Harihari Bada Karana ese Moale Ia Havaraia
APOSETOLO Paulo be lalokau Keristani naria tauna dainai, ena abidadama tadikaka edia namo ia laloa bada. (2 Korinto 11:28) Unai dainai, lagani 50 C.E. ia lao 60 C.E. padanai dala ia karaia Iudea ogogami Keristani taudia totona moni do idia haboua, bona unai nega ia gaukaralaia harihari bada karana dekenai mai anina bada herevana ia hadibadia totona. Paulo ese ia hahedinaraia mai moale ida ia henia tauna be Iehova ese ia laloa bada, ia gwau: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.”—2 Korinto 9:7.
Ogogami Momokani Lalonai, to Heduru Idia Henia
Keristani ginigunadia momo be ladana badana idia abia taudia lasi. Paulo ese ia itaia idia “momo lasi be mai aonega.” Idia be “tanobada ena manoka gaudia,” “tanobada ese ia negea gaudia.” (1 Korinto 1:26-28) Hegeregere, Makedonia dekenai idia noho Keristani taudia “edia ogogami be ia bada” bona “hisihisi bada idia davaria.” To, Makedonia manau Keristani tadikaka idia noinoi, edia moni do idia henia “Dirava ena taudia Iudea dekenai durua totona,” bona Paulo ese ia hahedinaraia, idia henia gauna be “edia goada ia hanaia gauna”!—2 Korinto 8:1-4.
To, unai bamona harihari bada karana be idia henia monina ena bada hegeregerena idia laloa lasi. To, ura namona, idia ura edia gau idia hariharilaia, bona kudouna amo idia henia be mai anina bada. Paulo ese Korinto Keristani taudia dekenai ia hahedinaraia henia karana be lalona bona kudouna dekena amo ia vara karana. Ia gwau: “Lau diba emui kara, umui ura bada [“emui lalona dekenai umui hegaegae,” NW ] idia do umui durua, . . . bona lau ese Makedonia taudia edia vairanai umui lau heagilaia.” Idia be ‘edia kudouna lalonai idia ura’ harihari gaudia momo idia henia.—2 Korinto 9:2, 7, NW.
“Idia Ura Idia Henia”
Aposetolo Paulo be reana guna ia vara harihari bada karana ta ia laloa, unai be lagani 1,500 gunanai, tano kaukau dekenai ia vara gauna. Israela ena iduhu 12 be Aigupito ena igui hesiai gaukara amo idia ruhaia. Idia be hari Sinai Ororona ena badina dekenai, bona Iehova ese ia haganidia tomadiho kalagana do idia haginia bona ia lalonai do idia noho tomadiho kohudia do idia atoa. Unai ena anina be kohu momo do idia haboua, bona unai bese idia noia do idia henia totona.
Unai Israela taudia be edena bamona idia kara? “Harihari gaudia idia ura idia henia taudia ibounai ese edia harihari gaudia be Lohiabada dekenai idia mailaia, Palai Dubu do idia haginia totona.” (Esodo 35:21) Unai bese ese harihari gaudia momo idia henia, a? Momo herea momokani! Inai hereva be Mose dekenai idia gwauraia, idia gwau: “Taunimanima ese edia harihari gaudia momo herea idia mailaia noho. Idia mailaia gaudia be momo herea, hegeregere momokani, bona idia hanaia danu.”—Esodo 36:5.
Unai nega dekenai Israela taudia edia moni davaria dalana be edena bamona? Vanegai sibona idia be igui hesiai taudia, ‘gaukara momo dekena amo idia hahisidia,’ edia ‘noho dalana ia dika,’ bona unai be mauri mai ena “hisihisi.” (Esodo 1:11, 14; 3:7; 5:10-18) Toana be idia be tauanina dalanai idia taga lasi. Momokani, Israela taudia be mai edia mamoe bona boromakau seri ida igui hesiai gaukara tanona idia rakatania. (Esodo 12:32) To reana unai aniani be momo herea momokani lasi, badina be Aigupito idia rakatania bena daudau lasi murinai, paraoa bona vamu idia ania lasi dainai idia maumau.—Esodo 16:3.
Unai neganai, tomadiho kalagana haginia totona Israela taudia be edeseni amo dava bada gaudia idia abia? Guna idia biagua taudia amo, Aigupito taudia unai. Baibel ia gwau: “Israela taudia ese . . . Aigupito taudia edia herahera gaudia, golo bona siliva dekena amo idia karaia gaudia, bona dabua danu idia noia. . . . [Aigupito taudia ese] edia noinoi gaudia idia henidia.” Aigupito taudia edia harihari bada karana be hahenamo, Iehova ena amo, Farao ena amo lasi. Baibel ia gwau: “Lohiabada ese Aigupito taudia edia lalona ia haidaua, Israela taudia dekenai idia matauraia, bona edia noinoi gaudia be idia henidia.”—Esodo 12:35, 36.
Mani unai neganai Israela taudia edia hemami ita laloa. Uru momo taudia be igui hesiai mai ena lalohisihisi bona ogogami lalonai idia hisihisi. Hari idia be igui hesiai lasi taudia bona edia kohu danu be momo. Unai kohu haida idia hariharilaia totona, edena bamona do idia laloa? Sedira do idia laloa unai be edia gaukara davana bona idia be mai edia maoro do idia dogoatao. To, tomadiho goevana durua totona idia noidia neganai, unai hegeregerena idia karaia—bona unai be lalo-rua amo lasi o idia henia metairametaira lasi! Idia laloaboio lasi Iehova ese dala ia kehoa dainai unai kohu idia abia. Unai dainai, idia be siliva momo bona golo momo bona animal momo idia henia. Idia be “harihari gaudia idia ura idia henia.” Idia edia “laloa namo” dekena amo idia karaia. Bona idia mamia do idia karaia be namo. Momokani, unai be “harihari gaudia idia ura mailaia taudia ibounai, ese [Iehova dekenai] unai gau idia mailaia.”—Esodo 25:1-9; 35:4-9, 20-29; 36:3-7.
Henia Karana Totona Oi Hegaegae
Harihari gauna ena bada o maragi ese henia tauna ena harihari karana ena toana korikori ia hahedinaraia lasi. Nega ta taunimanima be dubu ena moni udaia mauana lalonai edia moni idia udaia neganai, Iesu Keriso be idia ia itaia noho. Iesu ese kohu momo taudia ia itaia, boubou moni momo be maua ena lalonai idia udaia, to ma vabu ogogamina ta ia itaia, iena moni maragimaragi rua ia udaia neganai ia laloa bada. Iesu ia gwau: “Inai vabu mai ogogami danu ia udaia moni ese idia ibounai edia moni ia hanaia. . . . Inai vabu be mai ogogami danu, to ia ese iena moni ibounai, iena mauri dekenai durua gauna ia udaia.”—Luka 21:1-4; Mark 12:41-44.
Paulo ena hereva Korinto taudia dekenai be Iesu ena lalohadai ida ia hegeregere. Ogogami abidadama tamona taudia durua totona harihari gaudia idia haboua neganai, Paulo ia gwau: “Bema tau ta ia ura dikadika harihari gauna do ia henia, Dirava ese inai kara do ia ura henia. Dirava ia diba unai tau ena kohu be hida, bona ia laloa karaia, unai tau ena harihari gauna be iena kohu hegeregerena o lasi. Bema tau ta madi be kohu lasi neganai, Dirava ese unai tau ena henia kara do ia laloa momo lasi.” (2 Korinto 8:12) Oibe, harihari karana be kara helulu totona lasi o hahegeregerea totona lasi. Taunimanima ta ta be edia goada hegeregerena idia henia, bona Iehova be unai harihari bada karana ia moalelaia.
Ena be taunimanima ta ese Iehova ena kohu ia habadaia diba lasi, badina gau ibounai be iena, to Iehova idia tomadiho henia taudia be unai henia karana ena hahenamo amo edia lalokau Iehova dekenai idia hahedinaraia diba. (1 Sivarai 29:14-17) Kontribusen henia karana, taunimanima ese idia itaia totona lasi o sibona emu ura idauna ta totona lasi, to dala maorodia amo bona tomadiho momokani durua totona, ese moale ia havaraia bona unai amo Dirava ese hahenamo ia henia. (Mataio 6:1-4) Iesu ia gwau: “Henia kara ena moale be bada, abia kara ena moale be maragi.” (Kara 20:35) Unai dala do ita moalelaia bema mai moale ida Iehova ita hesiai henia totona iseda goada ita henia bona iseda kohu amo durua gaudia ita henia tomadiho momokani ita durua totona bona heduru idia ura taudia durua totona.—1 Korinto 16:1, 2.
Hari Inai Negai Henia Karana Totona Idia Hegaegae
Hari inai negai, Iehova ena Witnes taudia be inai tanobada hegegemadai lalonai “basileia ena Sivarai Namona” harorolaia gaukarana ia bada noho idia itaia dainai idia moale bada. (Mataio 24:14) Lagani 10 gunanai taunimanima 3,000,000 bona ma haida be bapatiso amo edia gwauhamata Iehova Dirava dekenai idia hamomokania, bona kongregesen matamatadia 30,000 bamona idia hagania. Oibe, hari inai negai Iehova ena Witnes taudia edia kongregesen toi toi amo ta ta be idia hanaia laganidia ten lalonai idia haginia gaudia. Lalo-momokani Keristani tatau bona hahine be edia nega bona goada idia henia edia dekena taudia idia vadivadi henia bona Iehova ena ura idia hamaorodia dainai, unai namba idia habadaia. Misinari taudia be edia noho gabuna idia rakatania bona tano daudaudia dekenai Basileia harorolaia gaukarana idia durua karana amo unai namba idia habadaia danu. Unai namba ia bada dainai sekit matamatadia idia karaia, bona sekit naria taudia matamatadia idia abia hidi. To danu, haroro bona sibona ena stadi totona Baibel momo idia abia be namo. Idia printaia buka bona magasin momo idia abia danu be namo. Bona tano momo dekenai brens rumadia do idia habadaia eiava edia gabu dekenai ruma badadia idia haginia be namo. Inai mai anina gaudia ibounai be Iehova ena taunimanima edia kontribusen amo idia havaraia gaudia.
Kingdom Hall Ma Haida Idia Ura
Iehova ena Witnes taudia edia namba ia bada daekau dainai Kingdom Hall ma haida idia abia be namo. Lagani 2000 ena matamanai, tahua karana ese ia hahedinaraia ogogami tanodia dekenai, moni ia hegeregere lasi gabudia dekenai unai, Kingdom Hall 11,000 bona ma haida idia ura henia. Angola mani oi laloa. Ena be lagani momo lalodiai tano taudia sibodia idia tuari heheni, to lagani ta ta amo unai tano ena Basileia harorolaia taudia edia namba be 10 pesen amo ia bada daekau. To, unai Africa ena tano badana dekenai idia noho kongregesen 675 amo, momo be murimuri dekenai idia hebou. Unai tano dekenai be Kingdom Hall 22 sibona, bona 12 sibona be mai edia guhi.
Democratic Republic of Congo dekenai be unai bamona danu. Ena be siti badana Kinshasa dekenai kongregesen be kahirakahira 300, to unuseniai Kingdom Hall be 10 sibona. Unai tano ibounai lalonai, Kingdom Hall 1,500 bona ma haida idia ura momokani. Eastern Europe tanodia dekenai edia namba ia bada ia lao haraga dainai, Russia bona Ukraine edia ripoti idia hahedinaraia Kingdom Hall handred momo idia abia be namo. Latin America dekenai Witnes taudia edia namba ia tubu daekau haraga toana be Brazil amo ia hedinarai, unuseniai Witnes taudia edia namba be 0.5 milioni ia hanaia bona Kingdom Hall momo idia ura henia.
Inai bamona tano dekenai heduru idia henia totona, Iehova ena Witnes taudia ese Kingdom Hall haginia haraga program idia hegaegaelaia. Inai program be tadikaka bona taihu tanobada hegegemadai edia harihari bada kontribusen amo idia durua, unai dala amo kohu lasi kongregesen be tomadiho gabudia namodia do idia abia danu.
Idaunegai Israela edia nega hegeregerena, hari Dirava ena taunimanima be gaukara bada idia karaia haorea diba badina lalo-momokani Keristani taudia be “edia uma ena anina namodia, be Lohiabada dekenai idia henia, edia matauraia karana Lohiabada dekenai be unai.” (Aonega Herevadia 3:9, 10) Iehova ena Witnes taudia edia Hakaua Oreana idia ura edia lalona ena ura dainai harihari gaudia idia henia taudia idia tanikiu henia bada. Bona ai diba momokani unai Basileia gaukarana badana durua totona Iehova be ena lauma amo iena taunimanima edia kudouna do ia hagoadaia noho.
Inai tanobada hegegemadai gaukarana ia bada noho lalonai, namona be mai eda moale bona ura ida iseda goada, iseda nega, bona iseda kohu ita henia diba daladia ita tahua. Bona namona be henia karana amo ia vara moale korikorina ita mamia.
[Box on page 29]
“MAI AONEGA IDA UMUI GAUKARALAIA!”
“Lauegu mauri lagani be 10. Buka karaia pepa eiava ma gau haida umui hoia totona inai moni lau siaia.”—Cindy.
“Lau ura inai moni lau siaia unai amo iseda buka momo do idia karaia. Lauegu tamana lau durua amo inai moni lau haboua. Unai dainai mai aonega ida umui gaukaralaia!”—Pam, ena mauri lagani be 7.
“Lau be lai bada momokanina dainai lau lalohisihisi. Lauegu ura be umui be umui noho namo. Banika dekenai lauegu moni be inai [$2, U.S.] sibona.”—Allison, ena mauri lagani be hani.
“Lauegu ladana be Rudy, bona lauegu mauri lagani be 11. Lau egu tadina Ralf ena mauri lagani be 6. Bona lauegu taihuna Judith ena mauri laganidia be rua mai kahana. Ai be hua toi lalonai moni ai haboua iseda tadikaka [tuari tanona ta] dekenai ai durudia totona. Ai ese dola 20 ai haboua bona hari ai siaia inai.”
“Lau be [lai bada momokani ese ia botadia] tadikaka lau hebogahisi henia. Lauegu tamana ida lau gaukara amo dola 17 lau haboua. Inai moni lau siaia ena gaukara ta lau gwauraia lasi, unai dainai umui ese umui abia hidi.”—Maclean, ena mauri lagani be 8.
[Box on page 31]
Haida ese Henia Karana Idia Hahedinaraia Daladia
TANOBADA IBOUNAI GAUKARANA DURUA KONTRIBUSEN MONINA
Momo ese edia moni idia atoa hegaegae, maua ta ladana “Society Ena Tanobada Ibounai Gaukarana Durua Monina—Mataio 24:14” lalonai do idia udaia totona. Hua ta ta iboudiai, kongregesen ese unai moni be Society ena hedikwota Brooklyn New York dekenai, eiava ena brens opesi ta dekenai idia siaia.
Taunimanima ese kontribusen idia siaia diba International Bible Students Association of Papua New Guinea Inc., Box 636, Boroko, NCD 111 dekenai. Mai dava bada herahera gaudia eiava dava bada gaudia idaudia danu idia henia diba. Revareva ta ida idia siaia be namo, unai revareva ai idia gwau idia be harihari gaudia.
KONTRIBUSEN MONINA MAI TARAVATUNA
Taunimanima ese Watch Tower Society dekenai moni idia henia diba, trust fund ai do ia naria totona, to bema nega ta henia tauna ia dabu bona ia ura ena moni ia abia lou, do idia henia lou diba. Bema oi ura ma hereva haida oi diba, namona be ai gwauraia vadaeni adres dekenai revareva oi torea.
PALANILAIA HENIA GAUDIA
Kontribusen moni bona mai taravatu kontribusen sibona lasi, to dala ma haida idia noho Basileia ena gaukara tanobada hegegemadai ai durua totona. Idia haida be inai:
Insurens: Bema ta ese life insurens ia hoia o moni be retirement fund ta ai ia atoa, Society ena ladana ia torea diba, bena ia mase neganai eiava ia buruka neganai unai moni do idia abia.
Banika Akaun: Ta ena banika ena taravatu hegeregerena, dala ia karaia diba Watch Tower Society ese ena moni do idia gaukaralaia ia do mauri lalonai, eiava ia mase neganai do idia henia Society dekenai.
Share Monina: Ta ena share monina be Watch Tower Society ia harihari henia diba.
Tano Bona Ruma: Bema ta be mai ena ruma o tano, ia hoihoilaia diba gauna, Watch Tower Society dekenai ia henia diba harihari gauna bamona, eiava do ia noholaia diba ela bona ia mase bena Society ese do ia abia. Bema ta ia ura unai bamona ia karaia, namona be Society ia hadibaia guna.
Will Bona Trust Gaudia: Bema ta ena ura be ia mase neganai Watch Tower Society ese ena tano, ruma, kohu, o moni do idia abia, loea dekenai ia lao be namo, will pepana, mase murinai kohu haria gwaumaoro pepana ai, iena ura do ia torea. Eiava bema ena moni be trust fund ai ia noho, ia ese Society ena ladana be trust agreement pepana ai ia torea diba, unai moni do idia abia totona. Tano haida ai, bema ta ese ena trust monina be tomadiho oreana ta ia henia, takisi moni haida do ia henia lasi.