaria diba?

Tadikaka Taihu amo Goada Abia

3. Edena dala ai Keristani taudia ginigunadia ese goada idia abia, bona dahaka ia vara?

³ Paulo ia gwau Keristani kongrigeisen be “hereva momokani ena du, bona hereva momokani ia gimaia maguna.” (1 Tim. 3:​15) Keristani taudia ginigunadia idia goada ena badina be idia ta ta idia hagoadaia heheni bona lalokau heheni. (Efe. 4:​11, 12, 16) Paulo be Efeso ai ia noho neganai, Korinto kongrigeisen taudia ese ia idia vadivadi henia. Unai vadivadi karana dainai Paulo ia gwau: “Lau moale, badina be Stepana bona Forotunato bona Akaiko be lau dekenai idia ginidae dainai . . . inai taudia ese lauegu lalona idia hanamoa bona hagoadaia.” (1 Kor. 16:​17, 18) Unai hegeregerena, Tito be tadikaka hagoadaia totona Korinto dekenai ia lao neganai, Paulo ese unai kongrigeisen ia tore henia, ia gwau: “Tito ia moale . . . badina umui ibounai ese iena kudouna umui hagoadaia.” (2 Kor. 7:​13, NW ) Hari inai negai, Iehova ena Witnes taudia be edia tadikaka taihu amo goada idia abia.

4. Kongrigeisen heboudia amo edena dala ai goada ita abia?

⁴ Oi danu oi diba, kongrigeisen heboudia amo moale bada ita abia. Unuseniai, ma haida ‘edia abidadama amo ita idia hagoadaia bona iseda abidadama amo idia ita hagoadaia.’ (Roma 1:​12, NW ) Iseda tadikaka taihu ita diba namonamo be gau badana. Idia be iseda tura korikoridia dainai, ita lalokau henia bona matauraia. Hanaihanai iseda hebou iboudiai dekenai idia ita bamoa neganai, goada bona moale ita abia.​​—⁠File. 7.

5. Edena dala ai hebouhebou badadia bona maragidia dekenai ta ta ita hagoadaia diba?

⁵ Danu distrik bona sekit hebouhebou amo goada ita abia. Unuseniai Baibel ena hereva momokani ita abia sibona lasi, to iseda hebamo karana amo ‘eda lalokau ita habadaia’ diba. (2 Kor. 6:​12, 13; NW ) To bema ita hemarai o ita davaria ia auka ma haida ita hereva henia totona be edena bamona? Iseda tadikaka taihu ita diba namonamo dalana ta be inai: Hebouhebou negadia ai volantia gaukara ita karaia be namo. Taihu ta be intenesenel hebouhebou dekenai hagoevaia gaukara ia durua bona ia gwau: “Hebouhebou dekenai lau be egu ruma bese bona tadikaka taihu haida sibona lau diba. To hagoevaia gaukara lau durua neganai, tadikaka taihu momo lau hedavari henidia! Unai nega lau moalelaia bada!”

6. Edena dala ta ese ita ia durua iseda holide negana lalonai ita moale totona?

⁶ Lagani ta lalonai, Israela taudia be nega toi Ierusalema dekenai idia lao Iehova idia tomadiho henia totona. (Eso. 34:23) Unai bamona idia karaia totona, haida be edia uma gabu bona sitoa idia rakatania bona dina momo lalonai dala dekenai bona kahu lalonai idia raka. To, dubu helaga dekenai idia lao taudia be idia “moale bada” bona “ane dekena amo Lohiabada idia hanamoa.” (2 Siv. 30:21) Hari, Iehova ena hesiai taudia momo be edia ruma bese ida Betele rumadia​​—⁠Iehova ena Witnes taudia edia brens opesi​​—⁠idia vadivadi henia neganai, idia moale bada. Namona be oi bona emu ruma bese be palani umui karaia, holide negana ta ai Betele rumana umui vadivadi henia totona.

7. (a) Moale karadia ita karaia hebou ena namo be dahaka? (b) Unai nega namona ita moalelaia totona, dahaka gaudia ita laloa be namo?

⁷ Ma danu, eda ruma bese bona turadia ida moale karadia ita karaia hebou neganai, goada ita abia. Aonega tauna King Solomona ia gwau: “Tau ta ena dala namo herea be inai: Do ia aniani, do ia inuinu, bona iena hekwarahi dekena amo ia abia gaudia do ia moalelaia.” (Had. 2:​24) Moale karadia ita karaia hebou amo moale ita davaria sibona lasi, to ita ia durua iseda tadikaka taihu ita diba namonamo bona lalokau henia totona. Unai nega namona ita moalelaia totona, namona be oi boiria taudia be momo lasi, bona ta ese ia hakaua, bema kekero muramura ia noho danu.

Haroro Gaukara amo Goada Abia

8, 9. (a) Iesu ena kara bona Farisea taudia edia kara ena idau mani oi gwauraia. (b) Baibel ena hereva be ma haida dekenai ita harorolaia karana ese edena dala ai ita ia durua?

⁸ Iesu be ena haroro gaukara ia karaia goadagoada, bona ena aposetolo taudia ia hagoadaia unai bamona idia karaia totona. Ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mat. 9:​37, 38) Iesu ese ia harorolaia sivaraina be taunimanima ia hagoadaia; unai be “sivarai namona.” (Mat. 4:​23; 24:14) To Farisea taudia be unai bamona lasi, idia ese taunimanima dekenai taravatu metaudia idia henia.​​—⁠Mataio 23:​4, 23, 24 duahia.

⁹ Basileia sivaraina be ma haida dekenai ita harorolaia neganai, idia ita durua Dirava idia diba totona, to danu, unai ese ita ia durua Baibel ena hereva ita lalopararalaia namonamo totona. Salamo torea tauna ia gwau: “Lohiabada do umui hanamoa! Ane dekenai Dirava do ita hanamoa be namo. Lohiabada do ita hanamoa be kara namona bona kara maorona.” (Sal. 147:⁠1) Emu dekena taudia dekenai Iehova ena sivarai oi harorolaia neganai, oi moale bada, a?

10. Herevana taunimanima be sivarai namona idia kamonai o lasi, to eda gaukara be mai anina bada, a? Gwauraia hedinarai.

¹⁰ Teritori haida dekenai taunimanima momo ese sivarai namona idia abia dae, to teritori ma haida dekenai momo idia ura lasi kamonai. (Kara 18:​1, 5-8 duahia.) Bema emu teritori ai, momo idia ura lasi Basileia ena sivarai idia kamonai, namona be oi karaia gaukarana ena namo oi laloa. Namona be oi laloatao, ena be nega ibounai ita hekwarahi Iehova ena ladana ita harorolaia totona, to iseda hekwarahi be hekwarahi kava lasi. (1 Kor. 15:58) Danu, herevana taunimanima be sivarai namona idia kamonai o lasi, to iseda gaukara be mai anina bada. Ita abia dae gauna be inai: Iehova ese kudou-maoro taudia do ia veria mai, bona Basileia ena sivarai namona do idia abia dae.​​—⁠Ioa. 6:​44.

Ruma Bese Ena Tomadiho amo Goada Abia

11. Iehova ese tama sina dekenai dahaka maduna ia henia, bona edena dala ai unai maduna idia huaia diba?

¹¹ Dirava idia gari henia tama sina edia maduna be, edia natudia dekenai Iehova ena taravatu idia hadibaia be namo. (Deu. 11:​18, 19) Tama sina e, nega oi atoa emu natudia dekenai iseda lalokau guba Tamana oi herevalaia totona, a? Emu ruma bese oi naria bona maduna idauidau oi huaia namonamo totona, Iehova be buka, magasin, vidio bona unai bamona gaudia ma haida amo heduru herevadia momo ia halasia.

12, 13. (a) Edena dala ai Ruma Bese Ena Tomadiho ese ruma bese ia durua? (b) Edena dala ai tama sina ese edia ruma bese taudia idia durua unai tomadiho negana idia moalelaia totona?

¹² Danu, hesiai tauna mai ena kamonai bona kara maoromaoro be dala ia kehoa Ruma Bese Ena Tomadiho negana totona. Pura ta ta ai, ruma bese taudia be unai nega ai Baibel idia stadilaia hebou. Momo idia gwau, Ruma Bese Ena Tomadiho dainai, ruma bese idia lalotamona bona lalokau heheni bona edia hetura karana Iehova ida ia hanamoa danu. To edena dala ai tama sina ese edia ruma bese ena tomadiho negana idia gaukaralaia ta ta idia hagoadaia totona?

¹³ Namona be Ruma Bese Ena Tomadiho negana be moale negana. Badina ita be “moale Diravana” ita tomadiho henia bona ia ura ia tomadiho henia karana ita moalelaia. (1 Tim. 1:​11, NW; Fili. 4:⁠4) Unai negai ruma bese taudia ese Baibel idia herevalaia hebou be hahenamo ta. Tama sina be natudia idia hadibaia neganai, haheitalai o gau idauidau idia gaukaralaia diba. Hegeregere, ruma bese ta ai, Brandon, ena mauri lagani 10, idia hamaoroa tok kwadogina ta do ia hegaegaelaia bona ena hereva kwarana be “Dahaka Dainai Iehova Ia Gwau Satani be Gaigai Bamona?” Brandon ia moale lasi badina ia be gaigai idauidau ia ura henia bada to gaigai be Satani ia laulaulaia danu. Nega haida ruma bese haida be Baibel drama idia karaia​—⁠Baibel ese ia herevalaia taudia ta ta edia kahana idia haria, Baibel amo edia kahana idia duahia, o hekwakwanai ma ta hanaia dalana ena drama idia karaia. Unai bamona hadibaia karana be natudia ese idia moalelaia badina idia be kahana haida idia karaia sibona lasi, to unai ese idia ia durua Baibel ena hakaua herevadia idia laloatao totona.a

Hametaua Gaudia Dadaraia

14, 15. (a) Edena dala ai inai nega dokona ai, lalometau bona gari idia bada idia lao? (b) Ita davaria hekwakwanai haida be dahaka?

¹⁴ Inai nega dokona ai, lalometau bona gari idia bada idia lao. Taunimanima milioni momo be moni gaukara idia karaia lasi, bona hekwakwanai ma haida idia davaria. Herevana haida be moni gaukara idia karaia, to idia abia moni be hegeregere lasi edia ruma bese idia ubua o durua totona. (Hagai 1:​4-6 hahegeregerea.) Gavamani o lohia taudia ma haida idia hegeregere lasi terorist karadia bona kara gageva ma haida idia haorea totona. Momo be idia sibona edia kerere idia laloa momo dainai idia lalohisihisi bada.​​—⁠Sal. 38:⁠4.

¹⁵ Satani ena tanobada ai idia vara hekwakwanai bona lalometau idauidau be Keristani taudia momokanidia ese idia davaria danu. (1 Ioa. 5:​19) Hegeregere, ena be Keriso ena hahediba taudia idia gaukara goada Iehova idia badinaia noho totona, to dagedage idia davaria danu. Iesu ia gwau: “Bema idia ese lau dekenai idia dagedage henia, umui dekenai danu do idia dagedage henia.” (Ioa. 15:20) Herevana ‘taunimanima momo ese ita idia dagedage henia, to Dirava ese ita do ia rakatania lasi.’ (2 Kor. 4:⁠9) To, dahaka dainai unai ia vara?

16. Dahaka ese ita ia durua diba ita moale totona?

¹⁶ Iesu ia gwau: “Umui hekwarahi bona metau bada umui huaia taudia ibounai e, lau dekenai umui mai bona umui dekenai goada matamata do lau henia.” (Mat. 11:​28, NW ) Keriso ena boubou gauna ita abidadama henia karana amo ita hahedinaraia, ita be Iehova dekenai ita tabekau. Unai dala amo “Dirava sibona dekena amo” siahu badana ita abia. (2 Kor. 4:⁠7) Dirava ena lauma helaga, “durua tauna” unai, be iseda abidadama ia hagoadaia dainai hisihisi bona hahetoho lalonai ita haheauka sibona lasi, to ita moale danu.​​—⁠Ioa. 14:26; Iam. 1:​2-4; NW.

17, 18. (a) Dahaka dekenai ita naria namonamo be namo? (b) Iseda mauri durua gaudia ita laloa momo karana ese dahaka ia havaraia diba?

¹⁷ Hari, Keristani taudia momokanidia idia naria namonamo be mai anina bada, inai tanobada ena moale karadia idia ura henia dikadika matamaia garina. (Efeso 2:​2-5 duahia.) Bema ita naria namonamo lasi, “tauanina ena ura dikadia, matabodaga ena ura dikadia, bona hekokoroku,” ese ita idia tarapua bona ita moru diba. (1 Ioa. 2:​16, NW ) Eiava lalohadai kerere do ita abia, do ita laloa tauanina gaudia ese moale idia mailaia. (Roma 8:⁠6) Hegeregere, haida be sibona idia hamoalea totona, drag idia ania, kekero muramura idia inua, ponografi laulau dikadia idia itaia, spot gadara dikadia eiava gavamani ese ia taravatua karadia lalonai idia vareai. Satani ena koikoi karadia dainai, taunimanima idia laloa unai gaudia amo moale idia davaria.​​—⁠Efe. 6:​11.

¹⁸ Momokani, aniani, inuinu bona moale karadia namodia be kerere lasi bema dala maorona ai ita gaukaralaia. To, ita ura lasi iseda mauri lalonai unai gaudia ita laloa momo. Nega dikana lalonai ita noho dainai, gau momo ita tahua lasi bona iseda ura ita biagua namonamo. Ita ura henia gaudia haida ese ita idia hametaua o hamanokaia diba, to namona be ‘Lohiabada Iesu Keriso amo ita abia diba maoromaorona dainai do ita noho kava lasi, to huahua do ita havaraia.’​​—⁠2 Pet. 1:​8, NW.

19, 20. Edena dala ai goada matamata ita abia diba?

¹⁹ Eda lalohadai be Iehova ena taravatu hegeregerena ita hadibaia neganai, ita laloparara inai tanobada gaudia idauidau ese noho hanaihanai moalena idia havaraia diba lasi. Mose be unai ia diba, bona ita danu be unai ita diba. (Heb. 11:25) Ita dibaia gauna be inai: Iseda guba Tamana ena ura ita karaia neganai, moale korikori bona goada ita abia.​​—⁠Mat. 5:⁠6.

²⁰ Hanaihanai Iehova ena ura ita karaia amo goada ita abia. Unai amo “Dirava ese ia ura lasi karadia bona tanobada ena ura idauidau do ita dadaraia momokani . . . Inai negai danu, ita be iseda helaro ena guguru negana, bona Dirava badana, bona iseda Hamauria Tauna Keriso Iesu be mai hairai ida do idia hedinarai negana, ita naria noho.” (Tito 2:​12, 13, NW ) Unai dainai, eda lalona ita hadaia Iesu ena huaia auna henunai ita noho, anina be iena siahu bona hakaua dalana ita badinaia be gau badana. Unai bamona ita karaia neganai, moale korikori bona goada matamata do ita abia!

[Footnote]

Edena Bamona Do Oi Haere?

• Hari, Iehova ena taunimanima be edena dala ai goada matamata idia davaria?

• Edena dala ai haroro gaukara amo ita bona ita hereva henia taudia ita hagoadaia?

• Edena dala ai tama ese ena ruma bese ia durua ruma bese ena tomadiho negana idia moalelaia totona?

• Dahaka gaudia ese ita ia hametaua diba?

[Pictures on page 26]

Iesu ena huaia auna ita huaia neganai, dala idauidau ai goada ita abia